បន្ទាប់ពីបាត់សកម្មភាពមួយរយៈធំអាជ្ញាធរសវនកម្មជាតិ ចេញមកផ្សព្វផ្សាយ «ច្បាប់ស្តីពីសវនកម្ម និងស្តង់ដារសវនកម្មសាធារណៈ នៃព្រះរាជាណាចក្រកម្ពុជា»
បាត់ដំបង៖ នៅព្រឹកថ្ងៃទី១២ ខែកញ្ញា ឆ្នាំ២០២៣ អាជ្ញាធរសវនកម្មជាតិ រៀបចំសិក្ខាសាលាផ្សព្វផ្សាយ «ច្បាប់ស្តីពីសវនកម្ម និងស្តង់ដារសវនកម្មសាធារណៈនៃព្រះរាជាណាចក្រកម្ពុជា» នៅខេត្តបាត់ដំបង ។ លោកបណ្ឌិត សួន សិទ្ធី អគ្គសវនកររង តំណាងលោកស្រីបណ្ឌិត សោម គីមសួគ៌ អគ្គសវនករ នៃអាជ្ញាធសវនកម្មជាតិ និងមានការចូលរួមពីលោក អេ សារុម សមាជិកក្រុមប្រឹក្សាខេត្ត និងលោក ផេង សិទ្ធី អភិបាលរង តំណាងលោក សុខ លូ អភិបាលខេត្តបាត់ដំបងបានចូលរួមកម្មវិធីបណ្តុះបណ្តាលនេះ។
លោកបណ្ឌិត សួន សិទ្ធី បានគូសបញ្ជាក់ថា អង្គសិក្ខាសាលានាពេលនេះ មានគោលដៅបញ្ច្រាប និងបង្កើនការយល់ដឹងអំពីតួនាទី និងភារកិច្ចសវនកម្មផ្ទៃក្រៅរាជរដ្ឋាភិបាល ដែលអនុវត្តមុខងារនេះដោយ អាជ្ញាធរសវនកម្មជាតិ ជូនដល់មន្ត្រីរាជការដែលបំពេញការងារនៅរដ្ឋបាលថ្នាក់ក្រោមជាតិ ដើម្បីទទួលបានការគាំទ្រ និងកិច្ចសហការកាន់តែល្អប្រសើរ។ យន្តការនេះ នឹងជួយអាជ្ញាធរសវនកម្មជាតិអនុវត្តការងារសវនកម្មប្រកប ដោយគុណភាពខ្ពស់ ក្នុងការសម្រេចគោលបំណងធ្វើឲ្យមានអភិបាលកិច្ចល្អ និងចូលរួមចំណែកកាត់បន្ថយ និងទប់ស្កាត់នូវរាល់កំហុសឆ្គងលើការគ្រប់គ្រង និងប្រើប្រាស់ថវិកាជាតិ ការគ្រប់គ្រងធនធានទ្រព្យសម្បត្តិរដ្ឋ ដើម្បីឈានទៅបង្កើនជំនឿទុកចិត្តពីប្រជាពលរដ្ឋ។
លោកបណ្ឌិត ព្រហ្ម វិចិត្រសុភ័ណ្ឌ អគ្គលេខាធិការរង និងជាគ្រូឧទ្ទេសនាម នៃអាជ្ញាធរសវនកម្មជាតិ បានធ្វើបទឧទ្ទេសនាម «ច្បាប់ស្តីពីសវនកម្ម និងស្តង់ដារសវនកម្មសាធារណៈនៃព្រះរាជាណាចក្រកម្ពុជា»
ដោយកំណត់លើ ៤ ចំណុច សំខាន់ៗ រួមមាន៖*ទី១-សាវតាស្ថាប័នអាជ្ញាធរសវនកម្មជាតិ*ទី២-ហេតុអ្វីត្រូវមានច្បាប់ស្តីពីសវនកម្មនៃព្រះរាជាណាចក្រកម្ពុជា*ទី៣-ខ្លឹមសារនៃច្បាប់សវនកម្មនៃព្រះរាជាណាចក្រកម្ពុជា*ទី៤-ស្តង់ដារសវនកម្មសាធារណៈនៃព្រះរាជាណាចក្រកម្ពុជា ជូនដល់មន្ត្រីរាជការ និងកងម្លាំងប្រដាប់អាវុធ ព្រមទាំងមន្ត្រីថ្នាក់ក្រុង/ស្រុក សង្កាត់/ឃុំ ទាំងអស់ ចំណុះរដ្ឋបាលខេត្តបាត់ដំបង។
លោកបណ្ឌិតបានបន្តថា អាជ្ញាធរសវនកម្មជាតិ គឺជាស្ថាប័នសាធារណៈឯករាជ្យអំពីកិច្ចប្រតិបត្តិការការងារនិងមានភារកិច្ចធ្វើ ការត្រួតពិនិត្យ និងផ្តល់អនុសាសន៍កែតម្រូវ លើរាល់កំហុសឆ្គងរបស់អង្គភាពរងសវនកម្ម ព្រមទាំងផ្ញើររបាយការណ៍សវនកម្មជូនស្ថាប័ននីតិប្បញ្ញត្តិ ពោលគឺ រដ្ឋសភា និងព្រឹទ្ធសភា និងចម្លងជូនរាជរដ្ឋាភិបាល ហើយរបាយការណ៍សវនកម្មត្រូវបានផ្សព្វផ្សាយជាសាធារណៈ។
លោកបណ្ឌិត សួន សិទ្ធី បានឲ្យដឹងថា៖ការធ្វើសវនកម្មមានទាំងថ្នាក់ជាតិ មានស្ថាប័ន ក្រសួងនានានៃរាជរដ្ឋាភិបាល ទៅតាមច្បាប់បានកំណត់ទុករួចហើយ និងថ្នាក់ក្រោមជាតិ មានខេត្តមន្ទីរអង្គភាពរដ្ឋនានា ក៏ដូចជាក្រុមហ៊ុនឯកជន នានាគ្រប់ប្រភេទ សូម្បីតែអង្គភាពអគ្គសវនកម្មខ្លួនឯងបើមានភាពមិនប្រក្រតី ថ្នាក់លើត្រូវជាតិ ត្រូវបង្កើតគណៈកម្មការពិសេសចុះត្រួតពិនិត្យផ្ទៃក្នុងខ្លួនឯង ដើម្បីជំរុញឲ្យមានតម្លាភាពផងដែរ.។មានការកត់សម្គាល់ថាតាំងពីបង្កើតមកអាជ្ញាធរសវនកម្មជាតិមិនដែលឃើញបានធ្វើសកម្មភាពអ្វីជាចំហរសម្រាប់ទប់ស្កាត់អំពើរពុករលួយការរមលោភសិទ្ធក្នុងការងាររដ្ឋបាលនោះទេគឺមានតែធ្វើការងារស្ងាត់ជារបាយការណ៍ម៉ាៗតែប៉ុណ្ណុះ។នេះបើតាមមតិអ្នកច្បាប់និយាយ៕
