បន្ទាប់ពីកម្ពុជាប្រទេសអាមេនីនិងអាហ្សែបៃហ្សង់ស្នើរង្វាន់ណូប៊ែលសន្តិភាពជូនលោកត្រាំ
06-June-2026 / ព័ត៌មានអន្តរជាតិ
អាមេរិក៖លោកនាយករដ្ឋមន្ត្រីអាមេនី Nikol Pachinian និងលោកប្រធានាធិបតីអាស៊ែបៃហ្សង់ Ilham Aliev បានយល់ព្រមតាមការសំណើរបស់លោកប្រធានាធិបតីអាមេរិក ដូណាល់ ត្រាំ បិទបញ្ចប់ជម្លោះដណ្តើមទឹកដី ជានិរន្តរ៍ ហើយផ្តើមបើកទំព័រទំនាក់ទំនងពាណិជ្ជកម្ម និងការទូតថ្មី ព្រមទាំងគោរពអធិបតេយ្យភាព បូរណភាពទឹកដី គ្នាទៅវិញទៅមក។ នេះបើតាមការអះអាងរបស់លោក ដូណាល់ ត្រាំ នៅសេតវិមានអាមេរិក កាលពីថ្ងៃសុក្រ ទី៨ សីហា។
ថ្លែងក្នុងពិធីចុះហត្ថលេខាលើកិច្ចព្រមព្រៀងសន្តិភាពជាប្រវត្តិសាស្ត្រ ម្ចាស់សេតវិមាន បានសាទរចំពោះការយល់ព្រមបិទបញ្ចប់ជម្លោះដណ្តើមទឹកដីត្រង់តំបន់ការ៉ាបាក់ ដែលជាតំបន់ភ្នំផ្តុំដោយក្រុមបំបែកទឹកដីនិយម និងដែលអូសបន្លាយ អស់រយៈពេលប្រមាណ ៣៥ឆ្នាំ។ ក្រោយមកនៅឆ្នាំ២០២៣ អាស៊ែបៃហ្សង់បានគ្រប់គ្រងទាំងស្រុងនៅតំបន់នោះដែលធ្វើឲ្យប្រជាជនអាមេនីប្រមាណ ១០ម៉ឺននាក់ ដែលរស់នៅតំបន់នោះរត់ភៀសខ្លួនទៅប្រទេសអាមេនី។ លោកត្រាំ បានបន្ថែមទៀតថា មេដឹកនាំអាមេនី និងអាស៊ែបៃហ្សង់បានចុះហត្ថលេខាលើសេចក្តីប្រកាសរួមគ្នា បង្កើតតំបន់ឆ្លងកាត់ពិសេសមួយរវាងប្រទេសទាំងពីរដោយដាក់ឈ្មោះថា « ផ្លូវត្រាំសម្រាប់សន្តិភាពនិងសុខដមរមនាអន្តរជាតិ »។
តំបន់ឆ្លងកាត់ពិសេសនេះនឹងអនុញ្ញាតឲ្យប្រជាជនអាស៊ែបៃហ្សង់ មានសិទ្ធិឆ្លងកាត់ចេញចូលទៅតំបន់ Nakhchivan ដែលស្ថិតនៅប៉ែកខាងលិចអាមេនី។ ទន្ទឹមនឹងនេះ សហរដ្ឋអាមេរិកបានទទួលសិទ្ធិអភិវឌ្ឍន៍តំបន់ប៉ែកខាងលិចអាមេនី ដែលជាតំបន់យុទ្ធសាស្ត្រ និងសំបូរទៅដោយធនធានរ៉ែអ៊ីដ្រូកាបួរ ដ៏ចាំបាច់សម្រាប់វិស័យឧស្សាហកម្មប្រេងឥន្ធនៈ។ អាមេរិកបានធានាថា អាមេនីក៏នឹងទទួលបានផលចំណេញពីការអភិវឌ្ឍន៍នេះដែរ ពីព្រោះអាមេនីនឹងក្លាយជាដៃគូជិតស្និទ្ធរបស់សហរដ្ឋអាមេរិក។ ប្រធានាធិបតីដូណាល់ត្រាំ បានលើកឡើងទៀតថា ប្រទេសទាំងពីរនឹងមានទំនាក់ទំនងល្អចាប់ពេលនេះតទៅ។ ក៏ប៉ុន្តែប្រសិនបើមានបញ្ហាទាស់ទែងគ្នា អាចទូរស័ព្ទមកលោកបាន លោកនឹងជួយដោះស្រាយ។
ដោយថ្លែងអំណរគុណដល់លោក ដូណាល់ត្រាំ ចំពោះការជួយជ្រោមជ្រែងស្វែងរកសន្តិភាព មេដឹកនាំអាមេនី និងអាស៊ែបៃហ្សង់ បានថែមទាំងស្នើដាក់លិខិតគាំទ្របេក្ខភាពលោក ដូណាល់ ត្រាំសម្រាប់ពានរវង្វាន់ណូបែលសន្តិភាពផង។ សហគមន៍អន្តរជាតិ មានជាអាទិ៍បារាំង អង់គ្លេស តួកគី ជាដើម បាននាំគ្នាបញ្ចេញប្រតិកម្ម សំដែងសេចក្តីសោមនស្សរីករាយនិងចូលរួមអបអរសាទរ ចំពោះសន្តិភាពយូរអង្វែងរវាងប្រទេសទាំងពីរផងដែរ។
សូមបញ្ជាក់ថានៅថ្ងៃទី៧ ខែសីហា ឆ្នាំ២០២៥ លោកនាយករដ្ឋមន្ត្រី ហ៊ុន ម៉ាណែត បានផ្ញើលិខិតផ្លូវការទៅកាន់គណៈកម្មាធិការណូបែលន័រវែសដើម្បីគាំទ្រ និងតែងតាំងប្រធានាធិបតីសហរដ្ឋអាមេរិក លោក ដូណាល់ ត្រាំ សម្រាប់ពានរង្វាន់ណូបែលសន្តិភាព។ ចំពោះនាយករដ្ឋមន្ត្រីកម្ពុជា លោក ដូណាល់ ត្រាំ បានរួមចំណែកយ៉ាងសំខាន់ជាប្រវត្តិសាស្ត្រ ក្នុងកិច្ចខិតខំប្រឹងប្រែងសម្របសម្រួលឱ្យមានបទឈប់បាញ់រវាងកម្ពុជា-ថៃ ពិសេសការស្វែងរកសន្តិភាពតាមព្រំដែននៃប្រទេសទាំងពីរ។
ក្នុងលិខិតផ្ញើទៅកាន់គណៈកម្មាធិការណូបែលន័រវែស លោក ហ៊ុន ម៉ាណែត ក្នុងនាមជានាយករដ្ឋមន្ត្រីកម្ពុជា បានបង្ហាញការដឹងគុណចំពោះលោក ដូណាល់ ត្រាំ ប្រធានាធិបតីទី៤៥ និង៤៧របស់អាមេរិក ដែលបានរួមចំណែកក្នុងការជំរុញឱ្យមានសន្តិភាពពិភពលោក ពិសេសសន្តិភាព និងស្ថិរភាពនៅតាមបន្ទាត់ព្រំដែនកម្ពុជា-ថៃ ក្រោមការផ្តួចផ្តើម និងសម្របសម្រួលឱ្យមានបទឈប់បាញ់គ្នា។លោកនាយករដ្ឋមន្ត្រី ហ៊ុន ម៉ាណែត ក៏ចាត់ទុកលោក ដូណាល់ ត្រាំ ជាវីរជន ដែលបានដោះស្រាយជម្លោះ និងសង្គ្រោះអាយុជីវិតមនុស្សជាច្រើននាក់ពីសង្គ្រាម ពិសេសបានបន្ធូរបន្ថយភាពតានតឹងជម្លោះក្នុងតំបន់មួយចំនួនលើពិភពលោក តាមរយៈចក្ខុវិស័យ និងជំនាញការទូតប្រកបដោយភាពច្នៃប្រឌិត។ (ដកស្រង់ពីវិទ្យុបារាំងអន្តរជាតិ)
