អាមេរិកអង់គ្លេសចិនចង់បានការផ្អាកសង្គ្រាមនិងវិលរកការចរចាដោះស្រាយបញ្ហារវាងឥណ្ឌានិងប៉ាគិស្ថាន
16-November-2025 / ព័ត៌មានអន្តរជាតិ
-ឥណ្ឌាប៉ាគិស្ថាន៖កាលពីយប់ថ្ងៃអាទិត្យ ទី១១ ខែឧសភា រដ្ឋមន្ត្រីការបរទេសអាមេរិក លោក Marco Rubio បាននិយាយជាមួយរដ្ឋមន្ត្រីការបរទេសចក្រភពអង់គ្លេស លោកដាវិតឡាមី( David Lammy) និងអធិការបតីអាល្លឺម៉ង់ លោកហ្វ្រែនឌ្រិកមឺឬ( Friedrich Merz) ក្នុងជំនួបតាមទូរសព្ទដាច់ដោយឡែកពីគ្នា ហើយបានបញ្ជាក់ជាថ្មីនូវគោលជំហររបស់សហរដ្ឋអាមេរិក ពាក់ព័ន្ធសង្គ្រាមអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
លោក Lammy និងលោក Rubio ក៏បានពិភាក្សាគ្នាផងដែរអំពីភាពតានតឹងរវាងឥណ្ឌានិងប៉ាគីស្ថាន ហើយបានអំពាវនាវដល់ប្រទេសដែលប្រដាប់ដោយអាវុធនុយក្លេអ៊ែរទាំងពីរនេះ រក្សាបទឈប់បាញ់ឱ្យរឹងមាំហើយបន្តធ្វើការទាក់ទងរវាងគ្នា។ លោក Rubio បាននិយាយថា អាមេរិកគាំទ្រការសន្ទនាគ្នាផ្ទាល់រវាងឥណ្ឌានិងប៉ាគីស្ថាន ហើយលើកទឹកចិត្តឱ្យភាគីទាំងពីរ បន្តប្រឹងប្រែងធ្វើឱ្យការទាក់ទងកាន់តែប្រសើរឡើង។
ដោយឡែកប្រទេសចិនវិញតាមរយៈអ្នកនាំពាក្យបានឆ្លើយប្រាប់កាសែតថា ប្រទេសចិនកំពុងតាមដានយ៉ាងយកចិត្តទុកដាក់ចំពោះស្ថានការណ៍បច្ចុប្បន្នរវាងឥណ្ឌា និងប៉ាគីស្ថាន ហើយមានការព្រួយបារម្ភយ៉ាងខ្លាំង ចំពោះការឡើងកម្តៅនៃស្ថានការណ៍នេះ។ ភាគីចិនអំពាវនាវឱ្យឥណ្ឌានិងប៉ាគីស្ថាន រក្សាចិត្តឱ្យស្ងប់និងមានភាពអត់ធ្មត់ដោយតម្កល់សន្តិភាពនិងស្ថេរភាពជាអាទិភាព ត្រឡប់ទៅរកការដោះស្រាយ តាមផ្លូវនយោបាយដោយសន្តិវិធី និងជៀសវាងកុំចាត់វិធានការណា ដែលធ្វើឱ្យស្ថានការណ៍ឡើងកម្តៅថែមមួយកម្រិតទៀត ។ នេះគឺសមស្របនឹងផលប្រយោជន៍ជាមូលដ្ឋានរបស់ឥណ្ឌា និងប៉ាគីស្ថាន ក៏ដូចជាមានអំណោយផលដល់សន្តិភាព និងស្ថិរភាពក្នុងតំបន់ ហើយក៏ជាការរំពឹងទុកទូទៅ របស់សហគមន៍អន្តរជាតិផងដែរ។ ចិនមានឆន្ទៈបន្តដើរតួនាទីប្រកបដោយ លក្ខណៈស្ថាបនាដើម្បីសម្រេចបានគោលដៅនេះ។
ទាក់បញ្ហានេះមេបញ្ជាការប្រតិបត្តិការយោធាឥណ្ឌានិងប៉ាគីស្ថាន នាថ្ងៃចន្ទនេះ នឹងពិភាក្សាអំពីជំហានបន្ទាប់សម្រាប់ប្រទេសទាំងពីរ ក្រោយបទឈប់បាញ់បានស្តារឡើងវិញ នូវមានភាពស្ងប់ស្ងាត់តាមបណ្តោយព្រំប្រទល់ បន្ទាប់ពីភាគីទាំងពីរបានប្រយុទ្ធគ្នាយ៉ាងខ្លាំងក្លា អស់រយៈពេលប៉ុន្មានថ្ងៃ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១២ ខែឧសភា ឆ្នាំ២០២៥។
កាលពីវេលាយប់កន្លងទៅនេះ មិនមានសេចក្តីរាយការណ៍ទៀតឡើយ អំពីសំឡេងផ្ទុះឬការបាញ់ផ្លោង ក្រោយមានការបំពានខ្លះៗនៅពេលដំបូង បន្ទាប់ពីសម្រេចបានបទឈប់បាញ់។ ខាងកងទ័ពឥណ្ឌាបាននិយាយថា ចន្លោះយប់ថ្ងៃអាទិត្យឈានចូលថ្ងៃចន្ទនេះ គឺជាយប់ស្ងប់ស្ងាត់ដំបូងបង្អស់ គិតក្នុងរយៈពេលប៉ុន្មានថ្ងៃចុងក្រោយ នៅតាមបណ្តោយព្រំប្រទល់។
បទឈប់បាញ់ខាងលើរវាងឥណ្ឌានិងប៉ាគីស្ថាន ដែលសម្រេចបានកាលពីថ្ងៃសៅរ៍ចុងសប្តាហ៍មុន ត្រូវបានប្រកាសដោយប្រធានាធិបតីអាមេរិក លោក ដូណាល់ ត្រាំ ក្រោយរយៈពេល៤ថ្ងៃ នៃការប្រយុទ្ធគ្នាដ៏តានតឹង រួមជាមួយកិច្ចប្រឹងប្រែងការទូតនិងសម្ពាធឱ្យបន្ធូរបន្ថយជម្លោះ ពីសំណាក់ទីក្រុងវ៉ាស៉ីនតោន។
គួរបញ្ជាក់ថា សត្រូវចាស់ទាំងពីរបានបាញ់កាំភ្លើងធំ យន្តហោះដ្រូន និងមីស៉ីលដាក់គ្នាទៅវិញទៅមក ហើយបណ្តាលឱ្យមានមនុស្សស្លាប់ យ៉ាងហោចជាង៤០នាក់ ខណៈទំនាក់ទំនងបានធ្លាក់ចុះដល់ចំណុចដ៏ទាបបំផុតមួយ បន្ទាប់ពីឥណ្ឌាបានទម្លាក់កំហុសលើប៉ាគីស្ថាន សម្រាប់ករណីបាញ់រះដ៏សាហាវមួយ ដែលបានសម្លាប់អ្នកទេសចរ២៦នាក់ នៅតំបន់ Kashmir ប៉ែកគ្រប់គ្រងដោយឥណ្ឌា។ដ្បិតតែមានបទឈប់បាញ់ដ៏ផុយស្រួយដែលសម្របសម្រួលដោយអាមេរិកក៏ដោយ ប៉ុន្តែឥណ្ឌាបានបញ្ជូននាវាចម្បាំង នាវាផ្ទុកយន្តហោះនិងនាវាមុជទឹក ទៅកៀកប៉ាគីស្ថាន ដើម្បីជាការកំញើញ។ក្នុងសេចក្តីថ្លែងការណ៍កាលពីថ្ងៃចន្ទទី១១ខែឧសភាឆ្នាំ២០២៥, កងទ័ពជើងទឹកឥណ្ឌានិយាយថា កម្លាំងជើងទឹក ត្រូវបានបញ្ជូនទៅភាគខាងជើងសមុទ្រអារ៉ាប់ ក្នុងគោលបំណងកំញើញនិងទប់ស្កាត់ ជាមួយប្រតិបត្តិការយ៉ាងពេញលេញនិងពោរពេញដោយសមត្ថភាពវាយប្រហារគោលដៅដែលបានកំណត់នៅសមុទ្រនិងដីគោក ហើយបង្ខំឲ្យកងនាវាចរនិងកងទ័ពអាកាសប៉ាគីស្ថាន រក្សាទីតាំងនៅកំពង់ផែឬនៅជិតឆ្នេរសមុទ្ររបស់ពួកគេ។ជុំវិញបញ្ហានេះដែរ ភាគីប៉ាគីស្ថាន បញ្ជាក់ថា ខ្លួនកំពុងតាមដានស្ថានការណ៍យ៉ាងយកចិត្តទុកដាក់។
ឥណ្ឌាចោទប៉ាគីស្ថានថាបានគាំទ្រអំពើភេរវកម្មឆ្លងដែននៅតំបន់កាស្មៀរកាលពីថ្ងៃ២២ខែមេសាដែលឆក់យកជីវិតទេសចរហិណ្ឌូចំនួន២៦នាក់។ ក្រោយមកឥណ្ឌាក៏បើកប្រតិបត្តិការ «Sindoor» សងសឹកដោយផ្តោតលើអ្វីដែលខ្លួនពណ៌នាថាជាហេដ្ឋារចនាសម្ព័ន្ធភេរវករនៅក្នុងប្រទេសប៉ាគីស្ថាន ហើយអះអាងថា បានសម្លាប់សកម្មប្រយុទ្ធយ៉ាងតិច១០០នាក់ ក្នុងប្រតិបត្តិការណ៍នោះ។ក្នុងពេល ទំនាក់ទំនងរវាងភាគីទាំងពីរបានឡើងកម្តៅឈានដល់កម្រិតខ្ពស់បំផុត ដល់ថ្នាក់មានគំរាមបាញ់នុយក្លេអ៊ែរដាក់គ្នាទៀតផង ប៉ុន្តែទីបំផុតសហរដ្ឋអាមេរិក ក៏ចូលខ្លួនសម្របសម្រួល នាំឲ្យមានបទឈប់បាញ់មួយ ធ្វើឲ្យស្ថានការណ៍ចុះត្រជាក់បន្តិចផងដែរ។
