វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2541 នាក់
ម្សិលមិញ 5544 នាក់
សរុប 13943638 នាក់
ប្រទេសអាហ្កានីស្ថាន៖ប៉ូលិសបាននិយាយថា នៅថ្ងៃចន្ទទី១៦ ខែមករា ឆ្នាំ២០២៣ អតីតសមាជិកសភាអាហ្វហ្គានីស្ថានម្នាក់និងអង្គរក្សម្នាក់ត្រូវបានជនមិនស្គាល់អត្តសញ្ញាណបាញ់សម្លាប់នៅផ្ទះរបស់គាត់ក្នុងរដ្ឋធានីកាប៊ុល។លោក Molvi Hamidullah Khalid មេប៉ូលិសក្នុងតំបន់បាននិយាយថា លោកស្រី Nabizada និងអង្គរក្សរបស់គត់ត្រូវបានបាញ់សម្លាប់នៅម៉ោងប្រហែល៣ទៀបភ្លឺថ្ងៃទី ១៤ ខែមករានៅក្នុងបន្ទប់តែមួយ។
លោកស្រី Mursal Nabizada គឺជាអតីតសមាជិកសភាស្ត្រីមួយរូបក្នុងចំណោមសមាជិកសភាមួយចំនួនដែលបន្តនៅក្រុងកាប៊ុល បន្ទាប់ពីពួកតាលីបង់បានឡើងកាន់អំណាចក្នុងខែសីហា ឆ្នាំ ២០២១ ។ វាជាលើកទីមួយហើយដែលសមាជិកសភាមកពីអតីតរដ្ឋាភិបាលត្រូវបានសម្លាប់នៅក្នុងទីក្រុងចាប់តាំងពីពួកតាលីបង់បានវិលត្រឡប់មកកាន់កាប់ប្រទេសអាហ្វហ្គានីស្ថាន។យោងតាមលោក Khalid បងប្រុសរបស់លោកស្រី Nabizadaបានឱ្យដឹងថា សន្តិសុខម្នាក់ទៀតក៏បានរងរបួសផងដែរ។ បន្ថែមពីលើនេះ កាសែត The Guardian បានដកស្រង់ប្រភពដែលនិយាយថា សន្តិសុខម្នាក់បានរត់គេចពីកន្លែងកើតហេតុ ជាមួយប្រាក់ជាច្រើនព្រមទាំងគ្រឿងអលង្ការ។
លោក Abdullah Abdullah មន្ត្រីកំពូលក្នុងអតីតរដ្ឋាភិបាលអាហ្វហ្គានីស្ថាន បាននិយាយថា លោកមានការសោកស្ដាយយ៉ាងខ្លាំងចំពោះការស្លាប់របស់លោកស្រី Nabizada ហើយសង្ឃឹមថា ជនល្មើសនឹងត្រូវទទួលទោស។នៅលើ Twitter អតីតសមាជិកសភា Mariam Solaimankhil បានពណ៌នាពីលោកស្រី Nabizada ថាជា “អ្នកត្រួសត្រាយពិត – ជាស្ត្រីរឹងមាំ សូម្បីតែប្រឈមមុខនឹងគ្រោះថ្នាក់”។
សារព័ត៌មាន Al Jazeera បានរាយការណ៍ថា “ទោះបីជាត្រូវបានផ្តល់ឱកាសឱ្យចាកចេញពីប្រទេសអាហ្វហ្គានីស្ថានក៏ដោយ ក៏លោកស្រីបានជ្រើសរើសស្នាក់នៅ និងប្រយុទ្ធដើម្បីប្រជាជនរបស់លោកស្រី”។ លោកស្រី Nabizada ត្រូវបានជ្រើសរើសជាសមាជិកសភាតំណាងឱ្យទីក្រុងកាប៊ុលក្នុងឆ្នាំ ២០១៩ ហើយបានកាន់តំណែងនេះរហូតដល់ក្រុមតាលីបង់បានកាន់កាប់.។គិតចាប់តាំងពីចូលមកកាន់កាប់ប្រទេសមក ក្រុមតាលីបង់ តែងតែអះអាងថា ពួកគេផ្តោតលើការធានាសន្តិសុខរបស់ប្រទេសជាតិ និងលើកទឹកចិត្តឱ្យជនជាតិអាហ្វហ្កានីស្ថាននានាត្រលប់មកកាន់ប្រទេសវិញផងដែរ។
ទោះជាយ៉ាងណា ការវាយប្រហារជាច្រើនត្រូវបានសង្កេតឃើញថាបានកើតឡើងជាបន្តបន្ទាប់ក្នុងរយៈពេលប៉ុន្មានខែថ្មីៗនេះ រួមទាំងការវាយប្រហារមួយដែលកើតឡើងនៅក្រសួងការបរទេស កាលពីសប្តាហ៍មុន ដែលបានសម្លាប់ និងធ្វើឱ្យរបួសមនុស្សរាប់សិបនាក់។កាលពីខែធ្នូកន្លងទៅ មនុស្សម្នាក់ក៏ត្រូវបានសម្លាប់នៅក្នុងការវាយប្រហារដោយគ្រាប់បែកអត្តឃាតនៅជិតការិយាល័យនៃគណបក្ស Hezb-e-Islami ប្រចាំទីក្រុងកាប៊ុល ខណៈដែលមេដឹកនាំរបស់ខ្លួន គឺលោក Gulbuddin Hekmatyar នៅពេលនោះក៏ស្ថិតនៅខាងក្នុងទីតាំងមួយនេះផងដែរ៕