អ្នកស្រីស៊ិន ចាន់ពៅរ៉ូហ្ស៊េត ប្រកាសឱ្យពលរដ្ឋខ្មែរឈប់គាំទ្របក្សភ្លើងទៀន ដែលនៅរស់ទាំងត្រដរមុនស្លាប់?!
21-September-2026 / ផ្សេងៗ
ភ្នំពេញ៖ អ្នកស្រី ស៊ិន ចាន់ពៅរ៉ូហ្ស៊េត ដកម្មជនគណបក្សប្រឆាំងនៅសង្កាត់អូចារ ក្រុងបាត់ដំបង ខេត្តបាត់ដំបង បានសម្តែងការខឹងសម្បាជាខ្លាំងចំពោះថ្នាក់ដឹកនាំគណបក្សភ្លើងទៀន បន្ទាប់ពីបណ្តេញអ្នកស្រីចេញពីបក្សដែលធ្វើឲ្យអ្នកស្រីនឹងត្រុវបាត់បង់តួនាទីជាចៅសង្កាត់រងមកពីគណបក្សភ្លើងទៀន។ អ្នកស្រី ស៊ិន ចាន់ពៅរ៉ូហ្ស៊េត បានអំពាវនាវឱ្យអ្នកគាំទ្របក្សភ្លើងទៀនទាំងក្នុង និងក្រៅប្រទេស បញ្ឈប់ការគាំទ្របក្សភ្លើងទៀនដែលត្រដរនៅរស់នេះបន្តទៅទៀត។
អតីតភាពជាគណបក្សសមរង្ស៊ីបច្ចុប្បន្នឈ្មោះ គណបក្សភ្លើងទៀន កាលពីថ្ងៃទី១៦ ខែធ្នូ ឆ្នាំ២០២៤ តាមរយៈប្រធានប្រតិបត្តិបក្សភ្លើងទៀនខេត្តបាត់ដំបងបានសម្រេចលុបឈ្មោះអ្នកស្រី ស៊ិន ចាន់ពៅរ៉ូហ្ស៊េត ចេញពីគណបក្ស។ ក្នុងលិខិតលុបឈ្មោះ ស៊ិន ចាន់ពៅរ៉ូហ្ស៊េត មិនបានបញ្ជាក់ពីមូលហេតុនោះទេ។ ប៉ុន្តែតាមប្រភពព័ត៌មានមួយចំនួនបានអះអាងថា ការលុបឈ្មោះ ស៊ិន ចាន់ពៅរ៉ូហ្ស៊េត ចេញពីបក្សភ្លើងទៀត ព្រោះការប្រព្រឹត្តខុសនឹងលក្ខន្តិកៈ និងបទបញ្ជាផ្ទៃក្នុងបក្ស ក្នុងគ្រាឈ្មោះនៅជាសមាជិកបក្សភ្លើងទៀត តែទៅធ្វើសកម្មភាពបម្រើបក្សមួយផ្សេងទៀត (បក្សកម្លាំងជាតិ)។ប៉ុន្តែប្រសិនបើចឹងមែនមន្ត្រីគណបក្សភ្លើងទៀនផ្សេងទៀតនៅមូលដ្ឋានក៏ខុសដែររួមទាំងមេដឹកនាំគណបក្ស៣រូបដែលនាំគ្នាទៅបោះឆ្នោតគាំទ្រនិងឈរឈ្មោះក្នុងនាមគណបក្សឆន្ទៈខ្មែរដើម្បីបានជាប់សមាជិកព្រឹទ្ធសភាចំនួន៣រូបហើយក៏មានសមាជិក្រុមប្រឹក្សាឃុំសង្កាត់មួយចំនួននៃគណបក្សភ្លើងទៀនលក់សន្លឹកឆ្នោតផងដែរពេលបោះឆ្នោតព្រឹទ្ធសភាកន្លងមកនេះ។
តាមរយៈបណ្តាញសង្គមហ្វេសប៊ុកអ្នកស្រី ស៊ិន ចាន់ពៅរ៉ូហ្ស៊េត បានអំពាវនាវឱ្យអ្នកគាំទ្រទាំងក្នុងប្រទេស និងក្រៅប្រទេសឈប់គាំទ្របក្សភ្លើងទៀតបន្តទៅទៀត«គណបក្សនេះ (បក្សភ្លើងទៀន) ពីដេីម ជាគណបក្សដែលល្អ តែក្រោមការគ្រប់គ្រងរបស់បក្ខពួកមេបច្ចុប្បន្ន បានបំផ្លាញស្មារតីដេីម បំផ្លាញកេរ្តិ៍ឈ្មោះដ៏ល្អរបស់បក្សដែលជាគណបក្ស សម រង្ស៊ី ពួកអស់នេះធ្វើការដកសកម្មជនណាដែលស្មោះត្រង់នឹងពលរដ្ឋ ដែលបម្រើទុក្ខលំបាករបស់ពលរដ្ឋ ហើយមិនចេះរណបគេ បង្ខិតបង្ខំសកម្មជនឱ្យទៅបោះឆ្នោតឱ្យគណបក្សផ្សេងដែលគេមិនស្រឡាញ់»។
ចាន់ពៅរ៉ូហ្ស៊េត បានបន្តថា «មូលហេតុនៃការដកខ្ញុំដោយបំពានលក្ខន្តិកៈនេះ គឺក្រោយពីខ្ញុំគាំទ្រគណបក្សកម្លាំងជាតិ និងរកជំនួយជួយគណបក្សកម្លាំងជាតិ។ ក្រោយពីភ្លើងទៀនគេមិនឱ្យចូលប្រកួតមក ខ្ញុំសូមបញ្ជាក់ថា ពួកគេបានបង្ខំឱ្យសកម្មជនភ្លេីងទៀនទៅបោះឆ្នោតឱ្យបក្សផ្សេង ដែលជាបក្សដែលក្រុមពួកគេឈរឈ្មោះ តែបើសកម្មជនរូបណាមិនស្តាប់តាមគេទេ ពួកគេគំរាមដកតួនាទី និងលុបឈ្មោះ»។
អ្នកស្រី ស៊ិន ពៅចាន់រ៉ូហ្ស៊េត បច្ចុប្បន្នមានតួនាទីជាចៅសង្កាត់រងទី២ នៅសង្កាត់អូរចា មកពីគណបក្សភ្លើងទៀន។ អ្នកស្រីធ្លាប់បានឈ្នះឆ្នោតជាចៅសង្កាត់អូរចា ក្នុងព្រឹត្តិការណ៍បោះឆ្នោត ក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧។ ប៉ុន្តែក្រោយគណបក្សសង្គ្រោះជាតិ ត្រូវតុលាការកំពូលរំលាយចោល តួនាទីជាចៅសង្កាត់របស់អ្នកស្រី ស៊ិន ពៅចាន់រ៉ូហ្ស៊េត ក៏ត្រូវបានបាត់បង់ដោយស្វ័យប្រវត្តិផងដែរតាមច្បាប់ស្តីពីគណបក្សនយោបាយដែលប្រើប្រពន្ធ័សមាមាត្រ។
សូមបញ្ជាក់ដោយសារមើលឃើញពីភាពមិនច្បាស់លាស់ស្របដូចមិនស្របច្បាប់ព្រោះមិនអាចចូលឈរឈ្មោះឲ្យប្រជាពលរដ្ឋបោះឆ្នោតឲ្យនាពេលកន្លងទៅមានសមាជិកបក្សភ្លើងទៀនជាច្រើនរូប បានលាឈប់ពីគណបក្សនេះ ទៅចុះចូលជាមួយគណបក្សនយោបាយដទៃ ក្នុងនោះមានគណបក្សប្រជាជនកម្ពុជាផងដែរ។ ចុះនៅពេលនេះ សមាជិកដែលមានជំហររឹងមាំខ្លាំងដូចជាអ្នកស្រី ស៊ិន ចាន់ពៅរ៉ូហ្ស៊េត មកបរិហារការដឹកនាំបក្សភ្លើងទៀនបែបនេះ តើថ្នាក់ដឹកនាំបក្សប្រឆាំងមួយនេះ នឹងត្រូវអត្ថាធិប្បាយបែបណា?ការបណ្តេញអ្នកស្រី ស៊ិន ពៅចាន់រ៉ូហ្ស៊េត ចេញពីគណបក្សភ្លើងទៀនដែលជាគណបក្សត្ររស់ ជាសញ្ញាបង្ហាញឱ្យឃើញថា ក្រុមប្រឆាំងដែលធ្លាប់រួមរស់ជាមួយគ្នាក្រោមដំបូលអតីតគណបក្សសង្គ្រោះជាតិ កំពុងតែបែកបាក់គ្នា ?។
