នាយករដ្ឋមន្ត្រីកាន់អំណាចហ្វាំងឡង់ចាញ់ប្រផិតប្រផើយក្នុងការបោះឆ្នោតតំណាងរាស្ត្រ
03-April-2024 / ព័ត៌មានអន្តរជាតិ
ហ្វាំងឡង់៖ មេដឹកនាំគណបក្សអភិរក្សនិយម និងជាគណបក្សប្រឆាំង លោក PetteriOrpoបានឈ្នះការបោះឆ្នោតសភាតំណាងរាស្ត្រក្នុងប្រទេសហ្វាំងឡង់ លើលោកស្រីនាយករដ្ឋមន្ត្រី សាណាមារីន(Sanna Marin) នៅក្នុងលទ្ធផលប្រកៀកប្រកិតគ្នា កាលពីយប់ថ្ងៃអាទិត្យ (ទី២ ខែមេសា) ។គណបក្សរបស់លោក Petteri Orpo ទទួលបានសម្លេងគាំទ្រ ២០.៨% ខណៈគណបក្សសង្គមប្រជាតេយ្យរបស់លោកស្រីនាយករដ្ឋមន្ត្រីសាណាម៉ារីន( Sanna Marin) ទទួលបានសម្លេងគាំទ្រ ១៩.៩% ពោលគឺលោកស្រីបានស្ថិតក្នុងលេខរៀងទី ៣ បន្ទាប់ពីមេដឹកនាំគណបក្សប្រជានិយមហ្វាំងឡង់លោកស្រីលីណាមែរី( Leena Meri )ដែលទទួលបានសម្លេងឆ្នោតសរុប ២០.១%ផងដែរ។
បរាជ័យក្នុងការបោះឆ្នោតរបស់លោកស្រីនាយករដ្ឋមន្ត្រីហ្វាំងឡង់ Sanna Marin នៅពេលនេះ គឺជារឿងដ៏គួរឱ្យសោកស្តាយ និងភ្ញាក់ផ្អើលជាទីបំផុតសម្រាប់លោកស្រីខ្លួនឯងផ្ទាល់ ព្រោះថាលោកស្រីគឺជាមេដឹកនាំដ៏មានប្រជាប្រិយភាពមួយរូបដែលបានខិតខំត្រួសត្រាយផ្លូវសម្រាប់ប្រទេសហ្វាង់ឡង់ក្នុងការចូលជាសមាជិករបស់អង្គការណាតូ រួមទាំងការគ្រប់គ្រងបញ្ហាវិបត្តិជំងឺកូវីដ១៩ក្នុងប្រទេសប្រកបដោយភាពជោគជ័យគួរឱ្យកត់សម្គាល់។
លោកស្រី សាណា ម៉ារីនជានាយករដ្ឋមន្ត្រីវ័យក្មេងបំផុត អាយុត្រឹមតែ៣៧ឆ្នាំនេះ ។ ប្រជាប្រិយភាព ដែលមានអ្នកខ្លះហៅលោកស្រីថា នាយករដ្ឋមន្ត្រីRock Star ថែមទៀតផង។ ការដោះស្រាយបញ្ហា គ្រប់គ្រងវិបត្តិជំងឺឆ្លងកូវីដ១៩ ការរៀបចំដាក់ពាក្យសុំចូលជាសមាជិកអូតង់ភ្លាមៗ ព្រមទាំងគោលជំហរឹងមាំ របស់លោកស្រីក្នុងការប្រឆាំងចំពោះការធ្វើសង្គ្រាមរបស់រុស្ស៊ីនៅអ៊ុយក្រែន គឺជាចំណុចវិជ្ជមានធំៗ ដែលធ្វើឲ្យលោកស្រីមានប្រជាប្រិយភាព។ ក៏ប៉ុន្តែបញ្ហាចោទដ៏ធំមួយ ដែលប្រជាជនរិះគន់លោកស្រី គឺផ្នែកសេដ្ឋកិច្ច អតិផរណា និងជាពិសេសគឺបំណុលសាធារណៈតែម្តង។
លោកភេតេរី អ័រប៉ូ (PetteriOrpo)បានធ្វើការឃោសនាបោះឆ្នោត ដោយសង្កត់ចំចំណុចខាងលើនេះ។ លោកបានរិះគន់លោកស្រី សាណា ម៉ារ៉ាំង ថាចាយប្រាក់រដ្ឋធូរលុងខ្លាំងណាស់ ធ្វើឲ្យរដ្ឋមានបំណុលសាធារណៈកាន់តែកើនខ្ពស់ អាចបង្កបញ្ហាទៅថ្ងៃខាងមុខ។ លោក ភេតេរី អ័រប៉ូ អះអាងថា លោកនឹងព្យាបាលសេដ្ឋកិច្ចហ្វាំងឡង់ ឲ្យជាសះស្បើយ តាមរយៈការផ្តល់សន្ទុះសេដ្ឋកិច្ច និងការធ្វើការសន្សំសំចៃប្រាក់រដ្ឋ។ យោងតាមយោបល់លោក រដ្ឋត្រូវតែសន្សំសំចៃប្រាក់ ចំនួនយ៉ាងហោច៦ពាន់លានអឺរ៉ូ នៅក្នុងដំណាក់កាលដំបូងបន្ទាន់ ដើម្បីកាត់បន្ថយបំណុលសាធារណៈ ដែលលោកចាត់ទុកថា វាគ្រោះថ្នាក់។
លោកស្រី សាណា ម៉ារ៉ាំង បានទទួលស្គាល់បរាជ័យក្នុងការបោះឆ្នោតនេះ តែលោកស្រីបានអបអរសាទរដែរ ថាទោះបក្សលោកស្រីចាញ់ឆ្នោតមែន តែបើពិនិត្យមើលចំនួនអាសនៈវិញ គឺបក្សលោកស្រីបានកើនចំនួន លើសពីការបោះឆ្នោតអាណត្តិមុន។
ជោគជ័យនៃគណបក្សស្តាំជាតិនិយមជ្រុល ដែលបានទទួលអាសនៈ នៅលេខរៀងទី២។ វាបង្ហាញពីចរន្តនយោបាយស្តាំនិយមជ្រុល នៅហ្វាំងឡង់ ដែលកាន់តែមានអ្នកគាំទ្រច្រើន តាមរយៈការឃោសនាស្តីបន្ទោស ទំលាក់កំហុសលើជនបរទេស លើជនអន្តោប្រវេសន៍ជាដើម ថាជាអ្នកចូលមកបង្កបញ្ហាអសន្តិសុខ សំបូរចោរ សំបូរឧក្រិដ្ឋកម្ម និងបង្កភាពរញ៉េរញ៉ៃក្នុងសង្គមហ្វាំងឡង់។សម្រាប់ការប៉ឆ្នោតនេះបើពិនិត្យលើចំនួនអាសនៈដែលប្រមូលបាន គឺលោក ភេតេរី អ័រប៉ូ មិនមានសំឡេងភាគច្រើនក្នុងសភា ដើម្បីអាចរៀបចំរដ្ឋាភិបាលតែម្នាក់ឯងនោះទេ ។ ពោលគឺលោកត្រូវតែបង្កើតរដ្ឋាភិបាលចម្រុះ ជាមួយបក្សផ្សេងទៀត។ បញ្ហានៅចោទជាមន្ទិល ព្រោះគេមិនទាន់ដឹងថា លោកភេតេរី អ័រប៉ូ នឹងចរចាជាមួយគណបក្សណាដើម្បីអាចបង្កើតជារដ្ឋាភិបាលចម្រុះ។ ជ័យជំនះលោក ឈ្នះប្រផិតប្រផោយខ្លាំងណាស់។
បើនិយាយពីភាគរយសន្លឹកឆ្នោតវិញ បក្សលោក ភេតេរី អ័រប៉ូ បានតែ២០,៨% បក្សស្តាំនិយមជ្រុលបាន ២០,១% ហើយបក្សសង្គមប្រជាធិបតេយ្យ បាន១៩,៩%។ យើងឃើញថាលើសខ្វះគ្នាតែបន្តិចប៉ុណ្ណោះ។លោកភេតេរី អ័រប៉ូ បានប្រកាសថា គណបក្សលោក នឹងចាប់ផ្តើមចរចាដើម្បីបង្កើតរដ្ឋាភិបាលចម្រុះ។ កន្លងមកក្នុងពេលឃោសនាបោះឆ្នោត លោក ភេតេរី អ័រប៉ូ បាននិយាយរិះគន់រដ្ឋាភិបាលរបស់លោកស្រី សាណា ម៉ារ៉ាំង ខ្លាំងៗណាស់ ទាក់ទិននឹងបញ្ហាសេដ្ឋកិច្ច ការគ្រប់គ្រងហិរញ្ញវត្ថុសាធារណៈ។ បើទៅចាប់ដៃជាមួយបក្សឆ្វេងកណ្តាលនិយមរបស់លោកស្រី សាណា ម៉ារីន គឺវាហាក់ដូចជាមិនសមហេតុសមផលទេ។
មានអ្នកវិភាគខ្លះទៀត លើកឡើងថា លោក ភេតេរី អ័រប៉ូ អាចទំនងជាងាកទៅចាប់ដៃជាមួយបក្សស្តាំជាតិនិយមជ្រុលច្រើនជាង។ កន្លងមកលោក ភេតេរី អ័រប៉ូ ធ្លាប់បាននិយាយការពារនៅចំពោះមុខបណ្តាញសារព័ត៌មានបរទេសថា នៅហ្វាំងឡង់គ្មានគណបក្សស្តាំនិយមជ្រុល នោះទេ។ មានន័យថា ក្នុងការយល់ឃើញរបស់លោក គឺគណបក្សដើម្បីប្រជាជនហ្វាំងឡង់ ដែលបានចំនួនអាសនៈលេខរៀងទី២នេះ គឺជាស្តាំធម្មតា តែមិនជ្រុលនិយម ស្អប់ជនបរទេស ស្អប់ជនអន្តោប្រវេសន៍ដូចគេចោទនោះទេ។តែយ៉ាងណាក៏ដោយ កន្លងមកគេបានឃើញបានឮហើយ ថាបក្សដើម្បីប្រជាជនហ្វាំងឡង់ មានទំនោរស្អប់ជនបរទេសកម្រិតណា។ បក្សនេះចង់ប្រើគោលនយោបាយបិទព្រំដែន មិនឲ្យមានជនអន្តោប្រវេសន៍ចូលមក ហើយមានទំនោរស្អប់សហភាពអឺរ៉ុបថែមទៀតផង។ កន្លងមក លោកភេតេរី អ័រប៉ូ ក៏ធ្លាប់អះអាងដែរ ថាលោកចង់រក្សាបើកទ្វារចំហហ្វាំងឡង់ ទទួលយកជនអន្តោប្រវេសន៍ដែលមានសមត្ថភាពមកធ្វើការ ហើយធានាឲ្យហ្វាំងឡង់បន្តផលិតនាំចេញតទៅទៀត។
ដោយសាការចរចាគ្នាអាចចំណាយពេលច្រើនសប្តាហ៍ ហើយក្នុងអំឡុងពេលនេះ គឺលោកស្រី សាណា ម៉ារ៉ាំង នឹងបន្តធ្វើនាយករដ្ឋមន្ត្រីបណ្តោះអាសន្នសិន។សម្រាប់ការចូលជាសាមជិកពេញសិទ្ធិអូតង់ គឺប្រជាជនហ្វាំងឡង់គាំទ្រខ្លាំងក្លាណា រួមទាំងថ្នាក់ដឹកនាំនយោបាយផងដែរ បន្ទាប់ពីបានឃើញគ្រោះថ្នាក់ ដែលរុស្ស៊ីបានឈ្លានពានអ៊ុយក្រែន។ រដ្ឋាភិបាលថ្មី ដែលនឹងដឹកនាំដោយលោកភេតេរី អ័រប៉ូ នឹងបន្តដើរតាមផ្លូវនេះ ដើម្បីធានាការពារសន្តិសុខហ្វាំងឡង់ ពីការគំរាមកំហែងរបស់រុស្ស៊ី។ហើយសម្រាប់អូតង់វិញ ហ្វាំងឡង់មានសារៈសំខាន់យុទ្ធសាស្ត្រខ្លាំងមិនណយទេ។ ហ្វាំងឡង់មានព្រំដែនជាប់រុស្ស៊ី ប្រវែង១៣០០គីឡូម៉ែត្រ។ ដូច្នេះបានហ្វាំងឡង់ជាសមាជិក គឺអូតង់ បានមានលទ្ធភាព នៅកៀកតាមដានសកម្មភាពកងទ័ពរបស់រុស្ស៊ីតែម្តង។ ហ្វាំងឡង់ ក៏មានកម្លាំងទ័ពនិងគ្រឿងសព្វាវុធដ៏ច្រើន ដើម្បីចូលរួមក្នុងកម្លាំងអូតង់ដែរ។ ហ្វាំងឡង់ និងអូតង់ ត្រូវការគ្នាទៅវិញមក ហើយអ្នកនយោបាយហ្វាំងឡង់ គឺយល់ច្បាស់ណាស់ អំពីសារៈសំខាន់ នៃសម្ព័ន្ធភាពយុទ្ធសាស្ត្រនេះត្រូវក្នុងពេលដែលខ្លួន ប្រឈមជាមួយយក្សកំណាចរុស្ស៊ី ជាប្រចាំ៕ប្រភព៖ BBC News
