ប្រធានរដ្ឋសភាកម្ពុជា ស្នើលោក ដូណាល់ ត្រាំ បន្តចូលរួមដោះស្រាយជម្លោះព្រំដែនកម្ពុជា និងថៃ
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា តាមរយៈគណៈប្រតិភូ តំណាងរាស្ត្រអាមេរិកបានស្នើលោកប្រធានាធិបតី ដូណាល់ ត្រាំ បន្តចូលរួមលើកកម្ពស់ការអនុវត្តបទឈប់បាញ់ ឱ្យមានប្រសិទ្ធភាពខ្ពស់ និងចូលរួមស្វែងរកដំណោះស្រាយដោយសន្តិវិធី នៅក្នុងជម្លោះព្រំដែនកម្ពុជា-ថៃ ស្របតាមបំណងប្រាថ្នារបស់ថ្នាក់ដឹកនាំនិងពលរដ្ឋកម្ពុជាដែលស្រឡាញ់សន្តិភាព ចង់ការពារសុខសន្តិភាព និងកិច្ចសហប្រតិបត្តិការល្អ ជាមួយបណ្តាប្រទេសជាតិទាំងអស់ ដើម្បីជំរុញការអភិវឌ្ឍប្រទេសជាតិ សម្រេចបានគោលដៅអភិវឌ្ឍន៍ នៅឆ្នាំ២០៣០ និងឆ្នាំ ២០២៥០។
នៅក្នុងឱកាសទទួលជួបពិភាក្សាការងារជាមួយសមាជិកសភាសហរដ្ឋអាមេរិក មកពីគណបក្សសារធារណៈរដ្ឋដឹកនាំដោយលោកស្រី បេត វ៉ាន់ដាញ (Beth Van Duyne) នាថ្ងៃទី២៨ ខែសីហានេះ សម្តេចប្រធានរដ្ឋសភា ក៏បានថ្លែងអំណរ គុណជាថ្មីទៀតជូនលោកប្រធានាធិបតី ដូណាល់ ត្រាំ និងលោក អាន់វ៉ា អ៊ីប្រាហ៊ីម នាយករដ្ឋមន្ត្រីប្រទេសម៉ាឡេស៊ី និងជាប្រធានប្តូរវេនអាស៊ាន ក៏ដូចជាសាធារណរដ្ឋប្រជាមានិតចិន និងបណ្តាប្រទេសជាមិត្តទាំងអស់ ដែលបានផ្តួចផ្តើមនិងសម្របសម្រួលឱ្យមានជំនួបចរចារវាងថ្នាក់ដឹកនាំប្រទេសកម្ពុជានិងថៃ សម្រេចបាននូវបទឈប់បាញ់កាលពីថ្ងៃទី២៨ ខែ កក្កដាកន្លងមកនេះ បានជួយសង្គ្រោះអាយុជីវិតពលរដ្ឋ រាប់ម៉ឺននាក់ នៅក្នុងប្រទេសទាំងពីរ។
សួមជម្រាបថា៖គណៈប្រតិភូសភាសហរដ្ឋ អាមេរិក ដែលចូលជួបពិភាក្សាការងារជាមួយ សម្តេចប្រធានរដ្ឋសភា នាឱកាសនេះ បានអញ្ជើញមកពីគណបក្សទាំងពីររបស់សហរដ្ឋអាមេរិក គឺគណបក្សប្រជាធិបតេយ្យ និងគណបក្សសាធារណរដ្ឋ។លោកស្រីបេត វ៉ាន់ ដាញ បានបញ្ជាក់ពីគោលបំណងដំណើរទស្សនកិច្ច មកកាន់កម្ពុជានាពេលនេះ ដើម្បីលើកកម្ពស់ចំណងមិត្តភាព កិច្ចសហប្រតិបត្តិការប្រទេសទាំងពីរឱ្យកាន់តែរឹងមាំបន្ថែម លើគ្រប់វិស័យ មានទាំងសេដ្ឋកិច្ច ពាណិជ្ជកម្ម អប់រំ បច្ចេកវិទ្យា សុខសន្តិភាពជាដើម។លោកស្រីបានគូសបញ្ជាក់ថា មុនមកបំពេញទស្សនកិច្ចនៅកម្ពុជា លោកស្រីក៏ បានបំពេញទស្សនកិច្ចនៅប្រទេសថៃផងដែរ។ តាមរយៈដំណើរទស្សនកិច្ចនេះ ឃើញថាប្រជាពលរដ្ឋប្រទេសទាំងពីរ ត្រូវការសន្តិភាព និងស្រឡាញ់សន្តិភាពដូចគ្នា។
សូមបញ្ជាក់ថាទន្ទឹមនិងដំណោះរទ្សកិច្ចតំណាងរាស្ត្រអាមេរិកនេះលោកប្រធានាធិបតីអាមរិកដូណាល់បានផ្ញើលិខិតថ្លែងអំណរគុណ សម្តេចធិបតី ហ៊ុន ម៉ាណែត ដែលបានស្នើសុំពានរង្វាន់ណូបែលសន្តិភាពជូនលោកប្រធានាធិបតីអាមេរិក។នៅក្នុងលិខិតផ្ញើជូនសម្តេចធិបតី លោក ដូណាល់ ត្រាំ បានវាយតម្លៃថា សម្តេចធិបតី ហ៊ុន ម៉ាណែត ជាថ្នាក់ដឹកនាំដ៏ឆ្នើមមួយរូប ដែលផ្តល់តម្លៃលើជីវិតមនុស្ស និងស្រឡាញ់សន្តិភាព និងបានគូសបញ្ជាក់ពីមោទនភាពរបស់ឯកឧត្តម ដែលបានចូលរួមជាផ្នែកមួយនៃកិច្ចព្រម ព្រៀងបទឈប់បាញ់ សំដៅបញ្ចប់នូវសោកនាដកម្មនៃជម្លោះប្រដាប់អាវុធ និងបានសង្គ្រោះជីវិតមនុស្សរាប់ពាន់នាក់។
សម្តេចប្រធានរដ្ឋសភា និងសមាជិកសភាសហរដ្ឋអាមេរិក បានវាយតម្លៃខ្ពស់ចំពោះចំណងមិត្តភាពនិងកិច្ចសហប្រតិបត្តិការដ៏ល្អរវាងកម្ពុជានិងសហរដ្ឋអាមេរិក ទាំងស្ថាប័ននីតិប្បញ្ញត្តិនិងនីតិប្រតិបត្តិ។សម្តេចប្រធានរដ្ឋសភាកម្ពុជា ក៏បានថ្លែងអំណរគុណជូនសហរដ្ឋអាមេរិកដែលបានបញ្ចុះពន្ធជូនកម្ពុជាពីចំនួន៤៩%មកនៅត្រឹម១៩% ។ ការបញ្ចុះពន្ធនេះមានសារៈសំខាន់នៅ ក្នុងការចូលរួមលើកកម្ពស់សេដ្ឋកិច្ចជាតិនិងជីវភាពរបស់ពលរដ្ឋកម្ពុជា។បន្ថែមពីនេះ សម្តេច បានស្នើសុំសមាជិកសភាសហរដ្ឋសអាមេរិកបន្តកៀរគរអ្នកវិនិយោគ អ្នកទេសចរ មកកម្ពុជាបន្ថែមទៀត៕
