សេនានុព័ន្ធយោធាមកពីប្រទេសមហាអំណាច និងប្រទេសមាជិកអាស៊ាន ព្រមទាំងមន្ត្រីនានា សរុប១៣ប្រទេស ចុះពិនិត្យស្ថានភាពជាក់ស្តែង នៅតំបន់សមរភូមិ ខេត្តព្រះវិហារ
21-September-2026 / ផ្សេងៗ
ព្រះវិហារ៖ សេនានុព័ន្ធ័យោធាមកពីប្រទេសមហាអំណាច និងប្រទេសមាជិកអាស៊ាន ព្រមទាំងមន្ត្រីទូតនានា សរុប១៣ប្រទេសនៅព្រឹកថ្ងៃទី៣០ ខែកក្កដា ឆ្នាំ២០២៥ ចុះពិនិត្យស្ថានភាពជាក់ស្តែងនៅតំបន់សមរភូមិ ច្រកអានសេះ ខេត្តព្រះវិហារ បន្ទាប់ពីមានកិច្ចព្រមព្រៀងឈប់បាញ់និងជំនួបមេយោធាភូមិភាគប្រទេសថៃនិងកម្ពុជា។ មន្ត្រីទូតបរទេសដែលចូលរួមសង្កេតកាណ៍រួមមាន៖ សហរដ្ឋអាមេរិក ចិន ជប៉ុន រុស្សី កូរ៉េ អូស្ត្រាលី និងប្រទេសសមាជិក ម៉ាឡេស៊ី ឥណ្ឌូនេស៊ី ហ្វីលីពីន សិង្ហបុរី ឡាវ វៀតណាម មីយ៉ាន់ម៉ា។ក្រៅពីនោះមានកាសែតបរទេសនិងក្នុងស្រុកផងដែរ។
កាលពីថ្ងៃទី២៩កក្កដាលោក ជុំ សន្ទរី អ្នកនាំពាក្យក្រសួងការបរទេស និងសហប្រតិបត្តិការ អន្តរជាតិកម្ពុជា បានលើកឡើងថា បទឈប់បាញ់កម្ពុជា-ថៃ ទទួលបានការសាទរយ៉ាងខ្លាំងក្លាពីបណ្តាប្រទេសមហាអំណាចធំៗ និងសហគមន៍អន្តរជាតិ ដែលនឹងជំរុញឱ្យភាគីទាំងអនុវត្តបានពេញលេញ។ថ្លែងក្នុងសន្និសីទសារព័ត៌មានដែលរៀបចំឡើងដោយអ្នកនាំពាក្យរាជរដ្ឋាភិបាលកម្ពុជា ដើម្បីសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នារសៀលថ្ងៃទី២៩ ខែកក្កដា ឆ្នាំ២០២៥នេះ លោក ជុំ សន្ទរី បានលើកឡើងថា មហាអំណាចធំៗ និងសហគមន៍អន្តរជាតិ រួមមាន សហរដ្ឋអាមេរិក អង្គការសហប្រជាតិ ជប៉ុន អូស្ត្រាលី សហភាពអឺរ៉ុប ចក្រភពអង់ បារាំង អាល្លឺម៉ង់ សុទ្ធតែបានចេញសារអបអរសាទរ និងអំពាវនាវឱ្យភាគីទាំងពីរគោរពកិច្ចព្រមព្រៀងនេះ នឹងធ្វើការជាមួយគ្នា ឆ្ពោះទៅរកដំណោះស្រាយដោយសន្តិវិធី។
លោក ជុំ សន្ទរី បានលើកឡើងថា លោក ដូណាល់ ត្រាំ ប្រធានាធិបតីអាមេរិក ដែលបានចូលរួមយ៉ាងសកម្មក្នុងការកិច្ចចរចានាំឱ្យមានបទឈប់បាញ់នេះ បានលើកឡើងនៅក្នុងបណ្តាញសង្គម របស់លោកថា លោកទើបតែបានសន្ទនាជាមួយនាយករដ្ឋមន្ត្រីស្តីទីថៃ និងនាយករដ្ឋមន្ត្រីកម្ពុជា។ លោកមានក្តីរីករាយសូមប្រកាសថា បន្ទាប់ពីការចូលរួមរបស់លោក ប្រទេសទាំងពីរបានឈានដល់កិច្ចព្រមព្រៀងឈប់បាញ់ និងសន្តិភាព»។
លោក ដូណាល់ ត្រាំបន្ថែមថាតាមរយៈការបញ្ចប់សង្គ្រាមនេះ យើងបានសង្គ្រោះជីវិតមនុស្សរាប់ពាន់នាក់។ ដោយសារបទឈប់បាញ់នេះលោកបញ្ជាឲ្យក្រុមការងារពាណិជ្ជកម្មរបស់លោកចាប់ផ្តើម ការចរចាជាមួយប្រទេសទាំងពីរឡើងវិញ។ជាមួយគ្នានេះ លោកក៏បានបញ្ជាក់ថា លោកបានចូលបញ្ចប់សង្គ្រាមជាច្រើន ក្នុងរយៈពេល៦ខែ ដែលជាមោទនភាពមួយ ហើយចាត់ទុកថា លោកគឺជាប្រធានាធិបតីសម្រាប់សន្តិភាព។
ជាមួយគ្នានេះដែរ រដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីយ៉ូ បានសម្តែងការសាទរចំពោះកិច្ចព្រមព្រៀងបទឈប់បាញ់រវាងកម្ពុជា និងថៃ ដោយបានបញ្ជាក់ថា លោកប្រធានាធិបតី Trump និងរូបលោកផ្ទាល់ ប្តេជ្ញាបញ្ឈប់អំពើហិង្សាជាបន្ទាន់ ហើយរំពឹងថារដ្ឋាភិបាលនៃប្រទេសកម្ពុជា និងថៃ នឹងគោរពយ៉ាងពេញលេញនូវការប្តេជ្ញាចិត្តក្នុងការបញ្ចប់ជម្លោះនេះ។លោក ម៉ាកូ រ៉ូប៊ីយ៉ូ បញ្ជាក់ថា «យើងសូមកោតសរសើរចំពោះនាយករដ្ឋមន្ត្រី អាន់វ៉ា អ៊ីប្រាហ៊ីម ចំពោះភាពជាអ្នកដឹកនាំរបស់លោក និងរដ្ឋាភិបាលម៉ាឡេស៊ី ដែលបានធ្វើជាម្ចាស់ផ្ទះនៃកិច្ចពិភាក្សាទាំងនេះ។ យើងសូមអំពាវនាវដល់គ្រប់ភាគី ឱ្យអនុវត្តតាមការប្តេជ្ញាចិត្តរបស់ពួកគេ ហើយសហរដ្ឋអាមេរិក នឹងបន្តចូលរួមក្នុងដំណើរការនេះដែលរៀបចំដោយសហរដ្ឋអាមេរិក និងម៉ាឡេស៊ី ដើម្បីបញ្ចប់ជម្លោះ»។
ទន្ទឹមគ្នានេះ អគ្គលេខាធិការ អង្គការសហប្រជាជាតិ លោក Antonio Guterres ស្វាគមន៍ចំពោះបទបាញ់គ្នារវាកម្ពុជា និងថៃ ដែលជាជំហានវិជ្ជមានមួយឆ្ពោះទៅរកការបញ្ចប់នូវអរិភាពបច្ចុប្បន្ន និងការធ្វើឱ្យមានភាពធូរស្រាលចំពោះភាពតានតឹងនេះ ។លោកថែមទាំងស្នើឱ្យភាគីទាំងពីរគោរពកិច្ចព្រមព្រៀងនេះឱ្យបានពេញលេញ។ អង្គការសហប្រជាជាតិត្រៀមខ្លួនរួចជាស្រេច ដើម្បីគាំទ្រ ដល់ការខិតខំប្រឹងប្រែងដែលសំដៅលើកស្ទួយសន្តិភាព និងស្ថេរភាព នៅក្នុងតំបន់។
រដ្ឋមន្ត្រីកាបរទេជប៉ុន ក៏សាទរ និងលើកឡើងពីសារៈសំខាន់នៃទំនាក់ទំនងទ្វេភាគីរវាងកម្ពុជា និងថៃ មានតម្លៃណាស់ សម្រាប់សន្តិភាព និងស្ថេរភាពក្នុងតំបន់។ក្នុងន័យនេះ ជប៉ុនបាននឹងកំពុងធ្វើការទំនាក់ទំនងជាមួយកម្ពុជា និងថៃ ដើម្បីបន្ធូបន្ថយភាពតានតឹង។ចំណែកប្រទេសអូស្ត្រាលី សហភាពអឺរ៉ុប ចក្រភពអង់ បារាំង អាល្លឺម៉ង់ ក៏បានចេញសារអបអរសាទរ និងអំពាវនាវឱ្យភាគីទាំងពីរគោរពកិច្ចព្រមព្រៀងនេះ នឹងធ្វើការជាមួយគ្នា ឆ្ពោះទៅរកដំណោះស្រាយដោយសន្តិវិធីដូចគ្នាផងដែរ។
គួរបញ្ជាក់ថា បទឈប់បាញ់មួយរវាងកម្ពុជា និងថៃត្រូវបានសម្រេចឡើង ក្រោយកិច្ចប្រជុំបន្ទាន់រវាងនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត និងនាយករដ្ឋមន្ត្រីស្តីទីថៃ លោក Phumtham Wechayachai នៅរសៀលថ្ងៃចន្ទ ក្នុងទីក្រុងកូឡាឡាំពួ ប្រទេសម៉ាឡេស៊ី ក្រោមការសម្របសម្រួលរបស់ លោក អានវ៉ា អ៉ីប្រាហ៉ីម នាយករដ្ឋមន្ត្រីម៉ាឡេស៊ី ដោយមានការចូលរួមពីតំណាងសហរដ្ឋអាមេរិក និងចិន៕
