រថយន្តធុនធំ បើកបុកមេគោ១ក្បាល កំពុងដើរតាមផ្លូវ រងរបួសបាក់ជើងក្រោយ ដួលដេកនៅលើផ្លូវឡានព្រុសបើករវល់មើលគោបុកម៉ូតូ
21-September-2026 / សន្តិសុខសង្គម
ភ្នំពេញ ៖ ឧបទ្ទវហេតុគ្រោះចរាចរណ៍បានកើតឡើងចំនួន២លើក នៅថ្ងៃទី១៩ ខែមិថុនាឆ្នាំ២០២៤លើ តាំងតែមួយ ប៉ុន្តែស្ថិតនៅចំណែកផ្លូវម្ខាងម្នាក់ តែពុំបណ្ដាលឲ្យមានអ្នកស្លាប់នោះទេបានតែមេគោបាក់ជើងមួយ។
ឧបទ្ទវហេតុទី១ បានកើតឡើងនៅតាមមហាវិថីឈ្នះឈ្នះ ភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។ នោះគឺមានរថយន្តធុនធំ មិនស្គាល់ម៉ាក១គ្រឿង បានបើកបុកមេគោ១ក្បាល ដែលកំពុងដើរតាមផ្លូវ ក្នុងទិសដៅស្របគ្នា បណ្ដាលឲ្យមេគោនោះរងរបួសបាក់ជើងក្រោយ ដួលដេកនៅលើផ្លូវ ។ឧបទ្ទវហេតុទី២ បានកើតឡើង នៅលើកំណាត់មហាវិថីឈ្នះឈ្នះដែរ ត្រង់ចំណុចដដែលនោះដែរ ប៉ុន្តែនៅចំណែកផ្លូវម្ខាងទៀត និងស្ថិតនៅភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ ។ ដោយមានរថយន្តម៉ាកតូយ៉ូតាព្រូស១គ្រឿង បានទៅដល់ចំណុចកើតហេតុ ហើយរវល់តែងាកមើលមេគោ កំពុងរងរបួសដួលដេកនៅផ្លូវ នោះក៏ជ្រុលទៅបុកម៉ូតូម៉ាកហុងដាប៊ីត ១គ្រឿង ជិះគ្នា២នាក់ បណ្ដាលឲ្យអ្នកជិះម៉ូតូ២នាក់នោះ រងរបួសស្រាល ។
នៅមុនពេលកើតហេតុ គេបានឃើញមេគោ ១ក្បាល ដែលម្ចាស់របស់វា លែងឲ្យដើរស៊ីស្មៅ បានដើរតាមមហាវិថីឈ្នះឈ្នះ ក្នុងទិសដៅពីត្បូងទៅជើង ប៉ុន្តែវាបានដើរអែបកៀន តាមគន្លងផ្លូវម៉ូតូប៉ុណ្ណោះ លុះពេលទៅដល់ត្រង់ចំណុចកើតហេតុនេះ ស្រាប់តែមានរថយន្តធុនធំ មិនស្គាល់ម៉ាក ១គ្រឿង បើកបរក្នុងល្បឿនលឿន ទៅដល់ល្មម ។បុរសនោះបានប្រាប់ទៀតថា ពេលនោះពុំដឹងថា អ្នកបើកបររថយន្តខាងលើរវល់តែងាកទៅណានោះទេ បានជាមិនឃើញគោដើរ ឬក៏គេចចេញបន្តិចទៅផុតបាត់ទៅហើយ ប៉ុន្តែរថយន្តនោះ មិនព្រមគេចសោះ ហើយក៏បុកមេគោ ១ក្បាលនេះពីក្រោយទាំងកំរោល បណ្ដាលឲ្យរងរបួសបាក់ជើងក្រោយ ដួលដេកនៅនឹងកន្លែងតែម្ដង ហើយរថយន្តនេះ ពុំមានការខូចខាតនោះទេ ។រថយន្តបង្កក៏ មិនបានឈប់ឡើយ ហើយក៏បានបន្ថែមល្បឿន ចាកចេញទៅបាត់ ។
បុរសនេះ បានប្រាប់បន្ថែមទៀតថា មេគោបានដេក នៅលើផ្លូវគួរឲ្យអាណិត ហើយមហាជនបានថ្កោលទោសដល់ម្ចាស់គោនេះថា គ្មានទំនួលខុសត្រូវក្នុងការមើលថែគោឲ្យបានល្អ លែងចោលបណ្ដោយឲ្យដើរបែបអនាធិបតេយ្យ បង្កឲ្យមានគ្រោះថ្នាក់បែបនេះ ។ តែក៏បានបន្ទោសឡានថាមិនមើលមុខក្រោយផងដែរ។
បុរសដដែល បានរៀបរាប់ប្រាប់ទៀតថា លុះរយៈពេល១៥នាទីក្រោយមក ខណៈមេគោ កំពុងរបួសដេកលើផ្លូវ ហើយនគរបាល មិនទាន់ទៅដល់ យកគោចេញពីផ្លូវផង ស្រាប់តែមាន១គ្រឿងទៀត រថយន្តម៉ាកតូយ៉ូតាព្រូស ពណ៍ស ពាក់ស្លាកលេខភ្នំពេញ 1BV-4861 ។ បើកបរធ្វើដំណើរតាមចំណែកផ្លូវម្ខាងទៀត ក្នុងទិសដៅពីជើងទៅត្បូងទៅដល់ ហើយអ្នកបើកបរអត់មើល ទៅមុខទេ គឺរវល់តែងាកមើលមេគោ ក៏ជ្រុលទៅបុកម៉ូតូ ១គ្រឿង ម៉ាកហុងដាប៊ីត ពណ៍ស លាយខៀវ ពាក់ស្លាកលេខភ្នំពេញ 1KG-8740 ជិះគ្នា២នាក់ បើកបរស្របគ្នា ហើយបត់ឆ្លងផ្លូវ បណ្ដាលឲ្យអ្នកជិះម៉ូតូខាងក្រោយខ្ទាតពីម៉ូតូទើរលើកញ្ចក់រថយន្ត ប៉ុន្តែអ្នកជិះម៉ូតូទាំង២នាក់រងរបួស្រាលប៉ុណ្ណោះ ។
សាក្សីរូបនោះ បាននិយាយទៀតថា ខណៈនោះម៉ូតូបានរងការខូចខាតយ៉ាងដំណំ ចំណែករថយន្ត ក៏បានរងការខូចខាតកាងមុខដែរ មិនតែប៉ុណ្ណោះ រថយន្តបានដាច់ស្លាកលេខខាងមុខ ជាប់ជាមួយម៉ូតូ ថែមទៀតផង ។ ក្រោយពេលកើតហេតុ អ្នកជិះម៉ូតូបានទាមទារសំណងពីខាងភាគីម្ចាស់រថយន្ត ហើយក៏បានធ្វើការសម្របសម្រួលគ្នាតែមិនត្រូវរ៉ូវ ។ បន្ទាប់មក ទើបនគរបាល នាំយកទៅរក្សាទុកនៅប៉ុស្តិ៍រង់ចាំការដោះស្រាយនៅពេលក្រោយ ចំណែកមេគោ ដែលត្រូវរថយន្តបុក ត្រូវបាននគរបាលស្វែងរកម្ចាស់ដែរ ប៉ុន្តែរកមិនឃើញសោះ ។ ទើបប្រគល់ឲ្យប្រជាការពារសង្កាត់ ជួយដឹកយកទៅរក្សាទុកនៅប៉ុស្តិ៍សំរោងក្រោម ដើម្បីបន្តស្រាវជ្រាវរកម្ចាស់ឲ្យទៅទទួលយកវិញ ៕
