អ៊ីស្រអែលបង្កការាំងស្ទះការវិលចុលផ្ទះរប់សប្រជាពលរដ្ឋប៉ាឡេស្ទីនបន្ទាប់ពីត្រាំបង្ហាញគំនិតចងជន្លៀសចេញ
21-September-2026 / ព័ត៌មានអន្តរជាតិ
ហ្គាហ្សា, ប៉ាឡេស្ទីន៖ អស់រយៈពេលជាច្រើនថ្ងៃហើយ ដែលពលរដ្ឋប៉ាឡេស្ទីនរាប់ម៉ឺននាក់ នៅមិនទាន់ទទួលបានការអនុញ្ញាតឱ្យវិលត្រឡប់ទៅកាន់លំនៅដ្ឋានរបស់ខ្លួនវិញ បន្ទាប់ពីមានកិច្ចព្រមព្រៀងបទឈប់បាញ់រវាងអ៊ីស្រាអែលនិងក្រុមហាម៉ាស។ ប្រជាពលរដ្ឋប៉ាឡេស្ទីន(ក្នុងំបន់ហ្គហ្សា)ភាគច្រើន បានចំណាយពេលរង់ចាំជាច្រើនយប់នៅតំបន់ច្រករបៀង Netzarim ស្ថិតភាគកណ្តាលតំបន់ហ្គាហ្សា ដើម្បីអាចបន្តដំណើរទៅកាន់ផ្ទះសម្បែងរបស់ខ្លួននៅឯតំបន់ភាគខាងជើង ដែលជាទីកន្លែងរងការបំផ្លិចបំផ្លាញខ្លាំងជាងគេដោយសារតែសង្គ្រាមរយៈពេលជាង ១ឆ្នាំមកនេះ។
អាជ្ញាធរប៉ាឡេស្ទីន បានឱ្យដឹងថា មានពលរដ្ឋតំបន់ហ្គាហ្សាសរុបជាង ៦៥ម៉ឺននាក់ កំពុងរង់ការបើកច្រក ដើម្បីវិលត្រឡប់ទៅរកលំនៅដ្ឋានរបស់ពួកគេនៅភាគខាងជើង ស្របទៅតាមការព្រមព្រៀងគ្នារវាងអ៊ីស្រាអែលនិងក្រុមហាម៉ាសនៅក្នុងលក្ខខណ្ឌបទឈប់បាញ់ដំណាក់កាលទី១ ដែលមានថេរវេលាសរុប ៤២ថ្ងៃ។កិច្ចព្រមព្រៀងដែលទទួលបានការសម្របសម្រួលដោយប្រទេសកាតា និងអេហ្ស៊ីប បានដាក់លក្ខខណ្ឌឱ្យអ៊ីស្រាអែលអនុញ្ញាតឱ្យពលរដ្ឋប៉ាឡេស្ទីនដែលជាជនភៀសខ្លួន អាចវិលត្រឡប់ទៅកាន់ផ្ទះសម្បែងរបស់ពួកវិញ ដើម្បីជាថ្នូរនឹងការដោះលែងចំណាប់ខ្មាំងអ៊ីស្រាអែលដែលនៅសេសសល់ពីក្រុមហាម៉ាស។
ករណីយ៍នេះមន្ត្រីយោធាអ៊ីស្រាអែលបកស្រាយថា គឺជាការឆ្លើយតបទៅនឹងភាពយឺតយ៉ាវរបស់ក្រុមហាម៉ាស ដែលនៅមិនទាន់បានបញ្ជាក់ពីបញ្ជីឈ្មោះចំណាប់ខ្មាំងដែលនឹងត្រូវដោះលែងបន្ទាប់ រួមទាំងស្ថានភាពរស់រានមានជីវិតរបស់ពួកគេ ជាពិសេស គឺការខកខានមិនបានប្រគល់ចំណាប់ខ្មាំងស្ត្រីអ៊ីស្រាអែល គឺអ្នកនាង Arbel Yehud តាមការសន្យានាដំណាក់កាលដំបូង ដែលជាហេតុធើ្វឱ្យគេសង្ស័យថា អ្នកនាងប្រហែលជាបានបាត់បង់ជីវិតក្រោមការឃុំឃាំងរបស់ក្រុមហាម៉ាស។
សូមបញ្ជាក់ថាថ្មីៗនេះលោក ដូណាល់ ត្រាំបានបង្ហាញគំនិត ចង់បោសម្អាតតំបន់ហ្កាហ្សា និងស្នើឲ្យជម្លៀសពលរដ្ឋប៉ាឡេស្ទីនចេញទៅរស់នៅប្រទេសជិតខាងមានអេហ្សីបនិងហ្សកដានីជាំដើម។តែគំនិតនេះ ត្រូវរងប្រតិកម្មរិះគន់ជាខ្លាំងពីសំណាក់ប្រជាជនប៉ាឡេស្ទីន និងចលនានយោបាយនៅហ្កាហ្សារួមទាំងបណ្តាប្រទេសនៅអឺរ៉ុបផងដែរ។ ពួកប្រដាប់អាវុធហាម៉ាស បានចេញមុខប្រតិកម្មថា «ពលរដ្ឋប៉ាឡេស្ទីននឹងធ្វើឲ្យសំណើរបស់លោក ត្រាំ បរាជ័យធ្លាក់ទឹក។ ជាច្រើនទសវត្សរ៍ដែលគម្រោងផ្លាស់ទី ជម្លៀសពលរដ្ឋប៉ាឡេស្ទីន បានជួបភាពបរាជ័យ។ ម្តងនេះទៀត ក៏នឹងបរាជ័យដូចគ្នា»។ នេះបើតាមអ្នកទទួលខុសត្រូវជាន់ខ្ពស់របស់ពួកហាម៉ាស លោក Bassem Naïm ដែលបានថ្លែងទៅកាន់ទីភ្នាក់ងារព័ត៌មានបារាំង AFP ដោយបញ្ជាក់ទៀតថា ពលរដ្ឋប៉ាឡេស្ទីននឹងប្រកៀកស្មាគ្នា ហើយពួតដៃកសាងហ្កាហ្សាឡើងវិញ។
កាលពីថ្ងៃសៅរ៍ ទី២៥មករា ប្រធានាធិបតីអាមេរិកថ្មី បានស្នើគម្រោងផែនការសន្តិភាពនៅហ្កាហ្សា។ ថ្លែងទៅកាន់ក្រុមអ្នកកាសែតនៅក្នុងយន្តហោះប្រធានាធិបតី Air Force One លោក ដូណាល់ ត្រាំ មានប្រសាសន៍ថា «ប្រជាជននៅទីនោះ មានប្រមាណ ១លាន៥សែននាក់។ ដូចគ្រប់គ្នាជ្រាបស្រាប់ហើយថា ច្រើនសតវត្សរ៍មកនេះ កន្លែងហ្នឹងជួបជម្លោះបញ្ហាមិនចេះចប់។ ដូច្នេះជាការងាយស្រួលទេ យើងបោសសម្អាតទីនោះ។» បុរសខ្លាំងអាមេរិក លោក ត្រាំ ថែមទាំងបញ្ជាក់ថានឹងចូលរួមសហការជាមួយប្រទេសអារ៉ាប់ផ្សេងទៀត ដើម្បីសាងសង់លំនៅឋានឲ្យពលរដ្ឋប៉ាឡេស្ទីនអាចរស់នៅ«សុខសាន្ត» ជារៀងរហូត។
លោក Bezalel Smotrich រដ្ឋមន្ត្រីហិរញ្ញវត្ថុអ៊ីស្រាអែល ដែលជាជនស្តាំនិយមជ្រុល បានគាំទ្រយ៉ាងពេញទំហឹង និងថា គំនិតរបស់លោក ត្រាំ ល្អអស្ចារ្យ។ រដ្ឋមន្ត្រីអ៊ីស្រាអែលបន្ថែមថា គំនិតដ៏ល្អនេះអាចអនុញ្ញាតឲ្យអ៊ីស្រាអែលពិចារណារកទីតាំងកន្លែងណាមួយ ដើម្បីឲ្យក្រុមប៉ាឡេស្ទីន កសាងជីវិតថ្មី ឲ្យល្អប្រសើរ។ក្រសួងការបរទេសអាល្លឺម៉ង់ នៅថ្ងៃចន្ទនេះបានបញ្ជាក់យ៉ាងច្បាស់ថា ប្រជាជន ប៉ាឡេស្ទីន មិនត្រូវត្រូវបានបណ្តេញចេញពីតំបន់ហ្គាហ្សានោះទេ។ ការបដិសេធនេះ គឺជាការឆ្លើយតបដោយប្រយោលទៅនឹងការលើកឡើងរបស់ប្រធានាធិបតីអាមេរិកលោក ដូណាល់ ត្រាំ ពីលទ្ធភាពនៃការតាំងទីលំនៅថ្មី របស់ជនជាតិប៉ាឡេស្ទីនចេញពីតំបន់ហ្គាហ្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។
ទន្ទឹមនិងការបញ្ចេញគមនីតបណ្តាញពលរដ្ឋប៉ាឡេស្ទីនចេញនៅព្រលឹមថ្ងៃសៅរ៍ ទី២៥មករារដ្ឋបាលដឹកនាំរបស់លោក ដូណាល់ ត្រាំ បានបញ្ជាក់ដែរថា គ្រឿងសញ្វវុធអាមេរិក ពិសេសគ្រាប់បែកខ្នាតធំ ២ ០០០ ដែលអ៊ីស្រាអែលបញ្ជាទិញ និងបង់លុយរួចហើយ បានត្រូវលោកដូណាល់ ត្រាំសម្រេចបញ្ចូនចេញទៅឲ្យអ៊ីស្រាអែល។ គ្រឿងសព្វាវុធដ៏ចម្រូងចម្រាសនេះ ត្រូវអតីតរដ្ឋបាល ចូ បៃដិន រារាំងបិទខ្ទប់និងមិនបញ្ជូនទៅឲ្យអ៊ីស្រាអែល។
សូមបញ្ជាក់ថាក្រុមសកម្មប្រយុទ្ធប៉ាឡេស្ទីនហាម៉ាស បានជ្រើសរើសសមាជិកពី ១០ ០០០នាក់ ទៅ ១៥ ០០០នាក់ ចាប់តាំងពីការចាប់ផ្តើមនៃសង្គ្រាមជាមួយអ៊ីស្រាអែល។ តាមប្រភពសមាជិកសភាចំនួនពីរដែលបានរាយការណ៍អំពីព័ត៌មានសម្ងាត់របស់សហរដ្ឋអាមេរិក ដោយបង្ហាញថា យុទ្ធជនដែលគាំទ្រដោយអ៊ីរ៉ង់នេះអាចនៅតែជាការគំរាមកំហែងចំពោះអ៊ីស្រាអែល។
បើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៥ខែមករាឆ្នាំ២០២៥ ប្រភពបាននិយាយថា ការស៊ើបអង្កេតបង្ហាញថា ចំនួនប្រហាក់ប្រហែលគ្នានេះនៃយុទ្ធជនហាម៉ាសត្រូវបានសម្លាប់ក្នុងអំឡុងពេលសង្គ្រាម។
ក្រុមហាម៉ាស និងអ៊ីស្រាអែល បានចាប់ផ្តើមបទឈប់បាញ់កាលពីថ្ងៃអាទិត្យទី១៩ខែមករា បន្ទាប់ពីជម្លោះរយៈពេល ១៥ខែ ដែលបានបំផ្លិចបំផ្លាញតំបន់ហ្គាហ្សាស្ទ្រីប និងតំបន់មជ្ឈិមបូព៌ា។
កាលពីថ្ងៃទី១៤ខែមករា រដ្ឋមន្ត្រីការបរទេសរបស់អតីតប្រធានាធិបតី ចូ បៃដិន លោក Antony Blinken បាននិយាយថា អាមេរិកជឿថា ក្រុមហាម៉ាសបានជ្រើសរើសអ្នកប្រយុទ្ធជាច្រើនដូចដែលខ្លួនបានបាត់បង់នៅក្នុងហ្គាហ្សា ដោយបានព្រមានថា នេះគឺជា «រូបមន្តសម្រាប់ការបះបោរយូរអង្វែង និងសង្គ្រាមជារៀងរហូត»។លោកមិនបានផ្តល់ព័ត៌មានលម្អិតបន្ថែមអំពីការវាយតម្លៃនេះទេ ប៉ុន្តែតួលេខរបស់អ៊ីស្រាអែល បានបង្ហាញថា ចំនួនអ្នកស្លាប់នៃក្រុមសកម្មប្រយុទ្ធនៅក្នុងតំបន់ហ្គាហ្សាមានប្រហែល ២០ ០០០នាក់៕
