សម្ពោធស្ពានស្ពានអាកាសនាយករដ្ឋមន្ត្រីណែនាំឲ្យពង្រឹងគុណភាពសាងសង់សំណង់ផ្សេងៗ
21-September-2026 / ផ្សេងៗ
ភ្នំពេញ៖សមិទ្ធផលថ្មីមួយទៀតក្នុងរាជធានីភ្នំពេញ ត្រូវបានសម្ពោធដាក់ឱ្យប្រើប្រាស់ក្រោមអធិតីភាពសម្តេចធិបតីហ៊ុនម៉ាណែតនាយករដ្ឋមន្ត្រីនាព្រឹកថ្ងៃទី៧ ខែមេសា ឆ្នាំ២០២៥ គឺស្ពានអាកាស «មរតកតេជោ» ដែលជាស្ពានអាកាសទី៨ ក្នុងរាជធានីភ្នំពេញ។យោងគ្រោះមហន្តរាយកើតនៅប្រទេសមីយ៉ានម៉ានិងថៃសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឲ្យបង្កើនកិច្ចសហការ និងពង្រឹងការអនុវត្តការងារបច្ចេកទេសក្នុងការកសាងហេដ្ឋារចនាសម្ព័ន្ធរូបវន្ត, ទាំងក្នុងវិស័យរដ្ឋ និងក្នុងវិស័យឯកជន ។
សម្តេចមហាបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «រយៈពេលប៉ុន្មានថ្ងៃចុងក្រោយនេះ គឺមានហេតុការណ៍គ្រោះរញ្ជួយដីនៅប្រទេសមួយចំនួន ក្នុងនោះ នៅតំបន់អាស៉ីអាគ្នេយ៍យើង ដែលបង្កឲ្យមានការលំបាក បាក់រលំ ខូចទ្រព្យសម្បត្តិ និងប៉ះពាល់អាយុជីវិតប្រជាពលរដ្ឋ។ នៅក្នុងលក្ខខណ្ឌនេះ ខ្ញុំសូមណែនាំក្រសួងរៀបចំដែនដី នគរូបនីយកម្ម និងសំណង់, គណៈកម្មាធិការជាតិគ្រប់គ្រងគ្រោះមហន្តរាយ, រដ្ឋបាលរាជធានី-ខេត្ត និងក្រសួងស្ថាប័ន ជំនាញពាក់ព័ន្ធ ត្រូវបង្កើនកិច្ចសហការ និងពង្រឹងការអនុវត្តការងារបច្ចេកទេសក្នុងការកសាងហេដ្ឋារចនាសម្ព័ន្ធរូបវន្ត, ទាំងក្នុងវិស័យរដ្ឋ និងក្នុងវិស័យឯកជន ដើម្បីកាត់បន្ថយ បានជាអតិបរមានូវហានិភ័យ ដែលអាចកើតមានឡើង ដោយសារគ្រោះធម្មជាតិ ឬបម្រែបម្រួលអាកាសធាតុ ដូចបណ្តាប្រទេសក្នុងតំបន់»។
សម្តេចមហាបវរធិបតី ហ៊ុន ម៉ាណែត ក៏បានថ្លែងទៀតថា តាំងពីដើមអាណត្តិមក សម្តេចបានណែនាំក្រសួងរៀបចំដែនដី នគរូបនីយកម្ម និងសំណង់ ពិនិត្យមើលលើសំណង់អគារចាស់ៗ ដែលអាចបង្កហានិភ័យដល់អ្នករស់នៅ។ សម្តេចមហាបវរធិបតី បានអំពាវនាវដល់អ្នករកស៊ីលើការសាងសង់ទាំងឡាយ កុំកេងចំណេញគុណភាពសំណង់ ដែលអាចបង្កគ្រោះថ្នាក់ដល់អ្នករស់នៅ។សម្តេចមហាបវរធិបតី ហ៊ុន ម៉ាណែត បានថ្លែងដែរថា អគារអង្គរជ័យ ដែលជាអគារទ្រុឌទ្រោមមួយ ត្រូវបានដោះស្រាយរួចរាល់ និងហ៊ុមព័ទ្ធ មិនឱ្យមនុស្សចូលនៅទៀតទេ។
សម្តេចបវរធិបតី ហ៊ុន ម៉ាណែត ក៏បានបង្ហើបឱ្យដឹងថា ស្ពានឆ្លងទន្លេប្រមាណ២ ឬ ៣ នឹងត្រូវបើកការដ្ឋានសាងសង់ជាបន្តបន្ទាប់ ដើម្បីបម្រើដល់ការធ្វើដំណើររបស់ប្រជាពលរដ្ឋជាដើម។សម្តេចមហាបវរធិបតី បានឲ្យដឹងថាក្នុងរយៈពេលមុន និងក្រោយបោះឆ្នោត សម្តេចបានអញ្ជើញសម្ពោធ និងបើកការដ្ឋានសាងសង់សមិទ្ធផលចំនួន៥លើក ហើយរួមមាន៖ បើកការដ្ឋានសង់ផ្លូវ៥០ម៉ែត្រ ភ្ជាប់ផ្លូវ៦០ម៉ែត្រ ទៅដង្កោ, សាងសង់ស្ពានចាក់អង្រែក្រោម ទៅព្រែកប្រា, បើកការដ្ឋានស្ពានអាកាសភ្លោះ, សម្ពោធអាងប្រព្រឹត្តកម្មទឹកកខ្វក់ និងសម្ពោធស្ពានអាកាសមរតកតេជោ។
សូមបញ្ជាក់ថាស្ពានអាកាសមរតកតេជោ ស្ថិតនៅចំណុចប្រសព្វរវាងខណ្ឌចំការមន និងខណ្ឌមានជ័យ រាជធានីភ្នំពេញ ត្រូវបានបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានាពេលបច្ចុប្បន្ន។ការដ្ឋានសាងសង់ប្រើរយៈពេលសាងសង់ត្រឹមតែ ៣០ខែប៉ុណ្ណោះលើគម្រោង៣៨ខែ។ស្ពានអាកាសមរតកតេជោ បានចំណាយថវិកាសាងសង់អស់ចំនួន ៣៦.៧៧៥.០០០ដុល្លារ ជាកញ្ចប់ថវិកាបានពីមូលនិធិអភិវឌ្ឍកោះនរា និងថវិកាមួយផ្នែក ដែលនៅសល់ពីការអនុវត្តគម្រោងសាងសង់ស្ពានអាកាសក្បាលថ្នល់ដំណាក់កាលទី២។ ស្ពាននេះ គឺជាស្ពានអាកាសទី១ ដែលត្រូវសម្ពោធដាក់ឱ្យប្រើប្រាស់ជាផ្លូវការក្នងអាណត្តិរាជរដ្ឋាភិបាល នីតិកាលទី៧ នៃរដ្ឋសភា។
ស្ពានអាកាសមរតកតេជោ ជាស្ពានអាកាសមានកម្ពស់២ជាន់ និងមានផ្លូវខ្វាត់ខ្វែងច្រើនជាងគេ បើធៀបនឹងស្ពានអាកាសចំនួន៧ដែលដាក់ឱ្យប្រើប្រាស់រួចហើយនោះ។បច្ចុប្បន្នរាជធានីភ្នំពេញមានស្ពានអាកាសចំនួន៨ បានសាងសង់រួចរាល់ និងដាក់ឱ្យប្រើប្រាស់។ ស្ពានអាកាសទាំង៨រួមមាន៖ ស្ពានអាកាសក្បាលថ្នល់ (២៤ មិថុនា ២០១០), ស្ពានអាកាស៧មករា (៦ មករា ២០១២), ស្ពានអាកាសស្ទឹងមានជ័យ (៣១ កក្កដា ២០១៤), ស្ពានអាកាស៥មករា (៥ មករា ២០១៦), ស្ពានអាកាសមិត្តភាពកម្ពុជា-ចិន សែនសុខ ឬហៅថា «ស្ពានអាកាសផ្សារដីហ៊ុយ» (២ កក្កដា ២០១៨), ស្ពានអាកាសរង្វង់មូលចោមចៅ (៣១ មីនា ២០២២), ស្ពានអាកាសឫស្សីកែវ ស្ថិតលើផ្លូវជាតិលេខ៥ (៣១ ខែឧសភា ឆ្នាំ២០២៣) និងស្ពានអាកាសមរតកតេជោ សម្ពោធដាក់ឱ្យប្រើប្រាស់នាព្រឹកថ្ងៃចន្ទ ទី៧ ខែមេសា ឆ្នាំ២០២៥។
ក្រៅពីស្ពានអាកាសទាំង៨នេះ បច្ចុប្បន្នរដ្ឋបាលរាជធានីភ្នំពេញ ក៏កំពុងសាងសង់ស្ពានអាកាសភ្លោះ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន និងផ្លូវជាតិលេខ២ ព្រំប្រទល់រវាងរាជធានីភ្នំពេញ និងខេត្តកណ្តាល។ ស្ពានអាកាសភ្លោះតម្លៃជាង ១៦លានដុល្លារនេះ ត្រូវបានបើកការដ្ឋានសាងសង់ដោយសម្តេចសម្តេចមហាបវរធិបតី កាលពីថ្ងៃទី១៧ ខែមិថុនា ឆ្នាំ២០២៤ ហើយគ្រោងបញ្ចប់ការសាងសង់ក្នុងពេលឆាប់ៗខាងមុខនេះ។
