លោក ពូទីន៖ ការចរចាជាមួយអ៊ុយក្រែន អាចទៅរួច ប៉ុន្តែមិនមែនជាមួយលោក ហ្សេលេនស្គីតែអ៊ុក្រែនថា លោក ពូទីន ខ្លាចមិនហ៊ានចរចា
25-April-2025 / ព័ត៌មានអន្តរជាតិ
រុស្ស៊ូអ៊ុយក្រែន៖កាលពីថ្ងៃអង្គារ ទី២៨ ខែមករា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយ ថា ប្រធានាធិបតីរុស្ស៉ី លោក វ្ល៉ាឌីមៀ ពូទីន ភ័យខ្លាចចំពោះការចរចាដើម្បីបញ្ចប់ សង្គ្រាមឈ្លានពាននៅអ៊ុយក្រែន បន្ទាប់ពីលោក ពូទីន បានច្រានចោល លទ្ធភាពជួបនិយាយគ្នាដោយផ្ទាល់ ជាមួយលោកប្រធានាធិបតីអ៊ុយក្រែន។ ទីភ្នាក់ងារព័ត៌មាន AFPបានផ្សាយថា៖លោក ហ្សេលេនស្គី បានបង្ហោះសារយ៉ាងដូច្នេះថា «ថ្ងៃនេះ លោក ពូទីន បានបញ្ជាក់ឱ្យឃើញជាថ្មីម្តងទៀតថា រូបលោកភ័យខ្លាច ចំពោះការចរចា... ខ្លាចមេដឹកនាំដែលរឹងមាំ ហើយធ្វើអ្វីគ្រប់យ៉ាងដែលអាចទៅរួច ដើម្បីអូសបន្លាយសង្គ្រាម»។
កាលពីថ្ងៃអង្គារ ទី២៨ ខែមករា ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយថា ការចរចាជាមួយអ៊ុយក្រែន គឺអាចទៅរួច ប៉ុន្តែមិនមែនជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នោះទេ។ នេះបើតាមការចេញផ្សាយ ដោយទីភ្នាក់ងារព័ត៌មាន AFP។លោក ពូទីន បាននិយាយថា ប្រសិនបើលោក ហ្សេលេនស្គី ចង់ចូលរួមក្នុងកិច្ចចរចា រូបលោកផ្ទាល់ នឹងចាត់ឱ្យអ្នកតំណាងចូលរួមជំនួស ដោយលោកប្រធានាធិបតីរុស្ស៉ី បានសង្កត់ធ្ងន់ថា បើអ៊ុយក្រែនពិតជាមានបំណងចង់ចរចាស្វែងរក ការព្រមព្រៀងគ្នាដោយប្រាកដប្រជាមែននោះ ចូរឱ្យអ្នកផ្សេងដឹកនាំកិច្ចប្រឹងប្រែងចរចា ជំនួសលោក ហ្សេលេនស្គី វិញទៅ។
ផ្ទុយទៅវិញលោក វ្ល៉ាឌីមៀ ពូទីន បែរជានិយាយថា សង្គ្រាមដែលកំពុងបន្តអូសន្លាយ នៅអ៊ុយក្រែន មុខជានឹងចប់ក្នុងរយៈពេលត្រឹម២ខែ ឬឆាប់ជាងនេះទៅទៀត ប្រសិនបើក្រុមលោកខាងលិច ឈប់ផ្តល់ការគាំទ្រដល់ទីក្រុងកៀវ តទៅទៀត។ ដែលចង់មានន័យថាត្រូវឲ្យប្រទេសអ៊ុយក្រែនចាញ់សង្គ្រាមមិនមែនតាមការចរាចារទេ។ថ្លែងប្រាប់ក្រុមអ្នកសារព័ត៌មាន មកពីទូរទស្សន៍រដ្ឋរុស្ស៉ី លោកប្រធានាធិបតីរុស្ស៉ី បានលើកឡើងថា អ៊ុយក្រែននឹងមិនមានលទ្ធភាពតស៊ូប្រយុទ្ធ បានយូរទៀតឡើយ សូម្បីតែត្រឹម១ខែ ប្រសិនបើលែងទទួលបានការគាំទ្រហិរញ្ញវត្ថុ និងសព្វាវុធតទៅទៀត ពោលគឺអ្វីៗមុខជានឹងបញ្ចប់ទៅវិញមិនខាន ក្នុងរយៈពេលត្រឹមប្រហែល ១ខែកន្លះ ឬក៏២ខែតែប៉ុណ្ណោះ។
ការឆ្លើយឆ្លងសម្តីគ្នានេះគឺបន្ទាប់ពី ប្រធានាធិបតីអាមេរិក លោក ដូណាល់ ត្រាំ បានដាក់សម្ពាធឱ្យភាគីទាំងពីរ ស្វែងរកទីបញ្ចប់សម្រាប់សង្គ្រាម ដែលអូសបន្លាយពេលជិត៣ឆ្នាំមកហើយ។ លោកត្រាំក៏បានតែងតាំងប្រេសិទ្ធពិសេសសម្រាប់ការចរចារនេះផងដែរ។ទោះបីយ៉ាងណាប្រធានាធិបតីអ៊ុយក្រែនលោក Volodymyr Zelenskiy ជំរុញឱ្យប្រធានាធិបតីអាមេរិក ដូណាល់ ត្រាំ ឈរនៅខាងអ៊ុយក្រែន ដោយលើកឡើងក្នុងបទសម្ភាសន៍ជាមួយទូរទស្សន៍ Fox News ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន «មិនខ្លាចអឺរ៉ុបនោះទេ»។«យើងចង់ឱ្យគាត់ (ដូណាល់ ត្រាំ) នៅខាងយុត្តិធម៌ គឺនៅខាងអ៊ុយក្រែន» លោក Zelenskiy បានថ្លែង ដោយបញ្ជាក់ថា អ៊ុយក្រែនត្រូវការការធានាសន្តិសុខកាន់តែទូលំទូលាយ។
ការណ៍នេះកើតឡើងស្របពេលដែលប្រធានាធិបតីអាមេរិក ដែលធ្លាប់សន្យាបញ្ចប់សង្គ្រាម រុស្ស៊ី-អ៊ុយក្រែនយ៉ាងឆាប់រហ័ស ថ្មីៗនេះបានបង្ហាញពីឆន្ទៈជួបពិភាក្សាជាមួយលោក ពូទីន។ ជំហាននេះផ្ទុយពីគោលនយោបាយរបស់ អតីតប្រធានាធិបតី Biden ដែលជៀសវាងការទាក់ទងដោយផ្ទាល់ជាមួយមេដឹកនាំរុស្ស៊ី។គួរបញ្ជាក់ថា សង្គ្រាមអ៊ុយក្រែន បានផ្ទុះឡើង តាំងតែពីថ្ងៃទី២៤ ខែកុម្ភៈ ឆ្នាំ២០២២ ដែលគិតមកទល់ពេលនេះ មានរយៈពេលជិត ៣ឆ្នាំមកហើយ និងហាក់នៅតែមិនទាន់មានសញ្ញាថា នឹងថមថយឡើយ បើទោះបីជាប្រធានាធិបតីអាមេរិក លោក ដូណាល់ ត្រាំ ដែលទើបត្រឡប់មកកាន់អំណាចសាជាថ្មី បានប្តេជ្ញាងជួយស្វែងរកទីបញ្ចប់ឱ្យបានឆាប់ សម្រាប់ជម្លោះនេះក៏ដោយ។ជាងនេះទៅទៀតប្រទេសអឺរ៉ុបដែលជាម្ចាស់ជំនួយដ៏ធំមួយដល់អ៊ុយក្រែនបន្ទាបពីអាមេរិកនោះក៏បានប្រតិកម្មថាគេត្រូវបានចំណែកក្នុងការចរចារបញ្ចប់សង្គ្រាមរវាងរុស្ស៊ីនិងអ៊ុយក្រែនផងដែរមិនមែនឲ្យអាមេរិកមកបោះមេតែឯងនោះទេ៕
