សម្រង់ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញសម្ពោធស្ពាន ភ្ជាប់កោះយ៉ក្នុងខេត្តកោះកុង
កោះកុង៖ នៅព្រឹកថ្ងៃចន្ទ ទី៨ ខែមករា ឆ្នាំ២០២៤សម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញសម្ពោធស្ពានបេតុង និងសំណេះសំណាលជាមួយកម្មករ និយោជិតសរុបជាង១ម៉ឺននាក់ នៅក្នុងខេត្តកោះកុង។ក្នុងឱកាសនោះសម្តេចធិបតី ហ៊ុន ម៉ាណែត បានមានសប្រសាសន៍សំណេះសំណាលជាមួយកម្មករ និយោជិតជាង១ម៉ឺននាក់ ដែលមានខ្លឹមសាជាអាទិថា៖
សម្តេចមានក្តីសោមនស្សរីករាយ ដែលបានអញ្ជើញសម្ពោធដាក់ឱ្យប្រើប្រាស់ស្ពាន «សម្តេចតេជោ ហ៊ុន សែន កោះយ៉» និងសំណេះសំណាលជាមួយកម្មករ និយោជិតក្នុងខេត្តកោះកុង ដែលជាកម្មវិធីលើកដំបូងសម្រាប់ឆ្នាំថ្មី។* សម្តេចធិបតី ហ៊ុន ម៉ាណែត បាននាំយកនូវការផ្តាំផ្ញើសួរសុខទុក្ខរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់ពលរដ្ឋខេត្តកោះកុងនិងថ្លែងអំណរគុណអ្នកខេត្តកោះកុង ដែលបានបោះឆ្នោតគាំទ្រគណបក្សប្រជាជនកម្ពុជាឱ្យដឹកនាំប្រទេស។* សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលប្តេជ្ញាចិត្តប្រឹងប្រែងធ្វើឱ្យជាតិ និងជីវភាពប្រជាពលរដ្ឋកាន់តែល្អប្រសើរពីមួយឆ្នាំ ទៅមួយឆ្នាំ តបនឹងការទុកចិត្ត និងគាំទ្ររបស់ប្រជាពលរដ្ឋ។សម្តេចធិបតី ហ៊ុន ម៉ាណែត បានថ្លែងថា សកម្មភាព និងគោលនយោបាយទាំងឡាយដែលបានដាក់ចេញ គឺដើម្បីការរស់នៅ និងជីវភាពរបស់ប្រជាពលរដ្ឋឱ្យកាន់តែល្អប្រសើរ។* សម្តេចធិបតី ហ៊ុន ម៉ាណែត បានថ្លែងថា កោះកុងពីអតីតកាលឆ្ងាយណាស់ ព្រោះគ្មានផ្លូវធ្វើដំណើរ មិនមែនមានស្ថានភាពដូចពេលបច្ចុប្បន្ននោះឡើយ។* សម្តេចធិបតី ហ៊ុន ម៉ាណែត បានថ្លែងថា កោះកុងនឹងកាន់តែរស់រវើកនាពេលអនាគត។
សម្តេចធិបតី ហ៊ុន ម៉ាណែត បានថ្លែងថាដើម្បីមានសន្តិភាព គឺផ្តើមចេញពីនយោបាយឈ្នះ-ឈ្នះ បង្កើតដោយសម្តេចតេជោ ហ៊ុន សែន។ គោលនយោបាយសន្តិភាព គឺជាគោលនយោបាយដ៏ចាំបាច់នាំមកនូវការបញ្ចប់សង្គ្រាម និងការឯកភាពជាតិ ហើយនាំឱ្យមានការអភិវឌ្ឍន៍ខេត្តកោះកុង។ បើគ្មានសន្តិភាព ហើយនៅដាច់ដោយដុំ ច្បាស់ណាស់កោះកុងគ្មានវត្តមានរោងចក្រ សហគ្រាសនោះឡើយ។* សម្តេចធិបតី ហ៊ុន ម៉ាណែត បានថ្លែងថា ទិវាសន្តិភាព២៩ធ្នូ គឺដើម្បីប្រជាពលរដ្ឋខ្មែរគ្រប់រូប ដែលស្អប់សង្គ្រាម និងស្រឡាញ់សន្តិភាព។ នរណាមិនសប្បាយចិត្តនឹង «ទិវាសន្តិភាព២៩ធ្នូ» គឺមិនបាច់ឈប់សម្រាកនៅថ្ងៃនោះទេ។សម្តេចធិបតី ហ៊ុន ម៉ាណែត បានថ្លែងថា គ្មានកំហុសនោះទេ សម្រាប់ការចងចាំថ្ងៃបញ្ចប់សង្គ្រាម និងថ្ងៃផ្តួលរំលំរបបប្រល័យពូជសាសន៍ប៉ុលពត។* សម្តេចធិបតី ហ៊ុន ម៉ាណែត បានថ្លែងថា កម្ពុជារស់នៅដោយមានឯករាជ្យ និងអធិបតេយ្យជាតិ ដោយសារមាន៩ វិច្ឆិកា ដែលជាព្រះរាជបូជនីយកិច្ចរបស់ព្រះបរមរតនកោដ្ឋ។
ឆ្លើយតបនឹងការរិះគន់របស់ម្សៀក្បត់ជាតិតជំនាន់ សម រង្ស៉ី, សម្តេចធិបតី ហ៊ុន ម៉ាណែត បានចោទសួរថាចន្លោះពីថ្ងៃទី១៧ មេសា ១៩៧៥ ដល់ ៧ មករា ១៩៧៩ តើខ្មែរក្រហមបានស្លាប់ខ្មែរមែនឬទេ? ក្រោយរណសិរ្សសាមគ្គីសង្គ្រោះជាតិ បានផ្តួលរំលំរបបខ្មែរក្រហមនៅថ្ងៃទី៧ ខែមករា ឆ្នាំ១៩៧៩ ជាពេលដែលខ្មែរក្រហមលែងសម្លាប់ពលរដ្ឋខ្មែរមែនទេ?* សម្តេចធិបតី ហ៊ុន ម៉ាណែត បានថ្លែងថា ការផ្តួលរំលំរបបខ្មែរក្រហមនៅថ្ងៃទី៧ ខែមករា ឆ្នា១៩៧៩ គឺជាការបិទបញ្ចប់ការកាប់សម្លាប់របស់ខ្មែរក្រហម ហើយរំដោះអាយុជីវិតប្រជាពលរដ្ឋរាប់លាននាក់។* សម្តេចធិបតី ហ៊ុន ម៉ាណែត បានថ្លែងថា ក្រោយថ្ងៃផ្តួលរំលំរបបខ្មែរក្រហម គឺបាននាំឱ្យកម្ពុជាមានការអភិវឌ្ឍន៍ និងរីកចម្រើនដូចពេលបច្ចុប្បន្ន នេះជាសច្ចភាពប្រវត្តិសាស្ត្រ។
សម្តេចធិបតី ហ៊ុន ម៉ាណែត បានថ្លែងថា ចុងទសវត្សរ៍ឆ្នាំ៧០ កម្ពុជាគ្មានជម្រើសស្វែងរកអ្នកជួយសង្គ្រោះនោះឡើយ ក្រៅពីប្រទេសវៀតណាម ខណៈច្បាប់មិនបើកផ្លូវឱ្យអង្គការសហប្រជាជាតិចូលមកជួយកម្ពុជានោះឡើយ។ កុំយករឿងនយោបាយ មកបកស្រាយប្រវត្តិសាស្ត្រ ត្រូវយកទិដ្ឋភាពប្រវត្តិសាស្ត្រ មកបកស្រាយប្រវត្តិសាស្ត្រ ដើម្បីរកឃើញការពិត។* សម្តេចធិបតី ហ៊ុន ម៉ាណែត បានប្រៀបធៀបស្ថានភាពជីវិតខ្មែរក្នុងសម័យខ្មែរក្រហម ជាពេលលិចទូកកណ្តាលទន្លេ កណ្តាលសមុទ្រ គឺគ្មានជម្រើសរើសអ្នកជួយនោះទេ។ ចាប់ពីពេលបច្ចុប្បន្ន ទៅអនាគត ត្រូវរួមគ្នាកសាងអភិវឌ្ឍន៍ប្រទេស រក្សាឱ្យបាននូវសុខសន្តិភាព ទប់ស្កាត់កុំឱ្យមានសង្គ្រាមវិលត្រឡប់មកវិញ។* សម្តេចធិបតី ហ៊ុន ម៉ាណែត បានថ្លែងថា នៅថ្ងៃទី២៥ ខែមករា ឆ្នាំ២០២៤ សម្តេចនឹងអញ្ជើញប្រកាសកម្មវិធីជំរុញការវិនិយោគនៅខេត្តព្រះសីហនុ។
* សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលនីតិកាលទី៧ មិនរង់ចាំពេលវេលា៣ខែ ទើបដាក់ចេញគោលនយោបាយនោះទេ ពោលក្រោយសភាផ្តល់សេចក្តីទុកចិត្តសម្តេចបានប្រកាស និងអនុវត្តន៍ភ្លាមៗតែម្តង។* សម្តេចធិបតី ហ៊ុន ម៉ាណែត ក្រើនរំលឹកក្រសួងការងារយកចិត្តទុកដាក់បណ្តុះបណ្តាលជំនាញ មិនត្រូវយកលុយជាតិបង្កើតគម្រោង ហើយបណ្តុះបណ្តាលមិនមានគុណភាពនោះទេ។
* សម្តេចធិបតី ហ៊ុន ម៉ាណែត បានថ្លែងថា រយៈពេលប្រមាណជា៤ខែកន្លងមកនេះ រាជរដ្ឋាភិបាលចំណាយជិត៥លានដុល្លារ សម្រាប់ឧបត្ថម្ភដល់កម្មការិនីមានផ្ទៃពោះ។* សម្តេចធិបតី ហ៊ុន ម៉ាណែត បានថ្លែងថា ប្រជាពលរដ្ឋខ្មែរត្រូវមានមោទនភាពសម្រាប់សមិទ្ធផល ដែលជាតិកម្ពុជាសម្រេចបាននាពេលបច្ចុប្បន្ន ផ្តើមចេញពីការផ្តួលរំលំរបបប្រល័យពូជសាសន៍ ប៉ុលពត ដើម្បីជាមូលដ្ឋានបន្តសម្រាប់មនុស្សជំនាន់ក្រោយ។
* សម្តេចធិបតី ហ៊ុន ម៉ាណែត បានបញ្ចប់ការថ្លែងសំណេះសំណាលនៅវេលាម៉ោង១០៖៥៥នាទីព្រឹកថ្ងៃទី០៨ ខែមករា ឆ្នាំ២០២៤។
