សម្តេចបវរធិបតី ហ៊ុន ម៉ាណែតស្វាគមន៍លទ្ធផលវិជ្ជមាន នៃកិច្ចប្រជុំពិសេសលើកទី១ នៃគណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង
21-September-2026 / ផ្សេងៗ
កោះកុង៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសស្វាគមន៍ចំពោះលទ្ធផលវិជ្ជមាននៃកិច្ចប្រជុំពិសេសលើកទី១ នៃគណៈកម្មាធិការព្រំដែនទូទៅ កម្ពុជា-ថៃ (GBC) ដែលប្រព្រឹត្តទៅនៅខេត្តកោះកុង ដោយប្រទេសកម្ពុជាធ្វើជាម្ចាស់ផ្ទះ នៅថ្ងៃពុធ ទី១០ ខែកញ្ញា ឆ្នាំ២០២៥។
កិច្ចប្រជុំGBCពិសេសនេះ ភាគីកម្ពុជាដឹកនាំដោយ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ រីឯភាគីថៃ ដឹកនាំដោយលោក ណាត់តាផុន ណាក់ផានីត រដ្ឋមន្រ្តីស្តីទីការពារជាតិថៃ។ ការបើកកិច្ចប្រជុំនេះបានឡើងបន្ទាប់ពីបញ្ចក់កិច្ចប្រជុំលេខាធិការដ្ឋាននៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានប្រព្រឹត្តទៅនៅថ្ងៃទី៧-៩ ខែកញ្ញា ឆ្នាំ២០២៥ នៅខេត្តកោះកុង ក្នុងរយៈពេល ៣ថ្ងៃ ដោយក្រុមការងារលេខាធិការដ្ឋាននៃប្រទេសទាំងពីរ បានចូលរួមពិភាក្សាក្នុងបរិយាកាសប្រកបដោយមិត្តភាព និងស្ថាបនា ក្នុងគោលបំណងជំរុញកិច្ចសន្ទនាប្រកបដោយផ្លែផ្កា លើកកម្ពស់ការកសាងទំនុកចិត្ត និងស្វែងរកកិច្ចសហប្រតិបត្តិការជាក់ស្តែង ដើម្បីត្រៀមសម្រាប់កិច្ចប្រជុំពិសេសរបស់គណៈកម្មាធិការព្រំដែនទូទៅកម្ពុជា-ថៃ (GBC)។
ឧបនាយករដ្ឋមន្ត្រីការពារលោក ទៀ សីហា បានឱ្យដឹងបន្ទាប់ពីបញ្ចប់កិច្ចប្រជុំពិសេសលើកទី១របស់គណៈកម្មាធិការព្រំដែនទូទៅ (GBC) កម្ពុជា-ថៃ នៅវេលាថ្ងៃត្រង់នៃថ្ងៃពុធនេះថា ការកែសម្រួលយុទ្ធោបករណ៍ និងសម្ភារៈយោធានឹងចាប់ផ្ដើមពិភាក្សាជាមួយថៃនៅពេល៣សប្ដាហ៍ទៀតដើម្បីរៀបចំផែនការសកម្មភាពក្នុងការកែសម្រួលនិងដោយមានការត្រួតពិនិត្យពីក្រុមអ្នកអង្កេតការណ៍អាស៊ាន (AOT)។ លោកក៏បានឱ្យដឹងបន្ថែមថាក្នុងកិច្ចប្រជុំនោះភាគីកម្ពុជា-ថៃក៏បានពិភាក្សាដើម្បីឱ្យមានការដោះលែងទាហានខ្មែរទាំង១៨នាក់ឱ្យឆាប់បានវិលត្រលប់មកកម្ពុជាវិញផងដែរដើម្បីជាផ្លូវបង្កើតភាពជឿទុកចិត្តគ្នាឡើងវិញ។
លោករដ្ឋមន្ត្រីការពារជាតិបានបញ្ជាក់ថា៖ «ភាគីទាំងពីរបានប្ដេជ្ញាចិត្តយ៉ាងមុតមាំដើម្បីដោះស្រាយបញ្ហាដោយសន្ដិវិធី និងជៀសវាងការប៉ះទង្គិចគ្នាភាគីទាំងពីរបានបញ្ជាក់ថាការពង្រឹងទំនាក់ទំនងគ្រប់កម្រិតក្នុងការកសាងជំនឿទុកចិត្តនិងលើកកម្ពស់ភាពជាអ្នកជិតខាងល្អ»។
ក្នុងការថ្លែងនោះលោករដ្ឋមន្ត្រីក៏បានឱ្យដឹងពីការទទួលយកសំណើររបស់ប្រទេសជប៉ុនជំរុញឱ្យបើកទ្វារព្រំដែនមួយចំនួនឡើងវិញដើម្បីធានាដល់ការដឹកទំនិញចាំបាច់រវាងប្រទេសទាំងពីរមកពិចារណាក្នុងកិច្ចប្រជុំនោះផងដែរ។
បើយោងតាមកិច្ចព្រមព្រៀងដែលប្រកាសក្រោយកិច្ចប្រជុំពិសេស GBC បានបញ្ចប់ បានឱ្យដឹងថា កម្ពុជា-ថៃ ព្រមព្រៀងគ្នាថែរក្សាការទំនាក់ទំនងទៀងទាត់រវាងទីតាំងកងទ័ពទាំងអស់ តំបន់យោធា និងអង្គភាពនៅតាមបណ្ដោយព្រំដែននៃភាគីទាំងសងខាង និងប្រឹងប្រែងដោះស្រាយរាល់បញ្ហាដោយសន្តិវិធី និងបញ្ចៀសជម្លោះ។ក្នុងរួមមានការកែសម្រួលអាវុធធន់ធ្ងន់ការដោះម៉ីននិងលុបបំបាត់ល្បែងឆ្លងដែន។
ភាគីទាំងពីរ នឹងកោះប្រជុំកិច្ចប្រជុំគណៈកម្មាធិការព្រំដែនតំបន់ (RBC) ក្នុងរយៈពេល២សប្ដាហ៍ បន្ទាប់ពីកិច្ចប្រជុំពិសេស GBC នៅថ្ងៃទី៧ ខែសីហា ឆ្នាំ២០២៥។ ទីតាំងរៀបចំ កិច្ចប្រជុំនឹងត្រូវបានកំណត់ស្របទៅតាមការទទួលធ្វើជាម្ចាស់ផ្ទាស់ប្ដូរវេនជាទៀងទាត់។ ភាគីទាំងពីរ រក្សាបណ្ដាញទំនាក់ទំនងជាទៀងទាត់ និងដោយផ្ទាល់រវាងកម្រិតរដ្ឋមន្ត្រី និងមន្ត្រីយោធាជាន់ខ្ពស់។
ភាគីទាំងសងខាងក៏បានឯកភាពទប់ស្កាត់ព័ត៌មានក្លែងក្លាយ ឬមិនពិត ក្នុងគោលបំណងបន្ធូរបន្ថយភាពតានតឹង កាត់បន្ថយគំនិតអវិជ្ជមានរបស់សាធារណៈជន និងពង្រឹងបរិយាកាសអំណោយផលដើម្បីឆ្ពោះទៅរកកិច្ចពិភាក្សប្រកបដោយសន្តិភាពផងដែរ។
គួរជម្រាបថា ចាប់តាំងពីមានបញ្ហាតានតឹងផ្នែកព្រំដែនរវាងកម្ពុជា-ថៃដែលឈានទៅដល់ការប៉ះទង្គិចដោយអាវុធអស់រយៈពេល ៥ថ្ងៃមក មានករណីផ្ទុះមីនចំនួន ៦លើកលើទាហានថៃដោយសារការដើរល្បាតរំលោភចូលដែនអធិបតេយ្យភាពកម្ពុជារហូតបណ្តាលឱ្យគ្រោះថ្នាក់ដាច់កជើងជាបន្តបន្ទាប់។ ហេតុការណ៍ទាហានថៃដើរជាន់មីនខ្មែរដែលសល់ពីសម័យសង្គ្រាមទាំង ៦លើកបានបណ្តាលឲ្យទាហានថៃចំនួន១០នាក់រងរបួស ក្នុងនោះមាន ៦នាក់ របួសដាច់ជើង។កម្ពុជា-ថៃ បានព្រមព្រៀងលើបទឈប់បាញ់ កាលពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី។
