ទូតអាមេរិករង្គៀសចិត្តរឿងកឹមសុខាតែអយ្យការតុលាការថាគេអត់ចោទអាមេរិកផង!
ភ្នំពេញ៖ អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានចេញសេចក្តីប្រកាសពត៍មានមួយថា តំណាងអយ្យការមិនបានចោទប្រកាន់សហរដ្ឋអាមេរិក រដ្ឋបរទេស ឬភ្នាក់ងាររដ្ឋបរទេសណាមួយនោះឡើយក្នុងសំណុំរឿងលោក កឹម សុខា ។ នេះបើតាមសេចក្តីប្រកាសរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញ។
«ក្នុងដំណើរការនៃការជំនុំជម្រះក្តី លើសំណុំរឿងពាក់ព័ន្ធនឹង ជនជាប់ចោទ ឈ្មោះ កឹម សុខា ពីបទសន្ទិដ្ឋិភាព ជាមួយបរទេស តាមបញ្ញត្តិមាត្រា ៤៤៣ ក្រមព្រហ្មទណ្ឌនៃព្រះរាជាណាចក្រកម្ពុជា គឺព្រះរាជអាជ្ញាពុំបានចោទប្រកាន់ប៉ះពាល់ទៅលើសហរដ្ឋអាមេរិក រដ្ឋបរទេស ឬភ្នាក់ងារបរទេសណាមួយនោះឡើយ ព្រះរាជអាជ្ញា បានចោទប្រកាន់ទៅលើ ជនជាប់ចោទឈ្មោះ កឹម សុខា ដែលមានអង្គហេតុ អង្គច្បាប់ ព្រមទាំងមានធាតុផ្សំបទល្មើសគ្រប់គ្រាន់ទៅតាមច្បាប់ នៃព្រះរាជាណាចក្រកម្ពុជាតែប៉ុណ្ណោះ»។
ប្រតិកម្មតំណាងអយ្យការ បានធ្វើឡើងបន្ទាប់ពី លោក W. Patrick Muphy អគ្គរដ្ឋទូតសហរដ្ឋអាមេរិកប្រចាំនៅកម្ពុជា បានថ្លែងក្នុងសន្និសីទសារព័ត៌មានថា សហរដ្ឋអាមេរិក មានការរំខានចិត្តដោយខាងព្រះរាជអាជ្ញា បានលើកឡើងនូវរឿងមិនពិត ដែលត្រូវបានប្រឌិតឡើង ទាក់ទងនឹងសហរដ្ឋអាមេរិក»។
អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានបញ្ជាក់ថា នៅក្នុងដំណើរការជំនុំជម្រះ លើសំណុំរឿងក្តីនេះ គឺមានសាធារណជនជាតិ និងអន្តរជាតិជាច្រើន ចូលរួមស្ដាប់ និងសង្កេតការណ៍គ្រប់ពេលសវនាការ។
ឯកអគ្គរដ្ឋទូតសហរដ្ឋអាមេរិកគឺលោក W. Patrick Murphy បានទៅចូលរួមសង្កេតការណ៍ដោយផ្ទាល់ ក្នុងដំណើរការសវនការក្តីរបស់លោក កឹម សុខា អតីតប្រធានគណបក្សសង្គ្រោះជាតិ បន្ទាប់ពីដំណើរការសវនការអស់រយៈ៩សប្តាហ៍កន្លងមក គឺចាប់តាំងពីថ្ងៃទី ១៥ មករា ២០២០ ។ សវនាការថ្ងៃទី១១ និង ១២ ខែមីនា ឆ្នាំ២០២០នេះ គឺជាសវនាការលើកទី៧ បន្ទាប់ពីតុលាការបានរំលងពេលអស់ពីរសប្តាហ៍គឺ សប្តាហ៍ទី៦ និង សប្តាហ៍ទី៨ ដោយអះអាងថា ដើម្បីទុកពេលវេលាដល់ភាគីមេធាវីលោក កឹម សុខា បានសិក្សាលើឯកសារភស្តុតាងក្នុងសំណុំរឿង និងទុកសាលសវនការដើម្បីដំណើរការលើសំណុំរឿងផ្សេងៗទៀតផងដែរ ។
នៅខាងមុខសាលាដំបូងរាជធានីភ្នំពេញ បន្ទាប់ពីចេញពីបន្ទប់សវនាការនាព្រឹកនេះ លោកឯកអគ្គរដ្ឋទូតសហរដ្ឋអាមរិក W. Patrick Murphy ក៏បានធ្វើសន្និសីទកាសែតផងដែរ ។ចំណែកស្ថានទូតសហរដ្ឋអាមេរិកប្រចាំកម្ពុជា (U.S. Embassy Phnom Penh, Cambodia) បានចេញប្រកាសព័ត៌មានថា ថ្ងៃនេះ លោកឯកអគ្គរដ្ឋទូត W. Patrick Murphy មានវត្តមាននៅក្នុងសវនការកាត់ក្តីលោក កឹម សុខា ក្នុងនាមជាអ្នកសង្កេតការណ៍។ នេះគឺជាសេចក្តីថ្លែងរបស់លោកទៅកាន់អ្នកសារព័ត៌មាន នៅក្រៅតុលាការ៖ សហរដ្ឋអាមេរិកកំពុងតាមដានសវនការកាត់ក្តីលោក កឹម សុខាយ៉ាងដិតដល់។
ដំណើរការនេះអាចមានបច្ច័យទៅលើនិតិរដ្ឋ និងដំណើរការត្រឹមត្រូវតាមផ្លូវច្បាប់ នៅកម្ពុជា និងសម្រាប់ទំនាក់ទំនងអន្តរជាតិ របស់ប្រទេសកម្ពុជា។ លោក កឹម សុខាមានកេរ្តិ៍ឈ្មោះដែលលោកសមនឹងទទួលបាននៅទូទាំងពិភពលោក ថាជាអ្នកគាំទ្រសិទ្ធិ និងសេរីភាព។ យើងរីករាយនឹងឃើញថា សិទ្ធិនយោបាយរបស់លោកត្រូវបានគេប្រគល់ឲ្យលោកវិញ ហើយយើងសង្ឃឹមផងដែរថា ប្រជាជនកម្ពុជាទាំងអស់អាចចូលរួមក្នុងដំណើរការនយោបាយ។ បុគ្គលិកស្ថានទូតបានចូលរួមក្នុងគ្រប់ថ្ងៃនៃដំណើរការសវនការនេះ។
យើងមានការរំខានចិត្ត ដោយខាងព្រះរាជអាជ្ញាបានលើកឡើងនូវរឿងមិនពិត ដែលត្រូវបានប្រឌិតឡើង ទាក់ទងនឹងសហរដ្ឋអាមេរិក។ សហរដ្ឋអាមេរិកបានផ្តល់ជំនួយចំនួន ៣ ពាន់លានដុល្លារ ដល់ប្រទេសកម្ពុជា ក្នុងពេលប៉ុន្មានទសវត្សរ៍កន្លងទៅនេះ ដោយរួមទាំងជំនួយប្រកបដោយតម្លាភាព ដើម្បីពង្រឹងស្ថាប័ន និងគណបក្សនយោបាយ ស្របតាមរដ្ឋធម្មនុញ្ញរបស់ប្រទេសកម្ពុជា។
កម្មវិធីរបស់យើងគឺសម្រាប់គណបក្សនយោបាយទាំងអស់ ដោយរួមទាំងគណបក្សប្រជាជនកម្ពុជា ដែលកំពុងគ្រប់គ្រងប្រទេស និងស្ថាប័នជាច្រើនទៀតរបស់រដ្ឋាភិបាល។ រដ្ឋាភិបាលរបស់ខ្ញុំបានបញ្ជាក់ច្បាស់ហើយថា សហរដ្ឋអាមេរិកមិនដែលចង់ជ្រៀតជ្រែកក្នុងអភិបាលកិច្ចរបស់ប្រទេសកម្ពុជាទេ ។ យើងគោរពពេញលេញចំពោះឯករាជ្យភាព និងអធិបតេយ្យភាពរបស់ប្រទេសកម្ពុជា។ តែ យើងគាំទ្រសេរីភាពក្នុងការបញ្ចេញមតិ សង្គមស៊ីវិលដែលមានភាពសកម្ម និងការអត់ឱនដល់ទស្សនៈប្រឆាំង ជាផ្នែកសំខាន់ចាំបាច់មួយនៃគ្រប់លទ្ធិប្រជាធិបតេយ្យ៕
