សម្តេចតេជោមិនចង់ឃើញប្រទេសប្រជាធិបតេយ្យ ប្រព្រឹត្តនូវកំហុសជាលើកទី៣!
21-September-2026 / ផ្សេងៗ
ប៊ែលហ្ស៊ិក៖នៅថ្ងៃទី១៨ ខែតុលា ឆ្នាំ២០១៨នេះ ក្នុងឱកាសដែលអនុញ្ញាតឲ្យ លោក ម៉ាទីន ហេយ (Martin Hayes) អនុប្រធានក្រុមប្រឹក្សាធុរកិច្ចអាស៊ាន-សហភាពអឺរ៉ុប និងជាប្រធានក្រុមហ៊ុនបុសស៍ (Bosch) ប្រចាំអាស៊ីអាគ្នេយ៍ ចូលជួបសំដែងការគួរសម សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសង្កត់ធ្ងន់ពាក់ព័ន្ធបញ្ហាការចង់ដកនូវប្រព័ន្ធអនុគ្រោះពាណិជ្ជកម្ម (EBA) ពីកម្ពុជា ដោយសម្តេចបញ្ជាក់យ៉ាងច្បាស់ថា ប្រសិនអឺរ៉ុបដក EBA ក្លាយជាការពិតមែននោះ អឺរ៉ុបនឹងក្លាយជាប្រទេសប្រជាធិបតេយ្យ ដែលប្រព្រឹត្តកំហុសចំពោះកម្ពុជាជាលើកទី៣។
«សម្តេចមិនចង់ឃើញប្រទេសប្រជាធិបតេយ្យ ដែលប្រព្រឹត្តនូវកំហុសជាលើកទី៣ ពោលគឺកំហុសលើកទី១ ប្រទេសប្រជាធិបតេយ្យនៅអឺរ៉ុប បានគាំទ្រនូវរដ្ឋប្រហារយោធាក្នុងប្រទេសកម្ពុជា កាលពីទសវត្ស៧០ កំហុសទី២ គាំទ្រដល់របបខ្មែរក្រហមជាង១ទសវត្ស ពិសេសគាំទ្រខ្មែរ ក្រហមនៅអង្គការសហប្រជាជាតិ និងកំហុសទី៣ បើទោះបីជាស្ថិតក្នុងដំណាក់កាលពិភាក្សាលើសេចក្តីថ្លែងការណ៍ ឬក្លាយទៅជាការពិតនោះ វានឹងក្លាយទៅជាកំហុសទី៣ របស់ប្រទេសប្រជាធិបតេយ្យ នៅសហភាពអឺរ៉ុបសម្រាប់កម្ពុជា»។
សម្តេចតេជោប្រមុខរាជរដ្ឋាភិបាល បានលើកឡើងទៀតថា កន្លងមកមានប្រទេសមួយចំនួន ក្នុងសហភាពអឺរ៉ុប ដែលបានធ្វើការគំរាមដល់កម្ពុជា និងសហភាពមីយ៉ាន់ម៉ា ក្នុងការដកនូវប្រព័ន្ធអនុគ្រោះពាណិជ្ជកម្ម (EBA)។ សម្តេចតេជោបន្តដែរថា កន្លងមក EU បានជួយដល់កម្ពុជា លើគ្រប់វិស័យទាំងអស់ ប្រសិនជា EU សំរេចដកនូវ EBA គឺហាក់បីដូចជា EU បោះបង់ចោលនូវអ្វីដែលខ្លួនបានធ្វើកាលពីពេលកន្លងមក។
សូមបញ្ជាក់ថានៅព្រឹកថ្ងៃទី១៧ ខែតុលា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញមកដល់សណ្ឋាគារស្នាក់នៅក្នុងទីក្រុងប្រ៊ូសែល (Brussels) ប្រទេសប៊ែលហ្ស៊ិក (Belgium) ដើម្បីទៅចូលរួម«កិច្ចប្រជុំកំពូលអាស៊ី-អឺរ៉ុប (ASEM) លើកទី ១២» ដែលនឹងប្រព្រឹត្តទៅនៅថ្ងៃទី១៨-១៩ ខែតុលា ឆ្នាំ២០១៨ នៅទីក្រុងប្រ៊ុចសែល ប្រទេសប៊ែលហ្ស៊ិក និង កិច្ចប្រជុំកំពូលអ្នកដឹកនាំវិនិយោគសាកល នៃវេទិកាវិនិយោគពិភពលោកឆ្នាំ២០១៨ របស់សន្និសីទសហប្រជាជាតិ ស្ដីពីពាណិជ្ជកម្ម និងការអភិវឌ្ឍន៍ ដែលនឹងប្រព្រឹត្តទៅចាប់ពីថ្ងៃទី២២ ដល់ ២៤ តុលា ២០១៨។
នៅទៅនោះមានបងប្អូនប្រជាពលរដ្ឋ និងកូនក្មួយយុវជនជាច្រើនបានមករង់ចាំទទួលគារវៈស្វាគមន៍ ប្រកបដោយក្តីគោរពស្រឡាញ់ និងនឹករឮកដ៏ជ្រាលជ្រៅបំផុត។ បងប្អូនប្រជាពលរដ្ឋនៅទីនោះបាននិយាយថា ពួកគាត់មិនហត់នឿយឡើយទោះបីត្រូវធ្វើដំណើរមកពីតំបន់ឆ្ងាយៗ ប៉ុន្តែផ្ទុយទៅវិញពួកគាត់សប្បាយរីករាយក្រៃលែងដែលបានមករង់ចាំទទួលសម្តេចតេជោ ហើយនេះគឺជាកិត្តិយសដ៏ឧត្តុង្គឧត្តមបំផុតរបស់ប្រទេសកម្ពុជាក្រោមការដឹកនាំដ៏ត្រឹមត្រូវរបស់ សម្តេចដែលបានធ្វើអោយកម្ពុជាមានស្ថេរភាព និងរីកចម្រើនមកទល់សព្វថ្ងៃ.។
កិច្ចប្រជុំកំពូលអាស៊ី-អឺរ៉ុប (ASEM) លើកទី ១២ នឹងប្រព្រឹត្តទៅក្រោមមូលបទ «អឺរ៉ុប និងអាស៊ី៖ ដៃគូសកលសម្រាប់បញ្ហាប្រឈមសកល» មានគោលបំណងពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ី និងអឺរ៉ុប ខណៈពេលដែលតំបន់ទាំងពីរជំរុញកសាងកម្លាំងរួមគ្នា ដើម្បីដោះស្រាយបញ្ហាជាច្រើន ចាប់ពីការបង្កើនពាណិជ្ជកម្ម និងវិនិយោគ ការតភ្ជាប់ ការអភិវឌ្ឍប្រកបដោយចីរភាព និងបំរែបំរួលអាកាសធាតុ ជាដើម។
ក្នុងសម័យប្រជុំពេញអង្គដែលមានមូលបទរង «ពង្រឹងប្រព័ន្ធពហុនិយម៖ ជំរុញភាពជាដៃគូអាស៊ី-អឺរ៉ុបអំពីការប្រឈមសកល» សម្តេចតេជោនាយករដ្ឋមន្ត្រី នឹងថ្លែងបទអន្តរាគមន៍ដោយផ្តោតទៅលើប្រធានបទ៖ «របៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាព និងបរិយាប័ន្ន»។
ក្នុងអំឡុងពេលស្នាក់នៅប្រទេសបែលហ្ស៊ិក និងប្រទេសស្វីស សម្តេចតេជោនាយករដ្ឋមន្ត្រី នឹងមានជំនួបទ្វេភាគីដាច់ដោយឡែកពីគ្នាជាមួយមេដឹកនាំសំខាន់ៗជាច្រើនរូប និងថ្នាក់ដឹកនាំគណៈប្រតិភូដទៃទៀត។ ក្នុងនោះសម្តេចតេជោនាយករដ្ឋមន្ត្រី ក៏នឹងជួបសំណេះសំណាលជាមួយសមាជិកសហគមន៍ខ្មែរ និងសិស្ស និស្សិតខ្មែរផងដែរ។
