អេហ្ស៊ីប ប្រាប់អាមេរិកថា រដ្ឋអារ៉ាប់ជំទាស់នឹងផែនការតំបន់ហ្គាហ្សារបស់លោក ត្រាំ
06-June-2026 / ព័ត៌មានអន្តរជាតិ
ប្រទេសអេហ្សីប៖រដ្ឋមន្ត្រីការបរទេសអេហ្ស៊ីប លោកបាដអាបដឹឡាទី( Badr Abdelatty )ថ្លែងទៅកាន់រដ្ឋមន្ត្រីការបរទេសអាមេរិក លោកម៉ាកូរូប៊ីយ៉ូ( Marco Rubio )កាលពីថ្ងៃចន្ទទី១០ខែកុម្ភៈឆ្នាំ២០២៥ថាក្រុមរដ្ឋអារ៉ាប់ បានច្រានចោលផែនការរបស់លោកប្រធានាធិបតីអាមេរិក ដូណាល់ ត្រាំ ក្នុងការគ្រប់គ្រងតំបន់ហ្គាហ្សា និងការផ្លាស់ទីលំនៅប្រជាជនប៉ាឡេស្ទីនទៅកាន់ប្រទេសផ្សេង។ នេះជាការលើកឡើងរបស់ ។
នៅក្នុងកិច្ចប្រជុំមួយនៅទីក្រុងវ៉ាស៊ីនតោន លោកបាដអាបដឹឡាទី( Badr Abdelatty )បានសង្កត់ធ្ងន់លើសារៈសំខាន់នៃការពន្លឿនការកសាងតំបន់ហ្គាហ្សាឡើងវិញ ខណៈដែលវត្តមានរបស់ប្រជាជនប៉ាឡេស្ទីននៅទីនោះដដែល។
បើយោងតាមសេចក្តីថ្លែងការណ៍របស់ក្រសួងការបរទេសអេហ្ស៊ីប លោក Abdelatty បាននិយាយថា លោកកំពុងទន្ទឹងរង់ចាំធ្វើការជាមួយរដ្ឋបាលថ្មីរបស់សហរដ្ឋអាមេរិក ដើម្បីសម្រេចបាននូវសន្តិភាព និងស្ថិរភាពដ៏ទូលំទូលាយ និងយុត្តិធម៌នៅក្នុងតំបន់។
ក្រសួងការបរទេស បានបន្ថែមថា លោក Abdelatty ក៏បានជួបជាមួយបេសកជនមជ្ឈិមបូព៌ារបស់អាមេរិក លោក Steve Witkoff នៅក្នុងកិច្ចប្រជុំដាច់ដោយឡែកមួយផងដែរ ដើម្បីពិភាក្សាលើបញ្ហាដូចគ្នានេះ។បើតាមសេចក្តីថ្លែងការណ៍របស់ក្រសួងការបរទេសអាមេរិកបន្ទាប់ពីកិច្ចប្រជុំវិញ បានលើកឡើងថា លោក Rubio បានរំលឹកឡើងវិញពីសារៈសំខាន់នៃកិច្ចសហប្រតិបត្តិការជិតស្និទ្ធ ដើម្បីជំរុញផែនការក្រោយជម្លោះសម្រាប់អភិបាលកិច្ច និងសន្តិសុខនៃតំបន់ហ្គាហ្សា ហើយបានសង្កត់ធ្ងន់ថា ក្រុមហាម៉ាសមិនអាចគ្រប់គ្រងតំបន់ហ្គាហ្សា ឬគំរាមកំហែងអ៊ីស្រាអែលម្តងទៀតបានទេ។
លោក ត្រាំប្រធានាធិបតីអាមេរិក បានស្នើកាលពីថ្ងៃទី២៥ខែមករាថា អេហ្ស៊ីប និងហ្ស៊កដានី គួរតែទទួលយកជនជាតិប៉ាឡេស្ទីនពីតំបន់ហ្គាហ្សា។ ក្រោយមក លោកបានស្នើឲ្យអាមេរិកកាន់កាប់តំបន់ហ្គាហ្សា និងផ្លាស់ទីលំនៅអចិន្ត្រៃយ៍របស់ជនជាតិប៉ាឡេស្ទីនចេញពីហ្គាហ្សាដោយគ្មានសិទ្ធិត្រឡប់មកវិញទេ។ក្រុមសិទ្ធិមនុស្ស និងអង្គការសហប្រជាជាតិ បានចាត់ទុកទង្វើនេះគឺជាការបោសសម្អាតជនជាតិភាគតិច និងបានថ្កោលទោសចំពោះការលើកឡើងរបស់លោក ត្រាំ។
ក្រសួងសុខាភិបាលហ្គាហ្សា បានឲ្យដឹងថា ការវាយប្រហារយោធារបស់អ៊ីស្រាអែលលើតំបន់ហ្គាហ្សាមុនត្រូវផ្អាកដោយបទឈប់បាញ់ដ៏ផុយស្រួយ បានសម្លាប់ប្រជាជនប៉ាឡេស្ទីនជាង ៤៧ ០០០នាក់ក្នុងរយៈពេល ១៦ខែកន្លងមក ហើយត្រូវបានមជ្ឈដ្ឋានអន្តរជាតិចោទប្រកាន់ថាជាអំពើប្រល័យពូជសាសន៍ និងឧក្រិដ្ឋកម្មសង្គ្រាម។ យ៉ាងណា អ៊ីស្រាអែលបានបដិសេធចំពោះការចោទប្រកាន់នេះ។សង្គ្រាមនេះ បានធ្វើឲ្យប្រជាជនស្ទើរតែទាំងអស់នៃតំបន់ហ្គាហ្សាផ្លាស់ទីលំនៅ និងបង្កឲ្យមានវិបត្តិស្រេកឃ្លាន។
សូមបញ្ជាកើថាការបង្ហូរឈាមចុងក្រោយបំផុតនៅក្នុងជម្លោះអ៊ីស្រាអែល-ប៉ាឡេស្ទីនដែលមានអាយុកាលរាប់ទសវត្សរ៍ ត្រូវបានបង្កឡើងនៅថ្ងៃទី៧ខែតុលាឆ្នាំ២០២៣ នៅពេលដែលពួកសកម្មប្រយុទ្ធហាម៉ាសប៉ាឡេស្ទីនបានវាយប្រហារអ៊ីស្រាអែលដោយបានសម្លាប់មនុស្ស ១ ២០០នាក់ និងចាប់ចំណាប់ខ្មាំងចំនួន ២៥០នាក់។លោក ត្រាំ កាលពីថ្ងៃចន្ទ ទី១០ ខែកុម្ភៈ បាននិយាយថា ក្រុមហាម៉ាសត្រូវតែដោះលែងចំណាប់ខ្មាំងឱ្យបានមុនថ្ងៃត្រង់ នៅថ្ងៃសៅរ៍ ចុងសប្ដាហ៍នេះ បើពុំដូច្នោះទេលោកនឹងប្រាប់ឱ្យអ៉ីស្រាអែល លុបចោលបទឈប់បាញ់ហ្កាហ្សា។ ប្រតិកម្មនេះ កើតមានឡើង បន្ទាប់ពីក្រុមហាម៉ាស គំរាមពន្យារពេលដោះលែងចំណាប់ខ្មាំង ដែលគ្រោងធ្វើឡើងនៅថ្ងៃសៅរ៍ ចុងសប្ដាហ៍ ចំពោះមុខការចោទប្រកាន់គ្នាទៅវិញទៅមក ពីការរំលោភបំពានកិច្ចព្រមព្រៀងបទឈប់បាញ់ ជាមួយអ៉ីស្រាអែល។
ទាក់ទងបញ្ហានេះដែរតាមទីភ្នាក់ងារសារព័ត៌មាន AFP នៅថ្ងៃអង្គារ ទី១១ ខែកុម្ភៈ ឆ្នាំ ២០២៥បានឲ្យដឹងថាថ្នាក់ដឹកនាំជាន់ខ្ពស់ម្នាក់របស់ក្រុមហាម៉ាស បាននិយាយថា ការព្រមានរបស់ប្រធានាធិបតីអាមេរិក លោក ដូណាល់ ត្រាំ ឱ្យក្រុមរបស់ខ្លួនឆាប់ដោះលែងចំណាប់ខ្មាំងអ៉ីស្រាអែល បង្កភាពស្មុគស្មាញថែមទៀតដល់ដំណើរការ សម្រេចបទឈប់បាញ់សម្រាប់តំបន់ហ្កាហ្សា នៅដំណាក់កាលថ្មី។លោក Sami Abu Zuhri បានប្រាប់ AFP ដូច្នេះថា «លោក ត្រាំ ត្រូវតែចង់ចាំថា វាជាកិច្ចព្រមព្រៀងដែលត្រូវបានគោរព ដោយភាគីទាំងសងខាង ហើយជាវិធីតែមួយគត់ដែលនាំទៅដល់ ការដោះលែងចំណាប់ខ្មាំងអ៉ីស្រាអែល។ ភាសាគំរាមកំហែង គ្មានតម្លៃទេ និងនាំមកនូវតែភាពស្មុគស្មាញបន្ថែមប៉ុណ្ណោះ»៕
