វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5833 នាក់
ម្សិលមិញ 5378 នាក់
សរុប 14085126 នាក់
ថៃ៖ គណៈរដ្ឋមន្ត្រីនៃប្រទេសថៃ បានឯកភាពលើការចុះបញ្ជីផ្ដល់ភាពស្របច្បាប់សម្រាប់ពលករខ្មែរ ដើម្បីឱ្យពួកគាត់បន្តស្នាក់នៅក្នុងប្រទេសថៃ បានរយៈពេល ២ឆ្នាំទៀត ក្នុងបរិបទនៃជំងឺកូវីដ១៩។
កាសែតបាងកកប៉ុស្តិ៍ចុះផ្សាយឲ្យដឹងថា៖ការចុះឈ្មោះអនឡាញ សម្រាប់ពលករដែលមិនមានឯកសារត្រឹមត្រូវ នឹងចាប់ផ្ដើមពីថ្ងៃទី២៥ ខែមករា ដល់ថ្ងៃទី១៣ ខែកុម្ភៈ ឆ្នាំ២០២១។ ក្រៅពីពលករខ្មែរ ថៃក៏អនុញ្ញាតឱ្យពលករមីយ៉ាន់ម៉ា(ភូមា) និងពលករឡាវ ចុះបញ្ជីដើម្បីទទួលបានសិទ្ធិស្នាក់នៅដោយស្របច្បាប់ផងដែរ។
តាមរយៈការចុះបញ្ជីនេះ ពលករខ្មែរ អាចស្នាក់នៅក្នុងប្រទេសថៃ រហូតដល់ថ្ងៃទី១៦ ខែកុម្ភៈ ឆ្នាំ២០២៣។ ពលករតម្រូវឱ្យស្វែងរកការងារមួយសិន ក្នុងពេល ៩០ថ្ងៃ ហើយបន្ទាប់ពីចុះបញ្ជីតាមអនឡាញ អាជ្ញាធរសុខាភិបាលថៃ នឹងធ្វើការត្រួតពិនិត្យសុខភាព និងយកវត្ថុសំណាកធ្វើតេស្តរកជំងឺកូវីដ១៩ ដែលថ្លៃចំណាយសរុប ៧២០០បាត រាប់បញ្ជូលទាំងធានារ៉ាប់រងសុខភាពរយៈពេល២ឆ្នាំ។ ការចំណាយទាំងអស់ ជាបន្ទុករបស់ពលករ និងនិយោជករបស់ពួកគេ។
សូមបញ្ជាក់ថាមន្ត្រីស្ថានទូតខ្មែរប្រចាំទីក្រុងបាងកកទទួលផ្នែកពលករ លោក គឹម ចំរើន បានប្រកាសនៅក្នុងហ៊េសប៊ុក (Facebook)ស្ថានទូតខ្មែរ កាលពីថ្ងៃទី២៧ធ្នូថា អំឡុងពេលនេះ រដ្ឋាភិបាលថៃបានអនុគ្រោះ ដល់ពលករបរទេសទាំងអស់ ឱ្យអាចធ្វើការនៅប្រទេសថៃជាបណ្ដោះអាសន្នបាន ដោយមិនមានការចាប់ចងនោះទេ។ លោកបន្ថែមថា ប្រសិនបើពលករខ្មែរ ខ្វះខាតស្បៀងអាហារ ពួកគាត់អាចទាក់ទងតាមហ្វេសប៊ុកស្ថានទូត ផ្នែកទទួលបន្ទុកពលករ ឱ្យជួយផ្សព្វផ្សាយរកជំនួយជូនពួកគាត់បាន។
ប្រភព៖ Bangkok Post