រដ្ឋមន្ត្រីហិរញ្ញវត្ថុថៃអំពាវនាវជាថ្មី ឱ្យទម្លាក់អត្រាការប្រាក់ មុនកិច្ចប្រជុំរបស់ធនាគារកណ្តាលដែលទាមទាឯករាជ្យភាព
21-September-2026 / សេដ្ឋកិច្ច
បាងកក៖ រដ្ឋមន្ត្រីក្រសួងហិរញ្ញវត្ថុថៃលោកពិឆៃជុនហាវ៉ាជិរ៉ា( Pichai Chunhavajira) នៅថ្ងៃអង្គារ៍ទី១៦តុលា បានធ្វើការអំពាវនាវជាថ្មី ឱ្យមានការកាត់បន្ថយអត្រាការប្រាក់ ដែលការអំពាវនាវនេះ ធ្វើឡើងមួយថ្ងៃមុនពេលមានកិច្ចប្រជុំគោលនយោបាយរូបិយវត្ថុរបស់ធនាគារកណ្តាល ដែលត្រូវបានព្យាករថានឹងរក្សាអត្រាការ នៅដដែល។
ទីភ្នាក់ងារព័ត៌មាន Bloomberg បានដកស្រង់សម្ដីរបស់លោក Pichai ខណៈថ្លែងប្រាប់អ្នកយកព័ត៌មានបន្ទាប់ពីកិច្ចប្រជុំប្រចាំសប្តាហ៍ របស់គណៈរដ្ឋមន្ត្រី នៅទីក្រុងបាងកកនៅថ្ងៃអង្គារ៍ថា «ពេលវេលាគឺត្រឹមត្រូវ» សម្រាប់ធនាគារកណ្តាលថៃក្នុងការបន្ធូរបន្ថយអត្រាការប្រាក់គោល ដើម្បីជួយដល់សេដ្ឋកិច្ច។ លោកបានបន្តថា អត្រាការប្រាក់ទាបនឹងជួយប្រទេសថៃ ក្នុងការគ្រប់គ្រងលំហូរមូលធនបានកាន់តែប្រសើរ និងបញ្ឈប់ការឡើងថ្លៃប្រាក់បាត។
លោករដ្ឋមន្ត្រីបាននិយាយថា សិទ្ធិអំណាចចុងក្រោយលើគោលនយោបាយរូបិយវត្ថុ គឺស្ថិតនៅលើគណៈកម្មាធិការគោលនយោបាយរូបិយវត្ថុ ដែលសម្រេចលើកិច្ចការអត្រាការប្រាក់ ហើយគណៈកម្មាធិការគួរតែពិចារណាលើកត្តាទាំងអស់ ដូចជាអតិផរណាទាបជាដើម ខណៈពេលដែលធ្វើការសម្រេចចិត្ត។
គណៈកម្មាធិការគោលនយោបាយរូបិយវត្ថុ ដឹកនាំដោយទេសាភិបាលធនាគារកណ្តាលថៃលោក Sethaput Suthiwartnaruput អាចនឹងជំទាស់នឹងការអំពាវនាវឱ្យកាត់បន្ថយអត្រាការប្រាក់ ពីសំណាក់រដ្ឋាភិបាលម្តងទៀត និងរក្សាអត្រាការប្រាក់គោលរបស់ខ្លួន ឱ្យនៅដដែលក្នុងកម្រិត ២,៥% ដែលជាកម្រិតខ្ពស់បំផុតគិតចាប់តាំងពីឆ្នាំ ២០១៣មក នេះបើយោងតាមសេដ្ឋវិទូ ២២នាក់ក្នុងចំណោម ២៧នាក់ដែលបានអង្កេតដោយទីភ្នាក់ងារព័ត៌មាន Bloomberg។ សេដ្ឋវិទូ ៥នាក់ព្យាករណ៍ថានឹងមានការកាត់បន្ថយអត្រាការប្រាក់ ០,២៥ពិន្ទុភាគរយ។
លោក Pichai បានមានប្រសាសន៍ថា៖ «យើងចង់ឃើញកំណើនសេដ្ឋកិច្ចលឿនជាងមុន ដោយសារកំណើនសេដ្ឋកិច្ចរបស់យើង បានថមថយអស់រយៈពេលជាយូរមកហើយ»។ លោកបានបន្ថែមថា៖ «មានឱកាសកាត់បន្ថយអត្រាការប្រាក់ ហើយពេលវេលាគឺត្រឹមត្រូវ និងស្របតាមស្ថានភាពសេដ្ឋកិច្ចដែលយើងចង់ជំរុញ»។ទាក់ទងបញ្ហាទម្លាក់អត្រាការប្រាក់នេះលោកសេដ្ឋាភុតស៊ូធីវាត់ណារូភុត( Sethaput Suthiwartnaruput) ទេសាភិបាលធនាគារកណ្តាលថៃ (BoT) កាលពីពេលថ្មីៗនេះធ្លាប់បានសង្កត់ធ្ងន់លើភាពចាំបាច់សម្រាប់ឯករាជ្យភាពរបស់ធនាគារកណ្តាលក្នុងការកំណត់គោលនយោបាយរូបិយវត្ថុក្នុងគ្រាដែលមានការខ្វែងគំនិតគ្នាជាយូរជាមួយរដ្ឋាភិបាលថៃលើបញ្ហាថាតើគួរកាត់បន្ថយអត្រាការប្រាក់ឬអត់ដើម្បីទ្រទ្រង់សេដ្ឋកិច្ច។ នេះបើយោងតាមកាសែតបាងកកប៉ុស្តិ៍។
កាសែតបាងកកប៉ុស្តិ៍បានរាយការណ៍ដោយដកស្រង់សម្ដីរបស់លោកទេសាភិបាល Sethaput ខណៈថ្លែងក្នុងសន្និសីទសារព័ត៌មានមួយថា បើទោះជាអត្រាការប្រាក់ទាបអាចជួយជំរុញកំណើនសេដ្ឋកិច្ចរយៈពេលខ្លីក៏ពិតមាន តែការទម្លាក់អត្រាការប្រាក់ដើម្បីទទួលបានកំណើនសេដ្ឋកិច្ចរយៈពេលខ្លីនេះគឺជាការដោះដូរជាមួយអតិផរណាដែលនឹងកើនឡើង ហើយអត្រាការប្រាក់ទាបនេះក៏អាចនាំទៅរកភាពងាយរងគ្រោះនានាដូចជាការកើនឡើងបំណុល និងសកម្មភាពបែបកេងចំណេញ។
លោកបាននិយាយថា ហានិភ័យទាំងនោះនឹងរារាំងកំណើនសេដ្ឋកិច្ចសម្រាប់រយៈពេលវែង ហើយអាចនាំឱ្យមានវិបត្តិ។ លោកបានបន្ថែមថា ឯករាជ្យភាពរបស់ធនាគារកណ្តាលមានសារៈសំខាន់ណាស់សម្រាប់ស្ថិរភាពតម្លៃ។ការថ្លែងរបស់លោក Sethaput បានកើតមានឡើងក្នុងគ្រាដែលមានការប្រឈមមុខដាក់គ្នារវាងធនាគារកណ្តាលនិងរដ្ឋាភិបាលថៃដែលបានអំពាវនាវម្តងហើយម្តងទៀតឱ្យកាត់បន្ថយអត្រាការប្រាក់ដើម្បីបង្កើនការជំរុញវិធានការសារពើពន្ធរបស់ខ្លួន ហើយធនាគារកណ្តាលបាននិយាយថា អត្រាការប្រាក់មានកម្រិតសមរម្យ ហើយបញ្ហារចនាសម្ព័ន្ធទេដែលកំពុងធ្វើឱ្យរាំងស្តាត់កំណើនសេដ្ឋកិច្ច។
អត្រាការប្រាក់គោលរបស់ប្រទេសថៃមានកម្រិតខ្ពស់ក្នុងរយៈពេលមួយទសវត្សរ៍គឺ ២,៥០% ក្នុងរយៈពេលមួយឆ្នាំមកនេះ ខណៈពេលដែលធនាគារកណ្តាលបានទប់ទល់នឹងការអំពាវនាវម្តងហើយម្តងទៀតឱ្យកាត់បន្ថយ។ ការវាយតម្លៃអត្រាការប្រាក់នៅដំណាក់កាលបន្ទាប់នឹងធ្វើឡើងនៅថ្ងៃទី១៦ ខែតុលា។នាយករដ្ឋមន្ត្រីថៃអ្នកស្រី ភែថងថាន ស៊ីណាវ៉ាត បាននិយាយកាលពីដើមឆ្នាំនេះមុនពេលអ្នកស្រីក្លាយជានាយករដ្ឋមន្ត្រីថា ឯករាជ្យភាពរបស់ធនាគារកណ្តាលគឺជាឧបសគ្គក្នុងការដោះស្រាយបញ្ហាសេដ្ឋកិច្ច។ នេះបើយោងតាមកាសែតបាងកកប៉ុស្តិ៍៕
ប្រធានធនាគាថៃ
