ប្រទេសស៊ីរ៊ីមាននាយករដ្ឋមន្ត្រីបណ្ណោះអាសន្នហើយដើម្បីគ្រប់គ្រងសភាពការណ៍
21-September-2026 / ព័ត៌មានអន្តរជាតិ
ប្រទេសស៊ីរី៖ លោកម៉ូហាម៉េដអាល់បាស្សៀ( Mohammed al-Bashir )ត្រូវបានក្រុមឧទ្ទាមដ៏មានឥទ្ធិពលនៅស៊ីរី Hayat Tahir al-Sham (HTS) និងសម្ព័ន្ធមិត្តរបស់ខ្លួន តែងតាំង ជាប្រមុខរដ្ឋាភិបាលអន្តរកាល ដើម្បីគ្រប់គ្រងប្រទេស រហូតដល់ថ្ងៃទី០១ ខែមីនាឆ្នាំ២០២៥។ នេះបើតាមសេចក្តីថ្លែងការណ៍។
គេមិនសូវស្គាល់លោកម៉ូហាម៉េដអាល់បាស្សៀ( Mohammed al-Bashir )ច្រើនទេ ប៉ុន្តែយោងតាមប្រវត្តិរូបសង្ខេប លោកបានទទួលការបណ្តុះបណ្តាលផ្នែកវិស្វករអគ្គិសនី និងបម្រើការងារនៅរោងចក្រឧស្ម័នមួយកកន្លែង មុនពេលផ្ទុះសង្គ្រាមស៊ីវិលនៅឆ្នាំ២០១១។ នៅខែមករា លោកបាស្សៀ(Bashir)ត្រូវបានតែងតាំងជានាយករដ្ឋមន្ត្រីនៃរដ្ឋាភិបាលសង្គ្រោះ(SG) ដែលក្រុម HTSបានបង្កើតឡើង ដើម្បីគ្រប់គ្រងដែនដីដែលស្ថិតក្រោមការកាន់កាប់របស់ពួកគេ។ SGត្រូវបានបង្កើតឡើងក្នុងរូបភាពដូចជារដ្ឋមួយ ដែលមានក្រសួង នាយកដ្ឋានតំបន់ អាជ្ញាធរតុលាការនិងសន្តិសុខ។ ប្រជាជនប្រហែល៤លាននាក់ ភាគច្រើនភៀសខ្លួនពីកន្លែងផ្សេងៗគ្នានៅក្នុងប្រទេស បានមករស់នៅទីនេះ។
សហគមន៍អន្តរជាតិ ពិបាកជឿជាក់លើក្រុមដែលចូលមកដឹកនាំប្រទេសស៊ីរីថ្មី ព្រោះ HTSស្ថិតនៅក្នុងបញ្ជីខ្មៅរបស់អង្គការសហប្រជាជាតិនិងអាមេរិក ក៏ដូចជាប្រទេសមួយចំនួនទៀត ដែលចាត់ទុកថាជាក្រុមភេរវករ។ សម្រាប់ អាមេរិកតាមរយៈរដ្ឋមន្ត្រីការបរទេសលោក Antony Blinken បានដាក់ចេញលក្ខខណ្ឌជាបន្តបន្ទាប់ដើម្បីជាំថ្នូនៃការទទួលស្គាល់និងគាំទ្រ ហើយប្រសិនបើលក្ខខណ្ឌទាំងនោះត្រូវបានបំពេញ នោះនឹងឃើញស៊ីរីរីករាយ និងការទទួលស្គាល់ពេញលេញរបស់ទីក្រុងវ៉ាស៊ីនតោន។ លោកBlinkenថា វាជាការចាំបាច់ណាស់ ដែលតួអង្គទាំងអស់ ដែលពាក់ព័ន្ធ ការពារជនស៊ីវិល ការគោរពសិទ្ធិមនុស្ស ជាពិសេស ជនជាតិភាគតិចដែលងាយរងគ្រោះ ថែរក្សាស្ថាប័នរដ្ឋ ផ្តល់សេវាដើម្បីបំពេញតម្រូវការប្រជាជនស៊ីរី និងកសាងឆ្ពោះទៅរកអភិបាលកិច្ចរួម។
ទាក់ទងនឹងប្រវត្តិមិនល្អរបស់ក្រុមដែលកំពុងគ្រប់គ្រងស៊ីរី បើតាមបេសកជនពិសេស របស់អង្គការសហប្រជាជាតិ ទទួលបន្ទុកកិច្ចការស៊ីរីលោកGeir Pedersen បានប្រាប់អ្នកកាសែតនៅទីក្រុងហ្សឺណែវថា HTSត្រូវធ្វើសកម្មភាពជាក់ស្តែង ដើម្បីបង្ហាញនិងចេញជាលទ្ធផលវិជ្ជាមាន នោះលោកជឿជាក់ថា សហគមន៍អន្តរជាតិ អាចពិនិត្យឡើងវិញពីការដកក្រុមនេះ ចេញពីបញ្ជីក្រុមភេរវករ។ លោកថា ក្រុងDamascusជាចំណុចចាប់ផ្តើមដកពិសោធន៍ដ៏សំខាន់ ដែលរដ្ឋាភិបាលអន្តរកាលត្រូវរៀបចំនិងអនុវត្ត។បន្ទាប់ពីការតែងតាំងជានាយករដ្ឋមន្ត្រីបណ្តោះអាសន្នភ្លាមលោក Bashir បានចូលធ្វើការងារភ្លែត ដើម្បីឆ្លើយតបនឹងស្ថានភាពនៅក្នុងប្រទេស។ នៅថ្ងៃអង្គារ លោកMohammed al-Bashir ដែលជាអតីតប្រធានរដ្ឋបាលក្រុមឧទ្ទាមនៅភាគពាយ័ព្យ បានធ្វើជាប្រធានកិច្ចប្រជុំមួយ នៅក្នុងទីក្រុង Damascus ដោយមានការចូលរួមពីសមាជិករដ្ឋាភិបាលថ្មីរបស់លោក និងអតីតគណៈរដ្ឋមន្ត្រី របស់អតីតប្រធានាធិបតីស៊ីរីលោក Bashar al-Assad ដើម្បីពិភាក្សាពីការផ្ទេរតំណែងរដ្ឋមន្ត្រីនិងស្ថាប័ន។
លោកបាស្សៀបានអញ្ជើញសមាជិក មកពីរដ្ឋាភិបាលចាស់និងបុគ្គលមួយចំនួនមកពីIdlibនិងតំបន់នៅជុំវិញ ដើម្បីជួយសម្រួល ដល់ការងារចាំបាច់ទាំងអស់ សម្រាប់រយៈពេល២ខែខាងមុខ រហូតដល់មានប្រព័ន្ធរដ្ឋធម្មនុញ្ញ ដែលអាចបម្រើប្រជាជនស៊ីរីបាន។ លោកនឹងរៀបចំកិច្ចប្រជុំជាបន្តបន្ទាប់ទៀត ដើម្បីឱ្យស្ថាប័នផ្សេងៗ មានសកម្មភាពរស់រវើកឡើងវិញ ដើម្បីអាចបម្រើដល់សេចក្តីត្រូវការរបស់ប្រជាជន។
ទន្ទឹមនឹងនេះដែរ ជីវិតរស់នៅក្នុងក្រុង Damascusហាក់ដូចជាវិលត្រឡប់មករកភាពប្រក្រតីវិញបន្តិចម្តងៗ បន្ទាប់ពីរយៈពេលជិត២ថ្ងៃនៃការបិទខ្ទប់ នៅពេលដែលក្រុមឧទ្ទាមធ្វើសកម្មភាពវាយលុក រហូតបណ្តេញលោកAssadឱ្យរត់គេចខ្លួនចេញពីប្រទេសនៅថ្ងៃទី០៨ខែធ្នូឆ្នាំ២០២៤។ សារព័ត៌មានBBC ឱ្យដឹងថា ឃើញមានអ្នកថ្មើជើងនិងរថយន្តជាច្រើនគ្រឿង ចេញធ្វើចរាចរណ៍តាមដងផ្លូវ ហើយហាងនិងភោជនីយដ្ឋានមួយចំនួន ក៏បានបើកដំណើរឡើងវិញផងដែរ។
សង្គ្រាមស៊ីវិលរយៈពេល១៤ឆ្នាំកន្លងមក បានសម្លាប់មនុស្សជាង៥០ម៉ឺននាក់ និងបង្ខំឱ្យមនុស្សពាក់កណ្តាលប្រទេសភៀសខ្លួនចេញពីផ្ទះរបស់ពួកគេ។ នាយករដ្ឋមន្ត្រីអន្តរកាល លោកMohammed al-Bashir នៅថ្ងៃអង្គារទី១០ខែធ្នូបានថ្លែងប្រាប់ទូរទស្សន៍ Al Jazeera របស់ប្រទេសកាតា នៅក្នុងបទសម្ភាសន៍លើកដំបូងរបស់លោក ចាប់តាំងពីត្រូវបានតែងតាំងថា ឥឡូវនេះវាដល់ពេលហើយសម្រាប់ប្រជាជនរីករាយ ជាមួយស្ថិរភាពនិងភាពស្ងប់ស្ងាត់ បន្ទាប់ពីលោកAssadត្រូវបានទម្លាក់ចេញពីអំណាច ដែលបានបិទបញ្ចប់ការដឹកនាំជាង២ទសវត្សរ៍របស់លោកនិងយាយដោយឡែក និងនិយាយជារួមរយៈពេល៥ទសវត្សរ៍ដោយត្រកូលលោកអាសាដ។
