ចុះអាណាថ្លើមធំហ៊ានរៀបចំផែនការវាយប្រហារដោយដ្រូនចូលភូមិគ្រឹះរបស់សម្តេចេជោ នៅក្រុងតាខ្មៅ ?
21-September-2026 / ផ្សេងៗ
ភ្នំពេញ៖នៅ ថ្ងៃទី១១ ខែកុម្ភៈ ឆ្នាំ២០២៥ សម្តេចតេជោ ហ៊ុន សែន ប្រធានព្រឹទ្ធសភា បានទម្លាយពត៍មានចេញវត្តព្រះឥន្ទសាមគ្គីធម៌ ស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ថា នៅប៉ុន្មានសប្តាហ៍មកនេះ មានការរៀបចំផែនការដើម្បីវាយប្រហារដោយយន្តហោះ(ដ្រូន) ចូលទៅក្នុងភូមិគ្រឹះរបស់សម្តេចនាក្រុងតាខ្មៅ ក្នុងគោលបំណងផ្តាច់ជីវិតរបស់សម្តេច។សម្តេចបានបញ្ជាក់ដោយមិនបញ្ចេញឈ្មោះអ្នករៀបចំថា «សូមផ្តាំផង ផែនការវាយប្រហាដោយដ្រូនចូលតាខ្មៅ អ្នកត្រូវចាំ ហើយបាត់ខ្លួនពីតាកែវមួយ គឺគាំទ្រផែនការវាយប្រហារដ្រូនចូលតាខ្មៅ សន្តិសុខជាតិ អ្នកកុំចង់ប្រហារជីវិតរបស់ខ្ញុំ ចង់សម្លាប់ខ្ញុំ»។
ទោះបីយ៉ាងណាសម្តេចតេជោបញ្ជាក់ថា ផែនការនេះត្រូវបានសម្តេចដឹងជាមុន តាមរយៈសារសំឡេងសម្ងាត់ ដែលសម្តេចទទួលបាន ។សម្តេចតេជោ ហ៊ុន សែន មិនបានបញ្ជាក់អំពីអ្នកពាក់ព័ន្ធក្នុងការរៀបចំដ្រូនដើម្បីវាយប្រហារសម្តេចនោះឡើយ ប៉ុន្តែកន្លងមកតាំងពិទសវត្ត៩០ប្លាយសម្តេចតេជោធ្លាប់បានទម្លាយពីរឿងមេដឹកនាំបក្សប្រឆាំងអំពាវនាវឲ្យអាមេរិកបាញកាំជ្រួចចូលផ្ទះសម្តេចនៅតាខ្មៅផងដែរ ។
សម្តេចតេជោ ហ៊ុន សែន បានបញ្ជាក់បន្ថែមថា «នេះជាអំពើភេរវកម្ម ហើយសូមជនបរទេសទាំងឡាយ ប្រយ័ត្នប្រយែង ក្នុងការគាំទ្រទាំងឡាយនៃសកម្មភាពភេរវកម្ម ខ្ញុំគ្រាន់តែបញ្ជាក់ ក្នុងប៉ុន្មានអាទិត្យនេះ ផែនការវ៉ៃដ្រូនចូលផ្ទះខ្ញុំ»។សម្តេចបានស្នើឱ្យបរទេសទាំងអស់ កុំលូកលាន់ចូលកិច្ចការផ្ទៃក្នុងរបស់កម្ពុជា ព្រោះថាកម្ពុជា ត្រូវតែគ្រប់គ្រងសន្តិសុខរបស់ខ្លួនឯង។ដោយឡែកក្រៅពីរឿងចាប់ខ្លួនអ្នកដែលបង្កើតផែនការបង្ហោះដ្រូនចូលផ្ទះនៅតាខ្មៅសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានថ្លែងឲ្យដឹងពីតួនាទីនាយករដ្ឋមន្ត្រីថា អ្នកដឹកនាំបន្តវេនគណបក្សប្រជាជនកម្ពុជា ដែលដឹកនាំរាជរដ្ឋាភិបាលកម្ពុជា មិនអាចដើរចេញពីបន្ទាត់នយោបាយរបស់បក្សនោះឡើយ។
ការថ្លែងរបស់សម្តេចតេជោ ហ៊ុន សែន បន្ទាប់ពីមានបរទេសមួយចំនួន រួមទាំងអ្នកនៅក្នុងស្រុកផង លើកឡើងថា តើពេលណា សម្តេចមហាបវរធិបតី ហ៊ុន ម៉ាណែត នាយុករដ្ឋមន្ត្រីកម្ពុជា ដើរចេញពីបន្ទាត់នយោបាយរបស់សម្តេចតេជោ ហ៊ុន សែន។សម្តេចតេជោ បញ្ជាក់ ថា «អ្នកបាននិយាយថា តើពេលណាដែល ហ៊ុន ម៉ាណែត ដើរចេញពីស្រមោលរបស់ឪពុក? ច្បាស់ណាស់ ដែលតួអង្គនាយករដ្ឋមន្ត្រី ឬរដ្ឋមន្ត្រី មិនអាចដូចគ្នាទេ សូម្បីតែឪពុក និងកូន ក៏ប៉ុន្តែ មិនអាចដើរចេញហួសពីបន្ទាត់នយោបាយរបស់គណបក្សបានទេ»។
សម្តេចតេជោ ហ៊ុន សែន បានបន្តថា «សូមសម្លឹងមើលទៅគ្រាន់តែប្រទេសកូរ៉េខាងត្បូង បោះឆ្នោតឯកត្តនាមរើសប្រធានាធិបតី ប៉ុន្តែដើរខុសបន្ទាត់នយោបាយគណបក្ស សូម្បីគណបក្សខ្លួនឯង ក៏បោះឆ្នោតទម្លាក់ប្រធានាធិបតី ចោលដែរ។ អីចឹង សូមផ្តាំ ទៅអ្នកនិយាយថា ហ៊ុន ម៉ាណែត ដើរចេញពីស្រមោលឪពុក? ក្រុមអ្នកបន្តវេន ពេលណាដើរចេញពីស្រមោលគណបក្សប្រជាជន? No way (គ្មានផ្លូវទេ)»។បើតាមប្រសាសន៍សម្តេចតេជោ ហ៊ុន សែន បើទោះបីសម្តេចជាឪពុក និងជាប្រធានគណបក្ស តែសម្តេចមិនលូកលាន់ការងាររបស់សម្តេចមហាបវរធិបតី ហ៊ុន ម៉ាណែត នោះឡើយ។ ការមិនលូកលាន់កិច្ចការរបស់សម្តេចមហាបវរធិបតី ហ៊ុន ម៉ាណែត ទើបធ្វើឱ្យការដឹកនាំរបស់សម្តេចមានភាពរឹងមាំ។ទោះបីយ៉ាងណាសម្តេចតេជោ ហ៊ុន សែន ក៏បានព្រមានថា នាយករដ្ឋមន្ត្រី ដែលដឹកនាំផ្ទុយពីគោលនយោបាយបក្ស ទោះបីជាកូន ក៏ត្រូវដកចេញពីតំណែងដែរ។
នៅក្នុងឱកាសអញ្ជើញ សម្ពោធអគារសិក្សា និងដាក់ឲ្យប្រើប្រាសសមិទ្ធផលនានា នៅបរិវេណវត្តព្រះឥន្ទសាមគ្គីធម៌ ស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាលសម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រកាសជួយសាងសង់អគារសិក្សា២ខ្នងកម្ពស់៤ជាន់ និងជួយឧបត្ថម្ភថវិកា ១០០លានរៀលក្នុងមួយខែ រយៈពេលមួយឆ្នាំ សម្រាប់ការចំណាយនៅវត្តព្រះឥន្ទសាមគ្គីធម៌។សម្តេចតេជោ ថ្លែង ថា «ខ្ញុំព្រះករុណា ខ្ញុំសូមចូលរួមក្នុង១ខែ១០០លានរៀល រយៈពេល១ឆ្នាំ […] សាងសង់អគារសិក្សាបន្ថែម ៤ជាន់តែម្ដង ដែលមាន៤៨បន្ទប់»។
សម្តេចតេជោ ហ៊ុន សែន បានមានប្រសាសន៍បន្ដថា សម្ដេចនឹងជួយសម្រួលការលំបាក ២ភាគ៣ ដល់វត្តព្រះឥន្ទសាមគ្គីធម៌ ដែលវត្តនេះត្រូវចំណាយថវិកាទូទៅទាំងមូលក្នុង ១ខែអស់ប្រមាណ១៦០លានរៀលទៅលើប្រាក់ខែគ្រូបង្រៀន គ្រូពេទ្យ និងការចំណាយផ្សេងៗនៅក្នុងសាលារៀន។បើតាមប្រសាសន៍របស់សម្ដេចតេជោ, ការជួយផ្គត់ផ្គង់ និងឧបត្ថម្ភថវិកានេះ មិនត្រឹមតែជួយបានដល់ព្រះតេជគុណមួយមុខនោះទេ ប៉ុន្តែអាចជួយដល់ជីវភាពគណៈគ្រប់គ្រង លោកគ្រូ អ្នកគ្រូសរុប ២៣២នាក់បន្ថែមទៀត។ សម្តេចតេជោ ហ៊ុន សែន បានគូសបញ្ជាក់ថា បច្ចុប្បន្ននេះសិស្សានុសិស្សកំពុងត្រូវការបន្ទប់សិក្សាចំនួន២៧បន្ទប់ ដូច្នេះដើម្បីបំពេញតម្រូវការសិក្សារបស់សិស្ស និងសមណសិស្ស សម្ដេចសម្រេចរុះរើអគារសិក្សាបណ្ដោះអាសន្នដែលប្រកស័ង្កសីចេញ និងឲ្យវិស្វកម្មចូលសាងសង់អគារសិក្សាថ្មី ដែលមានកម្ពស់៤ជាន់ និង៤៨បន្ទប់ដល់សាលារៀនក្នុងវត្តព្រះឥន្ទសាមគ្គីធម៌។
