កម្ពុជាអរគុណអាមេរិកនិងសន្យាបន្តកិច្ចសហប្រតិបត្តិការ
02-November-2023 / ផ្សេងៗ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការទ្វេភាគី កម្ពុជា-សហរដ្ឋអាម៉េរិក នាពេលកន្លងមក។ ភាគីទាំងពីរ ក៏បានប្តេជ្ញាចិត្តផងដែរ ក្នុងការបន្តនូវកិច្ចសហប្រតិបត្តិការ ជាមួយគ្នាឲ្យកាន់តែជិតស្និទ្ធបន្ថែមទៀតសម្រាប់ជាឧត្តមប្រយោជន៍ នៃប្រទេសទាំងពីរ។
សេចក្ដីប្រកាសព័ត៌មានស្តីពីលទ្ធផលជំនួបរវាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក ផាទីក មើហ្វី ឯកអគ្គរដ្ឋទូតសហរដ្ឋអាម៉េរិក ប្រចាំព្រះរាជាណាចក្រកម្ពុជា នៅថ្ងៃទី២៧ ខែកញ្ញា ឆ្នាំ២០២៣បានឲ្យដឹងថា៖ក្នុងជំនួបនេះ សម្ដេចធិបតី បានទទួលស្វាគមន៍ចំពោះ ឯកឧត្តមឯកអគ្គរដ្ឋទូត និងសហការី និងបាន ជម្រាបពីលទ្ធផលល្អដែល សម្ដេចធិបតី និងគណៈប្រតិភូកម្ពុជា ទទួលបានពីជំនួបទ្វេភាគីនានា នៅទីក្រុង ញូវយ៉ក ជាពិសេសនាជំនួបទ្វេភាគីជាមួយ លោកស្រី វ៉ិចតូវីយ៉ានូលែន អនុរដ្ឋមន្ត្រីការ បរទេសស្តីទីសហរដ្ឋអាម៉េរិក។
សម្ដេចធិបតី បានថ្លែងអំណរគុណចំពោះរដ្ឋាភិបាលសហរដ្ឋអាម៉េរិក ដែលបានផ្តល់ជូនឡើងវិញនូវជំនួយក្នុងទំហំទឹកប្រាក់ប្រមាណ ១៨លានដុល្លារអាម៉េរិក តាមរយៈទីភ្នាក់ងារ សហរដ្ឋអាម៉េរិកសម្រាប់ការអភិវឌ្ឍអន្តរជាតិ(USAID)។ ប្រាក់ជំនួយដែលត្រូវបានផ្ដល់ជូនឡើងវិញនេះ នឹងត្រូវ យកទៅប្រើប្រាស់នៅក្នុងវិស័យសំខាន់ៗ ដូចជា ការកែលម្អការផ្តល់សេវាសុខាភិបាលទាំងក្នុងផ្នែករដ្ឋ និង ផ្នែកឯកជន, ការការពារបរិស្ថានប្រកបដោយចីរភាព, ការការពារ និងការប្រយុទ្ធនឹងជំងឺរបេង និង ការបណ្ដុះបណ្ដាលផ្នែកសហគ្រិនភាពដល់យុវជនកម្ពុជាជាដើម។ សូមបញ្ជាក់ថាកាលពីថ្ងៃទី២២ ខែកញ្ញា ឆ្នាំ២០២៣ ក្នុងដំណើរអញ្ជើញទៅក្រុងញូវយ៉ក សហរដ្ឋអាមេរិក ដើម្បីថ្លែងសុន្ទរកថានៅអង្គការសហប្រជាជាតិ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានជួប អនុរដ្ឋមន្ត្រីស្តីទីក្រសួងការបរទេសអាមេរិក លោកស្រី វិកតូរីយ៉ា នូឡែន (Victoria Nuland) ។
ក្នុងឱកាសនោះលោកស្រី វិកតូរីយ៉ា នូឡែន បានប្រកាសផ្តល់ជំនួយផ្នែកអភិវឌ្ឍន៍១៨លានដុល្លារក្នុងមួយឆ្នាំមកឱ្យកម្ពុជាវិញ បន្ទាប់ពីប្រកាសផ្តាច់ក្រោយពេលបោះឆ្នោតខែកក្កដា ឆ្នាំ២០២៣។
ក្នុងសន្និសីទសារព័ត៌មានពេលសម្តេចធិបតី ហ៊ុន ម៉ាណែត អញ្ជើញត្រឡប់ពីអាមេរិកវិញ នាថ្ងៃទី២៥ ខែកញ្ញា ឆ្នាំ២០២៣ លោក ហ្សង់-ហ្វ្រង់ស័រតាន់រដ្ឋមន្ត្រីប្រតិភូអមនាយករដ្ឋមន្ត្រីក៏ បានគូសរំលេចឱ្យដឹងយ៉ាងដូច្នេះ «ពេលដែលជួបជាមួយលោកជំទាវ វីកតូរីយ៉ា នូឡែន ទាំងសម្តេចធិបតី ហ៊ុន ម៉ាណែត ទាំងលោកជំទាវ វីកតូរីយ៉ា នូឡែន សុទ្ធតែសម្តែងនូវឆន្ទៈក្នុងការធ្វើឱ្យទំនាក់ទំនងរវាងប្រទេសទាំងពីររឹងរឹតពីប្រសើរ។ បានន័យថា ប្រសើរហើយ ឥឡូវធ្វើឱ្យរឹងរឹតពីប្រសើរ»។
ត្រឡប់មកវិញសម្រាប់ជំនួបនៅភ្នំពេញពាក់ព័ន្ធនឹងការធ្វើមាតុភូមិនិវត្តន៍ពលរដ្ឋខ្មែរ ភាគីទាំងពីរ(អាមេរិកកម្ពុជា)បានឯកភាពគ្នាក្នុងការបន្តសម្របសម្រួល និង សហប្រតិបត្តិការយ៉ាងជិតស្និទ្ធនៅគ្រប់ជំហាននៃនីតិវិធី ពោលគឺ ពន្លឿននីតិវិធីក្នុងការកំណត់អត្តសញ្ញាណ និងការរៀបចំបញ្ជូនពលរដ្ឋខ្មែរមកកម្ពុជា, ធ្វើសាមញ្ញកម្មនីតិវិធីនៅពេលបញ្ចូន និង រៀបចំផែនការសកម្មភាពនៃការគាំទ្រ និងការធ្វើសមាហរណកម្មសម្រាប់ឱ្យពលរដ្ឋខ្មែរ អាចបន្សំ និងអាចធ្វើសមាហរណកម្មទៅ ក្នុងសង្គមកម្ពុជាវិញ សំដៅកសាងជីវិតថ្មីមួយឱ្យបានល្អសមស្របនៅលើទឹកដីកម្ពុជា។
ចំពោះបេសកកម្មស្រាវជ្រាវ និងជីករុករកអដ្ឋិធាតុជនជាតិអាម៉េរិកបាត់ខ្លួន (POW/MIA) សម្ដេចធិបតី បានជម្រាបជូនលោកឯកអគ្គរដ្ឋទូត ថា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ និងបានរៀបចំកែសម្រួល សមាសភាពនៃគណៈកម្មការ POW/MIA ក្នុងការសម្របសម្រួល និងសហការជាមួយគ្រប់ភាគីពាក់ព័ន្ធទាំងអស់ ដើម្បីអនុវត្តបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួនឱ្យបានរហ័សទាន់ពេល និង ជោគជ័យ ប្រកបដោយកាយវិការនៃការគោរព និងស្រឡាញ់ចំពោះក្រុមគ្រួសារនៃយុទ្ធជនដែលបានបាត់ខ្លួន។ក្រៅពីនេះ ភាគីទាំងពីរក៏បានពិភាក្សា និងបន្តកិច្ចសហប្រតិបត្តិការនៅក្នុងវិស័យផ្សេងៗទៀត ដែលប្រទេស ទាំងពីរកំពុងយកចិត្តទុកដាក់បំផុត។ប្រាវ៉ូចឹងតិចទៀតបញ្ហាសិទ្ធមនុស្សនិងអ្នកនយោបាយអាចនឹងត្រូវធូស្រាល!៕
