នាយករដ្ឋមន្ត្រីថៃរួចខ្លួនពិការដេញដោលទម្លាក់តំណែង
21-September-2026 / ព័ត៌មានអន្តរជាតិ
ប្រទេសថៃ៖ក្នុងរយៈពេលពីរថ្ងៃនៃការតស៊ូមតិនៅក្នុងសភា លោកស្រីនាយករដ្ឋមន្ត្រីវ័យ៣៨ឆ្នាំ ផេថងថាន ស៊ីណាវ៉ាត់ (Paetongtarn Shinawatra) បានរងការវាយប្រហារយ៉ាងខ្លាំងតាំងពីសំណុំរឿងគេចពន្ធដល់ពិធីការដឹកនាំប្រទេស។ នៅក្នុងញត្តិចាប់ថ្នាក់សុំដកទំនុកចិត្តពីប្រមុខរដ្ឋាភិបាល បក្សប្រឆាំងបានបន្ទោសអំពីវិធីគ្រប់គ្រងប្រទេស និងកង្វះបទពិសោធន៍របស់លោកស្រីនាយករដ្ឋមន្ត្រី ព្រមទាំងបានចោទលោកស្រីផេថងថានថាបានដឹកនាំប្រទេសក្រោមខ្សែញាក់របស់លោកថាក់ស៊ីន ស៊ីណាវ៉ាត់ជាឪពុក។
នាយករដ្ឋមន្ត្រីថៃ បានហែលឆ្លងសំណួរនានាដោយគ្មានភាពភ័យខ្លាចពីការវាយលុករបស់គណបក្សប្រឆាំង បានបញ្ជាក់ជាថ្មីអំពីស្ថិរភាពនៃក្រុមចម្រុះដែលកំពុងកាន់អំណាច។យោងតាមរ៉យទ័រ នាយករដ្ឋមន្ត្រីវ័យក្មេងបំផុតរបស់ប្រទេសថៃលោកស្រី ផែថងថាន បានឈ្នះការគាំទ្រពីសមាជិកសភាចំនួន ៣១៩នាក់ក្នុងចំណោមសមាជិកសភា ៤៨៨រូប ។ការបោះឆ្នោតដកទំនុកចិត្តលើលោកស្រីផែថងថាន គឺជាការសាកល្បងដំបូងនៃអាណត្តិរបស់នាយករដ្ឋមន្ត្រីជាងប្រាំពីរខែ បន្ទាប់ពីលោកស្រីត្រូវបានទទួលដំណែងជានាយករដ្ឋមន្ត្រីដោយនឹកស្មានមិនដល់ក្នុងការចាប់អារម្មណ៍ផ្នែកនយោបាយដែលមិនធ្លាប់កាន់តំណែងជាសាធារណៈដោយជំនួសលោក សេដ្ឋា ថាវីស៊ី ដែលជាសម្ព័ន្ធមិត្ត បន្ទាប់ពីការដកតំណែងរបស់គាត់ដោយតុលាការរំលោភលើក្រមសីលធម៌។
“គ្រប់សំឡេង ប្រឆាំងក្តី គាំទ្រក្តី គឺសុទ្ធតែជាកម្លាំងចលករុញខ្ញុំ និងរដ្ឋាភិបាលឱ្យបន្តប្រឹងធ្វើការខ្លាំងបន្ថែមទៀតដើម្បីបម្រើពលរដ្ឋ” នេះជាប្រសាសន៍របស់លោកស្រីផេថងថាននៅតាមបណ្តាញសង្គម ក្រោយពីសភាបានច្រានចោលញត្តិប្រឆាំងនឹងលោកស្រី។ទន្ទឹមនឹងនោះ តាមសេចក្តីរាយការណ៍ លោក Nattapong Ruangpanyawut ប្រធានគណបក្សប្រជាជនក្នុងនាមជាមេដឹកនាំបក្សប្រឆាំងដ៏ធំជាងគេនៅក្នុងសភា រួមទាំងសមាជិកគណបក្សប្រជាជនមួយចំនួនទៀត បានបង្ហាញការអបអរសាទរនិងថតរូបជាមួយនាយករដ្ឋមន្ត្រី ផែថងថាន នៅក្នុងសភា រួមជាមួយនឹងសមាជិកគណៈរដ្ឋមន្ត្រីមួយចំនួនផងដែរតាមសេចក្តីរាយការណ៍ គេឃើញសមាជិកសភាមកពីគណបក្សចម្រុះរដ្ឋាភិបាលបាននាំថតរូបជាក្រុមជាមួយនឹងទឹកមុខញញឹមរីករាយ ជាពិសេសនាយករដ្ឋមន្ត្រី ផែថងថាន បានបង្ហាញទឹកមុខស្រស់ស្រាយស្នាមញញឹទៅកាន់អ្នកពាក់ព័ន្ធក្នុងលក្ខណៈមិត្តភាព។
សូមរំឭកថា ជានាយករដ្ឋមន្ត្រីថៃដ៏ក្មេងជាងគេបំផុត លោកស្រីផេថងថានបានចូលកាន់តំណែងជាប្រមុខរដ្ឋាភិបាលចម្រុះ កាលពីខែសីហា។ ចំណែកលោកថាក់ស៊ីន ស៊ីណាវ៉ាត់ជាឪពុកដែលធ្លាក់ពីអំណាចនៅឆ្នាំ២០០៦ដោយរដ្ឋប្រហារធ្លាប់បានប្រកាសមិនលូកលាន់ក្នុងនយោបាយទៀតទេ។ ប៉ុន្តែលោកនៅតែសកម្មខ្លាំង ជាពិសេសដើម្បីការពារបក្សភឿថៃរបស់លោក។ជាមហាសេដ្ឋីមានទ្រព្យដល់ទៅ ២១០០លានដុល្លារ (Forbes) និងបាននិរទេសខ្លួនចេញពីប្រទេសកាលពីឆ្នាំ២០០៨ ដើម្បីគេចពីការកាត់ទោសក្នុងបទពុករលួយប្រព្រឹត្តក្នុងអំឡុងពេលកាន់អំណាច ពីឆ្នាំ២០០១-២០០៦ អតីតនាយករដ្ឋមន្ត្រីថាក់ស៊ីនដែលនៅតែមានប្រជាប្រិយភាពខ្លាំងក្នុងរង្វង់ប្រជាពលរដ្ឋជនបទថៃទើបអាចត្រឡប់ចូលមាតុប្រទេសវិញកាលពីខែសីហា ២០២៣។
ពេលមកដល់ទឹកដីកំណើតភ្លាម លោកថាក់ស៊ីនក៏ទទួលបានការអនុគ្រោះទោសពីព្រះមហាក្សត្រ និងអាចបញ្ចប់ទោសនៅក្រៅឃុំ ក្រោមហេតុផលអាយុច្រើន និងមានសុខភាពមិនល្អត្រឹមថ្ងៃទី៣១ សីហា២០២៤ ពោលគឺនៅពេលកូនស្រីបានក្លាយជានាយករដ្ឋមន្ត្រីថៃតែប៉ុន្មានថ្ងៃ។ ហេតុដូច្នេះហើយបានជាបក្សប្រឆាំងយល់ថា មានការព្រមព្រៀងស្ងាត់ៗសម្រួលឱ្យឪពុក និងអ្នកទោសផ្សេងទៀតបានរួចខ្លួន។ នេះបើតាមពាក្យចោទរបស់សមាជិកបក្សប្រជាជនជាបក្សប្រឆាំងនៅក្នុងការតស៊ូមតិនៅសភា។
