លោក តាន់ ហ្សង់ហ្វ្រង់ស័រ័ថាកម្ពុជាបន្តអនុវត្តនយោបាយការបរទេសប្រកបដោយភាពបត់បែនតែចិនថា ទំនាក់ទំនងយោធាចិន-កម្ពុជា «មិនអាចបំបែកបានទេ» និងជា «បងប្អូនដ៏រឹងមាំ»
21-September-2026 / ផ្សេងៗ
ប្រទេសចិន៖ អ្នកនាំពាក្យក្រសួងការពារជាតិចិន លោក Wu Qian បានបដិសេធចំពោះការលើកឡើងទាំងឡាយណាដែលថា មានភាពរកាំរកូសក្នុងទំនាក់ទំនងយោធារវាង ចិននិងកម្ពុជា ដោយលោកបានចាត់ទុកការលើកឡើងទាំងនោះថាជា «ការបង្កាច់បង្ខូច និង មិនត្រឹមត្រូវ»។ថ្លែងក្នុងសន្និសីទសារព័ត៌មាន កាលពីរសៀលថ្ងៃព្រហស្បតិ៍ ទី២៧ ខែកុម្ភៈលោក Wu បានសង្កត់ធ្ងន់ថា «ប្រទេសចិននិងកម្ពុជា គឺជាមិត្តដែកថែប ដែលចែករំលែកគ្នាទាំងសេចក្តីសុខ និងទុក្ខលំបាក និងតែងតែគាំទ្រគ្នាទៅវិញទៅមក»។ លោកបានបន្តថា ក្រោមការណែនាំជាយុទ្ធសាស្ត្រ របស់មេដឹកនាំប្រទេសទាំងពីរ យោធាចិន និងកម្ពុជា មាន «ទំនាក់ទំនងកម្រិតខ្ពស់ និងកិច្ចសហប្រតិបត្តិការប្រកបដោយផលិតភាព និងសំខាន់លើវិស័យផ្សេងៗ»។
អ្នកនាំពាក្យក្រសួងការពារជាតិចិនរូបនេះ បានលើកឡើងពីឧទាហរណ៍ជាក់ស្តែង នៃកិច្ចសហប្រតិបត្តិការរវាងប្រទេសទាំងពីរ រួមមានសមយុទ្ធ «នាគមាស» ចំនួនប្រាំមួយដង និងសមយុទ្ធទេវតាសន្តិភាព ឬ Peace Angel ក៏ដូចជាការធ្វើឱ្យស៊ីជម្រៅនូវកិច្ចសហប្រតិបត្តិការលើវិស័យផ្សេងៗទៀត។ លោកក៏បានរំឭកពីការប្រគល់មេដាយរបស់ក្រសួងការពារជាតិកម្ពុជា ដល់ក្រុមអ្នកជំនាញវេជ្ជសាស្ត្រ និងក្រុមអ្នកជំនាញការចិននៅកម្ពុជាផងដែរ។
លោក Wu Qian បានសន្យាថា យោធាចិននឹងបន្ត «ចាប់ដៃជាមួយភាគីកម្ពុជា ដើម្បីផ្តល់ការឯកភាពគ្នាដ៏សំខាន់ រវាងមេដឹកនាំនៃប្រទេសទាំងពីរ និងពង្រឹងទំនាក់ទំនងយោធា»។
លោកបានប្រៀបធៀបការទុកចិត្តគ្នា រវាងប្រទេសទាំងពីរ ទៅនឹង «ដើមឈើដែលចាក់ឫសក្នុងដី ដែលមានការជួយគ្នាទៅវិញទៅមក» ដោយសង្កត់ធ្ងន់ថា ទំនាក់ទំនងចិន-កម្ពុជា បានឆ្លងកាត់ការសាកល្បងនៃការប្រែប្រួលក្នុងឆាកអន្តរជាតិ ហើយរាល់ការប៉ុនប៉ងបំបែកបំបាក់ទំនាក់ទំនងនេះ នឹងមិនទទួលជោគជ័យឡើយ។សូមបញ្ជាក់ថាប្រតិកម្មរបស់ចិនបានកើតឡើងបន្ទាប់ពីមេទព័ជើងគោកកម្ពុជាទទួលជួបមេទព័ជើងគោកអាមេរិកដែលសន្យាពីការធ្វើកិច្ចសហការជាមួយគ្នាបន្តទៀត។
សម្រាប់ការទទួលជួបមេទព័អាមេរិកនេះដែរដែលបណ្តាញសារពត៍មានវាយតម្លៃថាកម្ពុជាផ្លាស់ប្តូរឥរិយាបទទន់ភ្លន់ជាមួយអាមេរិកនេះនៅថ្ងៃទី២៧កុម្ភៈនេះដែរលោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកការបរទេស និងសហប្រតិបត្តិការអន្តរជាតិ បានមានប្រសាសន៍ថា នៅក្នុងបរិបទនៃពិភពលោកមួយ ដែលមានស្ថានភាព កាន់តែផុយស្រួយ ស្មុគស្មាញ មិនជាក់លាក់ និងគ្រោះថ្នាក់ រាជរដ្ឋាភិបាលកម្ពុជាគ្មានជម្រើសអ្វី ក្រៅពីបន្តអនុវត្តនយោបាយការបរទេសប្រកបដោយភាពបត់បែននោះឡើយ។
នៅក្នុងវេទិកាសារព័ត៌មានលើកទី៦ ដែលរៀបចំដោយអង្គភាពអ្នកនាំពាក្យរាជរដ្ឋាភិបាល ស្ដីពី «រាជរដ្ឋាភិបាល នីតិកាលទី៧ នៃរដ្ឋសភា ជាក្ដីសង្ឃឹមរបស់ប្រជាពលរដ្ឋខ្មែរ» នៅសាលសេរីភាព អគារមិត្តភាព ទីស្ដីការគណៈរដ្ឋមន្ត្រី លោក តាន់ ហ្សង់ហ្រង់ស័រ បានមានប្រសាសន៍បន្តថា «រាជរដ្ឋាភិបាលយើងគ្មានជម្រើសទេ, ត្រូវតែបន្តប្រឹងប្រែង ត្រូវតែបន្តដុតដៃដុតជើង ដើម្បីទាញយកពីទំនាក់ទំនងរវាងកម្ពុជានិងពិភពលោក នូវផលប្រយោជន៍ ច្រើនក្រាស់ក្រែលដូចដែលអាចធ្វើទៅបានមកជូនប្រជាជាតិខ្មែរយើង។ ហេតុអ្វី? ពីព្រោះ ដូចសម្តេចបវរធិបតី នាយករដ្ឋមន្ត្រី ធ្លាប់លើកឡើងជាញឹកញាប់ហើយថា សន្តិភាពសំខាន់សម្រាប់ការអភិវឌ្ឍ, ការអភិវឌ្ឍ សំខាន់សម្រាប់សន្តិភាព បានន័យជារួមថា សន្តិភាពនិងការអភិវឌ្ឍ ចិញ្ចឹមគ្នាទៅវិញទៅមក»។
ក្នុងន័យនេះ រាជរដ្ឋាភិបាលកម្ពុជា បានបន្តពង្រឹងសន្តិភាពដើម្បីបន្តអភិវឌ្ឍសង្គម-សេដ្ឋកិច្ច ហើយទន្ទឹមនេះ បន្តអភិវឌ្ឍប្រទេសដើម្បីបន្តរក្សាសន្តិភាពឱ្យនៅគង់វង្សយូរលង់ នៅក្នុងពិភពលោកមួយ ដែលមានស្ថានភាពកាន់តែផុយស្រួយ ស្មុគស្មាញ មិនជាក់លាក់ និងគ្រោះថ្នាក់។ នេះបើតាមការបញ្ជាក់បន្ថែមរបស់ លោក តាន់ ហ្សង់ហ្រង់ស័រ។លោករដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកការបរទេស និងសហប្រតិបត្តិការអន្តរជាតិ បានមានប្រសាសន៍បន្ថែមថា៖ «ពិភពលោកនៅដើមឆ្នាំ២០២៥នេះ សឹងថាមានលក្ខណៈរញ៉េរញ៉ៃជាងឆ្នាំ២០២៤ ទៅទៀត។
ទាំងអស់គ្នាមើលឃើញរៀងៗខ្លួនហើយ, មើលឃើញភាពតានតឹងភូមិសាស្ត្រនយោបាយ, ការប្រកួតប្រជែងស្រួចស្រាល់ផ្នែកសេដ្ឋកិច្ច ជាមួយការផ្តើមលេចធ្លោឡើងនៃសង្គ្រាមពាណិជ្ជកម្ម, សឹកសង្គ្រាមនៅអឺរ៉ុប និងមជ្ឈិមបូព៌ា ព្រមទាំងជម្លោះប្រដាប់អាវុធនៅក្នុងបណ្តាប្រទេសជាច្រើនដូចជានៅភូមា, អស្ថិរភាពនយោបាយរ៉ាំរ៉ៃនៅទីនេះនិងទីនោះ ដូចជានៅស៊ីរី និង បាំងក្លាដេស ចុងក្រោយនេះ, ភាពខ្សោយទៅៗនៃស្ថាប័នពិភពលោកនានា, អនាធិបតេយ្យនិងភាពត្រដរខ្យល់នៃសណ្តាប់ធ្នាប់សកល ដែលតាំងពីចប់សង្គ្រាមលោកលើកទី២មកម្ល៉េះ ដឹកនាំនិងគ្រប់គ្រងពិភពលោក។ ទាំងនេះ មិនទាន់និយាយដល់បញ្ហាសន្តិសុខមិនប្រពៃណីផងដូចជា បម្រែបម្រួលអាកាសធាតុ ជំងឺរាតត្បាតថ្មីមួយទៀតជាយថាហេតុ ដូចកូវីដ១៩ កាលពីប៉ុន្មានឆ្នាំមុន បញ្ហាសន្តិសុខថាមពល ស្បៀងអាហារ ទឹកស្អាត ឬឧក្រឹតកម្មឆ្លងដែន។ល។និង។ល។»។
លោកបន្តថា ក្នុងន័យនេះ អ្វីដែលនឹងប៉ះពាល់ពិភពលោក នឹងគង់តែប៉ះពាល់ តំបន់អាស៊ី-ប៉ាស៊ីហ្វិក អាស៊ីអាគ្នេយ៍ និងកម្ពុជានៅទីបំផុត។ រាជរដ្ឋាភិបាលកម្ពុជាដឹកនាំដោយសម្តេចបវរធិបតី ហ៊ុន ម៉ាណែត យល់ដឹងណាស់នូវភាពផុយស្រួយនៃស្ថានភាពសកល និងតំបន់។ ម្ល៉ោះហើយ ដើម្បីរៀបជើងព្រួល ត្រៀមលក្ខណៈ ឆ្លើយតបទៅនឹងស្ថានភាពមិនជាក់លាក់អស់ទាំងនេះនៃពិភពលោក តំបន់ និងទីតាំងភូមិសាស្ត្ររបស់កម្ពុជាយើង រាជរដ្ឋាភិបាលមិនត្រឹមតែត្រូវពង្រឹងភាពធន់នៃសេដ្ឋកិច្ចជាតិយើងប៉ុណ្ណោះទេ តែត្រូវបន្តអនុវត្តនយោបាយ ការបរទេសមួយដែលមានភាពបត់បែនខ្ពស់។ នេះបើតាមការបញ្ជាក់បន្ថែមពីលោក តាន់ ហ្សង់ហ្វ្រង់ស័រ។
លោករដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកការបរទេស និងសហប្រតិបត្តិការអន្តរជាតិ បានបញ្ជាក់ថា ដើម្បីអនុវត្តគោលនយោបាយការបរទេសដែលត្រូវបានកំណត់ដោយគណបក្សប្រជាជាជនកម្ពុជា រាជរដ្ឋាភិបាលរបស់សម្តេចបវរធិបតី បាននិងកំពុងបន្ត៖- ការពារផលប្រយោជន៍ស្នូលរបស់កម្ពុជាយើង, ឯករាជ្យ អធិបតេយ្យ បូរណភាពទឹកដី សន្តិភាព និងស្ថិរភាពសង្គម, កាពារគំរូអភិវឌ្ឍសង្គម-សេដ្ឋកិច្ច ដែលឈរលើស្តង់ដារជាក់ស្តែងរបស់កម្ពុជា ហើយមិនអនុញ្ញាតឱ្យ មានការជ្រៀតជ្រែកកិច្ចការផ្ទៃក្នុងរបស់កម្ពុជា ពីសំណាក់បរទេសណាឡើយ
- អនុវត្តនយោបាយការបរទេសមួយ ដែលឈរលើមូលដ្ឋានឯករាជ្យ ច្បាប់អន្តរជាតិ ធម្មនុញ្ញអង្គការសហប្រជាជាតិ និងរដ្ឋធម្មនុញ្ញនៃព្រះរាជាណាចក្រកម្ពុជា- បន្តរពង្រឹងនិងពង្រីកទំនាក់ទំនងល្អជាមួយបណ្តាប្រទេសជិតខាង, ជាមួយបណ្តាប្រទេសដៃគូ ទាំងក្នុងនិង ក្រៅតំបន់អាស៊ាន- រួមចំណែកកាន់តែសកម្ម ក្នុងបុព្វហេតុបង្កើតការពារ រក្សាសន្តិភាព និងស្ថិរភាពក្នុងតំបន់ និងក្រៅតំបន់ ព្រមទាំងនៅគ្រប់ជ្រុងជ្រោយក្នុងពិភពលោក...៕
