រុស្ស៊ីនឹងធ្វើសមយុទ្ធកម្លាំងអាវុធបរមាណូយុទ្ធសាស្ត្រអាមេរិកថារុស្ស៊ីកសាងកំហុសធំបើប្រើវាលើអ៊ុយក្រែន!
03-April-2024 / ព័ត៌មានអន្តរជាតិ
ប្រទេសរុស្ស៊ី៖រុស្ស៊ីបានឡើងគម្រោងធ្វើសមយុទ្ធជាប្រចាំនៃកម្លាំងបរមាណូយុទ្ធសាស្ត្រ ហើយរុស្ស៊ីក៏បានផ្តល់ព័ត៌មានដល់ភាគីអាមេរិកពីគម្រោងសមយុទ្ធខាងលើនោះដែរ ស្របទៅតាមខ្លឹមសារនៃកិច្ចព្រមព្រៀងគ្រប់គ្រងអាវុធបរមាណូ ។សារព័ត៌មាន Euronews នៅថ្ងៃទី២៦ខែតុលា បានដកស្រង់ការប្រកាសរបស់ក្រសួងការពារជាតិអាមេរិកដែលបានបញ្ជាក់ថា អាមេរិកពិតជាទទួលបានការផ្តល់ដំណឹងពីគម្រោងធ្វើសមយុទ្ធកម្លាំងបរមាណូយុទ្ធសាស្ត្ររបស់រុស្ស៊ី ។.png)
មន្ត្រីអាមេរិកបានបញ្ជាក់ថា បើតាមសហរដ្ឋអាមេរិក រុស្ស៉ីនឹងដឹកនាំការបាញ់សាកល្បងមីស៊ីលអំឡុងការធ្វើសមយុទ្ធប្រចាំឆ្នាំឈ្មោះថា Grom នៃកងកម្លាំងយុទ្ធសាស្ត្រនុយក្លេអ៊ែររបស់ខ្លួន ជាមួយការបញ្ជាក់ថា ទីក្រុងមូស្គូបានបាញ់សាកល្បងមីស៊ីលផ្លោងអន្តរទ្វីបនៅក្នុងសមយុទ្ធកាលពីលើកមុន។នៅក្រោមសន្ធិសញ្ញា New START Treaty រុស្ស៉ី និងសហរដ្ឋអាមេរិកមានកាតព្វកិច្ចជូនដំណឹងគ្នាជាមុនពីការបាញ់សាកល្បងមីស៊ីល ដើម្បីបញ្ចៀសការយល់ច្រឡំណាមួយ។
ទាក់ទងនិងការប្រើអាវុធនុយក្លេអែរវិញរដ្ឋាភិបាលអាមេរិកវិញនៅថ្ងៃ ទី២៥ខែតុលា បានព្រមានរុស្ស៊ីថា ការប្រើគ្រាប់បែកកខ្វក់ឬអាវុធនុយក្លេអ៊ែរប្រភេទផ្សេងទៀតក្នុងប្រទេសអ៊ុយក្រែននឹងមានផលវិបាក និងជា “កំហុសធ្ងន់ធ្ងរ”។នេះជាការព្រមានពីប្រធានាធិបតីអាមេរិក លោក Joe Biden ។ប្រតិកម្មានកើតឡើងបន្ទាប់ពីមន្ត្រីទូតរុស្ស៊ី បានលើកយកករណីដែលខ្លួនចោទប្រកាន់ថា អ៊ុយក្រែនកំពុងរៀបចំប្រើប្រាស់«គ្រាប់បែកវិទ្យុសកម្ម» មកបង្ហាញក្រុមប្រឹក្សាសន្តិសុខអង្គការសហប្រជាជាតិនៅថ្ងៃអង្គារសប្តាហ៍នេះ ខណៈដែលការអះអាងនេះត្រូវបានច្រានចោលដោយមន្ត្រីលោកខាងលិច និងអ៊ុយក្រែនថាជាព័ត៌មានមិនពិតនិងជាលេសសម្រាប់បង្កើនការធ្វើសង្គ្រាម។
លោក Dmitry Polyanskiy ឯកអគ្គរដ្ឋទូតរងរបស់រុស្ស៉ីប្រចាំនៅ UN បានប្រាប់អ្នកយកព័ត៌មានយ៉ាងដូច្នេះថា «យើងពេញចិត្តក្នុងការលើកឡើងពីអ្វីដែលយើងបានដឹង។ ខ្ញុំមិនខ្វល់នឹងមនុស្សដែលនិយាយថារុស្ស៊ីកំពុងសម្តែងនោះទេ ដោយថាវានឹងមិនកើតឡើងនោះទេ តែនេះគឺជាគ្រោះមហន្តរាយដ៏គួរឲ្យភ័យខ្លាចដែលគំរាមកំហែងយ៉ាងធ្ងន់ធ្ងរដល់ផែនដីទាំងមូល។ ភស្តុតាងគឺមាននៅក្នុងព័ត៌មានចារកម្មដែលត្រូវបានចែករំលែក ជាមួយសមភាគីលោកខាងលិច ជាមួយនឹងភាពចាំបាច់នៃការកម្ចាត់សកម្មភាពទាំងអស់នេះ»។ចំណែកឯបារាំង អង់គ្លេស និងសហរដ្ឋអាមេរិកបានអះអាងថា ការចោទប្រកាន់នេះ គឺពិតជាគ្មានតម្លាភាព ហើយទីក្រុងវ៉ាស៊ីនតោនបានព្រមានរុស្ស៊ីអំពី «ផលវិបាកធ្ងន់ធ្ងរ» សម្រាប់ការប្រើប្រាស់នុយក្លេអ៊ែរណាមួយ។
រុស្ស៉ីបានចោទប្រកាន់រដ្ឋាភិបាលទីក្រុងកៀវថាបានបញ្ជាឱ្យអង្គភាពចំនួន២ផលិតគ្រាប់បែកវិទ្យុសកម្ម ដោយមិនបានផ្តល់ភស្តុតាងណាមួយឡើយ ហើយនៅថ្ងៃចន្ទសប្តាហ៍នេះ ទីក្រុងមូស្គូបានដាក់លិខិតមួយដើម្បីស្នើសុំរៀបរាប់លម្អិតអំពីការចោទប្រកាន់នេះ ទៅកាន់អង្គការសហប្រជាជាតិ និងបានលើកឡើងបញ្ហានេះនៅក្នុងកិច្ចប្រជុំបិទទ្វារជាមួយក្រុមប្រឹក្សាសន្តិសុខ។ក្រៅពីប្រធានាធិបតីអាមេរិកអង្គការណាតូក៏បានបដិសេធការចោទប្រកាន់របស់រុស្ស៊ីដែលថាអ៊ុយក្រែនគ្រោងនឹងប្រើ “គ្រាប់កាចសាហាវ”នៅលើសមរភូមិដោយបានព្រមានក្រុងម៉ូស្គូកុំឱ្យប្រើវាជាលេសដើម្បីធ្វើឱ្យជម្លោះកាន់តែកើនឡើង។
អគ្គលេខាធិការអង្គការណាតូ លោក Jens Stoltenberg បាននិយាយកាលពីថ្ងៃទី២៤ ខែតុលាថាលោកបាននិយាយជាមួយរដ្ឋមន្ត្រីការពារជាតិអាមេរិក លោក Lloyd Austin និងរដ្ឋមន្ត្រីការពារជាតិអង់គ្លេស Ben Wallace អំពី “ការចោទប្រកាន់មិនពិតរបស់រុស្ស៊ីដែលថាអ៊ុយក្រែនកំពុងរៀបចំប្រើប្រាស់គ្រាប់បែកកាចសាហាវ’ នៅលើទឹកដីនៃប្រទេសនេះ”។លោក Stoltenberg បានសរសេរនៅលើ Twitter ថា “សម្ព័ន្ធមិត្តណាតូបដិសេធការចោទប្រកាន់នោះ។រុស្ស៊ីមិនត្រូវប្រើវាជាលេសដើម្បីបង្កើនភាពតានតឹងនោះទេ។យើងនៅតែប្រកាន់ខ្ជាប់នូវកិច្ចខិតខំប្រឹងប្រែងរបស់យើងដើម្បីគាំទ្រអ៊ុយក្រែន”។Stoltenberg បានចេញការព្រមាននេះបន្ទាប់ពីរដ្ឋមន្ត្រីការពារជាតិរុស្ស៊ីលោក Sergei Shoigu កាលពីថ្ងៃទី២៣ខែតុលាបានសម្តែង”ការព្រួយបារម្ភអំពីការបង្កហេតុដែលអាចកើតមានដោយអ៊ុយក្រែនទាក់ទងនឹងការប្រើប្រាស់’គ្រាប់បែកកាចសាហាវ'”ក្នុងអំឡុងពេលសន្ទនាតាមទូរស័ព្ទជាមួយសមភាគីអង់គ្លេស បារាំង និងតួកគី។”
