វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4871 នាក់
ម្សិលមិញ 6359 នាក់
សរុប 14091504 នាក់
ថៃ៖ នៅថ្ងៃព្រហស្បតិ៍ទី២៩ ខែមេសាមជ្ឍមណ្ឌលគ្រប់គ្រងស្ថានភាពជំងឺ COVID-19 (CCSA) បានប្រកាស ថា ប្រជាជននៅគ្រប់ខេត្តក្រុងទាំង ៧៧ របស់ប្រទេសថៃ គឺអាជ្ញាធរតម្រូវឲ្យពាក់ម៉ាស់មុខជាដាច់ខាត នៅពេលដែលពួកគេចាកចេញពីទីលំនៅរបស់ពួកគេ។នេះជាច្បាប់ថ្មីមួយក្នុងចំណោមវិធានការណ៍ជាច្រើនទៀត ដើម្បីទប់ស្កាត់ជំងឺ COVID-19 ដែលនឹងមានប្រសិទ្ធភាពចាប់ពីថ្ងៃទី០១ ខែឧសភា ឆ្នាំ២០២១។
សារព័ត៌មាន The Nation Thailand នៅថ្ងៃសុក្រទី៣០ ខែមេសា ឆ្នាំ២០២១នេះបានឲ្យដឹងថា ក្រសួងមហាផ្ទៃថៃ កាលពីដើមសប្តាហ៍នេះ ក៏បានប្រកាសថា ប្រជាជននៅក្នុងខេត្តចំនួន ៦៣ ដែលមានអត្រាឆ្លងជំងឺ COVID-19 ខ្ពស់ជាងគេ នឹងត្រូវពាក់ម៉ាស់មុខជាចាំបាច់មិនថាជាម៉ាស់ក្រណាត់ ឬអនាម័យក៏ដោយនៅពេលដែលពលរដ្ឋនៅកន្លែងសាធារណៈ ហើយពួកគេអាចប្រឈមនឹងការផាកពិន័យរហូតដល់ ២០,០០០ បាត (៦៤០ដុល្លារអាមេរិក) ក្រោមច្បាប់ជំងឺឆ្លងប្រសិនបើមិនគោរពតាម។
មជ្ឈមណ្ឌលគ្រប់គ្រងជំងឺឆ្លង COVID-19 របស់ប្រទេសថៃ (CCSA) បានរាយការណ៍នៅរសៀលថ្ងៃសុក្រ ទី៣០ ខែមេសា ឆ្នាំ២០២១នេះថា អ្នកឆ្លងជំងឺនេះសរុប ១,៥៨៣នាក់ទៀតត្រូវបានរកឃើញ និងអ្នកជំងឺ ១៥នាក់ទៀតបាត់បង់ជីវិត នៅក្នុងរយៈពេល ២៤ម៉ោងកន្លងទៅ។នៅក្នុងចំណោមករណីឆ្លងថ្មីៗទាំង ១,៥៨៣នាក់ខាងលើនេះ មានតែ ៤នាក់ប៉ុណ្ណោះជាករណីជាករណីនាំចូលពីបរទេស ហើយក្រៅពីនោះ ៤១៧នាក់ត្រូវបានរកឃើញនៅទីក្រុងបាងកក, ១៣៨នាក់នៅខេត្តសាមុតប្រាកាន និង ១៣១នាក់នៅខេត្តឈុនបុរី ខណៈតំបន់ទាំងបីនេះ នៅតែកំពុងរងការរាតត្បាតដោយ COVID-19 ខ្លាំងក្លាជាងតំបន់ផ្សេងៗទៀតនៅក្នុងប្រទេសថៃ។គិតត្រឹមថ្ងៃសុក្រនេះ ថៃមានករណីឆ្លង COVID-19 សរុប ៦៥,១៥៣ករណី ក្នុងនោះមានអ្នកស្លាប់ ២០៣នាក់ និងជាសះស្បើយវិញ ៣៦,២៥៤នាក់ ខណៈអ្នកជំងឺរហូតដល់ ២៨,៦៩៦នាក់កំពុងសម្រាកព្យាបាល។
រដ្ឋាភិបាលថៃ បានផ្តល់ការអនុញ្ញាតឲ្យវិស័យ ឯកជន អាចនាំចូលវ៉ាក់សាំងបង្ការ COVID-19 ពីបរទេសបាន ដើម្បីបម្រើសេវាដល់ប្រជាជន ដោយសហការជាមួយរដ្ឋាភិបាល។លោក ស៊ូផាន់ មង្គលស៊ូធី (Suphan Mongkolsutee) ប្រធានសហព័ន្ធឧស្សាហកម្មថៃ (FTI) បានថ្លែងកាលពីថ្ងៃព្រហស្បតិ៍ទី២៩ ខែមេសាម្សិលមិញនេះថា៖ «រដ្ឋាភិបាលរបស់យើងនឹងបង្កើនការបញ្ជាទិញវ៉ាក់សាំង ដើម្បីធានាឲ្យបាននូវវ៉ាក់សាំងចំនួន ១០០លានដូសក្នុងឆ្នាំ២០២១នេះ ជាមួយនឹងម៉ាក (brand) វ៉ាក់សាំងបន្ថែមទៀត ដែលនឹងត្រូវដាក់បន្ថែមនៅក្នុងខែឧសភា»។
សូមជម្រាបថា ប្រទេសថៃ ដែលមានចំនួនប្រជាជនជិត ៧០លាននាក់ បើគិតត្រឹមថ្ងៃព្រហស្បតិ៍ម្សិលមិញនេះ បានចាក់វ៉ាក់សាំងបង្ការ COVID-19 ចំនួន ១.៣៤លានដូសហើយជូនពលរដ្ឋរបស់ខ្លួន ក្នុងនោះមានតែ ២៨៥,០០០នាក់ ឬស្មើនឹង ០.៤% ប៉ុណ្ណោះបានទទួលការចាក់គ្រប់ដូស (ពីរដូស)។
គួរបញ្ជាក់ថា ប្រទេសថៃ កន្លងមកនេះបានធ្វើការបញ្ជាទិញ វ៉ាក់សាំងអង់គ្លេស AstraZeneca ប្រមាណ ៦១លានដូស និងវ៉ាក់សាំងចិន Sinovac ចំនួន ២.៥លានដូសរួចមកហើយ ហើយខ្លួនក៏កំពុងចរចាដើម្បីទិញវ៉ាក់សាំងរុស្ស៊ី Sputnik ចំនួនចាប់ពី ៥-១០លានដូសទៀត។បើតាម FTI ក៏បានលើកឡើងថា រដ្ឋាភិបាលនឹងសហការជាមួយវិស័យឯកជន ក្នុងនោះរួមមានទាំងប្រតិបត្តិករ នៃមន្ទីរពេទ្យឯកជននានាផងដែរ ដើម្បីសម្រួលដល់ការនាំចូលវ៉ាក់សាំង៕