មន្ដ្រីជាន់ខ្ពស់កសិកម្ម ស្នើឱ្យបន្តយកចិត្តទុកដាក់ បំផុស និងជំរុញការផលិតកសិកម្មសម្រាប់ពាណិជ្ជកម្ម បន្ទាប់ពីវិស័យឯកជន ស្នើ បង្កើតគណៈកម្មាធិការពិគ្រោះយោបល់ និងអភិវឌ្ឍន៍វិស័យវារីវប្បកម្ម ដើម្បីគាំទ្រដល់ទីផ្សារជលផលក្នុងស្រុក
21-September-2026 / សេដ្ឋកិច្ច
កែប៖ លោក តូច ប៊ុនហួរ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១៦ ខែតុលា ឆ្នាំ២០២៤បានផ្តល់អនុសាសន៍ឲ្យបន្តយកចិត្តទុកដាក់ បំផុស និងជំរុញការផលិតកសិកម្មសម្រាប់ពាណិជ្ជកម្ម តាមរយៈការធ្វើកសិកម្មតាមកិច្ចសន្យា ការចូលរួមការពារ ស្តារ និង អនុវត្តការប្រើប្រាស់ដោយនិរន្តរភាពនូវធនធានធម្មជាតិ និងប្រព័ន្ធបរិស្ថាន និងបន្តប្រឹងប្រែង ក្នុងការស្រាវជ្រាវ និងអភិវឌ្ឍន៍ទាក់ទាញអ្នកវិនិយោគ ដើម្បីបង្កើតគំនិតថ្មីៗក្នុងការបង្កើនផលិតភាពកសិកម្ម និងនវានុវត្តន៍ ដើម្បីឆ្លើយតបទៅនឹងតម្រូវការក្នុងការបរិភាគ និងប្រើប្រាស់ប្រចាំថ្ងៃរបស់ប្រជាជនសំដៅប្រយុទ្ធប្រឆាំងនឹងភាពអត់ឃា្លន ការបង្កើតការងារ សុវត្ថិភាពស្បៀងអាហារូបត្ថម្ភ និងកំណើនសេដ្ឋកិច្ចជាតិ។
លោក តូច ប៊ុនហួរ តំណាងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងបែបនេះនៅក្នុងពិធីទិវាស្បៀងអាហារពិភពលោកឆ្នាំ២០២៤ ក្រោមប្រធានបទ សិទ្ធិទទួលបានអាហារដើម្បីជីវិត និងអនាគតកាន់តែប្រសើរ នៅភូមិថ្មី សង្កាត់ព្រៃធំ ក្រុងកែប ខេត្តកែបដោយមានលោក ហ៊ួរ មិថុនា អភិបាលរងខេត្ត តំណាងលោកបណ្ឌិត សោម ពិសិដ្ឋ អភិបាលខេត្តកែបលោក អេះសាន់ ខាបៀរ និងលោកម៉េង ចាន់ធឿន តំណាងកម្មវិធីស្បៀងអាហារពិភពលោកចូលរួមផងដែរ។
លោក អេះសាន់ ខាបៀរ និងលោកម៉េង ចាន់ធឿន តំណាងកម្មវិធីស្បៀងអាហារពិភពលោកបានចាត់ទុក ការយកចិត្តទុកដាក់របស់ក្រសួងក្នុងការពង្រឹងវិស័យស្បៀង និងកសិកម្មរបស់កម្ពុជា ជាយុទ្ធសាស្ត្រសំខាន់ មួយដោយធានាថាចក្ខុវិស័យរួមស្តីពីបញ្ហាសន្តិសុខស្បៀង និងការអភិវឌ្ឍប្រកបដោយចីរភាព បន្តរីកចម្រើន និងឆ្ពោះទៅមុខជាដរាប។ បេីតាមលោកទាំងពីរ ខាងលេី ទិវាស្បៀងអាហារពិភពលោក ប្តេជ្ញាកសាងប្រព័ន្ធស្បៀងប្រកបដោយនិរន្តរភាព និងបរិយាប័ន្ន រួមគ្នាសម្រេចឱ្យបាននូវភាពប្រសើរទាំង៤ គឺ ផលិតកម្មកាន់តែប្រសើរ អាហារូបត្ថម្ភ
លោក តូច ប៊ុនហួរ តំណាងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់បន្ថែមថា ក្រោមការដឹកនាំដ៏ស្វាហាប់ និង ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា រាជរដ្ឋាភិបាល បានដាក់ចេញនូវកម្មវិធីគោលនយោបាយអាទិភាព ក្នុងការរក្សាស្ថេរភាពថ្លៃកសិផលកសិកម្ម ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើប ដើម្បីជួយគាំទ្រលើផ្នែកបច្ចេកទេស ការផ្តល់ព័ត៌មានការប្រឹក្សាយោបល់ និងជួយដោះស្រាយបញ្ហាពាក់ព័ន្ធនឹងការងារកសិកម្មដល់កសិករក្នុងគោលបំណងបង្កើនផលិតភាពកសិកម្ម ជំរុញជីវភាព ធានាបាននូវសន្តិសុខ និងសុវត្តិភាពស្បៀងផងដែរ។
សូមបញ្ជាក់ថាការថ្លែងរបស់លោក លោក តូច ប៊ុនហួរបានធ្វើឡើងបន្ទាប់ពីមាន វិស័យឯកជន បានស្នើសុំដល់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បង្កើតគណៈកម្មាធិការពិគ្រោះយោបល់ និងអភិវឌ្ឍន៍វិស័យវារីវប្បកម្ម ដើម្បីបង្កើតយន្តការអន្តរក្រសួងសម្រាប់ជួយគាំទ្រដល់ទីផ្សារជលផលក្នុងស្រុក ក្នុងការជំរុញកែច្នៃ និងជួយសម្រួលការនាំចេញទៅទីផ្សារអន្តរជាតិ។
ក្នុងកិច្ចប្រជុំក្រុមការងារ "ក" "ផ្នែកកសិកម្ម និងកសិឧស្សាហកម្ម" នៃវេទិការាជរដ្ឋាភិបាល-ផ្នែកឯកជន ក្រោមវត្តមាន លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ៉ និងនេសាទ និងជាសហប្រធានក្រុមការងារ "ក" តំណាងផ្នែករដ្ឋាភិបាល និងឧកញ៉ា ម៉ុង រិទ្ធថា សហប្រធានក្រុមការងារ "ក" តំណាងផ្នែកឯកជនបានថ្វើកាលពីរសៀលថ្ងៃទី៦ ខែកញ្ញា ឆ្នាំ២០២៤ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
គោលបំណងនៃកិច្ចប្រជុំនេះ ដើម្បីពិនិត្យទៅលើវឌ្ឍនភាពនៃក្រុមការងារ និងដើម្បីពិគ្រោះ ពិភាក្សា និងដោះស្រាយលើបញ្ហាប្រឈម និងកង្វល់ដែលលើកឡើងដោយផ្នែកឯកជននៅក្នុងវិស័យកសិកម្ម និងកសិឧស្សាហកម្ម បានជួបប្រទះ និងត្រូវការដំណោះស្រាយ ខណៈដែលផ្នែកឯកជនស្នើសុំដល់ក្រសួងកសិកម្ម រុក្ខាប្រមាញ់ និងនេសាទ ពិនិត្យក្រុមហ៊ុននាំចូលផលវារីវប្បកម្មឲ្យមានគុណវុឌ្ឍ ហើយការនាំចូលត្រូវបង់ពន្ធ និងអនុវត្តតាមចំនួនកូតាដែលបានកំណត់ដោយស្ថាប័នជំនាញការនាំចូល ត្រូវមានការបញ្ជាក់ពីប្រភពដើម បញ្ជាក់គុណភាព និងសុវត្ថិភាពចំណីអាហារ និងការតត្រួតពិនិត្យ។
ផ្នែកឯកជនក៏ស្នើឲ្យមានក្រុមហ៊ុននាំចូលពូជកូនត្រីដែលមានចុះបញ្ជីត្រឹមត្រូវ និងមានគុណវុឌ្ឍ ដើម្បីធានាបាននូវគុណភាព តម្លៃ និងប្រភព ដើមច្បាស់លាស់ ខណៈដែលប្រទេសកម្ពុជានៅពុំទាន់មានលទ្ធភាពផលិតកូនត្រីពូជគ្រប់គ្រាន់តាមតម្រូវការទីផ្សារទេ និងស្នើសុំជួយកៀរគរម្ចាស់ជំនួយគាំទ្របន្ថែម ដើម្បីអាចបង្កាត់ ភ្ញាស់កូនត្រីក្នុងស្រុកឲ្យបានច្រើនប្រភេទ មានគុណភាព និងផ្គត់ផ្គង់គ្រប់គ្រាន់តាមតម្រូវការទីផ្សារ។
សូមបញ្ជាក់ថា បច្ចុប្បន្នតម្លៃលក់ត្រីចិញ្ចឹមអាចទទួលយកបាន ដោយអ្នកចិញ្ចឹមត្រីនៅអាចទទួលបានប្រាក់ចំណេញខ្លះ ប៉ុន្តែអ្នកចិញ្ចឹមនៅតែមានក្តីកង្វល់រឿងទីផ្សារ ដោយសារខ្វះព័ត៌មានអំពីផលិតកម្មក្នុងស្រុក និងការនាំចូលត្រី។ ការនាំចូលកូនត្រីពូជ និងត្រីសម្រាប់កែច្នៃស្ទើរតែគ្មានលិខិតអនុញ្ញាត និងបញ្ជាក់អំពីគុណភាព ដូចជាកូនត្រីពូជ ដែលនាំចូលពីប្រទេសវៀតណាម មិនសូវមានគុណភាព និងមិនមានប្រភពដើមច្បាស់លាស់ ដែលនៅពេលយកមកចិញ្ចឹមមានអាត្រាបាត់បង់ខ្ពស់៕
.jpg&h=97&w=146)
