ទូតរុស្ស៉ី នៅអសប ទទួលស្គាល់ដោយប្រយោលករណីយ៍កូរ៉េខាងជើងបញ្ជូនទព័ជួយរុស្ស៉ី?អាមេរិកថែមជំនួយ
21-September-2026 / ព័ត៌មានអន្តរជាតិ
អសប៖ ឯកអគ្គរដ្ឋទូតរុស្ស៉ីប្រចាំអង្គការសហប្រជាជាតិ (UN) លោកវ៉ាស៊ីលីនេបឹនហ្សៀ( Vassily Nebenzia )បានចោទសួរក្នុងកិច្ចប្រជុំក្រុមប្រឹកស្សាសន្តិសុខថាហេតុអ្វីសម្ព័ន្ធមិត្តរបស់ខ្លួនដូចជាកូរ៉េខាងជើង មិនអាចជួយ ទីក្រុងមូស្គូបាននៅក្នុងសង្គ្រាមប្រឆាំងអ៊ុយក្រែន ខណៈបណ្ដាប្រទេសលោកខាងលិចអះអាងថាពួកគេមានសិទ្ធិជួយទីក្រុងកៀវដែរនោះ។
ទីភ្នាក់ងារសារព័ត៌មានរ៉ឺទែរ( Reuters)បានឲ្យដឹងថា៖លោកវ៉ាស៊ីលីនេបឹនហ្សៀ( Vassily Nebenzia )បានប្រឈមមុខនឹងការសួរដេញដោល នៅឯក្រុមប្រឹក្សាសន្តិសុខ UN កាលពីថ្ងៃពុធ ទី៣០ ខែតុលា ពីសំណាក់សហរដ្ឋអាមេរិក ចក្រភពអង់គ្លេស កូរ៉េខាងត្បូង អ៊ុយក្រែន និងប្រទេសមួយចំនួនទៀត ដែលសុទ្ធសឹងតែបានចោទរុស្ស៉ីថាបានបំពានដំណោះស្រាយ UN និងធម្មនុញ្ញបង្កើត UN តាមរយៈការដាក់ពង្រាយ កងទ័ពកូរ៉េខាងជើងដើម្បីជួយទីក្រុងមូស្គូ។
«ការគាំទ្រសកម្មភាពឈ្លានពានណាមួយដែលបំពានទាំងស្រុងលើគោលការណ៍របស់ធម្មនុញ្ញ UN គឺជាអំពើខុសច្បាប់»។ នេះជាការលើកឡើងរបស់ឯកអគ្គរដ្ឋទូតកូរ៉េខាងត្បូង ប្រចាំ UN លោក ជូនកុកវ៉ាង(Joonkook Hwang) ដោយបន្ថែមថា «សកម្មភាពណាមួយដែលតម្រូវឱ្យ DPRK (កូរ៉េខាងជើង) បញ្ជូនកងទ័ពទៅកាន់រុស្ស៉ីជាទង្វើបំពានយ៉ាងច្បាស់ក្រឡែត លើដំណោះស្រាយជាច្រើនរបស់ក្រុមប្រឹក្សាសន្តិសុខ»។ លោកវ៉ាស៊ីលីនេបឹនហ្សៀ( Vassily Nebenzia )បាននិយាយថាទំនាក់ទំនងយោធារបស់រុស្ស៉ីជាមួយកូរ៉េខាងជើង មិនបានបំពានច្បាប់អន្តរជាតិ នោះទេ។ លោកបន្តថា «ហើយបើទោះជារឿងគ្រប់យ៉ាងដែលត្រូវបាននិយាយពីទំនាក់ទំនងរវាងរុស្ស៉ី និងកូរ៉េខាងជើង ដោយសហសេវិកលោកខាងលិចរបស់យើងគឺជាការពិត ក៏ដោយ ចុះហេតុអ្វីសហរដ្ឋអាមេរិក និងសម្ព័ន្ធមិត្តរបស់ខ្លួនព្យាយាមបញ្ចុះបញ្ចូលឱ្យគេឯងយល់ថាពួកគេមានសិទ្ធិ ដើម្បីជួយរបបហ្សេលេនស្គី...ហើយចុះសម្ព័ន្ធមិត្តរបស់រុស្ស៉ីវិញ គឺគ្មានសិទ្ធិជួយរុស្ស៉ីមែនទេ?»។
គួរបញ្ជាក់ថា ជាការឆ្លើយទៅនឹងការលើកឡើងរបស់លោក Nebenzia ឯកអគ្គរដ្ឋទូតអ៊ុយក្រែនប្រចាំ UN លោក Sergiy Kyslytsya បានឆ្លើយតបថាគ្មានប្រទេសណាមួយ ដែលផ្ដល់ជំនួយដល់អ៊ុយក្រែន ធ្វើឡើងក្រោមការដាក់ទណ្ឌកម្មរបស់ក្រុមប្រឹក្សាសន្តិសុខនោះទេ។ទាក់ទងបញហារដ្ឋមន្ត្រីការពារជាតិអាមេរិក និងកូរ៉េខាងត្បូង កាលពីថ្ងៃពុធ ទី៣០ ខែតុលា បានអំពាវនាវឱ្យកូរ៉េខាងជើងដកកងទ័ពរបស់ខ្លួនចេញពីរុស្ស៉ី ជាទីដែលទីក្រុងវ៉ាស៊ីនតោននិយាយថា កងទ័ពកូរ៉េខាងជើងមួយចំនួននៅក្នុងចំណោម ១០ ០០០នាក់ ដែលកំពុងស្ថិតនៅលើទឹកដីរុស្ស៉ីត្រូវបានដាក់ពង្រាយសម្រាប់ការធ្វើសកម្មភាពប្រឆាំងនឹងកងកម្លាំងអ៊ុយក្រែន។ នេះបើតាមការ ចេញផ្សាយដោយទីភ្នាក់ងារសារព័ត៌មាន AFP។
រុស្ស៉ី និងកូរ៉េខាងជើង បានពង្រឹងទំនាក់ទំនងនយោបាយ និងយោធាកាន់តែស៊ីជម្រៅ ខណៈសង្គ្រាមអ៊ុយក្រែនជិតចូលដល់ឆ្នាំទី៣។ ប៉ុន្តែការបញ្ជូនកងទ័ពរបស់កូរ៉េខាងជើងទៅប្រយុទ្ធប្រឆាំងនឹង កងកម្លាំងអ៊ុយក្រែននឹងក្លាយជាការបង្កើនជម្លោះមួយនៅក្នុងសង្គ្រាមអ៊ុយក្រែន ដែលកំពុងបង្កការព្រួយបារម្ភយ៉ាងខ្លាំងដល់អន្តរជាតិ។ «ខ្ញុំអំពាវនាវឱ្យពួកគេ (កូរ៉េខាងជើង) ដកកងទ័ពរបស់ខ្លួន ចេញពីរុស្ស៉ី»។ នេះជាការកត់សម្គាល់របស់រដ្ឋមន្ត្រីការពារជាតិអាមេរិក លោក Lloyd Austin ដោយបន្ទរតាមពីក្រោយការអំពាវនាវរបស់សមភាគីកូរ៉េខាងត្បូងរបស់លោក គឺលោក Kim Yong-hyun ដែលឈរនៅជិតរូបលោក អំឡុងធ្វើសន្និសីទសារព័ត៌មាននៅឯមន្ទីរបញ្ចកោណ។
លោក Austin បានបន្ថែមទៀតថាសហរដ្ឋអាមេរិកនឹងបន្តធ្វើការជាមួយសម្ព័ន្ធមិត្ត និងប្រទេសជាដៃគូ ដើម្បីរារាំងកុំឱ្យរុស្ស៉ីដាក់ពង្រាយកងទ័ពកូរ៉េខាងជើងក្នុងសមរភូមិប្រយុទ្ធ។ លោក Kim Yong-hyun បានថ្លែងតាមរយៈ អ្នកបកប្រែថាលោកជឿថាការបញ្ជូនកងទ័ពកូរ៉េខាងជើងទៅកាន់រុស្ស៉ី អាចនឹងបង្កើនការគំរាមកំហែងសន្តិសុខដល់ឧបទ្វីបកូរ៉េ ពីព្រោះតែទីក្រុងព្យុងយ៉ាងអាចស្នើសុំឱ្យរុស្ស៉ីផ្ទេរបច្ចេកវិទ្យាអាវុធ ដើម្បីអភិវឌ្ឍកម្មវិធីអាវុធរបស់ខ្លួន ក្នុងនោះរួមមានអាវុធនុយក្លេអ៊ែរតាក់ទិក មីស៊ីលបាលិស្ទីគអន្តរទ្វីប និងផ្កាយរណបស៊ើបការណ៍ជាដើម ជាថ្នូរទៅនឹងការបញ្ជូនទ័ពទៅជួយរុស្ស៉ី។
ប៉ុន្តែ លោកប្រមុខការពារជាតិកូរ៉េខាងត្បូង មិនបានប្រកាសពីការផ្លាស់ប្ដូរណាមួយនៅក្នុងគោលនយោបាយរបស់កូរ៉េខាងត្បូង ពាក់ព័ន្ធនឹងការហាមឃាត់ការបញ្ជូនអាវុធទៅកាន់ប្រទេសកំពុងមាន សង្គ្រាមដូចជាអ៊ុយក្រែននោះទេ ដែលជាការប្រកាន់ខ្ជាប់គោលជំហរយ៉ាងម៉ឺងម៉ាត់មកទល់នឹងពេលនេះ បើទោះជាមានការទទូចសុំពីសហរដ្ឋអាមេរិក និងទីក្រុងកៀវ ឱ្យទីក្រុងសេអ៊ូលពិចារណា ឡើងវិញ ក៏ដោយ។
សូមបញ្ជាក់សហរដ្ឋអាមេរិក កាលពីថ្ងៃសុក្រ ទី១ ខែវិច្ឆិកាបានប្រកាសថាខ្លួននឹងផ្ដល់ជំនួយយោធាបន្ថែម ៤២៥លានដុល្លារ ទៅឱ្យអ៊ុយក្រែន មួយថ្ងៃបន្ទាប់ពីទីក្រុងវ៉ាស៊ីនតោន បាននិយាយថាកងទ័ពកូរ៉េខាងជើងរាប់ពាន់នាក់ បានត្រៀមលក្ខណៈជាស្រេចដើម្បីចូលរួមក្នុងសមរភូមិប្រឆាំងនឹងកងទ័ពអ៊ុយក្រែន។ នេះបើតាមការចេញផ្សាយដោយទីភ្នាក់ងារ សារព័ត៌មាន AFP។សេចក្ដីថ្លែងការណ៍មួយ ក្រសួងការបរទេសអាមេរិកបានបញ្ជាក់ថា កញ្ចប់ជំនួយយោធាថ្មីនេះដែល នឹងត្រូវដកចេញពីឃ្លាំងអាវុធអាមេរិក ក៏មានផងដែរមីស៊ីលបាញ់ពីអាកាសទៅដី បរិក្ខារពេទ្យ និងគ្រឿងបន្លាស់ជាច្រើន។ «សហរដ្ឋអាមេរិកនឹងបន្តធ្វើការ...ដើម្បីបំពេញតាមតម្រូវការបន្ទាន់ របស់អ៊ុយក្រែននៅលើសមរភូមិ និងការពារខ្លួនឯងប្រឆាំងនឹងការឈ្លានពានពីរុស្ស៉ី»។ នេះជាការបញ្ជាក់បន្ថែមរបស់ក្រសួងការបរទេសអាមេរិក។
ឯរដ្ឋមន្ត្រីការបរទេសកូរ៉េខាងត្បូង លោក Cho Tae-yul វិញបាននិយាយថាគ្រប់សេណារីយ៉ូទាំងអស់កំពុងស្ថិតនៅក្រោមការពិចារណា ឆ្លើយតបទៅនឹងការចោទសួរថា តើទីក្រុងសេអ៊ូល អាចនឹងបញ្ជូនអាវុធឱ្យអ៊ុយក្រែនដែរឬក៏យ៉ាងណា ជាការឆ្លើយបទៅនឹងការគាំទ្ររបស់កូរ៉េខាងជើងចំពោះរុស្ស៉ី។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters។លោក Cho Tae-yul ធ្វើការកត់សម្គាល់បែបនេះតាមរយៈអ្នកបកប្រែ អំឡុងធ្វើសន្និសីទសារព័ត៌មានមួយក្នុងទីក្រុងអូតាវ៉ា កាលពីថ្ងៃសុក្រ ទី១ ខែវិច្ឆិកា។ «គ្រប់សេណារីយ៉ូ ទាំងអស់កំពុងស្ថិតនៅក្រោមការពិចារណា»។ នេះជាការបញ្ជាក់របស់លោក Cho នៅពេលត្រូវបានចោទសួរថាតើកូរ៉េខាងត្បូងអាចនឹងបញ្ជូនអាវុធឱ្យអ៊ុយក្រែន ដែរឬក៏យ៉ាងណា? លោកបន្ថែមថា កូរ៉េខាងត្បូង នឹងតាមដានកម្រិតនៃការចូលរួមរបស់កងទ័ពកូរ៉េខាងជើងនៅក្នុងសង្គ្រាមអ៊ុយក្រែន និងថាតើទីក្រុងព្យុងយ៉ាងនឹងទទួលបានអ្វីមកវិញពីទីក្រុងមូស្គូ មុននឹងធ្វើការសម្រេចចិត្តជាក់លាក់ណាមួយ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានទទូចឱ្យសម្ព័ន្ធមិត្តអ៊ុយក្រែន ឈប់សម្លឹងមើល ហើយត្រូវចាត់វិធានការសកម្មជាក់ស្ដែង ដើម្បី ដោះស្រាយជាមួយវត្តមានកងទ័ពកូរ៉េខាងជើងនៅរុស្ស៉ី មុននឹងពួកគេចាប់ផ្ដើមប្រឈមមុខជាមួយកងទ័ពអ៊ុយក្រែននៅសមរភូមិ។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters។នៅក្នុងវីដេអូមួយដែលត្រូវបានបង្ហោះលើ Telegram កាលពីថ្ងៃសុក្រ ទី១ ខែវិច្ឆិកា លោក ហ្សេលេនស្គីបាននិយាយថាកូរ៉េខាងជើងកំពុងមានភាពរីកចម្រើននៅក្នុង ការអភិវឌ្ឍសមត្ថភាពយោធា ការដាក់ពង្រាយមីស៊ីល និងការផលិតអាវុធ ហើយឥលូវនេះ កូរ៉េខាងជើងមានឱកាសរៀនសូត្រពីសង្គ្រាមសម័យទំនើប។ «កងទ័ពរាប់ពាន់នាក់ ដំបូងមកពីកូរ៉េខាងជើង កំពុងស្ថិតនៅក្បែរព្រំដែនអ៊ុយក្រែន។ អ៊ុយក្រែននឹងត្រូវការពារខ្លួនឯងប្រឆាំងនឹងពួកគេ ហើយពិភពលោកនឹងសម្លឹងមើលសាជាថ្មី។ ប៉ុន្តែ ជំនួសឱ្យ ការសម្លឹងមើលរបស់សហរដ្ឋអាមេរិក អង់គ្លេស និងអាលឺ្លម៉ង់...ការចាត់វិធានការជាក់ស្ដែងដូចជាការអនុញ្ញាតឱ្យអ៊ុយក្រែប្រើមីស៊ីលរយៈចម្ងាយឆ្ងាយ គឺជារឿងចាំបាច់»។ នេះជាការគូសបញ្ជាក់របស់លោក ហ្សេលេនស្គី។
