សាលក្រម​តុលាការ​ធម្មនុញ្ញ​ស្តារនីតិសម្បទា​ប្រមុខរដ្ឋស្តីទី​កូរ៉េខាងត្បូង​ឡើងវិញ​

​កូរ៉េខាងត្បូង​៖​ការិយាល័យ​ប្រធានាធិបតី​បានប្រកាស​នៅ​ថ្ងៃទី​២៤​មីនា​នេះ បានបង្ហាញ​ជំហរ​ស្វាគមន៍​របស់ខ្លួន​លើ​សាលក្រម​របស់​តុលាការ​ធម្មនុញ្ញ​ក្នុងការ​ច្រានចោល​ការចោទប្រកាន់​ទម្លាក់​អំណាច​ប្រឆាំងនឹង​ប្រធានាធិបតី​ស្តីទី និង​នាយករដ្ឋមន្ត្រី Han Duck-soo ដែល​រដ្ឋសភា​គ្រប់គ្រង​ដោយ​បក្ស​ប្រជាធិបតេយ្យ​ដែលជា​បក្សប្រឆាំង​បានធ្វើ​កាល​ថ្ងៃទី​២៧​ខែធ្នូ​ឆ្នាំមុន​។​ 

​ការិយាល័យ​នាំពាក្យ​របស់​ប្រធានាធិបតី កូរ៉េ​បាន​អះអាងថា​៖«​សេចក្តីសម្រេច​របស់​តុលាការ​ធម្មនុញ្ញ​នៅថ្ងៃនេះ​បានបង្ហាញ​ឱ្យឃើញ​ជាថ្មី​ម្តង​ទៀតថា ការរំលោភ​លើ​ការចោទប្រកាន់​របស់រ​ដ្ឋ​សភា​គឺជា​ការវាយលុក​នយោបាយ​ដែល​មិន​ប្រុងប្រយ័ត្ន និង​មាន​ចរិត​ព្យាបាទ​» ហើយ «​យើង​សង្ឃឹមថា​ការវិល​ត្រឡប់មក​ធ្វើការ​វិញ​របស់​នាយក​រដ្ឋមន្ត្រី Han នឹង​ក្លាយជា​ចំណុច​ចាប់ផ្តើម​សម្រាប់​ការធ្វើឱ្យ​ប្រក្រតីភាព​នៃ​កិច្ចការរដ្ឋ​»​។​​តុលាការ​ធម្មនុញ្ញ​បានបញ្ជាក់​ពី​ហេតុផល​របស់ខ្លួន​ក្នុងការ​ច្រានចោល​ករណី​នេះ​ដោយ​និយាយថា «​វា​មិនអាច​កំណត់​បាន​ថា​ការបំពានច្បាប់​របស់​នា​យក​រដ្ឋមន្ត្រី Han គឺជា​ការ​ក្បត់​ការជឿទុកចិត្ត​របស់​ប្រជាជន​ដែល​ផ្តល់​ដោយ​ប្រយោល​តាមរយៈ​ប្រធានាធិបតី​ដែលមាន​អំណាច​តែងតាំង​គាត់​»​។​​តុលាការ​ធម្មនុញ្ញ​នៅ​ថ្ងៃទី​២៤​ខែមីនា​នេះ បានចេញ​សាលក្រម​ច្រានចោល​ការចោទប្រកាន់រ​បស់​រដ្ឋសភា​ទម្លាក់​អំ​ណា​ច​របស់​នាយករដ្ឋមន្ត្រី Han Duck-soo កាល​ថ្ងៃទី​២៧​ខែធ្នូ​ឆ្នាំ​២០២៤ ដោយ​ចៅក្រម​នៃ​តុលាការ​ធម្មនុញ​៨​រូប ក្នុងនោះ ចៅក្រម​៥​រូប​បើ​ឆ្នោត​ឲ្យ​បន្ត​តូ​នាទី ១​រូប​បោះឆ្នោត​ប្រឆាំង និង ២​រូប​អនុប្បវាទ​។

​ទីភ្នាក់ងារ​ព័ត៌មាន​រ៉​យ​ទ័​រ​បាន​រាយការណ៍​ថា​៖«​តុលាការ​ធម្មនុញ្ញ​កូរ៉េ​បាន​ច្រានចោល​ការចោទប្រកាន់​ប្រឆាំងនឹង​នាយករដ្ឋមន្ត្រី Han ហើយ​បាន​បញ្ជា​ឲ្យ​អំណាច​របស់គាត់​ឡើងវិញ​» ដោយ​កត់សម្គាល់ថា​៖«​ស្ថានភាព​នយោបាយ​ដែលមាន​ភាពចលាចល​ចាប់តាំងពី​នាយករដ្ឋមន្ត្រី​ហាន​ត្រូវបាន​ចោទប្រកាន់​កាលពី​ពីរ​ខែ​មុន​បាន​ឈានដល់​ចំណុច​របត់​មួយ​»​។​​ប្រធានាធិបតី​ស្តីទី​លោក​ហាន​ឌុ​ក​ស៊ូ​( Han Duck-soo) ត្រូវបាន​ចោទប្រកាន់​ពី​រដ្ឋសភា​គណបក្សប្រឆាំង​ទម្លាក់​ពី​អំណាច​នៅ​ថ្ងៃទី​២៧​ខែធ្នូ ឆ្នាំ​២០២៤ បន្ទាប់ពី​លោក​បដិសេធ​ក្នុងការ​តែងតាំង​ចៅក្រម​បី​រូប​ដែល​អនុម័ត​ដោយ​រដ្ឋសភា​ទៅកាន់​កៅអី​តុលាការ​ធម្មនុញ្ញ​ដែល​នៅ​ទំនេរ និង​ការ​វេតូ​របស់លោក​ប្រឆាំង​សេចក្តីព្រាងច្បាប់​ប្រឹក្សា​ពិសេស​ដែល​បង្កើតឡើង​ដោយ​សភា ក្នុង​បំណង​ស៊ើបអង្កេត​ប្រធានាធិបតី Yoon Suk Yeol និង​ជំទាវ​ទីមួយ Kim Keon-hee​។ នៅពេលនោះ លោក Han កំពុងកាន់​តំណែង​ជា​ប្រធានាធិបតី​ស្តីទី បន្ទាប់ពី​ការចោទប្រកាន់​របស់​ប្រធានាធិបតី Yoon ជុំវិញ​ការប្រកាស​ច្បាប់អាជ្ញាសឹក​ដែល​បរាជ័យ​។

​បន្ទាប់ពី​ការសម្រេច​នេះ លោក Han បានបង្ហាញ​ការប្ដេជ្ញាចិត្ត​ក្នុងការ​ដោះស្រាយ​បញ្ហា​ប្រឈម​ពាណិជ្ជកម្ម​ពិភពលោក និង​បានបញ្ជាក់​ពី​តម្រូវការ​សម្រាប់​ការឯកភាព​ជាតិ​។​តុលាការ​ធម្មនុញ្ញ​មិនទាន់​ប្រកាស​អំពី​កាលបរិច្ឆេទ​លើ​សេចក្តីសម្រេច​របស់ខ្លួន​ទាក់ទង​នឹង​ការចោទប្រកាន់​លោក​ប្រធានាធិបតី​យុន​( Yoon) នៅឡើយ​ទេ​។ ប្រសិនបើ​ការចោទប្រកាន់​របស់លោក Yoon ត្រូវបាន​តុលាការ​ធម្មនុញ្ញ​តម្កល់​ការចោទប្រកាន់​របស់​ស​ភា នោះ​ការបោះឆ្នោត​ប្រធានាធិបតី​ថ្មី​នឹងត្រូវ​បានទាមទារ​ក្នុង​រយៈពេល​៦០​ថ្ងៃក្រោយ​។​ក្នុងករណី​តុលាការ​ធម្មនុញ្ញ​បដិសេធ​ការចោទប្រកាន់​ដូច​ករណី លោក Han ពេលនោះ លោក Yoon Suk Yeol នឹង​បន្ត​តួនាទី​ជា​ប្រធានាធិបតី​វិញ​។ ក្នុងពេល​ជាមួយគ្នានេះ Yoon ប្រឈមមុខ​នឹង​ការចោទប្រកាន់​ផ្លូវច្បាប់​យ៉ាងធ្ងន់ធ្ងរ រួមទាំង​ការចោទប្រកាន់​ពី​ការបះបោរ ដែល​រួមចំណែក​ដល់​បរិយាកាស​នយោបាយ​ដ៏​តានតឹង​ក្នុងប្រទេស​កូរ៉េខាងត្បូង​។

សារពត៍មានBloomberg ក៏បាន​រាយការណ៍​ផងដែរ​ថា ៖«​តុលាការ​ធម្មនុញ្ញ​បាន​លុបចោល​ការចោទប្រកាន់​ប្រឆាំងនឹង​នាយករដ្ឋមន្ត្រី Han ហើយ​បាន​បញ្ចូល​គាត់​ជា​ប្រធានាធិបតី​ស្តីទី​” ដោយ​បន្ថែមថា​៖«​សេចក្តីសម្រេច​នេះ​បាន​ទាក់ទាញ​ការយកចិត្តទុកដាក់​ដូចដែល​វា​បាន​កើតឡើង​មុនពេល​ការសម្រេចចិត្ត​ទាក់ទង​នឹង​ការចោទប្រកាន់​ប្រធានាធិបតី Yoon Suk-yeol»​។​​វា​ត្រូវបាន​គេ​លើកឡើងថា ៖«​សេចក្តីសម្រេច​ទាក់ទង​នឹង​នាយករដ្ឋមន្ត្រី Han គឺជា​ករណី​ដំបូង​ដែល​តុលាការ​ធម្មនុញ្ញ​បានធ្វើ​សេចក្តីសម្រេច​ទាក់ទង​នឹង​ច្បាប់អាជ្ញាសឹក​របស់​ប្រធានាធិបតី Yoon” ហើយ​ថា “​អ្នក​តវ៉ា​រាប់ពាន់នាក់​បាន​ប្រមូល​ផ្តុំគ្នា​នៅ​ទីក្រុង​សេ​អ៊ូ​ល ដើម្បី​មើលថា​តើ​តុលាការ​ធម្មនុញ្ញ​នឹង​ទទួលយក​ឬក៏​ច្រានចោល​ការចោទប្រកាន់​ប្រឆាំងនឹង​ប្រធានាធិបតី Yoon”​។​

​កាសែត Washington Post (WP) បាន​រាយការណ៍​ថា​៖«​តុលាការ​ធម្មនុញ្ញ​បានដាក់​នាយករដ្ឋមន្ត្រី Han ឡើងវិញ ចំពេល​មាន​ចលាចល​នយោបាយ​ធ្ងន់ធ្ងរ​» ដោយ​បន្ថែមថា​៖«​ការសម្រេចចិត្ត​នេះ​ត្រូវបាន​ធ្វើឡើង​មុនពេល​រដ្ឋសភា​បាន​បោះឆ្នោត​លើ​សំណើ​ចោទប្រកាន់​លើ​ប្រធានាធិបតី​ស្តីទី និង​ជា​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ Choi Sang-mok»​។​​សារព័ត៌មាន The Straits Times បាន​ឲ្យ​ដឹងថា សាលក្រម​ចោទប្រកាន់​លោកនាយក​រដ្ឋមន្ត្រី​ហាន​បាន​កើតឡើង​ត្រឹមតែ​ជាង​មួយខែ​ប៉ុណ្ណោះ បន្ទាប់ពី​សវនាការ​លើ​អង្គសេចក្តី​បានបញ្ចប់​ក្នុងសម័យ​ប្រជុំ​តែមួយ​នៅ​ថ្ងៃទី​១៩​ខែកុម្ភៈ​។​​បន្ទាប់ពី​ការប្រកាស​សាលក្រម​របស់​នាយករ​ដ្ឋ​មន្ត្រី Han ក្រុម​អ្នកសង្កេតការណ៍​ជឿថា វា​នឹង​ត្រួសត្រាយ​ផ្លូវ​សម្រាប់​តុលាការ​ក្នុងការ​ប្រកាស​សាលក្រម​ដែល​រំពឹងទុក​ខ្ពស់​សម្រាប់​ការចោទប្រកាន់​របស់លោក Yoon នៅ​ដើម​ថ្ងៃទី​២៨ ខែមីនា​។​

សូមបញ្ជាក់ថា​សាលក្រម​តុលាការ​ធម្មនុញ្ញ​លើ​បណ្តឹង​ចោទប្រកាន់​ទម្លាក់​អំណាច​ប្រធានាធិបតី Yoon Suk Yeol បានក្លាយ​ជាការ​រង់ចាំ​ដ៏​យូរ​បំផុត​មួយ ធៀប​នឹង​សាលក្រម​លើ​បណ្តឹង​ចោទប្រកាន់​ទម្លាក់​អំណាច​របស់​ប្រធានាធិបតី​មុនៗ មាន​អតីត​ប្រធានាធិបតី​ប៉ាក​គុន​ហេ​( Park Geun-hye) ក្នុង​ឆ្នាំ ២០១៧ ដោយ​ប្រើពេល​ត្រឹម​១១​ថ្ងៃ និង​រ៉ុ​ន​ម៉ូ​យុន​( Roh Moo-hyun) ក្នុង​ឆ្នាំ ២០០៤ ដែល​តុលាការ​ធម្មនុញ្ញ​បានប្រកាស​ការសម្រេចចិត្ត​របស់​ពួកគេ​ក្នុង​រយៈពេល​១៤​ថ្ងៃ​៕ 
​