ឧកញ៉ាឈ្មួញគោនិងជាអនុប្រធានសភាពាណិជ្ជកម្មកម្ពុជា ស្នើដភាគីវៀតណា ជួយទិញកសិផល និងសាច់សត្វពីប្រទេសកម្ពុជា ឱ្យបានច្រើនជាងមុន
06-June-2026 / សេដ្ឋកិច្ច
វៀតណាម៖ សំណើររបស់ឧកញ៉ា ជឹម សុខ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្តព្រៃវែង គឺពេឡធ្វើតំណាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ដឹកនាំគណៈប្រតិភូសរុបជិត ៤០រូប ធ្វើទស្សនកិច្ចពាណិជ្ជកម្មនៅទីក្រុងហូជីមិញ ប្រទេសវៀតណាម រយៈពេល៤ថ្ងៃ ចាប់ពីថ្ងៃទី១៧ ដល់ថ្ងៃទី២០ ខែមីនា ឆ្នាំ២០២៥។
កម្មវិធីទស្សនកិច្ចពាណិជ្ជកម្មឆ្នាំ២០២៥ រៀបចំឡើងដោយសភាពាណិជ្ជកម្មកម្ពុជា និងមជ្ឈមណ្ឌលអភិវឌ្ឍធុរកិច្ច(BDC) ដោយមានការចូលរួមពីតំណាងសភាពាណិជ្ជកម្មទូទាំងប្រទេស ក្នុងគោលបំណងសំខាន់ ដើម្បីសម្របសម្រួលកិច្ចសហប្រតិបត្តិការរវាងពាណិជ្ជករកម្ពុជា និងវៀតណាម ការចាប់ដៃគូពាណិជ្ជកម្ម និងចុះទស្សនកិច្ចទីតាំងប្រព័ន្ធផលិតកម្ម ដើម្បីផ្លាស់ប្ដូរបទពិសោធន៍ក្នុងដំណើរការពាណិជ្ជកម្ម ផលិតកម្ម និងការកែច្នៃ ក៏ដូចជាឱកាសពិសេសមួយក្នុងការដាក់បង្ហាញផលិតផលទៅវិញទៅមករវាងកម្ពុជា-វៀតណាម។
ក្នុងជំនួបជាមួយសមាគមមិត្តភាពវៀតណាម-កម្ពុជា និងតំណាងវិនិយោគិនវៀតណាម ក្នុងទីក្រុងហូជីមីញឧកញ៉ា ជឹម សុខ បានស្នើដល់ភាគីវៀតណាមលើ ៣ចំណុចសំខាន់ គឺ ទី១ ជួយទិញស្រូវពីកម្ពុជា ឱ្យបានកាន់តែច្រើនជាងមុន ទី២ ជួយបង្កលក្ខណៈងាយស្រួលផ្នែកច្បាប់ដល់កម្ពុជា ដើម្បីនាំចូលសាច់សត្វមកកាន់ទីផ្សារវៀតណាម និងទី៣ ជួយទិញកសិផលផ្សេងទៀតដែលកម្ពុជា ផលិតបានច្រើនតែមិនទាន់មានទីផ្សារគ្រប់ជ្រុងជ្រោយ ដូចជា ដំឡូងមី កៅស៊ូ និងស្វាយចន្ទី។
ឧកញ៉ា ជឹម សុខ រំពឹងផងដែរថា ដំណើរទស្សនកិច្ចដ៏សំខាន់នេះ ក៏នឹងផ្តល់ឱកាសដល់គណៈប្រតិភូសភាពាណិជ្ជកម្មកម្ពុជា បានស្វែងយល់អំពីបច្ចេកទេសថ្មីៗ បច្ចេកវិទ្យាទំនើបៗ និងការបង្កើតទំនាក់ទំនងផ្ទាល់ជាមួយពាណិជ្ជករ ធុរជន និងអ្នកជំនាញរបស់ប្រទេសវៀតណាម ក្នុងគោលដៅលើកកម្ពស់គុណភាពផលិតផល សមត្ថភាពផលិតកម្ម និងជំរុញនវានុវត្តន៍។ឯលោក ង្វៀន វ៉ានណាម ប្រធានសមាគមមិត្តភាពវៀតណាម-កម្ពុជា នៃទីក្រុងហូជីមិញបានស្វាគមន៍ចំពោះទស្សនកិច្ចពាណិជ្ជកម្មរបស់គណៈប្រតិភូសភាពាណិជ្ជកម្មកម្ពុជា នៅមកកាន់ប្រទេសវៀតណាម។លោក រំពឹងថា ពាណិជ្ជករនៃប្រទេសទាំងពីរ អាចក្លាយជាដៃគូសហការក្នុងការផលិត និងជួញដូរទំនិញដែលភាគីទាំងពីរមានលទ្ធភាពប្រើប្រាស់ បំពេញតម្រូវការរបស់ប្រជាជននៃប្រទេសទាំងពីរ ជាពិសេសរវាងទីក្រុងហូជីមិញ និងតំបន់ផ្សេងៗទៀត។
លោក ង្វៀន វ៉ានណាម ក៏បានអះអាងផងដែរថា លោកនឹងរៀបចំដំណើរទស្សនកិច្ចពាណិជ្ជកម្មទៅកាន់ប្រទេសកម្ពុជា ដោយនាំយកនូវក្រុមហ៊ុនធំៗជាច្រើន ដើម្បីទៅចាប់ដៃគូធ្វើពាណិជ្ជកម្មជាមួយភាគីកម្ពុជា នាពេលខាងមុខនេះ។សូមបញ្ជាក់ថាបើគិតត្រឹមឆ្នាំ២០២៤ទំហំពាណិជ្ជកម្មរវាងកម្ពុជា និងវៀតណាមឈានដល់ ៧,០៨ ពាន់លានដុល្លារពីខែមករាដល់ខែវិច្ឆិកានៃឆ្នាំ ។យោងតាមទិន្នន័យពាណិជ្ជកម្មដែលចេញផ្សាយដោយអគ្គនាយកដ្ឋានគយ និងរដ្ឋាករ ការនាំចេញរបស់កម្ពុជាទៅកាន់វៀតណាមបានកើនឡើង២៦.៣ ភាគរយ និងឈានដល់ ៣.២៩ ពាន់លានដុល្លារ ។
ការនាំចូលរបស់កម្ពុជាពីវៀតណាមក៏បានកើនឡើង ១៦ ភាគរយ និងឈានដល់ ៣,៧៩ ពាន់លានដុល្លារក្នុងអំឡុងពេលនេះ ដែលស្មើនឹង ១៣,៨ ភាគរយនៃការនាំចេញសរុបរបស់កម្ពុជា។កម្ពុជានាំចេញកសិផលទៅវៀតណាមជាចម្បងរួមមាន អង្ករ កៅស៊ូ ស្វាយចន្ទី ដំឡូងមី ពោត ចេក ស្វាយ និងថ្នាំជក់។ ដោយឡែកការនាំចូលពីប្រទេសវៀតណាមរួមមានសម្ភារសំណង់ គ្រឿងចក្រ ឥន្ធនៈ ឧបករណ៍អគ្គិសនី និងអេឡិចត្រូនិក ជីកសិកម្ម ចំណីសត្វ បន្លែ និងផ្លែឈើ។កន្លងមក កម្ពុជានាំចេញគ្រាប់ស្វាយចន្ទីភាគច្រើនទៅប្រទេសវៀតណាម។
របាយការណ៍របស់សមាគមស្វាយចន្ទីកម្ពុជាបង្ហាញថា ក្នុងឆ្នាំ២០២៣ កម្ពុជាបាននាំចេញស្វាយចន្ទីចំនួន ៦១៨,០០០ តោន ស្មើនឹង ៩៤.២ ភាគរយនៃការនាំចេញសរុបរបស់ខ្លួនទៅកាន់ប្រទេសវៀតណាម។កម្ពុជា និងវៀតណាមក៏កំពុងព្យាយាមបង្កើនទំហំពាណិជ្ជកម្មទ្វេភាគីប្រចាំឆ្នាំឱ្យលើសពី ១០ ពាន់លានដុល្លារនាពេលអនាគតដ៏ខ្លីខាងមុខ និងដល់ ២០ ពាន់លានដុល្លារជាបន្តបន្ទាប់ក្នុងប៉ុន្មានឆ្នាំខាងមុខ។
យោងតាមលោក វិចិត្រ ឡោ អនុប្រធានសមាគមពាណិជ្ជកម្មចិនកម្ពុជា ទំហំពាណិជ្ជកម្មរវាងកម្ពុជា និងវៀតណាមកំពុងកើនឡើងដោយសារតែការផ្លាស់ប្តូរនិន្នាការសេដ្ឋកិច្ចដែលជាលទ្ធផលនៃការប្រកួតប្រជែងនយោបាយ និងភាពតានតឹងភូមិសាស្ត្រនយោបាយរវាងសហរដ្ឋអាមេរិក និងចិន។លោកបានមានប្រសាសន៍ថា “ការផ្លាស់ប្តូរនិន្នាការពាណិជ្ជកម្មអន្តរជាតិនេះបានអនុញ្ញាតឱ្យកម្ពុជាប្រើប្រាស់ភូមិសាស្ត្រជិតខាងរបស់ខ្លួនជាមួយប្រទេសវៀតណាម ដើម្បីទាញយកផលប្រយោជន៍ និងពង្រីកសក្តានុពលពាណិជ្ជកម្មដោយសម្រួលនីតិវិធីគយ កាត់បន្ថយពេលវេលាបោសសម្អាត និងបង្កើនប្រសិទ្ធភាពពាណិជ្ជកម្មរួមជាមួយប្រទេសជិតខាង”។
គិតត្រឹមខែកញ្ញាឆ្នាំ២០២៤ វៀតណាមមានគម្រោងវិនិយោគចំនួន ២០៨ នៅកម្ពុជា ដែលមានដើមទុនចុះបញ្ជីសរុបចំនួន២.៩១ ពាន់លានដុល្លារ ដែលធ្វើឱ្យវៀតណាមក្លាយជាវិនិយោគិនមួយក្នុងចំណោមវិនិយោគិនធំជាងគេទាំង១០នៅកម្ពុជា។កម្ពុជាក៏មានគម្រោងវិនិយោគចំនួន ៣៥ នៅប្រទេសវៀតណាម ដែលមានដើមទុនចុះបញ្ជីសរុបចំនួន ៧៥,៧៦ លានដុល្លារ។
ប្រទេសចិននៅតែជាដៃគូពាណិជ្ជកម្មដ៏ធំបំផុតរបស់កម្ពុជាក្នុងអំឡុងខែមករាដល់ខែវិច្ឆិកា ឆ្នាំ២០២៤ ជាមួយនឹងទំហំពាណិជ្ជកម្មឈានដល់ ១២.៧៦ ពាន់លានដុល្លារ។ប្រទេសចិនក៏ជាទីផ្សារនាំចេញធំជាងគេទីបីសម្រាប់កម្ពុជា បន្ទាប់ពីសហរដ្ឋអាមេរិក និងវៀតណាម ដែលមានទំហំទឹកប្រាក់រហូតដល់ ១.៦ ពាន់លានដុល្លារ កើនឡើង ២២.៣ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ពាណិជ្ជកម្មរបស់កម្ពុជាជាមួយសហរដ្ឋអាមេរិកបានឈានដល់ ៩,៣ ពាន់លានដុល្លារក្នុងអំឡុងខែមករាដល់ខែវិច្ឆិកាឆ្នាំនេះ កើនឡើង ១១,២ ភាគរយ បើធៀបនឹងរយៈពេលដូចគ្នាកាលពីឆ្នាំមុន។សហរដ្ឋអាមេរិកនៅតែជាទីផ្សារនាំចេញដ៏ធំបំផុតរបស់កម្ពុជាដែលមានចំណែក ៣៧.៩ភាគរយ។
