រដ្ឋមន្ត្រីការបរទេសហ្វីលីពីន៖ អាស៊ាននឹងមិនទទួលស្គាល់ការបោះឆ្នោតនៅមីយ៉ាន់ម៉ា នាពេលនេះទេ!
06-August-2026 / ព័ត៌មានអន្តរជាតិ
ហ្វីលីពីន៖ បន្ទាប់ពីកិច្ចប្រជុំចង្អៀតនៃរដ្ឋមន្ត្រីការបរទេសអាស៊ាន (AMM) ក្នុងទីក្រុងសេប៊ូ (Cebu) កាលពីថ្ងៃព្រហស្បតិ៍ រដ្ឋមន្ត្រីការបរទេសហ្វីលីពីន លោកស្រី ថេរ៉េសា ឡាហ្សារ៉ូ (Theresa Lazaro) មានប្រសាសន៍ថា ប្លុកអាស៊ានមិនទទួលស្គាល់ការបោះឆ្នោតនៅមីយ៉ាន់ម៉ាដែលដឹកនាំដោយរបបសឹកនោះទេ ។
លោកស្រី បានបញ្ជាក់ក្នុងសន្និសីទកាសែតថា «យើងមិនទាន់ដឹងថាមានការប្រកាសអ្វីខ្លះទេ បន្ទាប់ពីលទ្ធផលចេញមក។ ប៉ុន្តែបើផ្អែកលើទស្សនៈរួមរបស់អាស៊ាន គឺមិនមានការគាំទ្រ ឬទទួលស្គាល់ឡើយទេនាពេលនេះ»។ លោកស្រីកត់សម្គាល់ថា ទោះបីសមាជិកអាស៊ានខ្លះទទួលស្គាល់រដ្ឋាភិបាលអន្តរកាលក៏ដោយ ប៉ុន្តែស្ថានភាពជាក់ស្ដែងនៅតែបន្តប្រែប្រួល។ លោកស្រីបន្ថែមថា ការតាមដានលទ្ធផលបោះឆ្នោតរបស់សមាជិកខ្លះ មិនមែនមានន័យថាជាការគាំទ្រឡើយ ប៉ុន្តែគ្រាន់តែសង្ឃឹមថាការបោះឆ្នោតនេះអាចជារឿងវិជ្ជមានអ្វីមួយ ។
សមាគមប្រជាជាតិអាស៊ីអាគ្នេយ៍ (អាស៊ាន) ដែលមាន១១ប្រទេសជាសមាជិក នឹងមិនបញ្ជូនអ្នកសង្កេតការណ៍ទៅចូលរួមក្នុងការបោះឆ្នោតសកល ដែលមានបីដំណាក់កាលនៅប្រទេសមីយ៉ាន់ម៉ានោះទេ ដែលវាជាសញ្ញាបង្ហាញពីការមិនគាំទ្រ ឬទទួលស្គាល់លទ្ធផលបោះឆ្នោតឡើយ។ នេះបើតាមការប្រកាសរបស់រដ្ឋមន្ត្រីការបរទេសម៉ាឡេស៊ី លោក Mohamad Hasan នាថ្ងៃអង្គារទី២០ខែមករាឆ្នាំ២០២៦។
យោងតាមរ៉យទ័រ ថ្លែងនៅចំពោះមុខសភាម៉ាឡេស៊ី លោក Hasan បានបញ្ជាក់ថា ទោះបីជាយោធាមីយ៉ាន់ម៉ាបានស្នើសុំអ្នកសង្កេតការណ៍អាស៊ាន ក្នុងអំឡុងកិច្ចប្រជុំកំពូលឆ្នាំ២០២៥នៅទីក្រុងគូឡាឡាំពួក៏ដោយ ក៏ប្លុកនេះបានបដិសេធសំណើនេះជាឯកច្ឆន្ទ។ លោករដ្ឋមន្ត្រីបានសង្កត់ធ្ងន់ថា បើគ្មានអ្នកសង្កេតការណ៍ផ្លូវការ អាស៊ាននឹងមិនផ្តល់ភាពស្របច្បាប់ផ្នែកនយោបាយដល់របបយោធា ដែលបានកាន់អំណាចតាំងពីមានរដ្ឋប្រហារឆ្នាំ២០២១ឡើយ។សូមបញ្ជាក់ថានៅក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅប្រទេសហ្វីលីពីនរដ្ឋមន្ត្រីកសរបរទេសអាស៊ានបានរំលឹកឡើងវិញពីការបន្តជម្រុញការអនុវត្តន៍ផែនការសន្តិភាព៥ចំណុចដែលមានការផ្តល់ជំនួយមនុស្សធម៍ការបើកឲ្យមានបក្សប្រឆាំងចូលរួមជាដើម។តែផែនការនេះត្រូវបានរបបសឹកភូមាបដិសេធ។
ការបោះឆ្នោតដែលបានចាប់ផ្តើមតាំងពីខែធ្នូឆ្នាំ២០២៥ បានរងការរិះគន់យ៉ាងខ្លាំងពីអន្តរជាតិ រួមមានអង្គការសហប្រជាជាតិ និងរដ្ឋាភិបាលបស្ចិមប្រទេស ដែលយល់ឃើញថា ដំណើរការនេះគ្រាន់តែជាល្បិចកល ដើម្បីពង្រឹងអំណាចយោធាតាមរយៈគណបក្សអាយ៉ងតែប៉ុណ្ណោះ។ របាយការណ៍ពីដំណាក់កាលទីពីរនៃការបោះឆ្នោតកាលពីដើមខែមករានេះ បានបង្ហាញថា ចំនួនអ្នកទៅបោះឆ្នោតមានកម្រិតទាប ខណៈដែលគណបក្សសាមគ្គីភាព និងការអភិវឌ្ឍន៍សហភាព (USDP) ដែលស្និទ្ធនឹងយោធា បានអះអាងពីការនាំមុខដាច់គេ។
របាយការណ៍បង្ហាញថា គណបក្សសាមគ្គីភាពសហភាព និងអភិវឌ្ឍន៍ (USDP) ដែលគាំទ្រដោយយោធារបស់ប្រទេសមីយ៉ាន់ម៉ា បានឈ្នះអាសនៈយ៉ាងច្រើននៅក្នុងការបោះឆ្នោតទូទៅពីរដំណាក់កាល ដែលបានធ្វើឡើងនៅចុងខែធ្នូ និងថ្ងៃទី១១ ខែមករា។ ជ័យជម្នះនេះផ្តល់ឱ្យគណបក្ស USDP នូវអាសនៈគ្រប់គ្រាន់នៅក្នុងសភាដើម្បីបង្កើតរដ្ឋាភិបាលថ្មី ទោះបីជាដំណាក់កាលចុងក្រោយនៃការបោះឆ្នោតត្រូវបានគ្រោងទុកនៅថ្ងៃទី២៥ ខែមករាក៏ដោយ។
កាលពីថ្ងៃអាទិត្យសប្តាហ៍មុន មីយ៉ាន់ម៉ាបានបញ្ចប់ការបោះឆ្នោតវគ្គចុងក្រោយ ដែលក្នុងនោះគណបក្ស USDP គាំទ្រដោយយោធាបានឈ្នះអាសនៈភាគច្រើន។ អង្គការសហប្រជាជាតិ សហភាពអឺរ៉ុប អាស៊ាន និងអង់គ្លេស និយាយថា ការបោះឆ្នោតនេះ «ខុសច្បាប់» ដោយសារតែមានរដ្ឋប្រហារ ការរំលោភសិទ្ធិមនុស្ស និងការរឹតត្បិតសេរីភាព ផ្ទុយពីប្រទេសចិន រុស្ស៊ី និងឥណ្ឌា បានគាំទ្រដំណើរការនេះ ។
យោងតាមទីភ្នាក់ងារសារព័ត៌មាន Irrawaddy គណបក្ស USDP បានឈ្នះ ១៩៤ អាសនៈនៅក្នុងដំណាក់កាលទីមួយ។ រួមផ្សំជាមួយនឹងអាសនៈចំនួន ១៦៦ ដែលត្រូវបានបែងចែកទៅឱ្យយោធានៅក្នុងសភា នេះនាំឱ្យចំនួនអាសនៈសរុបរបស់ពួកគេកើនឡើងដល់ ៣៦០ ដែលលើសពីសំឡេងភាគច្រើនដែលត្រូវការចំនួន ២៩៤ ក្នុងចំណោម ៥៨៨ អាសនៈនៅក្នុងសភា ដែលគ្រប់គ្រាន់ដើម្បីបង្កើតរដ្ឋាភិបាលថ្មី។
