សមត្ថកិច្ចថៃ លើកឡើងថា អ្នកស៊ើបអង្កេតមិនបានរកឃើញភស្តុតាងបណ្តាលឱ្យផ្ទុះកង់ឡាន ដូចអ្នកបើកបរអះអាងនោះទេ
22-January-2026 / ព័ត៌មានអន្តរជាតិ
ថៃឡង់ដ៍៖ នៅក្នុងសន្និសីទសារព័ត៌មាននៅរសៀលថ្ងៃពុធ អគ្គស្នងការនគរបាលស្តីទី គីទីរ៉ាត់ ផាន់ផេត (Kittirat Panpetch) បានលើកឡើងថា អ្នកស៊ើបអង្កេតមិនបានរកឃើញភស្តុតាងណាមួយដែលបញ្ជាក់ពីការផ្ទុះសំបកកង់រថយន្តនោះទេ ពោលគឺផ្ទុយពីអ្វីដែលអ្នកបើកបររថយន្តក្រុងឈ្មោះ Saman Chanput អាយុ ៤៨ឆ្នាំ បានអះអាង ។
មិនតែប៉ុណ្ណោះ អាជ្ញាធរ ក៏បានរកឃើញធុងឧស្ម័ន (ហ្គាស) ប្រភេទ butb11 ចំនួន ១០ ធុង ដែលបានដំឡើងនៅក្នុងរថយន្តក្រុង ប៉ុន្តែឧស្ម័ន ៥ ធុងនៅក្នុងចំណោមនោះ មិនមានការអនុញ្ញាតនោះទេ(ដែលជាប្រកាបង្ហាញថាឡានឆេះដោយសារធ្លាយហ្គាស) ។សូមបញ្ជាក់ថានៅជាយក្រុងបាងកក មានគ្រោះថ្នាក់ផ្ទុះឆេះរថយន្តក្រុងដឹកសិស្សសាលាមួយគ្រឿង កាលពីថ្ងៃអង្គារទី ១តុលា។ នៅក្នុងចំណោមមនុស្ស៤៤នាក់នៅលើរថយន្តក្រុង មនុស្សចំនួន ១៩នាក់ត្រូវបានសង្គ្រោះ ចេញទាន់ពីអគ្គិភ័យ ចំណែក មនុស្ស២៥នាក់ ដែលនៅក្នុងនោះ កូនក្មេងសិស្សសាលាចំនួន ២២នាក់ និងគ្រូបង្រៀន ៣នាក់ បាត់ខ្លួន នៅក្នុងអណ្តាតភ្លើង។ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាតបានសរសេរក្នុងបណ្តាញសង្គម X ថា មានមនុស្សស្លាប់ច្រើននៅក្នុងគ្រោះថ្នាក់ឆេះរថយន្តក្រុងដឹកសិស្សសាលាថៃ នៅថ្ងៃអង្គារ នេះ។
សារព័ត៌មាន The Nation នៅថ្ងៃទី២ខែតុលានេះ នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រា បាននិយាយថា លោកស្រីបានណែនាំដល់រដ្ឋមន្ត្រីពាក់ព័ន្ធ ឱ្យចុះទៅពិនិត្យទីតាំងនៃអគ្គិភ័យឆេះរថយន្តក្រុងដឹកសិស្សសាលាដ៏សោកនាដកម្ម ដែលបានបណ្តាលឲ្យមនុស្សយ៉ាងហោចណាស់២៣នាក់ស្លាប់។រដ្ឋមន្ត្រីទាំងនោះរួមមានឧបនាយករដ្ឋមន្ត្រីពីររូប គឺរដ្ឋមន្ត្រីក្រសួងមហាផ្ទៃ Anutin Charnvirakul និងរដ្ឋមន្ត្រីក្រសួងដឹកជញ្ជូន Suriya Juangroongruangkit ក៏ដូចជាអនុរដ្ឋមន្ត្រីក្រសួងមហាផ្ទៃ Sabida Thaiset ដែលមកពី Uthai Thani ដែលជាខេត្តដូចគ្នាជាមួយសិស្សនៅលើឡានក្រុង។
ថ្លែងអំពីឧប្បត្តិហេតុនៅលើបណ្តាញសង្គម Instagram ផ្ទាល់ខ្លួនរបស់នាង អ្នកស្រី ផែថងថាន បាននិយាយថា៖«ខ្ញុំដឹងច្បាស់អំពីឧប្បត្តិហេតុភ្លើងឆេះរថយន្តក្រុងពីខេត្ត Uthai Thani ដែលដឹកសិស្សទៅបំពេញទស្សនកិច្ចទៅកាន់ទីក្រុងបាងកក ហើយបានជួបឧបទ្ទវហេតុនៅលើផ្លូវ Vibhavadi Rangsit បណ្តាលឲ្យមានអ្នកស្លាប់និងរបួស»។សាររបស់នាយករដ្ឋមន្ត្រីថៃបន្តថា៖«ក្នុងនាមជាម្តាយ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតចំពោះគ្រួសារអ្នករងរបួស និងបានស្លាប់»។តែនៅពេលអ្នកសារព័ត៌មានព្យាយាមសួរនាយករដ្ឋមន្ត្រីអំពីគំនិតរបស់លោកស្រីចំពោះស្ថានការណ៍នោះ នាយករដ្ឋមន្ត្រីមិនបានឆ្លើយតប ហើយដើរចេញពីប្រព័ន្ធផ្សព្វផ្សាយយ៉ាងលឿនដោយមិននិយាយអ្វីទាំងអស់។
រថយន្តក្រុងដឹកសិស្សបានចាកចេញពីខេត្ត អុថៃ ថានីនៅភាគខាងជើង រថយន្តក្រុងត្រូវដឹកគ្រូបង្រៀន៦នាក់ និងកូនសិស្ស៣៨នាក់ ដែលមានអាយុចាប់ពីសាលាមត្តេយ្យរហូតដល់ក្មេងអាយុ១៤ឆ្នាំ។ ប៉ុន្តែ ធ្វើដំណើរមកដល់ជាយក្រុងបាងកក កង់របស់រថយន្តក្រុងផ្ទុះ ធ្វើឲ្យអ្នកបើករេចង្កូតទៅបុកពំនុះទ្រូងផ្លូវ។ រថយន្តក្រុងដែលប្រើហ្គាស ក៏ផ្ទុះឆាបឆេះឡើង។នេះបើតាមការអះអាងរបស់អ្នកបើកបរ។
ក្រុមពន្លត់ភ្លើងបាននិយាយថា ក្រោយភ្លើងរលត់ គេត្រូវរង់ចាំជាច្រើនម៉ោងមុននឹងអាចឡើងទៅរកសាកសពក្មេងនៅក្នុងខ្មោចរថយន្តដែលនៅសល់តែគ្រោងដែក។ បើតាមប្រធានក្រុមជួយសង្គ្រោះ លោកPiyalak Thinkaew គេប្រទះឃើញសាកសពរបស់ក្មេងនៅផ្នែកខាងក្រោយរបស់រថយន្តក្រុង ព្រោះថា ញាណរបស់ក្មេងនៅពេលឃើញភ្លើងឆេះ គឺរត់ប្រមូលផ្តុំគ្នានៅតែផ្នែកខាងក្រោយ។ សាកសពក្មេងភាគច្រើនដែលតូចៗ និងឆេះរួញខ្មៅ ដែលជាហេតុធ្វើឲ្យគេមិនអាចឲ្យគេកំណត់បានអត្តសញ្ញាណភ្លាមៗ។ចំណែក កុមារដែលរួចខ្លួនពីភ្លើងឆេះ មួយចំនួន ឆេះមុខឆេះមាត់។ នេះបើតាមការចុះផ្សាយរបស់កាសែតថៃ ដែលបានដកស្រង់សំដីរបស់គ្រូពេទ្យ។
គួរជម្រាបជូនថា ប្រទេសថៃជាប់ចំណាត់ថ្នាក់មិនល្អសោះ នៅក្នុងពិភពលោក។ រថយន្តដែលគ្មានសុវត្ថិភាព និងការបើកបរដ៏អាក្រក់អាក្រីបានធ្វើឲ្យថៃមានចំនួនមនុស្សស្លាប់ក្នុងគ្រោះថ្នាក់ចរាចរណ៍ ប្រមាណ ២ម៉ឺននាក់ក្នុងមួយឆ្នាំៗ ពោលគឺ ៥០នាក់ក្នុងមួយថ្ងៃ។ នេះបើតាមតួលេខរបស់អង្គការសុខភាពពិភពលោក។ មនុស្សស្លាប់ និង មនុស្សរបួសក្នុងគ្រោះថ្នាក់ចរាចរណ៍បានធ្វើឲ្យទំហំខាតបង់សេដ្ឋកិច្ច មានប្រមាណ ១៥,៥ពាន់លានដុល្លារ នៅឆ្នាំ ២០២២។
តៃកុងឡានឈ្មោះ Samarn Chankut អាយុ៤៨ឆ្នាំ ត្រូវបានប៉ូលិស ចោទប្រកាន់ចំនួន៤ករណី ដូចជាបើកបរមិនប្រយ័ត្នបណ្តាលឲ្យមនុស្សស្លាប់ (ប្រឈមជាប់ពន្ធនាគារអតិបរមា១០ឆ្នាំ និង/ឬពិន័យជាប្រាក់២០ម៉ឺនបាត), បើកបរមិនប្រុងប្រយ័ត្នបង្កគ្រោះថ្នាក់ដល់អ្នកដទៃនិងទ្រព្យសម្បត្តិ (ផាកពិន័យពី ៤០០ ទៅ ១០០០ បាត), បង្ករបួសស្នាមដល់អ្នកដទៃនិងមិនជួយជនរងគ្រោះ (ប្រឈមជាប់ពន្ធនាគារពីមួយខែទៅបីខែ និង/ឬពិន័យជាប្រាក់ ២ ០០០បាត) និងបណ្តាលឲ្យរបួសធ្ងន់ធ្ងរនិងស្លាប់ (ប្រឈមជាប់ពន្ធនាគារអតិបរមា៣ខែ និង/ឬពិន័យជាប្រាក់ ២ ០០០បាត)។មានសេចក្តីរាយការណ៍ថាក្រោយឧបទ្ទវហេតុឆេះឡានក្រុងដឹកសិ្សនេះអាជ្ញាថៃបានចេញការហាមមិនឲ្យឡានក្រុងបន្តធ្វើសកម្មភាពដឹកសិស្សចុះធ្វកម្មសិក្សាបន្តទៀត។
