យន្តហោះចម្បាំង Su-35 អមដំណើរលោកប្រធានាធិបតី ពូទីន ទៅកាន់ប្រទេសអារ៉ាបរួម
03-April-2024 / ព័ត៌មានអន្តរជាតិ
រុស្ស៊ី៖ថ្ងៃពុធទី ៦ ធ្នូ លោក វ្ល៉ាឌីមៀរ ពូទីន ធ្វើដំណើរទស្សនកិច្ចទៅកាន់ អេមីរ៉ាតអារ៉ាប់រួម និង អារ៉ាប៊ីសាអូឌីតសម្រាប់ទស្សនៈកិច្ច១ថ្ងៃដោយមិនខ្លាចដិការឲ្យចាប់ខ្លួនរបស់តុលាកាព្រហ្មទណ្ឌអន្តរជាតិ។បន្ទាប់មកនៅថ្ងៃព្រហស្បតិ៍ទី ៧ ធ្នូ លោក ពូទីន នឹងទទួលជួបប្រធានាធីបតីអ៊ីរ៉ង់លោក អេប្រាហ៊ីម រ៉ៃស៊ី នៅទីក្រុងមូស្គូ។ នេះបើតាមការឲ្យដឹងពីសំណាក់វិមានក្រេមឡាំង។
អ្នកនាំពាក្យនៃវិមានក្រេមឡាំងលោក ឌីមីទ្រី ប៉េស្កូវបានឲ្យដឹងថា៖ លោកពូទីន ត្រូវជួបជាមួយប្រធានាធីបតីអេមីរ៉ាតអារ៉ាប់រួម លោក ម៉ូហាម៉េដ បិន ហ្សាយ៉េដ អាលណាយ៉ាន ដើម្បីពិភាក្សាអំពីទស្សនវិស័យសហប្រតិបត្តិការនានារវាងប្រទេសទាំង២ និង ស្ថានការណ៍ទូទៅ ក្នុងតំបន់មជ្ឈិមបូព៌ា។ បន្ទាប់មក នៅទីក្រុង រីយ៉ាដ ប្រទេសអារ៉ាប៊ីសាអូឌីត លោកពូទីន នឹងជួបជាមួយក្សត្ររជ្ជទាយាទព្រះអង្គម្ចាស់ ម៉ូហាម៉េដ បេនសាលម៉ាន។ ប្រមុខរដ្ឋទាំងពីរ នឹងពិភាក្សាគ្នាអំពីវិស័យ ពាណិជ្ជកម្ម ការវិនិយោគ និង នយោបាយអន្តរជាតិ។
លោកពូទីន បានឱកាសលើកឡើងអំពីជំលោះដ៏ក្តៅគគុករវាង អ៊ីស្រាអែល និង ប៉ាឡេស្ទីន។ លោក ពូទីន បានទិះតៀន និងបរិហារ អ៊ីស្រាលអែល ថាបានបង្កមហន្តរាយមនុស្សជាតិនៅតំបន់ហ្កាហ្សា ថែមទាំងអំពាវនាវឲ្យបង្កើតរដ្ឋប៉ាឡេស្ទីន ដែលឯករាជ្យ ។ ក្នុងជំនួបតាមអនឡាញ នៃកិច្ចប្រជុំកំពូល ហ្សេ២០ កាលពីចុងខែវិច្ឆិកាលោកពូទីន ធ្លាប់បានលើកយកប្រធានបទហ្កាហ្សា ដើម្បីវាយបកទៅកាន់ក្រុមប្រទេសបស្ចិមលោកវិញ ថាពុំប្រកាន់គោលជំហរស្មើភាព ដោយព្រួតគ្នាថ្កោលទោសរុស្ស៊ីពីបទវាយលុកចូលអ៊ុយក្រែន តែបែរជាឈរឱបដៃមើល ទង្វើសម្លាប់រង្គាលលើប្រជាជនស៊ីវិលប៉ាឡេស្ទីន។
ជំនួបមេដឹកនាំនៅមជ្ឈិមបូព៌ាលើកនេះនេះ លោកពូទីន ក៏បានលើកឡើងពីគោលជំហររបស់រុស្ស៊ី ក្នុងការកាត់បន្ថយការផលិតប្រេងឆៅ យ៉ាងហោចណាស់រហូតដល់ចុងខែមីនាឆ្នាំ ២០២៤ដើម្បីរក្សាតម្លៃប្រេងទប់ទល់ការដាក់ទណ្ឌកម្មពីលោកខាងលិច។ លោកពូទីន អះអាងថាការកាត់បន្ថយនេះ គឺដើម្បីរក្សាលំនឹងនៃតម្លៃប្រេងឆៅ ក្នុងពិភពលោក ពោលគឺ ស្របជាមួយគោលនជំហររបស់អារ៉ាប៊ីសាអូឌីត ដែលជាសមាជិកសំខាន់មួយទៀតរបស់ Opep+ ដែលជាអង្គការប្រមូលផ្តុំបណ្តាប្រទេសផលិតប្រេងកាតធំៗ នៅលើសកលលោក។
គួររំឭកថា កាលពីខែកក្កដា ឆ្នាំ២០២២កន្លងទៅ លោកពូទីន បានទៅធ្វើទស្សនកិច្ចនៅអ៊ីរ៉ង់ ខណៈពេលដែលប្រមុខការទូតរុស្ស៊ីលោក ស៊ែរហ្គៃ ឡាវ្រូវ ក៏មានវត្តមានដែរនៅទីក្រុងតេអេរ៉ង់ ក្នុងខែតុលាឆ្នាំ ២០២៣។
នៅក្នុងកិច្ចជំនួបថ្មីនេះ ប្រទេសទាំងពីរគ្រោងនិយាយពិភាក្សាគ្នាលើសំណុំរឿងសំខាន់ៗទ្វេភាគីដូចជា ទំនាក់ទំនងសេដ្ឋកិច្ច បញ្ហានានាក្នុងតំបន់និងក្នុងពិភពលោក ដោយផ្តោតជាពិសេសលើស្ថានការណ៍នៅហ្កាហ្សា។ នេះបើតាមការឲ្យដឹងពីភ្នាក់ងារព័ត៌មានរបស់អ៊ីរ៉ង់ IRNA ។ បណ្តាប្រទេសបស្ចិមលោក ចោទប្រកាន់អ៊ីរ៉ង់ថាបានចូលដៃចូលជើងជាមួយរុស្ស៊ីក្នុងបរិបទសង្គ្រាមអ៊ុយក្រែន ដោយបញ្ជូនដ្រូនបំពាក់គ្រាប់ផ្ទុះឈ្មោះ Shahed រាប់សិនគ្រឿងទៅឲ្យរុស្ស៊ី យកទៅវាយប្រហារ ដ៏សង្គ្រប់លើទឹកដីអ៊ុយក្រែន។
មកទល់បច្ចុប្បន្ន លោក វ្ល៉ាឌីមៀរ ពូទីន កម្រធ្វើដំណើរចេញពីប្រទេសរុស្ស៊ីណាស់ ពោលគឺលោកទៅកាន់បណ្តាប្រទេសណា ដែលជាសម្ព័ន្ធមិត្តជំនិតៗរបស់រុស្ស៊ីតែប៉ុណ្ណោះ។ ការណ៍នេះ បណ្តាលមកពីលោកពូទីន គ្មានគេទទួលស្វាគមន៍ និងរាប់រក នៅតាមប្រទេសបស្ចិមលោក ហើយលោកមាន ឈ្មោះក្នុងដីការចាប់ខ្លួនរបស់តុលាការអន្តរជាតិ ពីបទចាប់ជម្លៀសកុមារ អ៊ុយក្រែន យកមកប្រទេសរុស្ស៊ី ។ជាក់ស្តែង លោកពូទីន ពុំមានវត្តមានទេនៅក្នុងកិច្ចប្រជុំអន្តរជាតិសំខាន់ៗក្នុងពេលថ្មីៗនេះ មានជាអាទិ៍ ជំនួបកំពូលរវាងប្រទេសសេដ្ឋកិច្ចជឿនលឿនហៅកាត់ថាហ្សេ២០ នៅឥណ្ឌា កាលពីខែកញ្ញាកន្លងទៅ និង ជំនួប ប្រ៊ីក (ប្រស៊ីល រុស្ស៊ី ឥណ្ឌា ចិន និង អាហ្វ្រិកខាងត្បូង) ដែលប្រព្រឹត្តទៅក្នុងប្រទេសអាហ្វ្រិកខាងត្បូង កាលពីខែសីហា។ សូមបញ្ជាក់ដែរថាក្នុងដំណើរចេញក្រៅប្រទេសលើកនេះកងទ័ពអាកាសរុស្ស៊ីបានដាក់ពង្រាយយន្តហោះចម្បាំង Su-35 ចំនួនបួនគ្រឿង ដើម្បីអមដំណើរយន្តហោះពិសេសរបស់លោកប្រធានាធិបតី ពូទីន ទៅកាន់ប្រទេសអារ៉ាប់រួម (UAE)។
យោងតាមសារព័ត៌មាន Sky News កាលពីថ្ងៃទី៦ ខែធ្នូ អ្នកនាំពាក្យវិមានក្រឹមឡាំងបានប្រកាសពីការដាក់ពង្រាយកងយន្តហោះចម្បាំងទំនើប Su-35 របស់យោធារុស្ស៊ីដើម្បីអមដំណើរប្រធានាធិបតី Vladimir Putin ទៅកាន់ UAE ។ លោក Peskov បាននិយាយថា “យើងសូមអរគុណប្រទេសដែលបានផ្តល់ការអនុញ្ញាតពិសេសដើម្បីឱ្យយន្តហោះរុស្ស៊ីអាចផ្ទុកអាវុធតាមរយៈដែនអាកាសរបស់ពួកគេ” ។ក្រសួងការពារជាតិរុស្ស៊ីបាននិយាយថា យន្តហោះចម្បាំង Su-35 ទាំងអស់ដែលប្រើដើម្បីអមដំណើរលោក ពូទីន ត្រូវបានគ្រប់គ្រងដោយអ្នកបើកយន្តហោះលំដាប់ទីមួយ។ យន្តហោះចម្បាំងទាំងនេះនីមួយៗមានកាំជ្រួចរយៈចម្ងាយមធ្យម R-77-1 និងកាំជ្រួចរយៈចម្ងាយខ្លី R-74M ។
នៅក្នុងវីដេអូដែលបានផ្សព្វផ្សាយនោះ យន្តហោះ Su-35 ចំនួនបួនគ្រឿងបានតាមដានយ៉ាងជិតស្និទ្ធនូវយន្តហោះ Il-96 របស់ប្រធានាធិបតី Putin រហូតដល់វាចុះចតនៅអាកាសយានដ្ឋាន Abu Dhabi ។ បន្ទាប់មក យុទ្ធជនរុស្ស៊ីបានដើរជុំវិញអាកាសយានដ្ឋានជាច្រើនដង ។នៅទីក្រុង Abu Dhabi លោក Putin ត្រូវបានទទួលស្វាគមន៍យ៉ាងកក់ក្តៅពីមន្ត្រី UAE។ប្រភពបរទេស
