រដ្ឋប្រមូលបានដីជាង៦ម៉ឺនហិកតាមកវិញពីការទន្ទ្រានកាន់កាប់ខុសច្បាប់នៅតំបន់អាងទន្លេសាបនិងប្រជាជនជាង៦រយគ្រួសារយលព្រមចាកចេញពីអង្គរ
11-February-2026 / សេដ្ឋកិច្ច
ភ្នំពេញ៖ លោក សេង ឡូតអគ្គនាយកនិងជា អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៤ ខែសីហា ឆ្នាំ២០២២ បានថ្លែងក្នុងសន្និសីទសារព័ត៌មាន រៀបចំឡើងដោយអង្គភាពអ្នកនាំពាក្យរាជរដ្ឋាភិបាល ឲ្យដឹងថា គិតមកដល់ពេលនេះ មានផ្ទៃដីប្រមាណ ៦ម៉ឺន៥ពាន់ហិកតា ត្រូវបានប្រមូលយកមកវិញ ពីការទន្ទ្រានដីព្រៃលិចទឹកនៅជុំវិញបឹងទន្លេសាប។
លោក សេង ឡូត បានឲ្យដឹងថា ក្រសួងរៀបចំដែនដី បានប្តេជ្ញាចិត្តការពារដីដែលត្រូវបានដកហូតមកវិញនេះ ឲ្យបានគង់វង្សជានិច្ច។ ដើម្បីការពារ ដើម្បីទប់ស្កាត់ការរំលោភបំពានតទៅទៀត គឺមានការរៀបចំបោះបង្គោលបន្ថែមចំពោះបង្គោលព្រំណា ដែលបានបាក់បាត់ទៅ ឬគេគាស់ ឬក៏ខូច។ ក្រសួងដែនដីក៏រៀបចំផែនការ ដោយមានការដាំដើមឈើ នៅក្នុងដែននេះ ដើម្បីជាជម្រកសម្រាប់ត្រីពង រួមទាំងគំនិតផ្តួចផ្តើមថ្មី របស់លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានកប់គ្រាប់ត្នោត ជាព្រំសម្រាប់សម្គាល់ផងដែរ។ ក្រសួងបានរៀបចំការចុះត្រួតពិនិត្យ មើលប្រជាពលរដ្ឋតំបន់៣ តំបន់២ តំបន់១ ដែលរស់នៅតាមភូមិចាស់ជាក់ស្តែង ហេតុនេះហើយមានការកែសម្រួលព្រំតំបន់៣ តំបន់២ និងតំបន់១ នៃដែនដីទន្លេសាប។
លោកសេងឡូតបញ្ជាក់ថា «តំបន់៣ គឺហាមដាច់ខាត មិនឲ្យមានការកាន់កាប់ ឬអាស្រ័យផលអ្វីទាំងអស់។ អញ្ចឹងយើងបានកែដែនតំបន់៣ មកតំបន់២ បានផ្ទៃដីចំនួន ១ម៉ឺន៣ពាន់ហិកតារ ពាក់ព័ន្ធនឹងប្រជាពលរដ្ឋប្រមាណ ៥ពាន់គ្រួសារ ឲ្យបានអាស្រ័យផលបាន។ យើងក៏មានការកែព្រំប្រទល់ ពីតំបន់២ មកតំបន់១ បានផ្ទៃដី ១ម៉ឺន២ពាន់ហិកតារ និងផ្តល់ជាកម្មសិទ្ធិតែម្តង កាលណាកែមកតំបន់១ ដោយផ្តល់ជូនពលរដ្ឋ ១ម៉ឺន២ពាន់គ្រួសារ»។សម្រាប់បទល្មើសនេសាទ ជាពិសេសការទន្ទ្រានដីព្រៃលិចទឹកនៅជុំវិញបឹងទន្លេសាបនេះ បានចាប់ផ្តើមនៅចុងខែវិច្ឆិកា ឆ្នាំ២០២១ ក្រោយលោកឧបនាយករដ្ឋមន្ត្រី ជា សុផារ៉ា ដឹកនាំកិច្ចប្រជុំបន្ទាន់មួយ ដើម្បីដាក់ចេញវិធានការទប់ស្កាត់ និងបង្ក្រាបជាបន្ទាន់ និងបន្ទាប់ពីមានបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
ទោះជាយ៉ាងនេះក្តី រាជរដ្ឋាភិបាលកម្ពុជា កាលពីខែឧសភា ឆ្នាំ២០២២ បានប្រកាសអំពីសម្រេចកាត់ឆ្វៀលដីអភិរក្សបឹងទន្លេសាបចេញពីតំបន់៣ និងតំបន់២ ជូនទៅប្រជាពលរដ្ឋដែលបានអាស្រ័យផលជាក់ស្តែងចាប់ពី១០ឆ្នាំឡើងទៅ ឬអាចក្រោម១០ឆ្នាំ ចំពោះដីមិនមែនជាដីព្រៃលិចទឹក ហើយគោករាក់មិនអាចស្តាបាន បន្ទាប់ពីបានទប់ស្កាត់ការកាប់ទន្ទ្រាន និងដកហូតការកាន់កាប់ដោយខុសច្បាប់ កាលពីចុងឆ្នាំ២០២១។ ខេត្តនៅជុំវិញជុំវិញបឹងទន្លេសាបទាំង៦នោះ រួមមានខេត្តកំពង់ធំ កំពង់ឆ្នាំង សៀមរាប ពោធិ៍សាត់ បាត់ដំបង និងខេត្តបន្ទាយមានជ័យជាដើម.។
ក្រៅពីបញ្ហាដីនៅតំបន់ទន្លេសាបប្រជាពលរដ្ឋរស់នៅលើសំណង់ខុសច្បាប់តំបន់រមណីយដ្ឋានអង្គរចំនួន៦៩៨ គ្រួសារស្មើនឹង៧២,៤៨ភាគរយហើយ ស្ម័គ្រចិត្តរុះរើទៅរស់នៅភូមិធម្មជាតិ រុនតាឯក។ ចំនួននេះត្រូវបានផ្ទៀងផ្ទាត់រាប់ចាប់ពីថ្ងៃទី១៨ ដល់ថ្ងៃទី២៣ ខែសីហា។ នេះបើតាមសេចក្ដីប្រកាសព័ត៌មានរបស់ក្រសួងដែនដីនគររូបនីយកម្មនិងសំណង់នៅថ្ងៃទី២៤សីហា។ នៅក្នុងសន្និសីទកាសែតដោយឡែកនៅថ្ងៃនេះដែរ លោក សេង ឡូត អគ្គនាយកនៃអគ្គនាយកដ្ឋានរដ្ឋបាលនៃក្រសួងដែនដីបានគូសបញ្ជាក់ថា ផ្ទៃដីចំនួនជាង១ម៉ឺនក្បាលដីត្រូវបានសង្គ្រោះយកមកវិញ។សូមជម្រាបជូនថា ក្រសួងដែនដីកំពុងបើកយុទ្ធនាការទ្រង់ទ្រាយធំចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
