វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1198 នាក់
ម្សិលមិញ 5168 នាក់
សរុប 16013332 នាក់
ភ្នំពេញ៖ សេចក្ដីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា បានឲ្យដឹងថា៖ ដំណើរទស្សនកិច្ចផ្លូវការ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រះរាជាណាចក្រអារ៉ាប៊ីសាអូឌីត រដ្ឋកាតាសាធារណរដ្ឋតួកគីយេ និងអេមីរ៉ាតអារ៉ាប់រួម ពីថ្ងៃទី៨ ដល់ថ្ងៃទី១៤ ខែធ្នូ ឆ្នាំ២០២៤ ជាលទ្ធផលភាគីទាំងអស់បានឯកភាពគ្នា បន្តជំរុញកិច្ចសហប្រតិបត្តិការ លើវិស័យអប់រំ កីឡា វប្បធម៌ សាសនា ការតភ្ជាប់ និងការផ្លាស់ប្ដូររវាងប្រជាជននិងប្រជាជន។
សេចក្ដីប្រកាសព័ត៌មានបានឲ្យដឹងថា សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងថ្នាក់ដឹកនាំជាមិត្តបានផ្លាស់ប្តូរ យោបល់អំពីបញ្ហាតំបន់ និងអន្តរជាតិ ដែលជាការប្រឈមនៅចំពោះសភាពការណ៍ ដែលកំពុងវិវត្តន៍យ៉ាងលឿន កាន់តែតានតឹង និងស្មុគស្មាញ ជាពិសេសស្ថានភាពនៅសេរី លីបង់ ជម្លោះអ៊ីស្រាអែល-ប៉ាឡេស្ទីន និងសង្គ្រាមនៅអ៊ុយក្រែន ដើម្បីរួមចំណែកក្នុងការស្វែងរកដំណោះស្រាយជាយុទ្ធសាស្ត្រ សម្រាប់សន្តិភាព សន្តិសុខ ស្ថិរភាព និងវិបុលភាពក្នុងតំបន់ និងពិភពលោកទាំងមូល។
តាមរយៈជំនួប សម្ដេចតេជោ ហ៊ុន សែន បានសង្កត់ធ្ងន់ថា យោងតាមបទពិសោធន៍ផ្ទាល់របស់កម្ពុជា «សង្គ្រាមមិនអាចបញ្ចប់សង្គ្រាមបានទេ គឺមានតែកិច្ចសន្ទនា និងការចរចា» ហើយការដាក់ទណ្ឌកម្មជាឯកតោភាគី ក៏មិនមែនជាជម្រើសសម្រាប់ដោះស្រាយបញ្ហាដែរ ប៉ុន្តែផ្ទុយទៅវិញបានបង្កនូវភាពស្មុគស្មាញកាន់តែច្រើន និងដាក់បន្ទុកដល់ប្រជាជន និងប្រទេសក្នុងតំបន់ និងពិភពលោកផងដែរ។
នៅក្នុងដំណើរទស្សនកិច្ចផ្លូវខាងលើនេះ សម្ដេចតេជោបានស្នើភាគីមិត្តជំរុញការវិនិយោគរបស់ខ្លួននៅកម្ពុជា ពិសេសក្នុងវិស័យកសិកម្ម កសិ-ឧស្សាហកម្ម និងឧស្សាហកម្មកែច្នៃ ដូចជា ស្រូវនិងអង្ករ គ្រាប់ស្វាយចន្នី និងកសិផលជាច្រើនទៀតរបស់កម្ពុជា ដើម្បីនាំចេញទៅក្នុងទីផ្សារតំបន់ និងពិភពលោក។
អគ្គលេខាធិការដ្ឋានព្រឺទ្ធសភា បានបញ្ជាក់ថា ភាគីទាំអស់បានឯកភាពគ្នាបន្តជំរុញកិច្ចសបប្រតិបត្តិការក្នុងវិស័យសំខាន់ៗដទៃទៀត ដែលមានសក្ដានុពល និងផលប្រយោជន៍រួម ដូចជា អប់រំ កីឡា វប្បធម៌ សាសនា ការតភ្ជាប់ និងការផ្លាស់ប្ដូររវាងប្រជាជននិងប្រជាជន។សម្ដេចតេជោក៏បានអរគុណភាគី និងស្នើបន្តគាំទ្រលើការអភិវឌ្ឍធនធានមនុស្សនៅកម្ពុជា ជាពិសេសការផ្ដល់អាហារូបករណ៍ដល់យុវជនកម្ពុជា ព្រមទាំងជំនួយអភិវឌ្ឍនិងបច្ចេកទេសនានា។
សម្ដេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់នៃព្រឹទ្ធសភាកម្ពុជាទៅបំពេញទស្សនកិច្ចផ្លូវការនៅប្រទេសក្នុងតំបន់មជ្ឈិមបូព៌ាចំនួន៤ រយៈពេលពេញ១សប្ដាហ៍ រួមមាន ព្រះរាជាណាចក្រអារ៉ាប៊ីសាអូឌីត រដ្ឋកាតា សាធារណរដ្ឋតួកគីយេ និងអេមីរ៉ាតអារ៉ាប់រួម ហើយកាលពីម្សិលមិញសម្ដេចតេជោ ហ៊ុន សែន និងគណៈប្រតិភូជាន់ខ្ពស់កម្ពុជា បានអញ្ជើញមាតុភូមិនិវត្តន៍ មកដល់ព្រះរាជាណាចក្រកម្ពុជាវិញ នៅវេលាម៉ោង៧:០០នាទីយប់ ប្រកបដោយសុខសុវត្ថិភាព៕