នាយករដ្ឋមន្ត្រីកម្ពុជា ស្នើឲ្យកូរ៉េខាងជើង និងកូរ៉េខាងត្បូង និងភាគីពាក់ព័ន្ធនានាសម្រេចសន្ធិសញ្ញាសន្តិភាពសម្រាប់ឧបទ្វីបកូរ៉េ!
កូរ៉េ៖ សម្ដេចតេជោ ហ៊ុន សែននាយករដ្ឋមន្ត្រីកម្ពុជា បានថ្លែងស្នើឲ្យកូរ៉េខាងជើង និងកូរ៉េខាងត្បូង និងភាគីពាក់ព័ន្ធនានាសម្រេចសន្ធិសញ្ញាសន្តិភាពឲ្យបានឆាប់រហ័ស ដើម្បីធានាបាន នូវសន្តិភាពអចិន្ត្រៃយ៍នៅលើឧបទ្វីបកូរ៉េ។ សម្ដេចតេជោ ហ៊ុន សែនដែលជាប្រធានអាស៊ានប្តូវេនឆ្នាំ២០២២ផងដែរ អំពាវនាវ ឲ្យគ្រប់ភាគីពាក់ព័ន្ធទាំងអស់ឲ្យបន្តកិច្ចសហប្រតិបត្តិការលើទំនុកចិត្ត និងភាពជាដៃគូ ដោយយកប្រជាជនជាស្នូល ដើម្បីកសាងដំណើរឆ្ពោះទៅរកការបង្រួបបង្រួមកូរ៉េទាំងពីរដោយសន្តិភាព។
កាលើកឡើងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឡើងក្នុងសុន្ទរកថាថ្លែង បើកកិច្ចប្រជុំកំពូលសន្តិភាពពិភពលោក ឆ្នាំ២០២២ ក្រោមមូលបទ «ឆ្ពោះទៅកាន់សន្តិភាពនៅឧបទ្វីបកូរ៉េ» ថ្ងៃសុក្រ ទី១១ ខែកុម្ភៈ ឆ្នាំ២០២២ដែលប្រព្រឹត្តទៅនៅទីក្រុងសេអ៊ូល ប្រទេសកូរ៉េខាងត្បូងក្នុងនាមជាសហប្រធាននៃកិច្ចប្រជុំ ។សម្តេចតេជោ ហ៊ុន សែន បានមានប្រសាសន៍ថា « ឆ្នាំនេះ គឺជាខួបលើកទី ៧២ នៃសង្គ្រាមកូរ៉េ ដែលបានចាប់ផ្ដើមនៅថ្ងៃទី ២៥ ខែមិថុនា ឆ្នាំ ១៩៥០។
សង្គ្រាមបានបញ្ចប់ដោយកិច្ចព្រមព្រៀងឈប់បាញ់ នៅថ្ងៃទី ២៧ ខែ កក្កដា ឆ្នាំ ១៩៥៣ តែ មិនមែនបញ្ចប់ដោយសន្ធិសញ្ញាសន្តិភាពអចិន្ត្រៃយ៍នោះទេ ទោះបីជាកិច្ចខិតខំប្រឹងប្រែងសន្តិភាពត្រូវ បានធ្វើឡើងក្នុងរយៈពេលជាច្រើនទសវត្សរ៍ក៏ដោយ ប៉ុន្តែជាអកុសល, សន្ធិសញ្ញាសន្តិភាពមិនទាន់អាច សម្រេចបាននៅឡើយ ។ ហេតុដូច្នេះហើយ, នេះជាពេលវេលាដ៏សំខាន់ ដើម្បីសម្រេចនូវសន្ធិសញ្ញាសន្តិភាព នៅឧបទ្វីបកូរ៉េ ។ យើងត្រូវការចាំបាច់នូវសេចក្តីថ្លែងការណ៍បញ្ចប់សង្គ្រាមនៅឧបទ្វីបកូរ៉េ ។
សម្ដេចតេជោ ហ៊ុន សែន បានបញ្ជាក់ថា «សន្តិភាពនៅកូរ៉េ គឺជាបញ្ហាពិភពលោកដ៏ស្មុគស្មាញ ដែលត្រូវការដំណោះស្រាយ ហើយកិច្ចប្រជុំកំពូលនេះ គឺនឹងដាក់ចេញ នូវឯកសារសំខាន់ៗ ចំនួន ២ គឺសេចក្តីសម្រេចចិត្តទីក្រុងសេអ៊ូលឆ្នាំ ២០២២ ស្តីពីដំណើរឆ្ពោះទៅសន្តិភាព និងវិបុលភាពប្រកបដោយចីរភាពនៅឧបទ្វីបកូរ៉េ និងគំនិតផ្ដួចផ្ដើមស្ដីពីរដ្ឋពីរឆ្ពោះទៅរដ្ឋតែមួយ ជាតិតែមួយ ឧបទ្វិបតែមួយ ប្រជាជនតែមួយ ដែលយើងរងចាំធាតុចូលពីធាតុចូលរបស់ប្រតិភូមួយចំនួនទៀត»។
សម្តេចតេជោ ហ៊ុន សែន បានចែករំលែកបទពិសោធន៍កម្ពុជាក្នុងការស្វែងរកសន្តិភាព ថា «ក្នុងពាក់កណ្ដាលជីវិតរបស់ខ្ញុំនេះជាដំណើរការចរចា គឺជាជម្រើសដែលល្អបំផុត ខ្ញុំមិនដែលជឿទេថា ការប្រើប្រាស់សង្គ្រាម ដើម្បីបញ្ចប់សង្គ្រាម»។សម្តេចតេជោ បន្តថា «ប្រទេសរបស់យើងខ្ញុំហែកហួរដោយសារតែសង្គ្រាម យើងបានប្រើប្រាស់ការចរចារយះពេល ៤ឆ្នាំដើម្បីបញ្ចប់សង្គ្រាម ប៉ុន្តែប្រតិបត្តិការរបស់អង្គការសហប្រជាជាតិ អ្វីដែលជាកិច្ចព្រមព្រៀងប៉ារីសចង់បាន តែអ៊ុនតាក់មិនអាចសម្រេចបាន គឺអ៊ុនតាក់ដកត្រឡប់ទៅវិញ បន្សល់ទុកនៅកម្ពុជា តំបន់ពីរ និងរដ្ឋាភិបាលពីរ យើងខ្ញុំគ្មានជម្រើសអ្វីឱ្យល្អក្រៅពីការដាក់ចេញនយោបាយ ឈ្នះ ឈ្នះ ដើម្បីនាំមក នូវសន្តិភាព ដោយកម្ពុជាបានបញ្ចប់សង្គ្រាមទាំងស្រុងក្នុងរយៈពេលជាង ២០ ឆ្នាំរួចស្រេចទៅហើយ ហើយនេះប្រវត្តិសាស្ត្ររបស់យើង»។
កិច្ចប្រជុំកំពូលពិភពលោកឆ្នាំ ២០២២ បានរៀបចំឡើងនៅក្នុងអំឡុងពេលនៃការប្រកួតប្រជែង ភូមិសាស្ត្រនយោបាយកាន់តែតឹងតែង និងវិបត្តិជាបន្តបន្ទាប់ ដែលបង្កឡើងដោយជំងឺរាតត្បាត, គម្លាត សង្គមកាន់តែរីកធំ ក៏ដូចជាគ្រោះធម្មជាតិផងដែរ ។ ទន្ទឹមនេះដែរ, ពិភពលោករបស់យើង គឺកំពុងតភ្ជាប់គ្ន ទៅវិញទៅមក និងពឹងផ្អែកគ្នាទៅវិញទៅមកកាន់តែខ្លាំង ដូច្នេះហើយ យើងត្រូវការធ្វើការជាមួយគ្នា ដើម្បី សម្របសម្រួលការឆ្លើយតបជាសកលចំពោះបញ្ហាសកលដែលកំពុងកើតឡើងនេះ ។ សន្តិភាព និងស្ថិរភាព នៅឧបទ្វីបកូរ៉េ គឺជាបញ្ហាចោទមួយផងដែរ នៅក្នុងបញ្ហាពិភពលោកដ៏តានតឹង និងស្មុគស្មាញ ដែលត្រូវ ការដំណោះស្រាយ ។
ឆ្លៀតក្នុងឱកាសនេះ, ខ្លួនខ្ញុំផ្ទាល់សូមស្នើឱ្យកូរ៉េទាំងពីរ និងភាគីពាក់ព័ន្ធនានា សម្រេចសន្ធិសញ្ញ សន្តិភាពឱ្យបានឆាប់រហ័ស ដើម្បីធានាបាននូវសន្តិភាពអចិន្ត្រៃយ៍នៅលើឧបទ្វីបកូរ៉េ ។ ខ្ញុំក៏សូមអំពាវនាវ ដល់ភាគីពាក់ព័ន្ធទាំងអស់បន្តជំរុញកិច្ចសហប្រតិបត្តិការផ្អែកលើទំនុកចិត្ត និងភាពជាដៃគូយកប្រជាជន ជាស្នូល ដើម្បីកសាងដំណើរឆ្ពោះទៅរកការបង្រួបបង្រួមកូរ៉េទាំងពីរដោយសន្តិភាព ។
