បេក្ខជនប្រធានាធិបតីគណបក្សប្រជាធិបតេយ្យលោកស្រី ហារីស ប្រកាសពង្រឹងណាតូ គាំទ្រអ៊ីស្រាអែល ប្រឆាំងកូរ៉េខាងជើង និង អ៊ីរ៉ង់
15-March-2026 / ព័ត៌មានអន្តរជាតិ
អាមេរិក៖លោកស្រី កាម៉ាឡា ហារីស បេក្ខភាពប្រធានាធិបតីនៃគណបក្សប្រជាធិបតេយ្យដែលទើបទទួលយកការតែងតាំងជាផ្លូវការក្នុងសមាជជាតិក្នុងរដ្ឋ Chicago កាលពីថ្ងៃទី២២សីហាជាមួយបេក្ខភាពអនុប្រធានាធិបតី Tim Walz ក្នុងពិធីបិទបញ្ចប់សមាជបានប្រកាសឈរនៅជាមួយអង្គការប្រដាប់អាវុធណាតូប្រឆាំងរុស្ស៊ី និងគាំទ្រប្រទេសអ៊ុយក្រែនក្នុងការប្រយុទ្ធប្រឆាំងការឈ្លានពានរបស់ប្រទេសរុស្ស៊ី។
លោកស្រី ហារីស ដែលតំណាងគណបក្សប្រជាធិបតេយ្យសម្រាប់ការបោះឆ្នោតប្រធានាធិបតីនៅថ្ងៃទី៥ខែវិច្ឆិកាខាងមុខ តទល់ជាមួយបេក្ខភាពលោក ដូណាល់ ត្រាំ នៃគណបក្សសាធារណៈរដ្ឋ ក៏បានប្រកាសគាំទ្រអ៊ីស្រាអែលដែលជាសម្ព័ន្ធមិត្តរបស់សហរដ្ឋអាមេរិក សម្រាប់ការប្រយុទ្ធរបស់ពួកគេប្រឆាំងការវាយប្រហារណាមួយពីសំណាក់សត្រូវនៅក្នុងតំបន់ មានប្រទេសអ៊ីរ៉ងជាដើម។
ថ្លែងក្នុងពិធីបិទបញ្ចប់សមាជជាតិរយៈពេល៤ថ្ងៃរបស់គណបក្សប្រជាធិបតេយ្យនេះ លោកស្រី ហារីស ក៏បានប្រកាសពីការប្រឆាំងលោកគីម ជុងអ៊ុន នៅកូរ៉េខាងជើង ដែលលោកត្រាំធ្លាប់បានពិភាក្សាជាមួយ និង គ្រោងពិភាក្សាជាមួយប្រសិនលោកឈ្នះការបោះឆ្នោតប្រធានាធិបតីសហរដ្ឋអាមេរិកជាថ្មី។មុនការប្រកាសគាំទ្រអ៊ុយក្រែនក្នុងពេលដែលលោកស្រីកំពុងប្រជែងយកកៅអីប្រធានាធិបតីសហរដ្ឋអាមេរិកដ៏មានអំណាចបំផុត លោកស្រី ហារីស បានរំឭកឡើងវិញនូវ នូវការជជែកជាមួយ ប្រធានាធិបតីអ៊ុយក្រែន លោក Volodymyr Zelensky អំពីលទ្ធភាពដែលរុស្ស៊ីអាចឈ្លានពានអ៊ុយក្រែន។ប្រទេសរុស្ស៊ីកាច់ចង្កូតដោយប្រធានាធិបតីជាង២ទសវត្សរ៍ វ្ល៉ាឌីមៀរ ពូទីន បានលុកលុយចូលប្រទេសអ៊ុយក្រែន ក្រោយប្រធានាធិបតី ចូ បៃដិន ចូលកាន់អំណាចបានត្រឹមតែជាង១ឆ្នាំ ហើយក្នុងសង្គ្រាមនេះ សហរដ្ឋអាមេរិកជាអ្នកផ្គត់ផ្គង់អ៊ុយក្រែនធំបំផុតប្រឆាំងនឹងរុស្ស៊ី។
ដោយឡែកសម្រាប់ការងារក្រុងស្រុកវិញបេក្ខនារីប្រធានាធិបតីអាមេរិកមកពីគណបក្សប្រជាធិបតេយ្យ បានឲ្យតម្លៃខ្ពស់ទៅដល់ពលរដ្ឋអាមេរិកវណ្ណៈកណ្តាល។ លោកស្រី ខាម៉ាឡា ហារីស ថ្លែងថាដាក់ការខំប្រឹងប្រែងទាំងឡាយដើម្បីបង្កើតឱកាសល្អប្រសើរសម្រាប់វណ្ណៈស្រទាប់កណ្តាល ឈានទៅពង្រឹងសន្តិសុខសេដ្ឋកិច្ច ស្ថិរភាព និងសេចក្តីថ្លៃថ្នូរ។ ដ្បិត លោកស្រីជឿជាក់យ៉ាងមុតមាំថា ប្រសិនបើ ពលរដ្ឋវណ្ណៈមធ្យម មានលំនឹងសេដ្ឋកិច្ចរឹងមាំ នោះសហរដ្ឋអាមេរិកក៏រឹងមាំខ្លាំងដែរ។
ដោយពុំបានបញ្ជាក់លម្អិតពីវិធានការជាក់លាក់ថាត្រូវធ្វើម្តេចនិងត្រូវដោះស្រាយណាចំពោះករណីនីមួយៗ តែ លោកស្រី ខាម៉ាឡា ហារីស បានថ្លែងសន្យាលើកកម្ពស់កម្រិតប្រាក់ខែអប្បបរិមានិងប្រកាសផ្តល់ជំនួយកម្ចី ប្រមាណ ២៥ ០០០ ដុល្លារ ទៅដល់ក្រុមគ្រួសារណា ដែលទើបតែទិញលំនៅដ្ឋានផ្ទះសម្បែង ជាលើកទី១។ នេះដើម្បីចូលរួមចំណែកទប់ទល់បញ្ហាវិបត្តិលំនៅដ្ឋាន។ លោកស្រីក៏សន្យាផ្តល់ជំនួយកម្ចី ប្រមាណ ៦ ០០០ដុល្លារ ដល់ប្តីប្រពន្ធដែលទើបបង្កើតកូន១។ លើសពីនេះទៅទៀត លោកស្រី ខាម៉ាឡា ហារីស បង្ហាញក្តីសន្យាថាបើឈ្នះឆ្នោតកាន់កាប់សេតវិមានប្រធានាធិបតីអាមេរិក នោះលោកស្រីនឹងកាត់បន្ថយបញ្ចុះតម្លៃប្រេងសាំង និងកាត់បន្ថយអតិផរណាទំនិញ ទំនិញដែលឡើងថ្លៃខ្ពស់ខ្លាំង ពិសេសទំនិញទាក់ទងនឹងស្បៀងចំណីអាហារ។ ផ្ទុយទៅវិញ លោកស្រីចង់ដំឡើងពន្ធចំពោះក្រុមហ៊ុនធំៗនិងពួកអ្នកមានមហាសេដ្ឋីក្រាក់ៗ ដើម្បីយកលុយទៅជួយពួកអ្នកក្រ ដែលមានប្រាក់ចំណូលទាប។
វិធានការរបស់អ្នកស្រីខាម៉ាឡា ត្រូវគូប្រជែង មហាសេដ្ឋី ដូណាល់ ត្រាំ បេក្ខជនប្រធានាធិបតីមកពីគណបក្សសាធារណរដ្ឋ បាន ចោទប្រកាន់ថា ជាគោលការសេដ្ឋកិច្ចបែបកុម្មុនិស្តនិយម។
អតិផរណាទំនិញនៅអាមេរិក បានធ្លាក់ចុះ៣% ជាលើកទី១ក្នុងរយៈពេល៣ឆ្នាំនេះ។ ទោះបីជាយ៉ាងនេះក្តី លោក ដូណាល់ ត្រាំ មិនព្រមទទួលស្គាល់ឡើយ ហើយថែមទាំងរិះគន់ស្តីបន្ទោសក្រុមគណបក្សប្រជាធិបតេយ្យដែលដឹកនាំអាមេរិកសព្វថ្ងៃថា ជាហេតុបង្កឲ្យមានអតិផរណាទំនិញ។
បេក្ខជនប្រធានាធិបតីមកពីសាធារណរដ្ឋ រូបនេះ បានសន្យាថា បើខ្លួនឈ្នះឆ្នោតដឹកនាំសហរដ្ឋអាមេរិកជាថ្មី លោក ត្រាំ នឹងដាក់ពន្ធនាំចូលទំនិញពីបរទេស ឲ្យធ្ងន់ធ្ងរ ហើយនិងលុបចោលពន្ធដាមួយចំនួននៅក្នុងស្រុក និងលុបចោលសំណងធានារ៉ាប់រងសុខភាព ដែលលោកយល់ថា ជាទម្ងន់និងជាបន្ទុកធ្ងន់សម្រាប់រដ្ឋនិងពួកអ្នកមាន។ លោក ត្រាំ ក៏សន្យាចម្រាញ់រ៉ែ និងទាញយកថាមពលប្រេងនៅក្នុងស្រុកទៅប្រើប្រាស់ ហើយនិងកាត់បន្ថយតម្លៃថាមពល ចំនួនពាក់កណ្តាលឯណោះ។ ក៏ប៉ុន្តែ លោក ត្រាំ ពុំបានបញ្ជាក់លម្អិតពីវិធានការជាក់លាក់ថាត្រូវធ្វើដូចម្តេចនិងដោយវិធីសាស្ត្រណាមួយទេ។ តែករណីយ៍នេះលោកស្រី ខាម៉ាឡា ហារីស ធ្លាប់បានរិះគន់កម្មវិធីនយោបាយសេដ្ឋកិច្ចរបស់គូប្រជែង ថានាំមកនូវភាពបំផ្លិតបំផ្លាញអាមេរិក៕
