វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2163 នាក់
ម្សិលមិញ 3717 នាក់
សរុប 14150496 នាក់
ភ្នំពេញ៖ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវ: បានណែនាំទៅកាន់គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញាគ្រប់ជាន់ថ្នាក់ ត្រូវបន្តយកចិត្តទុកដាក់បន្តតាមដានករណីរោងចក្រដែលបានព្យួរកិច្ចសន្យាការងារ ដើម្បីក្តាប់បានព័ត៌មានទាន់ពេលវេលាករណីរោងចក្របិទទ្វារមិនដំណើរការ ហើយម្ចាស់រត់ចោល។
នៅក្នុងកិច្ចប្រជុំពិនិត្យវឌ្ឍនភាពការងាររបស់គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា (គ.ក.ប) នៅទីស្តីការក្រសួងការងារ នាព្រឹកថ្ងៃទី១២ ខែតុលា ឆ្នាំ២០២២លោករដ្ឋមន្ត្រីក្រសួងការងារបានលើកពីវឌ្ឍនភាពការងាររបស់គណៈកម្មការសម្រាប់ដោះស្រាយបញ្ហា កូដកម្ម បាតុកម្មនៅតាមគ្រប់មុខសញ្ញា ចាប់ពីឆ្នាំ២០២០ ដល់ខែសីហា ឆ្នាំ២០២២ ។អង្គប្រជុំបានវាយតម្លៃខ្ពស់ចំពោះការចូលរួមសម្រេចបានការងារដ៏ល្អកន្លងមករបស់គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា ទាំងថ្នាក់ជាតិ និងថ្នាក់ក្រោមជាតិ ក្នុងការអន្តរាគមន៍ និងដោះស្រាយដល់ទីកន្លែងបានទាន់ពេលវេលានូវរាល់ទំនាស់ ឬវិវាទការងារ ដើម្បីធានាបាននូវការស្វែងរកដំណោះស្រាយជូនម្ចាស់រោងចក្រ សហគ្រាស និងកម្មករនិយោជិត ក៏ដូចជាធានាបាននូវការផ្តល់ជូននូវអត្ថប្រយោជន៍ផ្សេងៗ ដែលបណ្តាលមកពីវិវាទការងារ ឬករណីរោងចក្រក្ស័យធន ឬករណីម្ចាស់រោងចក្ររត់ចោលជាដើម ដែលបានធ្វើឱ្យបញ្ហាកូដកម្ម បាតុកម្មទាមទារនៅតាមបណ្ដារោងចក្រ សហគ្រាសថយចុះយ៉ាងខ្លាំងនៅសេសសល់តែបញ្ហាខ្លះ ដែលការទាមទារកំពុងត្រូវបានដោះស្រាយ ឬបញ្ហាទាមទារខ្លះដែលហួសពីលទ្ធភាពដោះស្រាយ ដែលត្រូវរង់ចាំការសម្រេចពីតុលាការ។
លោករដ្ឋមន្ត្រីបានផ្តល់អនុសាសន៍ឱ្យបន្តយកចិត្តទុកដាក់បន្តតាមដានករណីរោងចក្រដែលបានព្យួរកិច្ចសន្យាការងារ ដើម្បីក្តាប់បានព័ត៌មានទាន់ពេលវេលាករណីរោងចក្របិទទ្វារមិនដំណើរការ ឬម្ចាស់រត់ចោល។
លោកបានបន្តថា ការដោះស្រាយករណីរោងចក្របិទទ្វារដោយម្ចាស់រត់ចោល ដើម្បីរឹបអូសទ្រព្យសម្បត្តិ លក់ឡៃឡុង បើកផ្តល់ជូនកម្មករនិយោជិត ឬទូទាត់សងថវិការដ្ឋ ត្រូវអនុវត្តឱ្យបានម៉ឺងម៉ាត់នូវស្មារតីសេចក្តីជូនដំណឹងលេខ ២៣៩ សជណ.អវ របស់ទីស្តីការគណៈរដ្ឋមន្ត្រី។លោក អ៉ិត សំហេង បានណែនាំឱ្យបន្តខិតខំអនុវត្តផែនការ និងបទបញ្ជាស្តីពីការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា ឆ្នាំ២០២០-២០២៤ ឱ្យទទួលបានប្រសិទ្ធភាពខ្ពស់។