នាយករដ្ឋមន្ត្រីប្រកាសដាក់ផ្លូវជាតិលេខ១០ឲ្យប្រើប្រាសជាផ្លូវការនិងអះអាងពីផលប្រយោជន៍ទទួលបាន

ពោធិសាត់៖សម្តេចមហាបវរធិបតី ហ៊ុន ម៉ាណែត នៅទឹកដីស្រុកវាលវែង ខេត្តពោធិ៍សាត់នាថ្ងៃព្រហស្បតិ៍ ទី១ ខែតុលា ឆ្នាំ២០២៦ បានប្រកាសដាក់ឱ្យប្រើប្រាស់ជាផ្លូវការនូវផ្លូវជាតិលេខ១០ ដែលសាងសង់ឡើងក្រោមក្របខ័ណ្ឌហិរញ្ញប្បទាន សហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិន និងក្របខ័ណ្ឌថវិកាជាតិ ។ ពិធីនេះក៏មានការអញ្ជើញចូលរួមដោយឯកឧត្តមភារធារីស្ថានទូតចិនប្រចាំកម្ពុជាផងដែរ។ 

សម្តេចមហាបវរធិបតី ហ៊ុន ម៉ាណែតបាន ថ្លែងអំណរគុណថ្នាក់ដឹកនាំចិន ដែលបានសន្យា​បន្តផ្តល់ជំនួយឥត​សំណង និងឥណទានសម្បទានដល់កម្ពុជា ព្រមទាំងលើកកម្ពស់​ការវិនិយោគ និងកិច្ចសហប្រតិបត្តិការសេដ្ឋកិច្ចឱ្យកាន់តែខ្លាំងក្លា ជាពិសេសជំរុញការ​បន្ស៊ីគ្នារវាង «គំនិត​ផ្ដួចផ្ដើម ខ្សែក្រវាត់ និង ផ្លូវ» និង «យុទ្ធសាស្ត្របញ្ចកោណ» សំដៅគាំទ្រដល់ «កិច្ចសហប្រតិបត្តិការ ឈ្នះ-ឈ្នះ» ព្រមទាំងពង្រឹងភាពជាដៃគូ និង​កិច្ចសហ​ប្រតិ​បត្តិ​ការល្អ ដែលនឹងរួមចំណែក ដល់ការគាំទ្រ «កិច្ចសហប្រតិ​បត្តិការ​ត្បូង​ពេជ្រ​កម្ពុជា-​ចិន​» និង «ការកសាងសហគមន៍ ជោគវាសនារួមកម្ពុជា-ចិន គ្រប់រដូវកាលក្នុង​យុគ​សម័យ​ថ្មី» ប្រកបដោយគុណភាពខ្ពស់, កម្រិតខ្ពស់ និងស្តង់ដាខ្ពស់។

សម្តេចមហាបវរធិបតី ហ៊ុន ម៉ាណែត បានមានប្រសាសន៍ថា គម្រោងនេះ នឹងផ្តល់​ផល​ចំណេញផ្នែកសេដ្ឋកិច្ចខ្ពស់ តាមរយៈការកាត់បន្ថយពេល និងថ្លៃដឹកជញ្ជូន, ការតភ្ជាប់រវាងភូមិភាគពាយ័ព្យ និងតំបន់ឆ្នេរសមុទ្រភាគនិរតី នៃ​ប្រទេសកម្ពុជា, ការជំរុញពាណិជ្ជកម្ម, ការអភិវឌ្ឍរបៀងទេសចរណ៍ និងការបង្កើត​កាលា​​នុវត្តភាព សេដ្ឋកិច្ចសម្រាប់សហគមន៍តាមបណ្ដោយផ្លូវ។

 សម្តេចមហាបវរធិបតី ហ៊ុន ម៉ាណែត មានប្រសាសន៍ថា គម្រោងខ្សែផ្លូវជាតិលេខ​១០​នេះ កាត់បន្ថយចម្ងាយផ្លូវធ្វើដំណើរ ឬដឹកជញ្ជូនប្រមាណ ៣០៦គីឡូម៉ែត្រ ប្រសិនគិត​ពីខេត្តបាត់ដំបង ទៅខេត្តកោះកុង, ប្រមាណ ២៣០គីឡូម៉ែត្រ ប្រសិនគិតពីខេត្ត​ពោធិ៍​សាត់ ទៅខេត្តកោះកុង និងប្រមាណ ៣៧២គីឡូម៉ែត្រ ប្រសិនគិតពីខេត្តប៉ៃលិន ទៅ​ខេត្ត​កោះកុង។

 សម្តេចមហាបវរធិបតី ហ៊ុន ម៉ាណែត មានប្រសាសន៍ថា ផ្លូវជាតិលេខ១០ ជាការតភ្ជាប់​តំបន់ភ្នំ ទៅតំបន់សមុទ្រ ពោលអ្នកខេត្តបាត់ដំបង ពោធិ៍សាត់ ចង់ទៅលេងសមុទ្រមិនចាំបាច់ធ្វើដំណើរទៅភ្នំពេញទៀតនោះឡើយ។

សម្តេចមហាបវរធិបតី ហ៊ុន ម៉ាណែត ក៏បានកោតសរសើរខេត្តពោធិ៍សាត់លើការរៀបចំបំពាក់ភ្លើងបំភ្លឺដងផ្លូវ ការដាំឈើលើទ្រូងផ្លូវ ដោយមានការថែទាំដុះបានល្អនិងបានមានប្រសាសន៍ឲ្យដឹងថារាជរដ្ឋាភិបាលមាន គម្រោងដាក់ភ្លើងសឡាបំភ្លឺតាមផ្លូវជាតិនឹងគ្របដណ្តប់លើខេត្តចំនួន១៣ ជាមួយចម្ងាយប្រមាណ ១២០០គីឡូម៉ែត្រ ដោយគ្រោងចំណាយថវិកាប្រមាណ ៦លានដុល្លារ។

ឯកឧត្ដម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងថា” ផ្លូវជាតិលេខ១០នេះ មានប្រវែងសរុប ១៩៨,៥១៨គីឡូម៉ែត្រ ចាប់ពីផ្លូវជាតិ លេខ ៥៧-៧ ត្រង់គីឡូម៉ែត្រលេខ ៣៥+៩០០ ស្ថិតក្នុងភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង មានប្រវែងជាង៣២គីឡូម៉ែត្រ ឆ្លងកាត់ ឃុំប្រម៉ោយ ស្រុកវាលវែង ខេត្តពោធិ៍សាត់ មានប្រវែងជិត ៩៩គីឡូម៉ែត្រ រហូតដល់ផ្លូវជាតិលេខ៤៨ ត្រង់គីឡូម៉ែត្រលេខ ១+៧០០ ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង មានប្រវែងជិត៦៨គីឡូម៉ែត្រ។

ឯកឧត្ដមរដ្ឋមន្ដ្រីក្រសួងសាធារណការ និងដឹកជញ្ជូន “គម្រោងនេះបានចំណាយថវិកាសរុបប្រមាណ ២៥២លានដុល្លារអាម៉េរិក រួមមាន
ថវិកាជាប្រភពឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន ចំនួនប្រមាណ ១៩២,៧១លាន ដុល្លារ អាម៉េរិក និងប្រភព ថវិកាជាតិ ចំនួន ប្រមាណ ៥៩,៣៦លានដុល្លារ អាម៉េរិក រួមទាំង ថវិកាបដិភាគ រាជរដ្ឋាភិបាល មួយចំនួន ផ្សេងទៀត សម្រាប់ ចំណាយ លើការដោះស្រាយផលប៉ះពាល់ ការបោសសម្អាត គ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ”។
 
ឯកឧត្ដមរដ្ឋមន្ដ្រីក្រសួងសាធារណការ និងដឹកជញ្ជូន បានបន្តទៀតថា”ផ្លូវជាតិលេខ១០នេះ គឺជាខ្សែផ្លូវថ្មីមួយ បានលេចចេញ ជារូបរាង ឡើង យ៉ាងស្រស់ត្រកាល នៅក្នុង សម័យកាលតេជោធិបតី ជាខ្សែផ្លូវយុទ្ធសាស្រ្ត និងជាសរសៃឈាមសេដ្ឋកិច្ចថ្មីរបស់កម្ពុជា ដែលត្រូវបានសាងសង់ តភ្ជាប់ពីស្រុកសំឡូត នៃខេត្តបាត់ដំបង ឆ្លងកាត់ ស្រុកវាលវែង នៃខេត្តពោធិ៍សាត់ និងភ្ជាប់ទៅ ក្រុង ខេមរភូមិន្ទ នៃខេត្តកកោះកុង ព្រមទាំងបានតភ្ជាប់ជាមួយផ្លូវជាតិ សំខាន់ៗ រួមមាន ផ្លូវជាតិលេខ ៥៧-៧ ផ្លូវជាតិលេខ៥៥ និងផ្លូវជាតិលេខ ៤៨ និងតភ្ជាប់ជាមួយបណ្តាញខ្សែផ្លូវផ្សេងៗនៅក្នុងភូមិសាស្រ្តនៃខេត្តទាំង ៣នេះ។ ជាក់ស្តែង ការតភ្ជាប់ប្រទាក់ក្រឡានៃខ្សែផ្លូវនេះ ពិតជាបាន កាត់បន្ថយពេលវេលា និងចម្ងាយផ្លូវធ្វើដំណើរ បានយ៉ាងច្រើន ដូចជា ពី ខេត្តបាត់ដំបងមកខេត្តកោះកុងចំណេញ ៣០៦គីឡូម៉ែត្រ ពី ខេត្ត ពោធិ៍សាត់ចុះមកខេត្តកោះកុង តាមផ្លូវជាតិលេខ៥៥ (វាលវែង) ចំណេញ ២៣០គីឡូម៉ែត្រ និងពីខេត្តប៉ៃលិនមកខេត្តកោះកុង (តាមសំឡូត) ចំណេញ ៣៧២គីឡូម៉ែត្រ ដែលពីមុនមក នៅពេលមិនទាន់មានខ្សែផ្លូវនេះ បងប្អូនប្រជាពលរដ្ឋយើងត្រូវធ្វើដំណើរ ចូលរាជធានីភ្នំពេញសិនទើបបន្តទៅគោលដៅទាំងនេះបាន”៕