ប្រទេសតួកគីចេញមុខគាំទ្រការឲ្យមានការដកទណ្ឌកម្មប្រឆាំងរុស្ស៊ី ជាថ្នូរនិងការនាំចេញស្បៀងចេញពីអ៊ុយក្រែន
02-November-2023 / ព័ត៌មានអន្តរជាតិ
ប្រទេសតួគី៖រដ្ឋមន្ត្រីការបរទេសតួកគីបាននិយាយថាសំណើរបស់រុស្ស៊ីសម្រាប់ការបញ្ចប់ការដាក់ទណ្ឌកម្មដើម្បីជួយសម្រួលដល់ការនាំចេញគ្រាប់ធញ្ញជាតិរបស់អ៊ុយក្រែនគឺ”សមហេតុផល”។រដ្ឋមន្ត្រីការបរទេសតួកគីលោក MevlutCavusogluបាននិយាយនៅក្នុងសន្និសីទសារព័ត៌មានរួមមួយថា”ដើម្បីឱ្យគ្រាប់ធញ្ញជាតិរបស់អ៊ុយក្រែនឈានដល់ទីផ្សារអន្តរជាតិយើងចាត់ទុកការដកចេញនូវឧបសគ្គដែលរារាំងការនាំចេញរបស់រុស្ស៊ីជាសំណើស្របច្បាប់”ជាមួយសមភាគីរុស្ស៊ីលោកសេហ្គេថាវរ៉ូវ( Sergei Lavrov) នៅទីក្រុងអង់ការ៉ា ថ្ងៃទី៨មិថុនានេះ។
មុននេះ រុស្ស៊ីបាននិយាយថាខ្លួនបានត្រៀមខ្លួនរួចជាស្រេចដើម្បីជួយសម្រួលដល់ការនាំចេញគ្រាប់ធញ្ញជាតិរបស់អ៊ុយក្រែននិងចូលរួមចំណែកបន្ថែមទៀតដើម្បីបញ្ចៀសវិបត្តិស្បៀងអាហារពិភពលោកដោយបានស្នើថាលោកខាងលិចត្រូវដកទណ្ឌកម្មលើប្រទេសនេះ។ ទណ្ឌកម្មដែលដាក់ដោយសហរដ្ឋអាមេរិក និងលោកខាងលិចលើប្រព័ន្ធហិរញ្ញវត្ថុរបស់ទីក្រុងម៉ូស្គូបានរារាំងប្រទេសរុស្ស៊ីពីការនាំចេញគ្រាប់ធញ្ញជាតិ និងជីទៅឱ្យដៃគូររបស់ខ្លួន។
រដ្ឋមន្ត្រីការបរទេសរុស្ស៊ីបានមកដល់ទីក្រុងអង់ការ៉ាប្រទេសតួកគី ដើម្បីចរចារអំពីវិធីនាំចេញគ្រាប់ធញ្ញជាតិអ៊ុយក្រែនក្នុងបរិបទនៃការព្រមានរបស់អង្គការសហប្រជាជាតិអំពីហានិភ័យនៃវិបត្តិស្បៀងអាហារពិភពលោកនៅពេលដែលគ្រាប់ធញ្ញជាតិអ៊ុយក្រែនប្រហែល២៥លានតោនត្រូវបានជាប់គាំងនៅកំពង់ផែនិងឃ្លាំង ដោយសារតែការបិទផ្លូវនាំចេញឆ្លងកាត់សមុទ្រខ្មៅ។ រុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមកថាបានដាក់មីននៅជុំវិញផ្លូវដឹកជញ្ជូននៅក្នុងសមុទ្រខ្មៅ ដោយរារាំងនាវាមិនឱ្យចូលនិងចាកចេញ។បន្ទាប់មកប្រទេសតួកគីបានស្នើឱ្យបើកច្រករបៀងឆ្លងកាត់ Bosphorus និងអមដំណើរកប៉ាល់ដឹកគ្រាប់ធញ្ញជាតិពីកំពង់ផែអ៊ុយក្រែនទៅកាន់ពិភពលោក បើទោះបីជាមានការព្រួយបារម្ភអំពីហានិភ័យនៃការរងការវាយប្រហារដោយគ្រាប់មីនក៏ដោយ។
អង្គការសហប្រជាជាតិបានស្នើឱ្យតួកគីអមក្បួនទំនិញពីកំពង់ផែរបស់អ៊ុយក្រែនឆ្លងកាត់សមុទ្រខ្មៅដើម្បីនាំយកគ្រាប់ធញ្ញជាតិទៅកាន់ទីផ្សារពិភពលោក។ រដ្ឋមន្ត្រីការបរទេស Cavusoglu បាននិយាយថា ផែនការរបស់អង្គការសហប្រជាជាតិគឺ”សមហេតុផល” និង “អាចដំណើរការបាន” ហើយបានស្នើឱ្យរៀបចំកិច្ចប្រជុំនៅទីក្រុងអ៊ីស្តង់ប៊ុលដើម្បីពិភាក្សាលម្អិតអំពីផែនការនេះ។ថ្លែងនៅក្នុងសន្និសីទសារព័ត៌មាន រដ្ឋមន្ត្រីការបរទេស Lavrov បានអះអាងថា រុស្ស៊ីប្តេជ្ញាធានាការឆ្លងកាត់ប្រកបដោយសុវត្ថិភាពនៃកប៉ាល់ពីអ៊ុយក្រែន។លោកបានបន្តថា៖«យើងបានត្រៀមខ្លួនជាស្រេចដើម្បីធ្វើកិច្ចការនេះជាមួយនឹងកិច្ចសហប្រតិបត្តិការរបស់តួកគី។ “ដើម្បីដោះស្រាយបញ្ហានេះរឿងតែមួយគត់ដែលចាំបាច់សម្រាប់កប៉ាល់ដើម្បីចាកចេញពីកំពង់ផែអ៊ុយក្រែនគឺសម្រាប់ពួកគេដើម្បីបោសសម្អាតមីនឬសម្គាល់ច្រករបៀងដែលមានសុវត្ថិភាពគ្មានអ្វីត្រូវការទៀតទេ” ។
លោក Lavrov ក៏បានសង្កត់ធ្ងន់ថា កិច្ចចរចាសន្តិភាពរវាងទីក្រុងម៉ូស្គូ និងគៀវត្រូវតែបើកឡើងវិញ មុនពេលជំនួបណាមួយរវាងប្រធានាធិបតីរុស្ស៊ី លោកVladimir Putin និងប្រធានាធិបតីអ៊ុយក្រែន លោក Volodymyr Zelensky។ យោងតាមលោកប្រតិបត្តិការយោធាពិសេសនៅអ៊ុយក្រែន ប្រព្រឹត្តទៅតាមផែនការហើយរុស្ស៊ីនឹងសម្រេចរាល់គោលបំណងដែលបានកំណត់។យុទ្ធនាការយោធារបស់រុស្ស៊ីនៅអ៊ុយក្រែននិងទណ្ឌកម្មរបស់លោកខាងលិចបានរំខានការផ្គត់ផ្គង់ស្រូវសាលី និងទំនិញផ្សេងទៀតរបស់ពិភពលោកដោយបង្កើនការភ័យខ្លាចនៃវិបត្តិស្បៀងអាហារពិភពលោក។រុស្ស៊ី និងអ៊ុយក្រែនផលិតបាន៣០% នៃការផ្គត់ផ្គង់ស្រូវសាលីពិភពលោក។ កប៉ាល់កុងតឺន័ររាប់សិបគ្រឿងត្រូវជាប់គាំងនៅកំពង់ផែសមុទ្រអ៊ុយក្រែនដោយកាត់ផ្តាច់ការនាំចេញស្រូវសាលី ប្រេងផ្កាឈូករ័ត្ន និងអាហារ និងជីផ្សេងៗទៀត។ប្រទេសតួកគីអះអាងថាជាអ្នកសម្រុះសម្រួលអព្យាក្រឹតរវាងប្រទេសជិតខាងទាំង២នៅក្នុងសមុទ្រខ្មៅ។ ក្រុងអង់ការ៉ាផ្គត់ផ្គង់យន្តហោះគ្មានមនុស្សបើកប្រដាប់អាវុធដល់អ៊ុយក្រែន។ ប៉ុន្តែបដិសេធមិនចូលរួមការដាក់ទណ្ឌកម្មរបស់លោកខាងលិចប្រឆាំងនឹងរុស្ស៊ី៕តាមAFPនិងGuardian
