ប្រធានក្រុមការងារចំពោះកិច្ច៖តំបន់ណាដែលរដ្ឋបាលខេត្តនិងអាជ្ញាធរកំណត់ជាតំបន់សុវត្ថិភាពក្នុងឺជាកន្លែងដែលចាប់ផ្តើមវាយតម្លៃនិងស្តារឡើងវិញបន្ទាប់ពីរងការខូចខាតដោយសង្គ្រាម!

ភ្នំពេញ:លោក ចន ណារិទ្ធ រដ្ឋលេខាធិការក្រសួងសេដ្ឋកិច្ច និងប្រធានក្រុមការងារចំពោះកិច្ច រៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធដែលរងការខូតខាតពីជម្លោះព្រំដែនកម្ពុជា-ថៃ បានលើកឡើងនៅព្រឹកថ្ងៃទី១៣ ខែមករា ឆ្នាំ២០២៦នេះថា តំបន់ណាដែលអាជា្ញធរមូលដ្ឋាន រដ្ឋបាលតាមបណ្តាខេត្ត និងអាជ្ញាធរមានសមត្ថកិច្ច ជាអ្នកកំណត់បឋមថា ជាតំបន់ដែលមានសុវត្ថិភាព ក្នុងការអនុញ្ញាតឱ្យពលរដ្ឋអាចត្រឡប់ទៅវិញបាន គឺកន្លែងនោះហើយ ដែលនឹងចាប់ផ្តើមវាយតម្លៃ និងស្តារឡើងវិញ ហើយទីតាំងណាដែលនៅប្រទាញប្រទង់ គឺមិនអាចធ្វើកិច្ចការទាំងនេះបានទេ។ 

លោក ចន ណារិទ្ធ បានបញ្ជាក់បន្ថែមថា សង្រ្គាមដែលថៃឈ្លានពានកម្ពុជាចំនួន២លើក នៅក្នុងឆ្នាំ២០២៥នេះ គឺជាសោកនាដកម្មមួយ ដែលប៉ះពាល់ជារួមទៅដល់ស្ថានភាពសង្គម សេដ្ឋកិច្ច និងជីវភាពរស់នៅរបស់ប្រជាពលរដ្ឋ ហើយក៏រំខានដល់ការប្រកបរបរទទួលទានរបស់ពួកគេផងដែរ។ លោកបន្តថា ដូច្នេះហើយ ដើម្បីឱ្យប្រជាពលរដ្ឋរស់នៅបានសុខស្រួលនៅក្នុងសង្គមជាតិ រាជរដ្ឋាភិបាលកម្ពុជា នៅថ្ងៃទី២២ ខែតុលា ឆ្នាំ២០២៥ ក៏បានបង្កើតនូវក្រុមការងារចំពោះកិច្ចមួយ ដើម្បីវាយតម្លៃក៏ដូចជាត្រួតពិនិត្យថាតើមានហេដ្ឋារចនាសម្ព័ន្ធជាមូលដ្ឋាននៅក្នុងសង្គមដូចជា ហេដ្ឋារចនាសម្ព័ន្ធរបស់ជាតិ និងឯកជន មានការខូចខាតកម្រិតណា ហើយគួរស្តារដូចម្តេចដើម្បីធានាឱ្យបាននូវជីវភាពរស់នៅរបស់ពលរដ្ឋ ពិសេសពលរដ្ឋភៀសសឹក ពេលត្រឡប់មកវិញ។

លោកចនណារិទ្ធបានគូសបញ្ជាក់បន្ថែមទៀតថា កិច្ចការដំបូងនិងជាបន្ទាន់គឺការធ្វើការវាយតម្លៃ អំពីស្ថានភាពខូចខាតតែម្តង ដែលសំដៅដល់ផ្ទះសម្បែងរបស់ពលរដ្ឋផង និងហេដ្ឋារចនាសម្ព័ន្ធសាធារណៈផង ដែលបម្រើឱ្យជីវភាពរស់នៅប្រចាំថ្ងៃរបស់ពលរដ្ឋដូចជា សាលារៀន មន្ទីរពេទ្យ និងហេដ្ឋារចនាសម្ព័ន្ធផ្សេងៗទៀត ដែលអាចធានាបាននូវប្រក្រតីភាព ក្នុងការរស់នៅប្រចាំថ្ងៃ។ លោកបន្ថែមថា ភ្ជាប់ជាមួយនឹងការវាយតម្លៃ ក្រុមការងារនឹងពិភាក្សា ព្រមទាំងពិនិត្យមើល ដោយលើកជាយោបល់ជូនរាជរដ្ឋាភិបាល អំពីគម្រោងនៃការស្តារទៅតាមអាទិភាពជាក់លាក់នៃប្រភេទហេដ្ឋារចនាសម្ព័ន្ធ ដើម្បីធានាថា ពលរដ្ឋភៀសសឹកដែលត្រឡប់ទៅមូលដ្ឋានដើមវិញនោះមានជីវភាពរស់នៅជាប្រក្រតី។

លោកបន្តថា កិច្ចការទាំងនេះត្រូវធ្វើឱ្យលឿនជាទីបំផុត ដោយមិនមានគម្រោងចំណាយពេលយូរទេ ព្រោះវាអាចប៉ះពាល់ដល់ជីវភាពប្រចាំថ្ងៃរបស់ពលរដ្ឋ ខណៈពួកគេបាននាំគ្នាត្រឡប់មកជាបន្តបន្ទាប់នៅទីតាំងណាដែលរដ្ឋបាលនិងអាជ្ញាធរផ្តល់ដំណឹងថា មានសុវត្ថភាពអាចត្រឡប់មកវិញបាន។

រាជរដ្ឋាភិបាលបានចេញសេចក្តីសម្រេចលេខ ១១៣ សសរ ចុះថ្ងៃទី២២ ខែតុលា ឆ្នាំ២០២៥ បង្កើតក្រុមការងារចំពោះកិច្ចរៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធដែលខូចខាតពីជម្លោះព្រំដែនកម្ពុជា-ថៃ ដោយសមាសភាពក្រុមការងារចំពោះកិច្ចនេះ មានតួនាទី សិក្សា ពិនិត្យ និងវាយតម្លៃលើជីវភាព និងស្ថានភាពជាក់ស្តែងនៃហេដ្ឋារចនាសម្ព័ន្ធដែលខូចខាត និងតម្រូវការស្តារជីវភាព និងហេដ្ឋារចនាសម្ព័ន្ធដែលខូចខាត, សម្របសម្រួល និងសហការជាមួយក្រសួង-ស្ថាប័ន និងអាជ្ញាធរខេត្តពាក់ព័ន្ធលើការងាររៀបចំអនុវត្តកម្មវិធីជំនួយសង្គមសម្រាប់ការស្តារជីវភាព និងគម្រោង និងកម្មវិធីស្តារហេដ្ឋារចនាសម្ព័ន្ធដែលខូចខាត រួមមានលំនៅឋានពលរដ្ឋ សាលារៀន មូលដ្ឋានសុខាភិបាលសាធារណៈ ផ្លូវថ្នល់ ស្ពាន ប្រព័ន្ធទឹកស្អាត បណ្តាញអគ្គិសនី ជាដើម ដោយគិតគូរអំពីទំហំខូចខាត និងទីតាំងគោលដៅជាក់លាក់ នៅក្នុងភូមិសាស្រ្តដែលរងការឈ្លានពានពីថៃ និងការធ្វើអាទិភាវូបនីយកម្មនៃការងារស្តារឡើងវិញ។