វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5210 នាក់
ម្សិលមិញ 5304 នាក់
សរុប 14144736 នាក់
ឥណ្ឌា៖ ក្រុមកសិករឥណ្ឌានៅក្នុងរដ្ឋ Punjab និងរដ្ឋ Haryana ភាគខាងជើងប្រទេសបាននាំគ្នាបន្តតវ៉ាដោយបិទខ្ទប់ផ្លូវរថភ្លើងនៅថ្ងៃអាទិត្យម្សិលមិញ ដើម្បីដាក់សម្ពាធទៅលើរដ្ឋាភិបាលរបស់លោកនាយករដ្ឋមន្ត្រី Narendra Modyឱ្យគិតគូឡើងវិញចំពោះតម្លៃកសិផល បន្ទាប់ពីរដ្ឋាភិបាលឥណ្ឌាបានធើ្វការកែប្រែច្បាប់កសិកម្មមួយចំនួនដែលធ្លាប់បានសន្យាជាមួយប្រជាកសិករកាលពីជាង ២ឆ្នាំកន្លងទៅ។
ក្រុមបាតុករបាននាំគ្នារារាំងខ្សែដឹកជញ្ជូនរថភ្លើងនៅក្បែរស្ថានីយក្នុងតំបន់ដាវីដាសពូរ៉ា( DeviDassPura)និងបានស្រែកពាក្យស្លោកដោយជំរុញឱ្យរដ្ឋាភិបាលយកចិត្តទុកដាក់លើនយោបាយកសិកម្ម ដើម្បីលើកកម្ពស់តម្លៃកសិផលនៅលើទីផ្សារ។ពាក់ព័ន្ធនឹងការតវ៉ារបស់កសិករឥណ្ឌានេះដែរ កាលពីខែកុម្ភៈកន្លងទៅ មានកសិករឥណ្ឌារាប់ពាន់នាក់បាននាំគ្នាផ្តើមធើ្វយុទ្ធនាការដង្ហែក្បួនឆ្ពោះទៅកាន់ទីក្រុងញូវដេលី ដើម្បីប្រមូលផ្តុំគ្នាតវ៉ាទ្រង់ទ្រាយធំ ក្រោមគោលបំណងទាមទារឱ្យមានការធានានូវតម្លៃកសិផល ប៉ុន្តែត្រូវអាជ្ញាធរធើ្វការរារាំងក្បួនតវ៉ារបស់ពួកគេនៅចម្ងាយប្រមាណជា ២០០គីឡូម៉ែត្រពីរដ្ឋធានី។
ទន្ទឹមនិងការតវ៉ារបស់កសិកររដ្ឋភិបាលឥណ្ឌាកាលពីថ្ងៃទី១០មីនាបានចុះហត្ថលេខាលើកិច្ចព្រមព្រៀងសេដ្ឋកិច្ច-ពាណិជ្ជកម្ម ជាមួយសមាគមដោះដូរពាណិជ្ជកម្មសេរីអឺរ៉ុប ដែលមានសមាជិក៤ប្រទេស គឺ ស្វ៊ីស ន័រវែស លិកតិនស្តាញ និងអ៊ីស្លង់។ កម្មវិធីចុះហត្ថលេខា ត្រូវបានប្រព្រឹត្តិធ្វើទៅនៅទីក្រុងញូដេលី ជាមួយនឹងវត្តមានរដ្ឋមន្ត្រីសេដ្ឋកិច្ច ពាណិជ្ជកម្មនៃប្រទេសទាំង៤នេះ និងលោករដ្ឋមន្ត្រីក្រសួងពាណិជ្ជកម្មឥណ្ឌា លោកពីយុសហ្គោរ៉ាល(Piyush Goyal)។
លោក Piyush Goyal បានឲ្យដឹងថាកិច្ចព្រមព្រៀង មានតម្លៃទឹកប្រាក់ចំនួន ១០០ពាន់លានដុល្លារ ក្នុងរយៈពេល១៥ឆ្នាំនេះ គឺជាការបោះជំហានជាប្រវត្តិសាស្ត្ររបស់ឥណ្ឌា ដែលកំពុងតែមានសក្តានុពល ក្នុងនាមជាមហាអំណាចសេដ្ឋកិច្ចពិភពលោកលំដាប់ទី៥។ កិច្ចព្រមព្រៀងនេះ នឹងបើកផ្លូវឲ្យវឌ្ឍនភាពរួមគ្នា តាមរយៈការពង្រីកការនាំចេញនាំចូល ព្រមទាំងការវិនិយោគ បង្កើតការងារថ្មីៗ។សូមបញ្ជាក់ថា កិច្ចព្រមព្រៀងនេះ គឺជាលទ្ធផលនៃការចរចាគ្នាអស់រយៈពេល១៦ឆ្នាំ រវាងភាគីឥណ្ឌា ជាមួយនឹងប្រទេសអឺរ៉ុបទាំង៤នៃសមាគម EFTA ។ លោករដ្ឋមន្ត្រីសេដ្ឋកិច្ចប្រទេសស្វ៊ីសហ្គុយប្រាមេលីន( Guy Parmelin )បានលើកឡើងថា កិច្ចព្រមព្រៀងនេះនឹងអនុញ្ញាតឲ្យភាគីទាំងអស់ អាចប្រើប្រាស់សក្តានុពលសេដ្ឋកិច្ចឲ្យកាន់តែប្រសើរ និងបង្កើតឱកាសថ្មីៗបន្ថែម សម្រាប់ឥណ្ឌានិងសម្រាប់ប្រទេសទាំង៤របស់ EFTA។
សម្រាប់ផលប្រយោជន៍ប្រទេសអឺរ៉ុបទាំង៤ សមាជិករបស់ EFTA នឹងបោះជើងចូលទីផ្សារដែលពេញដោយសក្តានុពលរបស់ឥណ្ឌា ចំណែកឥណ្ឌាវិញ នឹងអាចទាក់ទាញការវិនិយោគ បង្កើតការងារថ្មីៗ ដែលពោរពេញដោយវិជ្ជាជីវៈនិងសមត្ថភាព។សូមបញ្ជាក់ថាសមាគមដោះដូរពាណិជ្ជកម្មសេរីអឺរ៉ុប ហៅកាត់ថា EFTA/AELE ត្រូវបានបង្កើតឡើងនៅឆ្នាំ១៩៦០។