កុមារីត្រូវឆ្កែខាំម្ចាស់ឆ្កែចេញមុខទទួលខុសត្រូវនិងមានចៅហ្វាយខេត្តទៅមើលផងដែរ

កោះកុង៖កុមារីនៅភូមិកោះស្រឡៅ ឃុំកោះកាពិ ស្រុកកោះកុង ដែលត្រូវឆ្កែព្រួតខាំម្ចាស់ បានចេញមកទទួលខុស​ត្រូវ​ដោះ​ស្រាយថ្លៃ​សេវាព្យាបាល​ទាំងអស់ រីឯ​សត្វឆ្កែត្រូវចាប់បង្ខាំងទុកមិនឲ្យដើរសេរី។​ 

លោកវរៈសេនីយ៍ទោ ស្រ៊ីន សុខលីន អធិការនគរបាលស្រុកកោះកុង បានឱ្យដឹងនៅរសៀលថ្ងៃទី ០៩ ខែវិច្ឆិកា ឆ្នាំ​២០២៥​ថា ម្ចាស់ឆ្កែចំនួន៥ក្បាល ដែលព្រួតខាំកុមារីឈ្មោះ ឌី ដានីន អាយុ៧ឆ្នាំ កំពុងចូលខ្លួនទៅដោះ​ស្រាយទូទាត់ថ្លៃសេវាព្យាបាល​ទាំងស្រុង​នៅមន្ទីរពេទ្យ​បង្អែកខេត្តរួចរាល់ហើយ។

សមត្ថកិច្ចក៏ណែនាំឱ្យបង្ខាំងឆ្កែទាំងនោះទុក ដោយមិនព្រលែងពាសវាលពាសកាលទៀត ហើយធ្វើកិច្ចសន្យាមិនកើតមាន​ករណីឆ្កែខាំមនុស្ស​ណាម្នាក់ជាលើកទី២នោះទេ។កុមារីរងគ្រោះដែលត្រូវសត្វឆ្កែ៥ក្បាលព្រួតខាំ កាលពីថ្ងៃទី ៧ ខែវិច្ឆិកា វេលាម៉ោង ១០ ព្រឹក ពេលត្រឡប់ពីសាលារៀនបណ្តាលឲ្យរងរបួសធ្ងន់នៅចំណុចក្នុងដីចម្ការ​លោក លិ អ៊ូលៀង (ម្ចាស់ឆ្កែ)។

​ឪពុកកុមារីរងគ្រោះឈ្មោះ ជួង ឌីណា អាយុ ៣៥ឆ្នាំ និងម្តាយឈ្មោះ ឃាង សុខលាប អាយុ ៣៤ឆ្នាំ អ្នកទាំងពីរ មានមុខរបរកម្មករជៀជ័រកៅស៊ូ ស្នាក់នៅក្នុងដីចម្ការលោក លិ អ៊ូលៀង។

​យោងតាមកំណត់ហេតុ និងសួរបំភ្លឺឈ្មោះ ហាក់ ចន្ថា ត្រូវជាប្រពន្ធលោក លិ អ៊ូលៀង ដែលជាម្ចាស់ឆ្កែដែរបានឃើញហេតុការរាយការណ៍ប្រាប់ថា ជារៀងរាល់ថ្ងៃកុមារីរង​គ្រោះខាងលើទៅរៀន គឺឪពុកម្តាយជូនទៅ និងយក​ត្រ​លប់មកវិញ ប៉ុន្តែថ្ងៃកើតហេតុ កុមារីរងគ្រោះ​ដើរមកផ្ទះដោយខ្លួនឯង អំឡុងពេលនោះគាត់បានលឺសំឡេងឆ្កែព្រុស និងសំឡេងក្មេងយំគាត់​ក៏រត់​ចេញមកមើលក៏ឃើញឆ្កែចំនួន៥ក្បាលកំពុងខាំកុមារីរងគ្រោះ។ ​

គាត់ក៏បានស្ទុះចូលទៅចាប់ឆ្កែ និងទាញក្មេងចេញ បណ្តាលឱ្យគាត់ត្រូវរបួសដៃផងដែរ ដោយសារតែស្ថាន​ភាពកុមារីរងគ្រោះត្រូវរបួស ​និងមានឈាមហូរលើផ្ទៃមុខ និងដៃជើង គាត់ភ័យតក់​ស្លុតពេកបានស្រែកផង យំផងហៅអ្នកជួយ។​

​​ឪពុកម្តាយកុមារីរងគ្រោះ ដែលកំពុងជៀរជ័រកៅស៊ូក្នុងចម្ការ​បានរត់មកដល់អោបបី​កូនចុះ​មកក្នុងភូមិដើម្បីសង្គ្រោះ តែដោយឃើញរបួសធ្ងន់ធ្ងរ លោក ខាំ លិ ត្រូវជាប្តីរបស់លោកស្រី លិ ឡាំង មេឃុំកោះកាពិ បានជួយដឹកកុមារីរងគ្រោះតាមរយៈអូប័រ​ទៅសង្រ្គោះនៅមន្ទីពេទ្យ​បង្អែក​ខេត្ត​កោះកុង។យ៉ាងណាក្នុងពេលសម្រាក់ព្យាបាលគេឃើញមានលោកស្រីឈីវវ៉ាអភិបាលខេត្តកោះកុងទៅមើលសួរសុខទុក្ខផងដែរ។