បន្ទាប់ពី ចេញវិធានការតឹងរ៉ឹងលើអ្នកទិញផ្ទះជាជនបរទេស ប្រធានាធិបតីកូរ៉េខាងត្បូង បញ្ជាឱ្យមានការបង្រ្កាបសកម្មភាពប្រឆាំងនឹងជនបរទេស នៅក្នុងស្រុក

ប្រទេសកូរ៉េ៖ លោក Lee Jae Myung ប្រធានាធិបតីកូរ៉េខាងត្បូង នៅថ្ងៃព្រហស្បតិ៍ ទី២ ខែតុលា បានដាក់បទបញ្ជាឱ្យមានការបង្រ្កាបលើការប្រមូលផ្តុំណាមួយ ដើម្បីប្រឆាំងប្រទេសចិន និងប្រឆាំងបរទេស ដែលលោកចាត់ទុកថាធ្វើឱ្យប៉ះពាល់ដល់មុខមាត់ប្រទេស និងសេដ្ឋកិច្ច។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។ 

លោក Lee បានប្រាប់ក្រុមជំនួយការជាន់ខ្ពស់នៅក្នុងកិច្ចប្រជុំថា «តើនរណាចង់មកលេង និងទិញរបស់របរក្នុងប្រទេសមួយ ដែលត្រូវប្រជាជនពួកគេ ជេរប្រមាថដោយគ្មានហេតុផល?។ យើងត្រូវតែហាមប្រាមនូវទង្វើដែលបំផ្លាញខ្លួនឯង និងគ្មានប្រយោជន៍ ប៉ះពាល់ផលប្រយោជន៍ និងមុខមាត់ជាតិ»។ លោក​ Lee ​បញ្ជា​ឱ្យ​មាន​ការ​បង្ក្រាប​សកម្មភាព​ញុះញង់ ​ដែល​គំរាមកំហែង​ដល់​សុវត្ថិភាព​ភ្ញៀវ​ទេសចរ​បរទេស និង​វិធានការ​ពិសេស​ដើម្បី​បញ្ឈប់ «​ការ​ស្អប់ខ្ពើម​ពូជសាសន៍​»។

គួរបញ្ជាក់ថា ក្រុមស្តាំនិយមបានប្រមូលផ្តុំគ្នា ដើម្បីតវ៉ាប្រឆាំងនឹងប្រទេសចិន ដោយមានអ្នកខ្លះផ្តោតលើបក្សកុម្មុយនិសតែម្តង ចាប់តាំងពីរដ្ឋាភិបាលកូរ៉េខាងត្បូង អនុញ្ញាតឱ្យអ្នកទេសចរចិនដែលមិនតម្រូវឱ្យមានទិដ្ឋាការ ចូលមកក្នុងប្រទេស កាលពីដើមសប្តាហ៍នេះ។

សូមបញ្ជាក់ថាថ្មីៗនេះ កូរ៉េខាងត្បូង បានចេញនូវវិធានការច្បាប់ថ្មីហើយបានចូលជាធរមានកាលពីខែមុន ដើម្បីដាក់កំណត់កាន់តែតឹងរ៉ឹងចំពោះជនបរទេសលើការទិញអចលនទ្រព្យ ដោយផ្ដោតជាពិសេសលើជនបរទេសមកពីប្រទេសចិន និងហុងកុង ជុំវិញគោលបំណងដើម្បីកាត់បន្ថយសម្ពាធនៃកំណើនតម្លៃលំនៅដ្ឋានយ៉ាងឆាប់រហ័ស នេះបើយោងតាម South China Morning Post ដកស្រង់ដោយ VN Express ។

កំណើនតម្លៃអចលនទ្រព្យទាំងអស់នោះ កើតមានឡើងជាពិសេសនៅក្នុងរដ្ឋធានីសេអ៊ូល និងទីក្រុងក្បែរៗនោះ ព្រោះតែការទិញអចលនទ្រព្យជាហូរហែរពីជនបរទេស បានជំរុញឱ្យតម្លៃលំនៅដ្ឋានបន្តកើនឡើងឥតឈប់ឈរ មិនថាលំនៅដ្ឋានប្រភេទមធ្យម និងប្រភេទខ្ពស់ ។

យោងតាមសារព័ត៌មាន Chosun Daily ឱ្យដឹងថា គិតត្រឹមខែឧសភា ឆ្នាំ ២០២៥ អចលនទ្រព្យជិត ៩៧,០០០កន្លែង ត្រូវបានទិញដោយប្រជាជនមកពីប្រទេសចិន និងហុងកុង ដោយកើនឡើង ៧៨.៥% ធៀបនឹងឆ្នាំ ២០២០ ។

អ្នកទិញដែលជាជនបរទេស តែងតែប្រើប្រាស់ហិរញ្ញប្បទានពីក្រៅប្រទេស ដើម្បីទិញអចលនទ្រព្យក្នុងប្រទេសកូរ៉េខាងត្បូង ដោយពួកគេទទួលបានអត្ថប្រយោជន៍ច្រើនជាងអ្នកក្នុងស្រុក ដែលប្រឈមនូវដែនកំណត់តឹងរ៉ឹងសម្រាប់អចលនទ្រព្យ។ ប្រហែល ២០% នៃលំនៅដ្ឋានប្រភេទមធ្យម និងខ្ពស់ ក្នុងទីក្រុងសេអ៊ូល និងតំបន់ជិតនោះស្ថិតនៅក្រោមការគ្រប់គ្រងរបស់ជនបរទេស ភាគច្រើនជាជនជាតិចិន ។

រដ្ឋាភិបាលកូរ៉េ សង្ឃឹមថា វិធានការច្បាប់ថ្មីនេះ នឹងធ្វើឱ្យតម្លៃលំនៅដ្ឋានមានស្ថិរភាព និងកាន់តែមានភាពងាយស្រួលសម្រាប់ពលរដ្ឋក្នុងស្រុក។ គោលនយោបាយនេះ គឺជាផ្នែកមួយនៃកិច្ចខិតខំប្រឹងប្រែងរបស់លោកប្រធានាធិបតី លី ចេម្ញុង (Lee Jae-myung) ដើម្បីកាត់បន្ថយការចំណាយលើការរស់នៅ ៕