រដ្ឋទម្លាក់លុយ៣០លានដុល្លារទិញស្រូវកុំឲ្យថោកពេកទប់ចល្លាចល!
21-September-2026 / សេដ្ឋកិច្ច
ភ្នំពេញ៖លោក កៅ ថាច ប្រតិភូរាជរដ្ឋាភិបាលទទួលបន្ទុកអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) ឱ្យដឹងថា រាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ និងកសិកម្ម បានទម្លាក់ថវិកាចំនួន៣០លានដុល្លារ ដើម្បីអន្តរាគមន៍ទិញស្រូវដែលកំពុងធ្លាក់ថ្លៃពីកសិករ។
នៅក្នុងសន្និសីទសារព័ត៌មានស្តីពី ស្ថានភាពថ្លៃស្រូវ និងការប្រមូលផលស្រូវប្រាំង រៀបចំឡើងនៅរសៀលថ្ងៃទី១៥ ខែមករា នេះលោក កៅ ថាច លើកឡើងដូច្នេះ៖ «ថ្មីៗនេះ ដោយសារស្ថានភាពតម្លៃស្រូវមិនទាន់មានស្ថិរភាព រដ្ឋាភិបាលបានទម្លាក់បន្ថែម៣០លានដុល្លារទៀត នៅថ្ងៃនេះតែម្ដង។ លុយនេះ គឺមកដល់នៅធនាគារអភិវឌ្ឍន៍ជនបទ សម្រាប់បញ្ចេញទៅដើម្បីទិញស្រូវតែម្ដង។ នេះអ្វីដែលរាជរដ្ឋាភិបាលបានរៀបចំ និងធ្វើ អន្តរាគមជាបន្តបន្ទាប់»។
ប្រតិភូរាជរដ្ឋាភិបាលកម្ពុជាទទួលបន្ទុកធនាគារអភិវឌ្ឍន៍ជនបទ និងកសិកម្ម បានឱ្យដឹងថា គិតមកទល់ពេលនេះ ធនាគារអភិវឌ្ឍន៍ជនបទ និងកសិកម្ម បានទម្លាក់ថវិកាចូលទៅក្នុងវិស័យស្រូវអង្ករជាង២០៨លានដុល្លារសហរដ្ឋអាមេរិក។ ក្នុងនោះ ៣០លានដុល្លារ ជាទុនវិនិយោគ ក្រៅពីនេះជាទុនបង្វិល។
លោក កៅ ថាច បានញ្ជាក់ថា កន្លងមករាជរដ្ឋាភិបាលធ្លាប់បានទម្លាក់ថវិកាទិញស្រូវពីកសិករចំនួន៥លើកមកហើយ ក្នុងនោះលើកទី១ គឺកាលពីខែកញ្ញា ឆ្នាំ២០១៦, លើកទី២ ក្នុងខែវិច្ឆិកា ឆ្នាំ២០១៦, លើកទី៣ ខែកក្កដា ឆ្នាំ២០១៧, លើកទី៤ កាលពីខែកញ្ញា ឆ្នាំ២០២០, និងលើកទី៥ កាលពីខែមីនា ឆ្នាំ២០២៤។
ឯលោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទវិញ បានឱ្យដឹងថា បច្ចុប្បន្ននេះរោងម៉ាស៊ីនក្នុងស្រុកចំនួន ៤ ក្នុងចំណោមរោងម៉ាស៊ីនធំៗជាង ២០ ដែលក្រសួងកសិកម្មបាននិងកំពុងសម្របសម្រួល ក្នុងការបង្កើនការទិញស្រូវប្រាំងពីកសិករ។
រោងម៉ាស៊ីនកិនស្រូវទាំង ៤ នោះរួមមាន៖ ទី១. ក្រុមហ៊ុន អៀង ហ៊ាង សង្កែ បាត់ដំបង ទទួលទិញស្រូវស្រង៉ែ និង សែនក្រអូប ក្នុងបរិមាណគ្រោងទិញចំនួន ១៥,០០០ តោន ពីកសិករ។ ទី២ ក្រុមហ៊ុនអេមរុរ៉ាយស៍ សាខាបាត់ដំបង ដែលទទួលទិញស្រូវស្រង៉ែ និង សែនក្រអូបចាប់តាំងពី ថ្ងៃទី០២ មករា ឆ្នាំ២០២៥ រហូត ខែមិនា ២០២៥ សាខាកំពង់ធំ ព្រមទាំងទទួលទិញស្រូវប្រភេទ OM ចាប់តាំងពី ថ្ងៃទី០៣ មករា ឆ្នាំ២០២៥ រហូត ខែមិនា ២០២៥។
ទី៣ រោងម៉ាស៊ីនសេកមាស ជិតនៅ ផ្លូវជាតិលេខ 6A ភូមិតាសែន ស្រុកជើងព្រៃ កំពងចាម ដែលទទួលទិញស្រងនិង OM មានតម្រូវការទិញពីខែមករា ដល់មិនា ២០២៥ ចំនួន ២០០០០ តោន។ និងទី៤ រោងម៉ាស៊ីនឈិតប៊ុនថង ព្រៃវែង ទទួលទិញស្រូវ OM5451 និងស្រូវផ្សេងទៀត នៅក្នុងបរិមាណ ២០០០០តោន ចាប់ពីខែមករា ដល់មិនា ឆ្នាំ២០២៥។
អ្នកស្រី ឃី ប៉ូនី ម្ចាស់រោងម៉ាស៊ីនកិនស្រូវ អេមរុរ៉ាយស៍សាខាខេត្តកំពង់ធំ ក៏បានបញ្ជាក់ឱ្យកាសែត ដឹងថា រោងម៉ាស៊ីនកិនស្រូវរបស់អ្នកស្រី បានទិញស្រូវប្រភេទ OM ចូលពីកសិករក្នុងរង្វង់ចន្លោះពី ១៥ ទៅ ២០ ឡានក្នុងមួយថ្ងៃ ដោយគិតជាតោនចន្លោះពី ៥២៥ តោន ទៅ ៧០០ តោន ក្នុងមួយថ្ងៃទៅតាមចំនួនស្រូវ និងសមត្ថភាពឡសង្ងួតរបស់រោងម៉ាស៊ីន។
ចំពោះតម្លៃវិញ អ្នកស្រី បានអះអាងថា «តម្លៃស្រូវ OM អាចមានការប្រែប្រួលជារៀងរាល់ថ្ងៃ ដោយតម្លៃគិតទៅតាមជិត ឆ្ងាយ ប៉ុន្តែសម្រាប់ថ្ងៃទី១៥ ខែមករា ឆ្នាំ២០២៥ នេះ តម្លៃដឹកដល់រោងម៉ាស៊ីន អ្នកស្រីទិញចូលក្នុងតម្លៃ ៨៨០ រៀលឡើង ក្នុង ១គីឡូក្រាម»។ក្រៅពីឈ្មួញនៅរសៀលថ្ងៃទី ១៥ ខែមករា ឆ្នាំ ២០២៥ នេះ លោកឧកញ៉ា ព្រាប សុវត្ថិ និង ភរិយា បានប្រកាសចូលរួមចំណែកទិញស្រូវពីប្រជាកសិករចំនួន ៥០ តោន ជូនប្រជាពលរដ្ឋដែលកំពុងមានជីវភាពខ្វះខាត ដើម្បីចូលរួមជួយបន្តផ្ដល់ស្នាមញញឹមដល់ប្រជាជនខ្មែរទាំងអស់។
ដោយឡែកឧកញ៉ាឡេងណាវ៉ាត្រាដែលយឺតយ៉ាវក្នុងការសង់ផ្ទះជុនអតិថិជនខ្លួននោះក៏ប្រកាសតាមហ្វសប៊ុកថានឹងទិញអង្គរចែកជូនប្រជាពលរដ្ឋអ្នកទិញផ្ទះរបស់ខ្លួនដែរ។សូមអបអរសាទរតែសកម្មភាពចឹងវាបានតែមួយប្រ៉ាវទេបញ្ហាដែលស្ថេរភាពនិងជួយលើកស្ទួយសេដ្ឋកិច្ចកម្ពុជាគឺរដ្ឋត្រូវរកទីផ្សារនាំចេញស្រូវអង្គរឲ្យបានច្រើនមិនមែនពឹងតែទីផ្សារជិតខាងចឹងទេ៕
