ក្រុមជម្រើសជាតិប្រដាល់គុនខ្មែរសម្រាប់ប្រកួតស៊ីហ្កេមលើកទី៣៣ជម្រុះកីឡាឈ្នះមេដាមាស១០នាក់ចោល
28-December-2025 / សុខភាពនិងកីឡា
ភ្នំពេញ៖កីឡាករកម្ពុជាដែលធ្លាប់ដណ្តើមបានមេដាយមាស ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ដែលប្រារព្ធធ្វើ នៅកម្ពុជា ចំនួន១០នាក់ មិនមានឈ្មោះក្នុង ក្រុមជម្រើសជាតិប្រដាល់គុនខ្មែរ សម្រាប់ត្រៀមការប្រកួតស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥នេះទេ។
យោងតាមលិខិតឧទ្ទេសនាម ចុះហត្ថលេខាទទួលស្គាល់ដោយលោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡានោះ បានបង្ហាញថា មានកីឡាករ និងកីឡាការិនីចំនួន១២នាក់ ត្រូវបានជ្រើសរើសឱ្យចូលរួមប្រមូលផ្តុំជាមួយក្រុមជម្រើសជាតិប្រដាល់គុនខ្មែរ សម្រាប់ត្រៀមស៊ីហ្គេម ឆ្នាំ២០២៥នេះ។ប៉ុន្តែនៅក្នុងចំណោមអ្នកទាំង១២នោះ គ្មានវត្តមានកីឡាករ ឈុត សេរីវ៉ាន់ថង, ឃីម បូរ៉ា, ព្រំ សំណាង, ខាំ ខ្លានាង, កាន់ ម៉េងហុង, ឡៅ ចន្ទ្រា, រឿង សោភ័ណ្ឌ, ម៉ាប់ ធារ៉ា, ហ៊ឹម គឹមរៀងនិង ឃួន ឡាំងកូស៊ីន ដែលធ្លាប់ដណ្តើមបានមេដាយមាស សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជានោះទេ ។
លិខិតឧទ្ទេសនាមនោះ បង្ហាញថា មានតែកីឡាករ ឡៅ ចិត្ត្រា កីឡាករ ផុន ពិសិដ្ឋ និងកីឡាការិនី មឿយ ស៊ឹង ទេ ដែលត្រូវបានជ្រើសរើសឱ្យចូលរួមជាមួយក្រុមជម្រើសជាតិប្រដាល់គុនខ្មែរ ក្នុងនាមជាអ្នកធ្លាប់ដណ្តើមបានមេដាយមាស កាលស៊ីហ្គេម ឆ្នាំ២០២៣ ខណៈកីឡាការិនីម្ចាស់មេដាយមាស ទូច ចាន់វត្តី បានជាប់ជម្រើសជាតិប្រដាល់ឃីកប៊ុកស៊ីងទៅវិញ។ចំណែកបេក្ខភាពចំនួន៩នាក់ទៀត ដែលត្រូវបានជ្រើសរើសជាអត្តពលិកជម្រើសជាតិគុនខ្មែរ លើកនេះ រួមមានកីឡាការិនី ធឿន ដាសុផាន្នី, អេ ព្រីយ៉ានុតភូថង កីឡាករ ជា ចំរើន, ទិន ឌិន, ស៊ីម ស៊ីហុង, ហុង សុវណ្ណច័ន្ទសុធី, អេ វិរៈខាំឈិតភូថង, អេ អាំម៉ារិនភូថង និងកីឡាករជើងខ្លាំងកំពុងទទួលរងរិះគន់លើការបង្ហោះការជក់បារីអេឡិចត្រូនិក (វេប) ធឿន ធារ៉ា ចំណែកលោក អេ ភូថង ត្រូវបានជ្រើសតាំងជាគ្រូបង្គោល និងលោក ឡៅ ស៊ីណាត ជាគ្រូជំនួយ។
ជុំវិញការគ្មានឈ្មោះម្ចាស់មេដាយមាសស៊ីហ្គេម រហូតដល់១០នាក់ នៅការប្រមូលផ្តុំក្រុមជម្រើសជាតិគុនខ្មែរ លើកនេះ បង្កឱ្យមានការមន្ទិលសង្ស័យថា អាចជាការជ្រើសរើសទៅតាមខ្សែបក្ខពួក គឺបំភ្លេចអ្នកមានស្នាដៃជូនជាតិ ។
ករណីយ៍នេះលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានអះអាងពីមូលហេតុថា ការជ្រើសរើសបេក្ខភាពក្រុមជម្រើសជាតិឆ្នាំនេះ គឺផ្តោតខ្លាំងទៅលើសមត្ថភាព និងសមិទ្ធផលជាក់ស្តែងនាពេលបច្ចុប្បន្នរបស់កីឡាករ ហើយអាយុក៏ជាផ្នែកមួយ ត្រូវគិតគូរឡើងវិញផងដែរ។
លោកបានកាសែតថា កាលពីពេលថ្មីៗនេះថា៖ «យើងជ្រើសរើសកីឡាករជម្រើសជាតិ តំណាងឱ្យជាតិនេះ គឺផ្នែកទៅលើសមិទ្ធផល ទម្រង់ប្រកួត និងកម្រិតសមត្ថភាពរបស់គាត់ នាពេលបច្ចុប្បន្ន ព្រោះកីឡាករខ្លះពីមុនគាត់ល្អមែន តែឥឡូវគាត់ធ្លាក់ទម្រង់ អ៊ីចឹងក៏យើងអត់ជ្រើសរើសដែរ គឺយើងជ្រើសរើសយកតែកីឡាករមានទម្រង់ល្អ ក្នុងពេលបច្ចុប្បន្ន»។លោកបានបន្ថែមថា៖ «មួយវិញទៀត យើងមើលទៅលើវ័យដែរ ដោយយើងផ្តោតទៅលើយុវជនឱ្យបានច្រើន ព្រោះគាត់អាចទៅប្រកួតដកស្រង់បច្ចេកទេស នៅស៊ីហ្គេម លើកនេះហើយ គាត់នឹងអាចទៅប្រកួតលើកក្រោយ កាន់តែកើនសមត្ថភាពខ្ពស់ជាងហ្នឹងទៀត»។
សម្រាប់ការជ្រើសរើសកីឡាករជម្រើសជាតិប្រដាល់គុនខ្មែរ លើកនេះ ក៏ផ្តោតសំខាន់ទៅលើប្រភេទកីឡាករ ដែលចេះប្រកួត ក្នុងទម្រង់ពាក់ឧបករណ៍ការពារខ្លួន ជាពិសេសជាកីឡាករ ដែលដឹងពីរបៀបរបប និងច្បាប់នៃការប្រកួតស៊ីហ្គេម លើកទី៣៣នេះ ដែលកំណត់ដោយម្ចាស់ផ្ទះថៃ គឺគេប្រើលក្ខន្តិកប្រកួតបែប Muay Thai មិនមែនបែបគុនខ្មែរ ដូចស៊ីហ្គេម ឆ្នាំ២០២៣នោះទេ។
លោក ខូវ ឆាយ បញ្ជាក់ថា៖ «យើងដឹងហើយថា ការប្រកួតស៊ីហ្គេម មានពាក់ឧបករណ៍ការពារ អ៊ីចឹងកីឡាករមួយចំនួនគាត់ល្អមែន តែល្អបានតែការប្រកួតអាជីព ប៉ុន្តែពេលទៅប្រកួតបែបស្ម័គ្រចិត្ត វាយយកពិន្ទុ មានពាក់ឧបករណ៍ការពារ គាត់វាយអត់បានពិន្ទុទេ។ គាត់អត់មានក្បាច់ មានក្បួន និងមានទម្រង់ក្នុងការប្រកួតបែបហ្នឹងឡើយ ជាពិសេសយើងដឹងថា ការប្រកួតនៅប្រទេសថៃ ច្បាប់គេប្រើបែបណា ហើយកីឡាករណា ដែលសមស្របទៅនឹងការអនុវត្តច្បាប់ប្រកួតបែបនោះ អ៊ីចឹងយើងត្រូវតែជ្រើសរើសឱ្យបានត្រឹមត្រូវ»៕
