វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 196 នាក់
ម្សិលមិញ 4988 នាក់
សរុប 14172985 នាក់
ខេត្តពោធិសាត់៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី៣១ ខែមីនា ឆ្នាំ២០២៤នេះ បានបញ្ជាក់ឲ្យដឹងថា រាជរដ្ឋាភិបាល ត្រៀមស្នើដាក់សម្បត្តិវប្បធម៌ខ្មែរ៧ទៀត ទៅក្នុងបញ្ជីសម្បត្តិបេតិកភណ្ឌពិភពលោក។ក្នុងឱកាស អញ្ជើញជាអធិបតីភាព សម្ពោធឆ្លងព្រះបទុមចេតិយ និងសមិទ្ធផលនានា នៅវត្តមណីរតនារាម ស្ថិតក្នុងសង្កាត់រលាប ក្រុងពោធិ៍សាត់ ខេត្តពោធិ៍សាត់ នាព្រឹកថ្ងៃទី៣១ ខែមីនា ឆ្នាំ២០២៤នេះសម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «យើងត្រៀមចុះបញ្ជីចំនួន៧ថែមទៀត ក្នុងនោះមាន៖ គុកទួលស្លែង, បន្ទាយឆ្មារ, អង្គរបុរីភ្នំដារ, ភ្នំព្រះរាជទ្រព្យ, ប្រាសាទកំពង់ស្វាយ, ប្រាសាទបេងមាលា និងភ្នំគូលែន ទៅក្នុងបញ្ជីសម្បត្តិបេតិកភណ្ឌពិភពលោក»។
សម្តេចធិបតី ហ៊ុន ម៉ាណែត ក៏បានឲ្យដឹងដែរថា រាជរដ្ឋាភិបាល ក៏ត្រៀមចុះបញ្ជីថែមទៀត នូវក្រមា, អាពាហ៍ពិពាហ៍ខ្មែរ និងសង្រា្កន្ដ ដើម្បីឲ្យពិភពលោកបានស្គាល់។សម្តេចធិបតី ហ៊ុន ម៉ាណែត បានបញ្ជាក់ឲ្យដឹងថា សម្ដេចបានឲ្យក្រសួងវប្បធម៌ និងវិចិត្រ តៀមរៀបចំឯកសារ ដើម្បីដាក់ពាក្យ «សង្ក្រាន្ត» ចុះបញ្ជីបេតិកភណ្ឌអរូបិយ ឲ្យបានរួចរាល់ នៅឆ្នាំក្រោយ ដើម្បីអាចចូលនៅក្នុងឆ្នាំ២០២៦ កុំមានមន្ទឹលសង្ស័យតទៅទៀត។
សម្តេចធិបតី ហ៊ុន ម៉ាណែត ថ្លែងអំណរគុណដល់ព្រះសង្ឃ គណៈកម្មការវត្ត និងអាជ្ញាធរ សប្បុរសជនទាំងអស់ ដែលបានរួមគ្នាញ៉ាំងឱ្យសមិទ្ធផលនេះលេចជារូបរាងឡើងនិងបានចាត់ទុកសំណង់ផ្នែកព្រះពុទ្ធសាសនានៅក្នុងវត្តមណីរតនារាម នឹងក្លាយជាសំណង់ផ្នែកព្រះពុទ្ធសាសនាចាក់គ្រឹះរាប់រយឆ្នាំទៅមុខទៀត។វត្តមណីរតនារាម មានទីតាំងស្ថិតនៅតាមបណ្តោយផ្លូវជាតិលេខ៥ មានចម្ងាយប្រមាណ ៤០០ម៉ែត្រ ពីផ្លូវជាតិលេខ៥ មានផ្ទៃដី ទំហំប្រាំបីហិកតា ដែលមានទីតាំងស្ថិតនៅក្នុងភូមិថ្នល់បំបែក សង្កាត់រលាប ក្រុង ពោធិ៍សាត់ ខេត្តពោធិ៍សាត់។
លោក ខូយ រីដាអភិបាលខេត្តពោធិ៍សាត់បានថ្លែងពីប្រវត្តិ នៃការកកើតវត្តនេះថា ពីដំបូងទីវត្តនេះមានឈ្មោះថា មណ្ឌលសិក្សាព្រះពុទ្ធសាសនា មណីរត្ន ដែលកាលមុនជា មជ្ឈមណ្ឌលអប់រំព្រះពុទ្ធសាសនា មានទីតាំងនៅក្នុងវត្តកែវសុវណ្ណ ឃុំបន្ទាយដី ស្រុក ណ្តៀង ខេត្តពោធិ៍សាត់។ ដើម្បីពង្រីកមណ្ឌលអប់រំឱ្យទូលំទូលាយងាយស្រួលដល់អ្នកសិក្សា ប្រតិបត្តិ និងជា ទីគង់នៅសិក្សារបស់ព្រះសង្ឃផងនោះ ទើបគណៈកម្មការបាន ផ្តួចផ្តើមគំនិតបង្កើតឱ្យមាន មណ្ឌល សិក្សាមួយដោយឡែក នៅលើទីតាំងណាមួយមិនឆ្ងាយពេកពីទីប្រជុំជន។ លោក ជុក ម៉ិលសន្តិភាព និងឧបាសិកា ជា កែវមុនី លោកបានបរិច្ចាគដីស្រែរបស់លោក ដែលមានទីតាំង ក្នុងភូមិថ្នល់បំបែក ឃុំរលាប ស្រុកសំពៅមាស(បច្ចុប្បន្នក្រុងពោធិ៍សាត) ខេត្តពោធិ៍សាត់ ទំហំ ២ហិកតា ប្រគល់ជូនគណៈកម្មការសម្រាប់សាងសង់ជាមណ្ឌលសិក្សា ហើយបានស្នើសុំបង្កើតមណ្ឌលអប់រំព្រះពុទ្ធ សាសនា ។
បន្ទាប់មកបានប្តូរទីតាំងមជ្ឈមណ្ឌលអប់រំព្រះពុទ្ធសាសនាពីវត្តកែវសុវណ្ណ មកសាងសង់លើទីតាំងថ្មីនៅឆ្នាំ២០០១ ដោយបានប្តូរ ឈ្មោះ ពីមជ្ឈមណ្ឌលអប់រំព្រះពុទ្ធសាសនា ជាពុទ្ធសាសនមណ្ឌលមណីរត្នវិញ។ នៅថ្ងៃទី១៩ ខែធ្នូ ឆ្នាំ២០០១ បានបើកការដ្ឋានជីកស្រះទំហំ ៣០ម៉ែត្រx៥០ម៉ែត្រ យកអាចម៌ដី ចាក់បំពេញទីធ្លាបានទំហំ ៤៥ម៉ែត្រx១០០ម៉ែត្រ និងសង់កុដិតូចប្រក់ ស័ង្កសីទំហំ ៤ម៉ែត្រx៥ម៉ែត្រ បានចំនួន ៣ខ្នង សង់សាលា ប្រក់ស័ង្កសីទំហំ ១៣ម៉ែត្រx១៣ម៉ែត្រ បាន ១ខ្នង សង់ផ្ទះបាយ ប្រក់ស័ង្កសី ទំហំ ៤ម៉ែត្រX៩ម៉ែត្រ បាន ចំនួន១ខ្នង បន្ទាប់មក នៅ ឆ្នាំ២០០២ បាន បើកសាលារៀនព្រះធម៌ និងនិមន្ត ភិក្ខុ សាមណេរ គង់ក្នុងមណ្ឌលសិក្សា ហើយបាននិមន្ត ធម្មាចារ្យ ព្រះ ភិក្ខុវជិរប្បញ្ញោ សាន សុជា និងភិក្ខុ-សាមណេរ ចំនួន ៤អង្គផ្សេងទៀត មកបើកបង្រៀនព្រះធម៌ និងគង់នៅក្នុងមណ្ឌលបន្ទាប់មក ត្រូវបានប្តូរឈ្មោះពី ពុទ្ធសាសនមណ្ឌលមណីរត្ន ទៅជាមណ្ឌលសិក្សាព្រះពុទ្ធសាសនា មណីរត្នវិញ។
ក្រោមកិច្ចដឹកនាំផ្តួចផ្តើមរបស់ភិក្ខុវជិរប្បញ្ញោ សាន សុជា និងមានការឧបត្ថម្ភពីសប្បុរសជន ដោយមានការចូលរួមពីពុទ្ធបរិស័ទជិតឆ្ងាយក្នុង និងក្រៅប្រទេស បានកសាងជាបន្តបន្ទាប់ រួមមាន : ផ្លូវក្រាលគ្រួសក្រហមចូលទៅមណ្ឌលទំហំ ៧ម៉ែត្រ កម្ពស់១,៥ម៉ែត្រ ប្រវែង៩៥០ម៉ែត្រ និងសមិទ្ធផលជា ច្រើនទៀតជាបន្តបន្ទាប់។ ដោយការរីកចម្រើនក្នុងការគោរពប្រតិបត្តិ ទាំងការរីកចម្រើនសមិទ្ធផល នៅឆ្នាំ២០១០ បានឯកភាព មតិស្នើសុំប្តូរឈ្មោះពីមណ្ឌលសិក្សាព្រះពុទ្ធសាសនា មណីរត្ន ទៅជាវត្តមណីរតនារាមវិញ។ វត្តថ្មីនេះ ត្រូវដាក់ឱ្យព្រះសង្ឃ ពុទ្ធបរិស័ទគោរពប្រតិបត្តិ និងធ្វើបុណ្យទានឱ្យបានត្រឹមត្រូវ ទៅតាមពុទ្ធ ប្បញ្ញត្តិ និងពុទ្ធានុញ្ញាត ព្រមទាំងច្បាប់របស់រដ្ឋាភិបាលកម្ពុជា។
សមិទ្ធផលដែលបានបន្តកសាង និងសម្រេចបង្ហើយរួចរាល់ រួមមាន៖ ១- ព្រះបទុមចេតិយ ដែលមានកម្ពស់ ៥១ម៉ែត្រ ផ្ចិតបាតទម្រប្រវែង ២២ម៉ែត្រ អមដោយ ស្រះទឹកព័ទ្ធជុំវិញ លម្អទៅដោយសួនច្បារក្នុងផ្ទៃដីប្រមាណជា ១ហិកតា។២- កែសម្រួលសាលាភត្ត ១ខ្នងទំហំ ៣ ៧២០ ម៉ែត្រការ៉េ។៣- ចាក់សាបបេតុងទីធ្លាជុំវិញ ធ្វើឱ្យមានភាពងាយស្រួល ដល់ពុទ្ធបរិស័ទធ្វើដំណើរ។៤- សាលាបាលី ២ជាន់ មាន ៤បន្ទប់
។៥- សមូហចេតិយចំនួន១ ទុកសម្រាប់ដាក់តម្កល់អដ្ឋិធាតុរបស់អាចារ្យ គណៈកម្មការ និងពុទ្ធបរិស័ទទាំងឡាយ ដែលគ្មានលទ្ធភាព។៦- ស្ថានីយបុស្តិ៍វិទ្យុផ្សព្វផ្សាយសំឡេងព្រះធម៌ ១ខ្នង ដែលកំពុងដំណើរការផ្សព្វផ្សាយព្រះធម៌ជារៀងរាល់ថ្ងៃ។
៧- កុដិថ្មបេតុងជញ្ជាំងឥដ្ឋប្រក់ក្បឿង ១ខ្នង។គិតមកដល់ពេលនេះ ការកសាងសង់ព្រះបទុមចេតិយ និងរៀបចំទីធ្លាខាងមុខ ចំណាយអស់ទឹក ប្រាក់សរុបចំនួន ១ ៣០០ ០០០ ដុល្លារអាមរិក (មួយលាន បីរយពាន់ ដុល្លារអាមេរិក) នៅមានការខ្វះខាត ការកសាង សមិទ្ធផលនានា ជាច្រើនទៀតសម្រាប់ពុទ្ធបរិស័ទប្រើប្រាស់ជាឧត្តមប្រយោជន៍ក្នុងវិស័យ ពុទ្ធចក្រ និងអាណាចក្រ សូមគោរពជូន ឯកឧត្តម លោកជំទាវ អ្នកឧកញ៉ា ឧកញ៉ា សប្បុរសជន ពុទ្ធបរិស័ទ មេត្តាចូលរួមចាប់មគ្គផលតាមកម្លាំងសទ្ធាជ្រះថ្លារៀងៗខ្លួនបន្ថែមទៀត ដើម្បីលើកកម្ពស់ វិស័យព្រះពុទ្ធ សាសនា ក្នុងព្រះរាជាណាចក្រកម្ពុជារបស់យើង៕