រុស្ស៊ីសប្បាយចិត្តចំពោះការផ្អាកជំនួយអាមេរិកឲ្យអ៊ុយក្រែន
21-September-2026 / ព័ត៌មានអន្តរជាតិ
ប្រទេស៖ នៅថ្ងៃអង្គារ ទី៤ ខែមីនា វិមានក្រឹមឡាំង រុស្ស៊ីបានចាត់ទុក ការផ្អាកជំនួយយោធារបស់សហរដ្ឋអាមេរិកឱ្យទៅអ៊ុយក្រែន គឺជាការចូលរួមចំណែកដ៏ប្រសើរ ចំពោះបុព្វហេតុស្វែងរកសន្តិភាព។ ទីភ្នាក់ងារព័ត៌មាន AFPបានផ្សាយថាអ្នកនាំពាក្យវិមានក្រឹមឡាំង លោក Dmitry Peskov បាននិយាយថា «ប្រសិនបើសហរដ្ឋអាមេរិក បញ្ឈប់ការផ្គត់ផ្គង់យោធា នោះវាប្រហែលនឹងជាការចូលរួមចំណែកដ៏ប្រសើរបំផុត ចំពោះសន្តិភាព ហើយវាគឺជាដំណោះស្រាយមួយ ដែលពិតជាអាចនឹងជំរុញឱ្យទីក្រុងកៀវ យល់ព្រមបោះជំហានឆ្ពោះទៅរកដំណើរការសន្តិភាព»។
ការអត្ថាធិប្បាយដូចខាងលើរបស់វិមានក្រឹមឡាំង កើតមានឡើង បន្ទាប់ពីមន្ត្រីសេតវិមាន បានឱ្យដឹងកាលពីថ្ងៃចន្ទថា ប្រធានាធិបតីអាមេរិក លោក ដូណាល់ ត្រាំ បានផ្អាករាល់ការផ្តល់ជំនួយយោធាទាំងអស់ សម្រាប់អ៊ុយក្រែន ក្រោយការប៉ះសម្តីគ្នាខ្លាំងៗ ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីសប្តាហ៍មុន។ បើតាមប្រព័ន្ធផ្សព្វផ្សាយអាមេរិក ការផ្អាកនេះ នឹងបន្តរហូតទាល់តែមេដឹកនាំអ៊ុយក្រែន បង្ហាញពីការប្តេជ្ញាចិត្ត ប្រកបដោយសុច្ឆន្ទៈចំពោះសន្តិភាព ក៏ប៉ុន្តែទោះជាយ៉ាងណា វាមិនមែនជាការបិទបញ្ចប់ជំនួយយោធាជាអចិន្ត្រៃយ៍នោះទេ។ទោះបិយ៉ាងណាក្នុងការថ្លែងក្នុងសភាលើកដំបូងបន្ទាប់ពីចូលកាន់ដំណែងនាយប់ថ្ងៃទី៤កម្ភៈម៉ោងប្រទេសអាមេរិកលោកដូណាល់ត្រាំបានបង្ហើបថាបានទទួលសំបុត្រពីលោកហ្សេឡិនស្គីប្រាប់ថាដើម្បីសន្តិភាពអ៊ុយក្រែនបានយល់ព្រមចុះកុងត្រាឲ្យអាមេរិកធ្វើអាជីវកម្មហើយ។
គួបញ្ជាក់ដែរថាកាលពីថ្ងៃអង្គារសប្តាហ៍នេះ អ៊ុយក្រែន បាននិយាយថា ខ្លួននឹងធ្វើអ្វីគ្រប់យ៉ាងដែលអាចធ្វើទៅបាន ដើម្បីទប់ទល់នឹងការឈ្លានពានរបស់រុស្ស៉ី បន្ទាប់ពីប្រធានាធិបតីអាមេរិក លោក ដូណាល់ ត្រាំ សម្រេចចិត្តផ្អាកការគាំទ្រផ្នែកយោធា របស់ទីក្រុងវ៉ាស៉ីនតោនសម្រាប់ទីក្រុងកៀវ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី៥ ខែមីនា ឆ្នាំ ២០២៥។នាយករដ្ឋមន្ត្រីអ៊ុយក្រែន លោក Denys Shmygal បានប្រាប់សន្និសីទសារព័ត៌មាន ក្នុងទីក្រុងកៀវ ដូច្នេះថា «យើងនឹងធ្វើអ្វីគ្រប់យ៉ាង ដើម្បីបន្តទប់ទល់»។ រីឯ ទីប្រឹក្សាប្រធានាធិបតីអ៊ុយក្រែន លោក Mykhailo Podolyak វិញបានបង្ហោះសារលើបណ្តាញសង្គម X ថា «យើងកំពុងពិភាក្សាអំពីជម្រើសនានា ជាមួយដៃគូអឺរ៉ុបរបស់យើង ហើយជាការពិតណាស់ យើងមិនមើលរំលងលទ្ធភាពនៃការចរចា ជាមួយសមភាគីអាមេរិករបស់យើងឡើយ»។
គួរបញ្ជាក់ថា ចាប់តាំងដើមដំបូងនៃការឈ្លានពានរបស់រុស្ស៉ីលើអ៊ុយក្រែន ទីក្រុងវ៉ាស៉ីនតោន គឺជាអ្នកគាំទ្រផ្នែកយោធាដ៏សំខាន់បំផុតមួយរបស់ទីក្រុងកៀវ ដោយលោក Shmygal និយាយថា ជំនួយរបស់អាមេរិកក្នុងទម្រង់ជាការការពារដែនអាកាស និងព័ត៌មានសម្ងាត់ បានជួយសង្គ្រោះអាយុជីវិតមនុស្សជាច្រើននាក់។មុនការប្រកាសពីការសម្រេចចិត្តរបស់ទីក្រុងវ៉ាស៊ីនតោន សារព័ត៌មាន Bloomberg និង Fox News បានរាយការណ៍ថាការផ្អាកនេះនឹងត្រូវធ្វើឡើង រហូតទាល់តែមេដឹកនាំអ៊ុយក្រែនបង្ហាញពីការប្ដេជ្ញាចិត្តប្រកបដោយសុច្ឆន្ទៈ ចំពោះសន្តិភាព។ «នេះមិនមែនជាការបិទបញ្ចប់ជំនួយជាអចិន្ត្រៃយ៍នោះទេ វាគ្រាន់តែជាការផ្អាកជាបណ្ដោះអាសន្នប៉ុណ្ណោះ»។ នេះបើតាម Fox News ដោយផ្អែកលើការស្រង់សម្ដីពីមន្ត្រីម្នាក់នៃរដ្ឋបាលលោក ត្រាំ។
សូមបញ្ជាក់ថា អតីតប្រធានាធិបតីអាមេរិក លោក ចូ បៃដិន បានអនុម័តជំនួយ និងតែងតែអះអាងជារឿយៗពីការប្ដេជ្ញាចិត្តឥតងាករេចំពោះអធិបតេយ្យ និងបូរណភាពទឹកដីអ៊ុយក្រែន។ ខាងក្រោមនេះគឺជាបញ្ជីរាយឈ្មោះអាវុធដែល ទីក្រុងវ៉ាស៊ីនតោនបានផ្ដល់ឱ្យអ៊ុយក្រែន ចេញផ្សាយដោយក្រសួងការបរទេសអាមេរិកកាលពីថ្ងៃទី២០ ខែមករាកន្លងទៅ៖
* ប្រព័ន្ធការពារដែនអាកាស៖ដោយសារតែរងការវាយប្រហារតាមផ្លូវអាកាសឥតឈប់ឈរពីសំណាក់កងកម្លាំងរុស្ស៉ី ទីក្រុងវ៉ាស៊ីនតោនបានបញ្ជូនប្រព័ន្ធការពារដែនអាកាសឱ្យអ៊ុយក្រែន ជាពិសេសគឺប្រព័ន្ធខែលប្រឆាំងមីស៊ីល Patriot ចំនួន ៣គ្រឿង។ សម្ព័ន្ធមិត្តអឺរ៉ុបមួយចំនួនក៏បានបញ្ជូនខែលប្រឆាំងមីស៊ីល Patriot ទៅឱ្យទីក្រុងកៀវដែរ។ អាវុធនៅក្នុងបញ្ជី មានរួមបញ្ចូលផងដែរនូវប្រព័ន្ធការពារដែនអាកាសផ្សេងទៀតរួមមានប្រព័ន្ធ NASAMS ១២គ្រឿង ព្រមទាំង ប្រព័ន្ធមីស៊ីល HAWK និងគ្រាប់រំសេវ ក៏ដូចជាមីស៊ីលពាក់លើស្មាប្រឆាំងយន្ដហោះចម្បាំង Stinger ជាង ៣០០០ដើម ហើយដើម្បីបន្ថែមប្រសិទ្ធភាពលើប្រព័ន្ធអាវុធទាំងនេះ សហរដ្ឋអាមេរិកបានផ្ដល់ប្រព័ន្ធរ៉ាដា ២១គ្រឿង រួមជាមួយបរិក្ខារសម្រាប់ការធ្វើសមហរណកម្មជើងទម្របាញ់ និងមីស៊ីលរបស់លោកខាងលិចជាមួយប្រព័ន្ធអាវុធរបស់អ៊ុយក្រែន។
មីស៊ីល កាំភ្លើងត្បាល់៖ទីក្រុងវ៉ាស៊ីនតោន បានបញ្ជូនកាំភ្លើងធំ howitzers កាណុង១៥៥មីលីម៉ែត្រ ចំនួន២០០ដើម អមជាមួយនឹងគ្រាប់ ៣លានគ្រាប់ ព្រមទាំងកាំភ្លើងធំ howitzers កាណុង ១០៥មីលីម៉ែត្រ ៧២ដើម និងគ្រាប់ ១លានគ្រាប់ បូកបន្ថែមកាំភ្លើងត្បាល់ ៧០០ ០០០ដើម។ លើសពីនេះ ប្រព័ន្ធមីស៊ីល HIMARS ជាង ៤០គ្រឿងត្រូវបានផ្ដល់ឱ្យអ៊ុយក្រែន។ វ៉ាស៊ីនតោនថែមទាំងបានផ្ដល់ឱ្យទីក្រុងកៀវទៀតផងនូវមីស៊ីលពាក់លើស្មាប្រឆាំងរថក្រោះ Javelins ចំនួន ១០ ០០០ដើម។ Javelins បានក្លាយជានិមិត្តរូបនៃការតស៊ូរបស់អ៊ុយក្រែប្រឆាំងនឹងការឈ្លានពានពីរុស្ស៉ីអំឡុងសប្ដាហ៍ដំបូងនៃសង្គ្រាម។ ក្រៅពីនេះ អាវុធប្រឆាំងរថក្រោះ ១២០ ០០០ដើមផ្សេងទៀត ត្រូវបានប្រគល់ដល់ដៃទាហានអ៊ុយក្រែន រួមទាំងមីស៊ីលប្រឆាំងរថក្រោះប្រភេទ TOW ១០ ០០០ដើម។ ដោយឡែក ចំពោះអាវុធធុនតូចវិញ គ្រាប់កាំភ្លើង និងគ្រាប់បែកដៃជាង៥០០លានគ្រាប់ ត្រូវបានផ្គត់ផ្គង់ឱ្យអ៊ុយក្រែន។
រថក្រោះ ឧទ្ធម្ភាគចក្រ៖ខណៈមន្ទីរបញ្ចកោណមកទល់នឹងពេលនេះ នៅតែបន្តបដិសេធផ្ដល់យន្ដហោះចម្បាំងដោយផ្ទាល់ទៅឱ្យអ៊ុយក្រែន អតីតរដ្ឋបាលលោក ចូ បៃដិន ធ្លាប់បានផ្ដល់ឧទ្ធម្ភាគចក្រយោធាសម័យសូវៀត Mi-17 ២០គ្រឿង ដល់ទីក្រុងកៀវ គួបផ្សំនឹងការផ្ដល់ដ្រូនច្រើនប្រភេទខុសៗគ្នា និងអនុញ្ញាតឱ្យសម្ព័ន្ធមិត្តអឺរ៉ុប អាចបញ្ជូន យន្ដហោះចម្បាំង F-16 ផលិតដោយអាមេរិកទៅឱ្យអ៊ុយក្រែន។ ម្យ៉ាងវិញទៀត ក្រោយស្ទាក់ស្ទើរជាច្រើនខែ អតីតរដ្ឋបាលលោក បៃដិន បានផ្ដល់រថក្រោះ Abrams ៣១គ្រឿងឱ្យអ៊ុយក្រែន ដែលការប្រគល់ចាប់ផ្ដើមធ្វើឡើងកាលពីខែមករា ឆ្នាំ២០២៣ ហើយរថក្រោះសម័យសូវៀត T-72B ក៏ត្រូវបានផ្ដល់សម្រាប់អ៊ុយក្រែនផងដែរ។ នៅក្នុងបញ្ជីអាវុធផ្ដល់ឱ្យអ៊ុយក្រែន របស់ក្រសួងការបរទេសអាមេរិក ក៏មានដែររថពាសដែកប្រយុទ្ធ Bradley ៣០០គ្រឿង រថពាសដែក ដឹកកងទ័ព ១៣០០គ្រឿង រថយន្ដយោធា Humvee ៥០០០គ្រឿង និងរពាសដែកពេទ្យទាហាន ៣០០គ្រឿង។ ទីក្រុងវ៉ាស៊ីនតោនបានផ្ដល់ទូកល្បាត១០០គ្រឿង ប្រព័ន្ធការពារតំបន់ឆ្នេរ គ្រាប់មីន Claymore ប្រព័ន្ធផ្កាយរណប ទំនាក់ទំនង ឧបករណ៍មើលពេលយប់ និងអាវក្រោះ ១០០ ០០០សម្រាប់។
គួរបញ្ជាក់ថា ក្រោយថ្ងៃទី២០ ខែមករា ឆ្នាំ២០២៥ ពោលគឺក្រោយលោក ត្រាំ ស្បថចូលកាន់តំណែងជាប្រធានាធិបតី សហរដ្ឋអាមេរិកនៅតែបន្តផ្ដល់ឱ្យអ៊ុយក្រែននូវអ្វីដែលមន្ត្រីម្នាក់នៃក្រសួងការពារជាតិអាមេរិក ហៅថា «អាវុធដ៏សំខាន់» ដែលត្រូវបានអនុម័តផ្ដល់ឱ្យអ៊ុយក្រែនដោយអតីតរដ្ឋបាលលោក បៃដិន ក្នុងនោះរួមមានអាវុធប្រឆាំងនឹងរថក្រោះ និងគ្រាប់កាំភ្លើងធំ។ តែឥលូវ លោក ត្រាំ បានចេញបញ្ជាឱ្យផ្អាកការផ្ដល់អាវុធឱ្យអ៊ុយក្រែន ជាបណ្ដោះអាសន្ន។
ជម្លោះនៅទឹកដីភាគខាងកើតអ៊ុយក្រែន បានចាប់ផ្ដើមតាំងពីឆ្នាំ ២០១៤ មកម្លេះ គឺបន្ទាប់ពីប្រទេសរស្ស៊ីចាប់យកតំបន់គ្រីមៀរបង្កឲ្យមានបាតុកម្មប្រជាពលរដ្ឋទម្លាកលោកប្រធានាធិបតីឆិនកូឲ្យរត់ភៀសខ្លួនទៅជ្រកកោននៅរុស្ស៊ី។ហូតមកដល់ឆ្នាំ ២០២២ រុស្ស៊ី បានបញ្ជូនទាហានទ្រង់ទ្រាយធំទៅកាន់អ៊ុយក្រែន ហើយចាប់តាំងពីពេលនោះមក ស្ថានការណ៍កាន់តែយ៉ាប់យ៉ឺនទ្វេរដង។ តាមរយៈការប៉ាន់ស្មាន បានឱ្យដឹងថា បច្ចុប្បន្ន រុស្ស៊ី កំពុងគ្រប់គ្រងទឹកដីអ៊ុយក្រែនប្រមាណជា ១ភាគ៥ ឬប្រហែល ១១៣,០០០ គីឡូម៉ែត្រ ខណៈអ៊ុយក្រែនកំពុងគ្រប់គ្រងទឹកដីរុស្ស៊ីប្រហែល ៤៥០ គីឡូម៉ែត្រ ៕
