សង្ឃឹមថារដ្ឋមន្ត្រីក្រសួងពត៍មានលោកនេត្រភក្ត្រានឹងបកស្រាយបញ្ហាយកពត៍មានពិតបន្ទាប់ពីទទួលបានដាវអាជ្ញាសឹកឲ្យធើស៊ីអ្នកកាសែត
ខេត្តសៀមរាប៖សម្តេចធិបតី ប្រកាសប្រគល់ដាវអាជ្ញាសឹកឱ្យរដ្ឋមន្ត្រីក្រសួងព័ត៌មានធើស៊ីអ្នកព័ត៌មានណាដែលផ្សាយព័ត៌មានមិនពិត តាមគាបគេស៊ី និងបំពុលសង្គម!?សង្ឃឹមថាលោករដ្ឋមន្ត្រីពត៍មាននឹងបកស្រាយថាធើម៉េចដើម្បីបានពត៍មានពិតមកផ្សាយជាមិនខាន!។ថ្លែងពីទឹកដីខេត្តសៀមរាប សម្តេចធិបតី ហ៊ុន ម៉ាណែត នាយករដ្ឋមន្ត្រីបាន ស្នើឱ្យរដ្ឋមន្ត្រីក្រសួងព័ត៌មាន ដកអាជ្ញាប័ណ្ណ និងដាក់ក្នុងបញ្ជីខ្មៅចំពោះអ្នកព័ត៌មានណាដែលផ្សាយព័ត៌មានមិនពិត តាមគាបគេស៊ី និងបំពុលសង្គម ដើម្បីកុំធ្វើឱ្យអ្នកព័ត៌មានបួនដប់នាក់នេះធ្វើឱ្យប៉ះពាល់ដល់អ្នកព័ត៌មានវិជ្ជាជីវៈ ។
ក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នៅព្រឹកថ្ងៃទី១៨ ខែកក្កដា ឆ្នាំ២០២៤ សម្ដេចធិបតី នាយករដ្ឋមន្ដ្រីបានជំរុញឱ្យឯកឧត្ដម នេត្រ ភក្ដ្រា រដ្ឋមន្ត្រីក្រសួងព័ត៌មាន ត្រូវពិនិត្យមើលបញ្ហាដោយកុំឱ្យអ្នកសារព័ត៌មានមួយចំនួនតូច ដែលកំពុងប្រព្រឹត្តិខុសវិជ្ជាជីវៈ និងក្រមសីលធម៌ ដើម្បីបង្កើតជាមុខរបរ និងតាមគៀបគេស៊ី មកបំផ្លាញដល់អ្នកសារព័ត៌មាន ដែលគេកំពុងគោរពវិជ្ជាជីវៈយ៉ាងត្រឹមត្រូវ ។
សម្ដេចធិបតី នាយករដ្ឋមន្ត្រីបានគូសបញ្ជាក់យ៉ាងដូច្នេះថា «ប្រសិនបើរកឃើញមានអ្នកសារព័ត៌មានទាំងអស់នេះត្រូវលុបអាជ្ញាប័ណ្ណចោល ដើម្បីកុំឱ្យមានបន្ដធ្វើសកម្មភាពទាំង នេះឱ្យខាងតែបាន ។ ប៉ុន្ដែអ្នកសារព័ត៌មានខ្លះដោយសារតែផ្សាយលឿនទើបផ្សាយខុស ហើយគាត់ផ្សាយកែតម្រូវ នោះមិនមែនជាបញ្ហានោះទេ ព្រោះគាត់ពុំមានចេតនា តែសារព័ត៌មានមួយចំនួនមានចេតនាផ្សាយខុស ផ្សាយបំភ្លៃ និងមានចេតនាបង្កើតបញ្ហា និងបំផ្លាញសង្គម នឹងប្រឈមមុខនឹងផ្លូវច្បាប់តែម្ដង» ។
សម្តេចធិបតីបានលើកឡើថា រាជរដ្ឋាភិបាលកំពុងតែទប់ស្កាត់ព័ត៌មានក្លែងក្លាយ ដែលកំពុងបង្កើតបញ្ហា និងវាយលុកយ៉ាងខ្លាំងបង្កផលប៉ះពាល់យ៉ាងធ្ងន់ធរដល់ប្រជាពលរដ្ឋ និងសង្គមជាតិ ។
ជាមួយគ្នានេះ មានបណ្ដាប្រទេសមួយចំនួននៅអ៊ឺរ៉ុប កាណាដា អាមេរិក ក៏កំពុងគិតអំពីបញ្ហាព័ត៌មានក្លែងក្លាយនេះផងដែរ ។ សម្ដេចធិបតីបានបញ្ជាក់ថា៖«រាជរដ្ឋាភិបាលគ្មានការបិទសិទ្ធិសេរីភាពក្នុងការបញ្ចេញមតិនោះទេ ប៉ុន្ដែត្រូវគោរពសិទ្ធិអ្នកដទៃ ដើម្បីទទួលបានព័ត៌មានពិតដោយមិនធ្វើ ដើម្បីចំណេញនយោបាយ និងធ្វើឱ្យសង្គមមានបញ្ហា ។ ខ្ញុំស្វាគមន៍ព័ត៌មានពិត ដើម្បីជួយស្ថាបនា និងចូលរួមអភិវឌ្ឍន៍សង្គមជាតិ» ។
ក្នុងឱកាសនោះ សម្ដេចធិបតី អំពាវនាវឱ្យអ្នកព័ត៌មានទាំងប្រកាន់ភ្ជាប់នូវក្រមសីលធម៌វិជ្ជាជីវៈឱ្យបានខ្ជាប់ខ្ជួន ដើម្បីលើកកម្ពស់សិទ្ធិសេរីភាពរបស់អ្នកសារព័ត៌មានឱ្យបានខ្លាំងក្លាបន្ថែមទៀត ។
សូមបញ្ជាក់ថា ព័ត៌មានក្លែងក្លាយ ឬ Fake News បានក្លាយជាប្រធានបទក្តៅមួយ និងមានការជជែកដេញដោលច្រើន នៅក្នុងចំណោមអ្នកជំនាញសារព័ត៌មានក៏ដូចជា ពលរដ្ឋទូទៅក្នុងពិភពលោក ។ សម្រាប់កម្ពុជាដែលជាប្រទេសកំពុងអភិវឌ្ឍន៍ ហើយព័ត៌មានក្លែងក្លាយត្រូវបានប្រើជាមធ្យោបាយមួយ ដើម្បីជះឥទ្ធិពលទៅលើផ្នត់គំនិត និងការសម្រេចចិត្តរបស់ពលរដ្ឋដែលមានការចាប់អារម្មណ៍ពីផ្នែកនយោបាយរហូតដល់ការទិញលក់ផលិតផលតូចតាច តាម បណ្តាញសង្គម ឬអ៊ីនធឺណិតជាដើម ។ រាល់ព័ត៌មានក្លែងក្លាយឃើញមានការចែករំលែកយ៉ាងច្រើនលើបណ្តាញសង្គម ដែលចំណុចនេះធ្វើឲ្យមានការយល់ច្រឡំកាន់តែខុស ។
គេមិនដឹងថាអ្នកកាសែតត្រូវធ្វើម៉េចដើម្បីបានពត៍មានពិតដើម្បីផ្សព្វផ្សាយនោះទេព្រោះលំហនៃការយកពត័មានក្នុងស្រុកខ្មែរនៅចង្អៀតនៅឡើយ។សង្ឃឹមថាលោកនេត្រភក្ត្រារដ្ឋមន្ត្រីក្រសួងពត័មានបកស្រាយរឿងនេះមុននឹងប្រើដាវអាជ្ញាសឹករបស់សម្តេចនាយករដ្ឋមន្ត្រី!ព្រោះថាវិជ្ជាជីវៈសារពត៍មានហើយតែការយកពត៍មានដ់ម្បីផ្ទៀងផ្ទាត់នៅលំបាក៕
