វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 969 នាក់
ម្សិលមិញ 5020 នាក់
សរុប 14116416 នាក់
ភ្នំពេញ៖អតីតមន្ត្រីបក្សសង្គ្រោះជាតិជាង១០០នាក់ ទទួលបានសិទ្ធិធ្វើនយោបាយឡើងវិញកាលពីថ្ងៃទី១៦ វិច្ឆិកា ក្រោយតុលាការកំពូល បានធ្វើការហាមឃាត់ អស់រយៈពេល៥ឆ្នាំទៅតាមបណ្តឹងរបស់ក្រសួងមហាផ្ទៃកាលពីឆ្នាំ២០១៧ទាក់ទិននឹងផែនការផ្តួលរលំរដ្ឋាភិបាលពីសំណាក់ថ្នាក់ដឹកនាំរបស់អតីតគណបក្សសង្គ្រោះជាតិ។
លោក អ៊ុក គឹមសិទ្ធិ អគ្គព្រះរាជអាជ្ញារង និងជាអ្នកនាំពាក្យតុលាការកំពូលបានឱ្យដឹងថា សាលដីកាព្យូរសិទ្ធិធ្វើនយោបាយរបស់អតីតមន្ត្រី និងថ្នាក់ដឹកនាំគណបក្សសង្គ្រោះជាតិចំនួន១១៨នាក់ ត្រូវបានបញ្ចប់ហើយកាលពីថ្ងៃទី១៦ វិចិ្ឆកា ក្រោយរងបទចោទអស់រយៈពេល៥ឆ្នាំ។ លោកព្រះរាជអាជ្ញារង បន្តថា មន្ត្រីអតីតបក្សសង្គ្រោះជាតិទាំងនេះ ក៏នឹងមានសិទ្ធិពេញលេញធ្វើនយោបាយឡើងវិញដែរ ចាប់ពីថ្ងៃប្រកាសនេះតទៅ ប៉ុន្តែតុលាការមិនមានការចេញលិខិតផ្លូវការពាក់ព័ន្ធការបញ្ចប់ទោសព្យូរនេះទេ។ សម្រាប់អ្នកដែលនៅរងបទចោទ តុលាការមិនទាន់អាចផ្តល់សិទ្ធិឱ្យធ្វើនយោបាយឡើងវិញនោះដែរ។
លោក ថាច់ សេដ្ឋា ប្រធានស្តីទីគណបក្សភ្លើងទៀន បានប្រាប់វិទ្យុបារាំងអន្តរជាតិRFIថា លោកមិនមានអ្វីចម្លែកទេ ទាក់ទងនឹងការផ្តល់សិទ្ធិធ្វើនយោបាយឱ្យមន្ត្រីអតីតគណបក្សសង្គ្រោះជាតិ ព្រោះនេះមិនមែនជាការសម្រេចផ្តល់សិទ្ធិដោយសំអាងទៅលើប្រព័ន្ធយុត្តិធម៌នៃច្បាប់នោះទេ ប៉ុន្តែនេះដោយសារការដាក់បម្រាមរយៈពេលឆ្នាំ៥របស់តុលាការចូលដល់ថ្ងៃឱសានវាទ។លោកថាច់សេដ្ឋាបន្តថារដ្ឋាភិបាលគួរតែបញ្ឈប់រូបភាពគំរាមកំហែងដល់អ្នកនយោបាយដែលមាននិន្នាការប្រឆាំងខ្លួចាប់ពីពេលនេះតទៅ ដោយឱ្យពួកគេមានសិទ្ធិពេលពេញលើការបញ្ចេញមតិ ការធ្វើនយោបាយដោយស្របតាមឆន្ទះរបស់ពលរដ្ឋ និងដោយគ្មានការគៀបសង្កត់ក្នុងទិដ្ឋាភាពណាមួយ។ប្រធានស្តីទីគណបក្សភ្លើងទៀនរូបនេះចាត់ទុកថា ប្រសិនបើតុលាការអនុវត្តច្បាប់ដោយអយុត្តិធម៌ និងបន្តគម្រាមកំហែងដល់គណបក្សប្រឆាំងទៀតនោះ ចង់មិនចង់កេរ្តិ៍ឈ្មោះកម្ពុជា ក៏ដូចជាឆ្អឹងខ្នងនៃលទិ្ធប្រជាធិបតេយ្យនៅកម្ពុជា នឹងត្រូវបំផ្លាញកាន់តែខ្លាំង។
លោក ថាច់ សេដ្ឋា ផ្តល់សារទៅកាន់អតីតមន្ត្រី និងថ្នាក់ដឹកនាំបក្សសង្គ្រោះជាតិថា គណបក្សភ្លើងទៀននឹងត្រៀមខ្លួនស្វាគមន៍យ៉ាងកក់ក្តៅចំពោះការចូលរួមជីវភាពនយោបាយជាមួយខ្លួន ដោយលោកសម្អាងថា មន្ត្រីទាំង១១៨រូប ក៏ដូចជាអ្នក នយោបាយរបស់គណបក្សសង្គ្រោះជាតិ គឺជាយុទ្ធមិត្តរបស់បក្សភ្លើងទៀន។ទោះបីយ៉ាងណាព្រះអង្គម្ចាស់ស៊ីសុវត្ថិធម្មិកោអតីតទីប្រឹក្សាព្រះមហាក្សត្រព្រះបរមរតនកោដដែលជាប់បំរាមនេះដែរនិយាយាថាគណបក្សភ្លើងទៀនមិនមែនជាគណបក្សសង្គ្រោះជាតិទេតែលោកនឹងពិចារណាចូលបើមានគណបក្សណាដែលប្រកាន់លទ្ធិប្រជាធិបតេយ្យល្អ។ឯមេធាវីជួងជូងីវិញបានប្រកាសថាលោកព្យួរការងារមេធាវីដើម្បីចូលគណបក្សភ្លើងទៀន។
សម្រាប់ លោក ឯម សុវណ្ណរ៉ា អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយវិញបានលើកឡើងថា ទោះបីសាលដីកាព្យូរសិទ្ធិធ្វើនយោបាយរយៈពេល៥ឆ្នាំត្រូវបានបញ្ចប់ ប៉ុន្តែលំហរសិទ្ធិធ្វើនយោបាយរបស់អ្នកនយោបាយភាគច្រើន នៅមិនទាន់មានភាពទូលំទូលាយឡើយ។ ហើយការប្រើប្រាស់សិទ្ធិរបស់អ្នកនយោបាយចំពោះការបោះឆ្នោតឆ្នាំ២០២៣ក៏មិនទាន់មានលក្ខខណ្ឌល្អដែរព្រោះកម្លាំងនយោបាយរបស់ពួកគាត់ហាក់មិនទាន់មានការរួមគ្នាបានល្អ។ក្រោយសាលដីកាព្យូរសិទ្ធិធ្វើនយោបាយត្រូវបានបញ្ចប់កាលពីថ្ងៃទី១៦ វិច្ឆិកា មេធាវីការពារក្តីលោក សំ សុគង់បានអះអាងថា ថ្នាក់ដឹកនាំទាំង១១៨នាក់ ពួកគាត់ខ្លះបានស្នើសុំសិទ្ធិធ្វើនយោបាយឡើងវិញតាមរយៈការជ្រកកោនជាមួយគណបក្សដែលមាននិន្នាការប្រជាធិបតេយ្យ ខ្លះទៀតក៏បានសម្រេចឈប់ប្រឡូកក្នុងជីវិតជាអ្នកនយោបាយ និងខ្លះក៏បានរត់ភៀសខ្លួនទៅក្រៅប្រទេស ខណៈថ្នាក់ដឹកនាំនៃអតីតគណបក្សសង្គ្រោះជាតិខ្លះបានងាកទៅចូលរួមជីវភាពនយោបាយជាមួយគណបក្សកាន់អំណាច៕ដកស្រង់ពីRFI